2 »Haꞌ txꞌotxꞌ maxhto cheyiloj, haꞌ ton txꞌotxꞌ yet ebꞌnaj filisteo, yebꞌ txꞌotxꞌ yet ebꞌnaj gesureo. 3 Chiꞌichiti txꞌotxꞌ bꞌey haꞌ Sihor, yinh yetkꞌulal bꞌay chiꞌahilo tzꞌayik yinh Egipto, masanta chiꞌapni yinh ismohonal Ecrón, yinh yetkꞌulal norte; haꞌ txꞌotxꞌ xin istxꞌotxꞌ ebꞌnaj cananeo. Haꞌ tuꞌ xin ay howanh ebꞌnaj yahawil ebꞌnaj filisteo, haꞌ ton ebꞌnaj yahawil konhobꞌ Gaza, konhobꞌ Asdod, konhobꞌ Ascalón, konhobꞌ Gat, yebꞌ konhobꞌ Ecrón. Aytopaxo txꞌotxꞌ yul ismajul ebꞌnaj aveo, 4 yinh yetkꞌulal sur; yebꞌpaxo sunil istxꞌotxꞌ ebꞌnaj cananeo, chiꞌichiti bꞌey konhobꞌ Mehara, ayko yul ismajul ebꞌnaj sidonio, masanta chiꞌapni bꞌey Afec, yinh ismohonal istxꞌotxꞌ ebꞌnaj amorreo. 5 Aytopaxo istxꞌotxꞌ ebꞌnaj giblita, yebꞌ sunil txꞌotxꞌ Líbano ayko yinh yetkꞌulal bꞌay chiꞌahilo tzꞌayik, chiꞌichiti bꞌey konhobꞌ Baal-gad, bꞌey yich witz Hermón, masanta bꞌay chonhokapno bꞌey Hamat.

6 »Chintanhtzekanilojan yinh sat ebꞌnaj Israel sunil anma ay bꞌey txꞌotxꞌ chewal txꞌotxꞌ, chiꞌichiti bꞌey Líbano, masanta bꞌey Misrefot-maim, yebꞌ sunil anma sidonio. Haxa hach xin chaxhok hapohoꞌkanh txꞌotxꞌ, kat hawaqꞌnikano ismajul ebꞌnaj Israel hakaꞌtikꞌa yu walnihan tawet. 7 Chapohkanh txꞌotxꞌ yinh bꞌalonhebꞌ majan ebꞌnaj Israel, yebꞌ yinh yiktaxa majan ebꞌnaj titna yinh yaꞌ Manasés,» xhi Komam tet yaꞌ Josué.

8 Wal ebꞌnaj Israel titna yinh yaꞌ Rubén, yebꞌ yinh yaꞌ Gad, yebꞌ yikta majan ebꞌnaj Manasés, ischakano ebꞌnaj ismajul tet yaꞌ Moisés, ischejabꞌ Komam Jahawil bꞌey isqꞌaxebꞌikꞌto haꞌ Jordán, yinh yetkꞌulal bꞌay chiꞌahilo tzꞌayik. 9 Yiqꞌ ebꞌnaj txꞌotxꞌ chiꞌichiko bꞌey konhobꞌ Aroer, ayayo istiꞌ haꞌ Arnón, yebꞌ konhobꞌ ayayo sata akꞌal, yebꞌ sunil yakꞌalil txꞌotxꞌ Medeba, masanta chiꞌapni bꞌey konhobꞌ Dibón. 10 Yinipaxilo ebꞌnaj sunil iskonhobꞌ naj Sehón, ay bꞌey Hesbón, isreyal anma amorreo, masanta chiꞌapni yinh ismohonal istxꞌotxꞌ ebꞌnaj amonita. 11 Yinipaxilo ebꞌnaj txꞌotxꞌ Galaad, yebꞌ istxꞌotxꞌ ebꞌnaj gesureo, yebꞌ istxꞌotxꞌ ebꞌnaj maacateo, yebꞌ sunil witz Hermón, yebꞌ sunil txꞌotxꞌ Basán, masanta chiꞌapni bꞌey konhobꞌ Salca. 12 Yebꞌ sunil txꞌotxꞌ ismajul naj Og, isreyal txꞌotxꞌ Basán, isreyal konhobꞌ Astarot yebꞌ konhobꞌ Edrei. Haꞌ naj Og tuꞌ islahobꞌal rey xol ebꞌnaj refaíta. Haꞌ ebꞌnaj tuꞌ qꞌoji yaꞌ Moisés yinh, yinilo yaꞌ ebꞌnaj sat istxꞌotxꞌ. 13 Yajaꞌ wal ebꞌnaj ah Gesur, yebꞌ ebꞌnaj ah Maaca, mach ilaxilo ebꞌnaj sat istxꞌotxꞌ, kankano ebꞌnaj xol ebꞌnaj Israel, masanto tinanh.

14 Wal ebꞌnaj Israel titna yinh yaꞌ Leví, mach istxꞌotxꞌ ebꞌnaj yaqꞌ yaꞌ Moisés, yuto yet ebꞌnaj ye yebꞌalqꞌabꞌe chihaltelax yinh xahanbꞌalil tet Komam Dios, Jahawil, isDiosal anma Israel, hakaꞌtikꞌa yu yalni Komam.^a

15 Yaqꞌni yaꞌ Moisés istxꞌotxꞌ ebꞌnaj titna yinh Rubén; hakaꞌtikꞌa isbꞌisil ebꞌnaj hak tuꞌ txꞌotxꞌ ischakanilo ebꞌnaj. 16 Haꞌ istxꞌotxꞌ ebꞌnaj tuꞌ chiꞌichiti bꞌey konhobꞌ Aroer, ayayo istiꞌ haꞌ Arnón, kat yekꞌ bꞌey konhobꞌ ayayo yiktabꞌal hokan yebꞌ yinh nimeta akꞌal masanta yinh txꞌotxꞌ Medeba, 17 masanta chiꞌapni txꞌotxꞌ bꞌey Hesbón, yebꞌ bꞌey sunil konhobꞌ ayayo yul nimeta akꞌal tuꞌ, haꞌ ton konhobꞌ Dibón, konhobꞌ Bamot-baal, konhobꞌ Bet-baal-meón; 18 yebꞌ konhobꞌ Jahaza, konhobꞌ Cademot, konhobꞌ Mefaat, 19 yebꞌ konhobꞌ Quiriataim, konhobꞌ Sibma, konhobꞌ Zaret-sahar, ayko yinh iswonhanil akꞌal tuꞌ, 20 yebꞌ konhobꞌ Bet-peor, konhobꞌ Bet-jesimot, yebꞌ istzalanil witz Pisga, 21 haꞌ ton konhobꞌ ayayo yul akꞌal, yebꞌ sunil txꞌotxꞌ ismajul naj Sehón, isreyal anma amorreo, ay bꞌey Hesbón. Haꞌ naj rey Sehón tuꞌ, qꞌoji yaꞌ Moisés yinh naj, yebꞌ yinh ebꞌnaj yahawil ay bꞌey Madián, ayikto yalanh yip naj Sehón, haꞌ ton naj Evi, naj Requem, naj Sur, naj Hur, yebꞌ naj Reba. 22 Ispotxꞌnipaxo ebꞌnaj Israel naj Balaam, naj ahbꞌelom, iskꞌahol naj Beor, txꞌiꞌal hunteqꞌanxa ebꞌnaj potxꞌlaxpaxo yinta naj. 23 Ebꞌnaj Israel titna yinh yaꞌ Rubén tuꞌ, istxꞌotxꞌ ebꞌnaj chꞌapni yinh istiꞌ haꞌ Jordán. Hakaꞌtikꞌa isbꞌisil ebꞌnaj hak tuꞌ istxꞌotxꞌ ebꞌnaj aqꞌlaxi yebꞌ hunteqꞌan konhobꞌ yebꞌ ej yaldeahil.

24 Yaqꞌnipaxo yaꞌ Moisés istxꞌotxꞌ ebꞌnaj Israel titna yinh yaꞌ Gad, hakaꞌtikꞌa isbꞌisil ebꞌnaj tuꞌ, hak tuꞌ istxꞌotxꞌ ebꞌnaj ischah. 25 Yok ebꞌnaj yahawo txꞌotxꞌ Jazer, yebꞌ sunil konhobꞌ ayayo sat txꞌotxꞌ Galaad, yebꞌ yikta istxꞌotxꞌ ebꞌnaj amonita, masanta chiꞌapni bꞌey konhobꞌ Aroer, satakꞌti konhobꞌ Rabá. 26 Ischahnilo ebꞌnaj txꞌotxꞌ ayayo xolbꞌal Hesbón yebꞌ Ramat-mizpa yebꞌ Betonim, yebꞌ txꞌotxꞌ ayayo xolbꞌal Mahanaim, chiꞌapni sat mohon Debir. 27 Ischahnilo ebꞌnaj txꞌotxꞌ akꞌal, bꞌay ayayo Bet-aram, Bet-nimra, Sucot, yebꞌ Zafón, yuto haxanhe txꞌotxꞌ tuꞌ istxꞌotxꞌ naj Sehón, isreyal Hesbón aykanoj. Yuxin haꞌ istxꞌotxꞌ ebꞌnaj Gad ischah, chiꞌichiti txꞌotxꞌ yinh haꞌ Jordán yinh yetkꞌulal bꞌay chiꞌahilo tzꞌayik masanta chiꞌapni txꞌotxꞌ yinh haꞌ Cineret yinh yetkꞌulal sur. 28 Haꞌ hunteqꞌan konhobꞌ yebꞌ yaldeahil tuꞌ, okkano yu ebꞌnaj Gad. Hakaꞌtikꞌa xin isbꞌisil ebꞌnaj tuꞌ, hak tuꞌ istxꞌotxꞌ ebꞌnaj ischah.

29 Yaqꞌnipaxkano yaꞌ Moisés istxꞌotxꞌ yikta majan ebꞌnaj Israel titna yinh yaꞌ Manasés. Hakaꞌtikꞌa isbꞌisil ebꞌnaj tuꞌ, hak tuꞌ istxꞌotxꞌ ebꞌnaj aqꞌlaxi. 30 Ebꞌnaj tuꞌ, yiqꞌ ebꞌnaj sunil istxꞌotxꞌ naj Og, isreyal Basán, chal yelapnoj sunil txꞌotxꞌ Basán; chiꞌichiti bꞌey Mahanaim, yebꞌ 60 konhobꞌ ay yul ismajul Jair, 31 masanta yiktabꞌal txꞌotxꞌ Galaad, kat yapnikano bꞌey konhobꞌ Astarot, yebꞌ konhobꞌ Edrei, iskonhobꞌ naj rey Og. Haꞌ sunil tuꞌ, ischah anma Israel titna yinh naj Maquir, iskꞌahol yaꞌ Manasés. Hakaꞌtikꞌa xin isbꞌisil ebꞌnaj tuꞌ, hak tuꞌ txꞌotxꞌ ischah ebꞌnaj.

32 Haꞌ txꞌotxꞌ tuꞌ, yaqꞌkano yaꞌ Moisés tet ebꞌnaj bꞌey yakꞌalil txꞌotxꞌ Moab, ayayo isqꞌaxebꞌikꞌto haꞌ Jordán, satakꞌti konhobꞌ Jericó. 33 Yajaꞌ wal ebꞌnaj Israel titna yinh yaꞌ Leví, mach istxꞌotxꞌ ebꞌnaj aqꞌlax ismajuloj, yuto hal-lax tet ebꞌnaj tato haꞌ Komam Dios Jahawil, isDiosal anma Israel, haꞌ ismajul ebꞌnaj.