Qꞌoji yaꞌ Josué yinh naj rey Jabín yebꞌ yinh hunteqꞌanxa ebꞌnaj
11
Hayet yabꞌenilo naj rey Jabín, isreyal konhobꞌ Hazor sunil tuꞌ, ischejnito naj ischejabꞌ tet naj rey Jobab, isreyal konhobꞌ Madón, yebꞌ tet ebꞌnaj isreyal Simrón yebꞌ Acsaf, yunhe iskutxbꞌaniko isbꞌa ebꞌnaj isto yinh howal, 2 yanipaxto naj ischejabꞌ tet ebꞌnaj isreyal konhobꞌ ay yul ismajul txꞌotxꞌ chewal txꞌotxꞌ, ayko yinh yetkꞌulal norte, yebꞌpaxo ebꞌnaj isreyal konhobꞌ ayayo satla akꞌal, yebꞌpaxo istiꞌ haꞌ Jordán, yetkꞌulal sur yalanh haꞌ lago Cineret, yebꞌ ebꞌnaj ay bꞌey sat akꞌal, iskawilal konhobꞌ Dor yetkꞌulal bꞌay chito tzꞌayik.a 3 Yebꞌ ebꞌnaj cananeo ay yinh yetkꞌulal bꞌay chiꞌahilo tzꞌayik, yebꞌ ebꞌnaj ayayo yetkꞌulal bꞌay chito tzꞌayik; yebꞌpaxo ebꞌnaj amorreo, yebꞌ ebꞌnaj hitita, yebꞌ ebꞌnaj ferezeo, yebꞌ ebꞌnaj jebuseo ay yinh chewal txꞌotxꞌ, yebꞌpaxo ebꞌnaj heveo ay yinh tzalan Hermón yul ismajul txꞌotxꞌ Mizpa. 4 Sunil ebꞌnaj rey tuꞌ, elti ebꞌnaj yebꞌ sunil issoldado, kaw xin txꞌiꞌalkano noꞌ cheh yebꞌ carruaje yet howal iqꞌbꞌil yu ebꞌnaj. Kaw tzetkꞌakano ebꞌnaj soldado tuꞌ, matxa chibꞌischa ebꞌnaj, lahanxa isbꞌisil ebꞌnaj hakaꞌ arena ay istiꞌ haꞌ mar. Kaw tzetkꞌapaxo ischeh ebꞌnaj iqꞌnhe carruaje yet howal. 5 Iskutxbꞌan isbꞌa sunil ebꞌnaj tuꞌ istiꞌ haꞌ lago Merom; iswatxꞌenkanh ebꞌnaj iscampamento yu yaniko ebꞌnaj howal yinh ebꞌnaj Israel.6 Yalni Komam Jahawil tet yaꞌ Josué: «Mach chaxhxiwi, yuto yet hekal hakaꞌ hora tiꞌ sunil ebꞌnaj tuꞌ chiꞌaykꞌay tesataj hex Israelex tiꞌ, kat iskamkaniloj. Yajaꞌ hex tiꞌ xin chemaqꞌilto yoj ischeh ebꞌnaj, kat henhusnikanto iscarruaje ebꞌnaj yet howal tuꞌ,» xhi Komam.
7 Isto yaꞌ Josué yebꞌ sunil ebꞌnaj soldado Israel istiꞌ haꞌ lago Merom, tona nahul ay ebꞌnaj ayko ishowal yinh yaꞌ Josué yet yapni lemna ebꞌnaj Israel yinh ebꞌnaj. 8 Yaniko Komam Jahawil ebꞌnaj yul isqꞌabꞌ ebꞌnaj Israel, yaykꞌay ebꞌnaj yu ebꞌnaj yulaj bꞌeh, masanto apni ebꞌnaj bꞌey niman konhobꞌ Sidón, yebꞌ konhobꞌ Misrefot-maim, yebꞌ bꞌey akꞌal Mizpa ayko yinh yetkꞌulal bꞌay chito tzꞌayik. Sunil ebꞌnaj ispotxꞌkamo ebꞌnaj Israel tuꞌ, matxa xin hunu ebꞌnaj kolchakanoj. 9 Wal yaꞌ Josué kaw isyije yaꞌ tzet yal Komam Jahawil. Ismaqꞌilto yaꞌ yoj ischeh ebꞌnaj, isnhusnito yaꞌ iscarruaje ebꞌnaj yet howal.
10 Lahwi tuꞌ ismeltzo yaꞌ Josué yebꞌ ebꞌnaj Israel, yok ebꞌnaj yul konhobꞌ Hazor bꞌay iskutxbꞌa isbꞌa sunil ebꞌnaj aniko howal yinh ebꞌnaj Israel tuꞌ. Ispotxꞌnikamo yaꞌ Josué isreyal konhobꞌ tuꞌ. 11 Ispotxꞌnipaxokamo sunil anma ay yul konhobꞌ tuꞌ, istanhtzenkanilo ebꞌnaj sunil tzet ay bꞌey tuꞌ, isnhusnikanto ebꞌnaj konhobꞌ.
12 Hakaꞌtikꞌa yu ebꞌnaj Israel yinh konhobꞌ Hazor, hak tuꞌ yu ebꞌnaj yinh hunteqꞌanxa iskonhobꞌ ebꞌnaj rey iskutxbꞌa isbꞌa yu yaniko howal yinh ebꞌnaj Israel. Ok ebꞌnaj Israel yul iskonhobꞌ ebꞌnaj tuꞌ, ispotxꞌnikamo ebꞌnaj isreyal konhobꞌ, istanhtzenkanilo ebꞌnaj sunil hunteqꞌan konhobꞌ tuꞌ hakaꞌtikꞌa yu yalnikano yaꞌ Moisés, ischejabꞌ Komam Dios yet yalanhtokanoj. 13 Yajaꞌ wal hunteqꞌan konhobꞌ ayko yinhla iswiꞌ wonhan, mach isnhusilo ebꞌnaj, kachannhe konhobꞌ Hazor wal tuꞌ isnhusilo yaꞌ Josué tuꞌ. 14 Ispotxꞌnikamo ebꞌnaj sunil anma ay yul hunteqꞌan konhobꞌ tuꞌ yu yespada, machi xin hunu mak itzitz yakano ebꞌnaj. Yokkano isnoqꞌ anma tuꞌ yu ebꞌnaj yebꞌ tzetaj ay yul hunteqꞌan konhobꞌ tuꞌ. 15 Yaqꞌkano Komam Dios chejbꞌanile tet yaꞌ Moisés ischejabꞌ, haxa xin yaꞌ Moisés tuꞌ aqꞌnikano chejbꞌanile tuꞌ tet yaꞌ Josué, isyijen yaꞌ sunil chejbꞌanile tuꞌ, machi hunu tiꞌ mach isyije yaꞌ.
Yaꞌ Josué okkano yaꞌ yahawilo yinh sunil txꞌo txꞌotxꞌ
16 Yinikanikꞌo yaꞌ Josué sunil hunteqꞌan txꞌo txꞌotxꞌ tuꞌ, haꞌ ton txꞌotxꞌ chewal txꞌotxꞌ, yebꞌ ismajul Neguev, yebꞌ sunil txꞌotxꞌ Gosén, yebꞌ sunil akꞌal, txꞌotxꞌ Arabá, yebꞌ sunil txꞌotxꞌ chewal txꞌotxꞌ ayxatikꞌa yul isqꞌabꞌ ebꞌnaj Israel yebꞌ yakꞌalil. 17 Haꞌ ton txꞌotxꞌ chiꞌichiti bꞌey witz Halac, kat isto bꞌey txꞌotxꞌ Seir, masanta bꞌey Baal-gad ayayo yul yakꞌalil txꞌotxꞌ Líbano, yebꞌ yich witz Hermón. Istzabꞌnayo yaꞌ Josué sunil ebꞌnaj isreyal hunteqꞌan konhobꞌ tuꞌ, ispotxꞌnikamo yaꞌ ebꞌnaj. 18 Kaw xin txꞌiꞌal ej tzꞌayik yaqꞌle howal yaꞌ Josué yebꞌ ebꞌnaj rey tuꞌ. 19 Hanhe xin ebꞌnaj heveo ay bꞌey konhobꞌ Gabaón istꞌinhbꞌakano istzotiꞌ yebꞌ ebꞌnaj Israel, wal sunil hunteqꞌanxa konhobꞌ xin, istanhtzekanilo ebꞌnaj Israel yet yaniko ebꞌnaj howal yinh. 20 Yuto yaqꞌ kawbꞌolo Komam Dios, Jahawil yanma ebꞌnaj, yaniko ebꞌnaj howal yinh ebꞌnaj Israel, yunhe istanhtzelaxkanilo ebꞌnaj yu ebꞌnaj Israel tuꞌ. Mach xin tzꞌay iskꞌul ebꞌnaj istanhtzenkanilo ebꞌnaj, hakaꞌtikꞌa yu yalnikano Komam tet yaꞌ Moisés.b
21 Yinh hunteqꞌan tzꞌayik tuꞌ, qꞌoji yaꞌ Josué yinh sunil iskonhobꞌ ebꞌnaj anaceo, istanhtzenkanilo yaꞌ yinh hunelnhe; haꞌ ton konhobꞌ ay bꞌey chewal txꞌotxꞌ; konhobꞌ Hebrón, yebꞌ konhobꞌ Debir, yebꞌ konhobꞌ Anab, yebꞌ txꞌotxꞌ chewal txꞌotxꞌ ismajul Judá, yebꞌ yul ismajul Israel. 22 Hak tuꞌ xin, matxa hunu ebꞌnaj winaj kaw nimej istel, titna yinh naj Anac kankano yul ismajul ebꞌnaj Israel, kachannhe bꞌey konhobꞌ Gaza, yebꞌ bꞌey konhobꞌ Gat, yebꞌ bꞌey konhobꞌ Asdod, kantokano yikꞌal naj Anac.
23 Hak tuꞌ yu yinikanikꞌo yaꞌ Josué sunil txꞌo txꞌotxꞌ tuꞌ, hakaꞌtikꞌa yu yalnikano Komam tet yaꞌ Moisés. Lahwi tuꞌ, ispohnikanh yaꞌ Josué sunil txꞌo txꞌotxꞌ tuꞌ yinh hunun majan ebꞌnaj Israel, yunhe yokkano txꞌotxꞌ yu ebꞌnaj yinh hunelnhe. Lahwi tuꞌ xin, yok aqꞌankꞌulal sat txꞌotxꞌ yu matxa howal.