2 Qꞌoji ebꞌnaj Israel tuꞌ yinh naj rey Sehón, ay bꞌey konhobꞌ Hesbón, isreyal anma amorreo. Haꞌ xin txꞌotxꞌ ismajul naj tuꞌ, chiꞌichito txꞌotxꞌ bꞌey konhobꞌ Aroer, istiꞌ haꞌ Arnón masanta chiꞌapni yiktabꞌal hokan istiꞌ haꞌ Jaboc, bꞌay chiꞌichiko istxꞌotxꞌ ebꞌnaj amonita, yiktabꞌal txꞌotxꞌ Galaad. 3 Yebꞌpaxo txꞌotxꞌ istiꞌ haꞌ Jordán yinh yetkꞌulal bꞌay chito tzꞌayik, chiꞌichito txꞌotxꞌ yinh haꞌ Cineret, masanta bꞌey haꞌ Mar Kꞌachiꞌ, yinh istoholal Bet-jesimot, masanta yinh yetkꞌulal sur, yich witz Pisga.^a

4 Isqꞌojipaxo ebꞌnaj Israel tuꞌ yinh naj Og, isreyal txꞌotxꞌ Basán, haꞌ xin naj islahobꞌal rey yinh ebꞌnaj refaíta, ekꞌlena bꞌey konhobꞌ Astarot yebꞌ bꞌey konhobꞌ Edrei. 5 Haꞌ xin ismajul naj chiꞌichito txꞌotxꞌ bꞌey witz Hermón yebꞌ Salca, kat isto txꞌotxꞌ sunil yul ismajul txꞌotxꞌ Basán, masanta chiꞌapni txꞌotxꞌ yinh ismohonal txꞌotxꞌ Gesur yebꞌ Maaca, masanta bꞌey yiktabꞌanil txꞌotxꞌ Galaad, ayko yul ismajul naj rey Sehón, ay bꞌey konhobꞌ Hesbón.

6 Qꞌoji yaꞌ Moisés, ischejabꞌ Komam Dios yebꞌ ebꞌnaj Israel yinh ebꞌnaj rey tuꞌ, yaqꞌnikano yaꞌ Moisés istxꞌotxꞌ ebꞌnaj tuꞌ tet ebꞌnaj Israel titna yinh yaꞌ Rubén, yebꞌ ebꞌnaj titna yinh yaꞌ Gad, yebꞌ tet yikta majan ebꞌnaj titna yinh yaꞌ Manasés.

7 Haꞌ ton hunteqꞌan ebꞌnaj rey tiꞌ aykꞌay yu yaꞌ Josué yebꞌ yu ebꞌnaj Israel, isqꞌaxebꞌikꞌti haꞌ Jordán, yinh yetkꞌulal bꞌay chito tzꞌayik. Chiꞌichiti bꞌey Baal-gad yakꞌalil Líbano, masanta yich witz Halac, chiꞌahapno bꞌey Seir. Ispohnikanh yaꞌ Josué istxꞌotxꞌ ebꞌnaj rey tuꞌ yinh hunun majan ebꞌnaj Israel, yokkano txꞌotxꞌ yu ebꞌnaj yinh hunelnhe. 8 Haꞌ ton txꞌotxꞌ chewal txꞌotxꞌ, yebꞌ ej txꞌotxꞌ akꞌal, yebꞌ txꞌotxꞌ ayayo istiꞌ haꞌ Jordán, yebꞌ txꞌotxꞌ ayko yinh qꞌehan, yebꞌ txꞌotxꞌ ayko yul ismajul txꞌotxꞌ desierto, yebꞌ txꞌotxꞌ Neguev. Hunteqꞌan txꞌotxꞌ tuꞌ, yettikꞌa ebꞌnaj hitita yebꞌ ebꞌnaj amorreo, yebꞌ ebꞌnaj cananeo, yebꞌ ebꞌnaj ferezeo, yebꞌ ebꞌnaj heveo, yebꞌ ebꞌnaj jebuseo ye txꞌotxꞌ.

9 Haꞌ ebꞌnaj rey bꞌay qꞌoji ebꞌnaj Israel tuꞌ, haꞌ ton ebꞌnaj tiꞌ: naj isreyal konhobꞌ Jericó, yebꞌ naj isreyal konhobꞌ Hai, ayko iskawilal Bet-el, 10 naj isreyal Jerusalén, naj isreyal konhobꞌ Hebrón, 11 naj isreyal konhobꞌ Jarmut, naj isreyal konhobꞌ Laquis, 12 naj isreyal konhobꞌ Eglón, naj isreyal konhobꞌ Gezer, 13 naj isreyal konhobꞌ Debir, naj isreyal konhobꞌ Geder, 14 naj isreyal konhobꞌ Horma, naj isreyal konhobꞌ Arad, 15 naj isreyal konhobꞌ Libna, naj isreyal konhobꞌ Adulam, 16 naj isreyal konhobꞌ Maceda, naj isreyal konhobꞌ Bet-el, 17 naj isreyal konhobꞌ Tapúa, naj isreyal konhobꞌ Hefer, 18 naj isreyal konhobꞌ Afec, naj isreyal konhobꞌ Sarón, 19 naj isreyal konhobꞌ Madón, naj isreyal konhobꞌ Hazor, 20 naj isreyal konhobꞌ Simron-merón, naj isreyal konhobꞌ Acsaf, 21 naj isreyal konhobꞌ Taanac, naj isreyal konhobꞌ Meguido, 22 naj isreyal konhobꞌ Cedes, naj isreyal konhobꞌ Jocneam, ay bꞌey Carmelo, 23 naj isreyal konhobꞌ Dor, ayko yul ismajul txꞌotxꞌ Dor, naj isreyal konhobꞌ Goim ay yul ismajul Gilgal, 24 yebꞌ naj isreyal konhobꞌ Tirsa. Yinh sunil, 31 (hunlahonhebꞌ iskawinaj) ebꞌnaj isreyal hunteqꞌan konhobꞌ tiꞌ.