Yet isqꞌoji ebꞌnaj Israel yinh ebꞌnaj amorreo
10
Hayet yabꞌenilo naj Adonisedec, isreyal konhobꞌ Jerusalén tato aykꞌay konhobꞌ Hai yul isqꞌabꞌ yaꞌ Josué, istanhtzenkanilo yaꞌ konhobꞌ tuꞌ, kaw xiwkanh naj, yuto lahan utelax konhobꞌ tuꞌ yebꞌ isreyal, hakaꞌ utelax konhobꞌ Jericó yebꞌ isreyal yu yaꞌ Josué. Kaw xiwpaxokanh naj yet yabꞌenpaxilo naj tato yako isbꞌa ebꞌnaj gabaonita yul isqꞌabꞌ yaꞌ Josué yebꞌ yul isqꞌabꞌ anma Israel yu iskolni isbꞌa ebꞌnaj. 2 Kaw xiwkanh naj yuto haꞌ konhobꞌ Gabaón tuꞌ kaw ay yelapnoj hakaꞌ hunteqꞌan konhobꞌ ay isreyal, kaw ekꞌbꞌal nimajal yekoj sata konhobꞌ Hai, yebꞌ xin kaw ay yip yinh howal. 3 Yu huneꞌ tuꞌ, yuxin yalto naj Adonisedec, isreyal konhobꞌ Jerusalén tzotiꞌ tet naj Hoham, isreyal konhobꞌ Hebrón, yebꞌ tet naj Piream, isreyal konhobꞌ Jarmut, yebꞌ tet naj Jafía, isreyal konhobꞌ Laquis, yebꞌ tet naj Debir, isreyal konhobꞌ Eglón, yalnito naj hakaꞌ tiꞌ: 4 «Titanhwej, kat hekolwa winhan, kat janiko howal yinh ebꞌnaj gabaonita, yuto xaꞌok ebꞌnaj yinh aqꞌankꞌulal yebꞌ yaꞌ Josué yebꞌ ebꞌnaj Israel,» xhito naj. 5 Hak tuꞌ yu iskutxbꞌanayo isbꞌa ebꞌnaj howanh rey amorreo tuꞌ; haꞌ ton naj isreyal konhobꞌ Jerusalén yebꞌ naj isreyal konhobꞌ Hebrón, yebꞌ naj isreyal konhobꞌ Jarmut, yebꞌ naj isreyal konhobꞌ Laquis, yebꞌ naj isreyal konhobꞌ Eglón, yahto ebꞌnaj yebꞌ issoldado, yanikanh ebꞌnaj iscampamento satakꞌti konhobꞌ Gabaón yu yaniko ebꞌnaj howal yinh.6 Ischejnito ebꞌnaj Gabaón hal-laxo tet yaꞌ Josué yul campamento bꞌey Gilgal hakaꞌ tiꞌ: «Ahanhti yinh anhe kolwahanh jinhanh yuto sunil ebꞌnaj isreyal anma amorreo ay chewal txꞌotxꞌ tiꞌ, maskutxbꞌayo isbꞌa yu yaniko howal jinhanh. Mach chamanhkꞌo hakolwa jinhanh, hanhonh konhhachejabꞌonh tiꞌanh,» xhito ebꞌnaj tet yaꞌ Josué. 7 Hayet yabꞌen yaꞌ Josué huneꞌ tuꞌ, yel yaꞌ bꞌey Gilgal yebꞌ issoldado, ebꞌnaj kaw ay yip, kaw helan. 8 Yalni Komam Dios tet yaꞌ Josué: «Mach chaxhxiw tet ebꞌnaj, yuto haninan chiwakojan ebꞌnaj yul haqꞌabꞌ, machi hunu ebꞌnaj tuꞌ chiqꞌoji tawinh,» xhi Komam.
9 El yaꞌ Josué yebꞌ issoldado bꞌey konhobꞌ Gilgal, aqꞌbꞌalil ahapno ebꞌnaj, tona nahul ay ebꞌnaj yet yapni ebꞌnaj Israel tuꞌ. 10 Yaniko Komam Jahawil huneꞌ niman xiwkilal yinh ebꞌnaj yet yilni ebꞌnaj ebꞌnaj Israel; kaw xin niman ebꞌnaj tanhtzelaxkanilo bꞌey konhobꞌ Gabaón. Istzumbꞌen ebꞌnaj hunteqꞌanxa ebꞌnaj yul bꞌeh chiꞌapni bꞌey Bet-horón, ismaqꞌnikamo ebꞌnaj ebꞌnaj amorreo tzabꞌcha yu, masanta bꞌey konhobꞌ Azeca yebꞌ bꞌey konhobꞌ Maceda. 11 Hayet yayapno ebꞌnaj amorreo yinh isxulanil Bet-horón, yet lanhan yelkanh ebꞌnaj tet ebꞌnaj Israel, yaniti Komam Dios chꞌen nimeta sajbꞌat yibꞌanh ebꞌnaj masanta apni bꞌey konhobꞌ Azeca; istanhkanilo ebꞌnaj yu chꞌen nimeta sajbꞌat tuꞌ. Haꞌ isbꞌisil ebꞌnaj kam yu chꞌen sajbꞌat tuꞌ ekꞌbꞌal sata isbꞌisil ebꞌnaj kam yu chꞌen espada yu ebꞌnaj Israel.
12 Hayet yaniko Komam Jahawil ebꞌnaj amorreo yul isqꞌabꞌ ebꞌnaj Israel, istzotel yaꞌ Josué tet Komam Dios Jahawil sata konhobꞌ Israel, yalni yaꞌ hakaꞌ tiꞌ:
«Mamin, islinhbꞌahabꞌ isbꞌa tzꞌayik yibꞌanh Gabaón,
kat yokpaxo linhno ixahaw yibꞌanh yakꞌalil Ajalón,» xhi yaꞌ.
13 Hak tuꞌ yu yok linhno tzꞌayik yebꞌ ixahaw,
masanto qꞌoji ebꞌnaj Israel yinh makta ayko ishowal yinh.
Hak tuꞌ yu istzꞌibꞌnhelaxkano yul yum naj Jaser. Yet hunel, ok linhno tzꞌayik yiktabꞌal satkanh. Huneꞌ tzꞌayik xin elto yibꞌanh, mach bꞌelwi.a 14 Machi hunuxa tzꞌayik hakaꞌ huneꞌ tzꞌayik tuꞌ; nitam yet yalanhtokanoj, nitam yet tzujanilxa, yuto yabꞌe Komam Jahawil tzet isqꞌan huneꞌ naj winaj, yuto haꞌ Komam yaqꞌ howal selelo ebꞌnaj Israel.
15 Lahwi tuꞌ, ismeltzo yaꞌ Josué yebꞌ ebꞌnaj Israel bꞌey Gilgal yul iscampamento. 16 Yajaꞌ wal ebꞌnaj howanh rey, isreyal hunteqꞌan konhobꞌ tuꞌ elkanh ebꞌnaj, yebꞌanto isbꞌa ebꞌnaj yul huneꞌ chꞌen nhachꞌen bꞌey konhobꞌ Maceda. 17 Apni yalomal tet yaꞌ Josué tato howanh ebꞌnaj rey ebꞌabꞌil isbꞌa yul huneꞌ chꞌen nhachꞌen bꞌey konhobꞌ Maceda. 18 Yalni yaꞌ Josué hakaꞌ tiꞌ: «Bꞌalweyti chꞌen nime chꞌen istiꞌ chꞌen nhachꞌen tuꞌ, kat hemajchenkano istiꞌ chꞌen yu chꞌen, kat heyaniko istanhemal chꞌen. 19 Yajaꞌ wal hex mach chexkankano bꞌey tiꞌ, wal xin asiꞌwe yinta hunteqꞌanxa ebꞌnaj lanhan yelkanh, ebꞌnaj ayiko ishowal jinh, kat heyaniko howal yinh ebꞌnaj. Machi xin chechah meltzoho ebꞌnaj yul iskonhobꞌ, yuto haꞌ Komam Dios Jahawil koDiosal, xaꞌaniko ebꞌnaj yul koqꞌabꞌ,» xhi yaꞌ Josué.
20 Hanikꞌxanhe mach tanhilo ebꞌnaj ayko ishowal yinh ebꞌnaj Israel yu yaꞌ Josué yebꞌ yu ebꞌnaj soldado Israel; kaw nimankano ebꞌnaj kami, yajaꞌ xin ayto haywanhxa ebꞌnaj kani, isto ebꞌnaj iskolno isbꞌa yul iskonhobꞌ bꞌay ayko iskꞌubꞌal. 21 Wal ebꞌnaj soldado Israel xin meltzo ebꞌnaj yul campamento bꞌey Maceda bꞌay ay yaꞌ Josué; machi hunu ebꞌnaj tiꞌ lahwi, machi hunu ebꞌnaj kampaxoj. Machi hunu ebꞌnaj ayko ishowal yinh ebꞌnaj Israel, ahti tzotiꞌ txꞌoj yul istiꞌ yinh ebꞌnaj.
22 Lahwi tuꞌ yalni yaꞌ Josué: «Iwelo ismajil chꞌen nhachꞌen, kat heyinilti ebꞌnaj howanh rey ebꞌabꞌil isbꞌa bꞌey tuꞌ,» xhi yaꞌ. 23 Isyijen ebꞌnaj hakaꞌ yalni yaꞌ Josué, yinilti ebꞌnaj ebꞌnaj yul chꞌen nhachꞌen tuꞌ; naj isreyal konhobꞌ Jerusalén, yebꞌ naj isreyal konhobꞌ Hebrón, yebꞌ naj isreyal konhobꞌ Jarmut, yebꞌ naj isreyal konhobꞌ Laquis, yebꞌ naj isreyal konhobꞌ Eglón. 24 Hayet yilaxti ebꞌnaj tet yaꞌ Josué, yawten yaꞌ Josué sunil ebꞌnaj winaj Israel, yalni yaꞌ tet ebꞌnaj yahawil yinh ebꞌnaj soldado ayko iskꞌatanh: «Hitzanhwekoj, kat heyanayo heyoj yibꞌanh isnuqꞌb hunteqꞌan ebꞌnaj tiꞌ,» xhi yaꞌ. Isyijen ebꞌnaj tzet yal yaꞌ tuꞌ.
25 Yalni yaꞌ Josué hakaꞌ tiꞌ: «Mach chexxiwi, machi kabꞌkon hekꞌul; wal xin aweko yip heyanma, linhbꞌawe hebꞌa, yuto hak tiꞌ chiyute Komam hunteqꞌanxa ebꞌnaj ayko ishowal jinh,» xhi yaꞌ Josué.
26 Lahwi tuꞌ, ispotxꞌnikamo yaꞌ Josué ebꞌnaj howanh rey tuꞌ, istꞌunhbꞌalaxkanokanh ebꞌnaj yinh hunun teꞌ qꞌebꞌtaj masanto yinh qꞌejbꞌiyal. 27 Haxa yet isqꞌejbꞌayo tuꞌ xin, ischejni yaꞌ Josué ilaxoyo isnimanil ebꞌnaj, isto yalaxokto yul chꞌen nhachꞌen bꞌay yebꞌa isbꞌa ebꞌnaj. Yanikaniko ebꞌnaj Israel hunteqꞌan chꞌen nime chꞌen ismajilo istiꞌ chꞌen nhachꞌen tuꞌ, aytoko chꞌen ismajilo tuꞌ tinanh.
28 Yinhtikꞌa huneꞌ tzꞌayik tuꞌ, aykꞌay konhobꞌ Maceda yu yaꞌ Josué, istanhtzenkanilo yaꞌ konhobꞌ tuꞌ. Ispotxꞌnikamo ebꞌnaj Israel sunil mak ay yul konhobꞌ tuꞌ yu chꞌen espada, machi hunu mak kankanoj. Hakaꞌtikꞌa utelax naj isreyal konhobꞌ Jericó, hak tuꞌ utelaxpaxo naj isreyal konhobꞌ Maceda.
29 Lahwi tuꞌ, yel yaꞌ Josué yebꞌ ebꞌnaj Israel bꞌey Maceda tuꞌ, isto ebꞌnaj bꞌey konhobꞌ Libna, yaniko ebꞌnaj howal yinh konhobꞌ tuꞌ. 30 Yaniko Komam huneꞌ konhobꞌ tuꞌ yebꞌ isreyal yul isqꞌabꞌ ebꞌnaj Israel. Ispotxꞌnikamo ebꞌnaj sunil mak ay yul konhobꞌ yu chꞌen espada, istanhtzenpaxilo ebꞌnaj sunil tzet ay bꞌey tuꞌ, matxa hunu tzet kankanoj. Hakaꞌtikꞌa utelax naj isreyal konhobꞌ Jericó, haktikꞌapax tuꞌ utelax naj isreyal konhobꞌ Libna.
31 Lahwi tuꞌ, yel yaꞌ Josué yebꞌ sunil anma Israel bꞌey Libna, isto bꞌey konhobꞌ Laquis, iswatxꞌenkanh ebꞌnaj iscampamento iskawilal, yaniko ebꞌnaj howal yinh. 32 Haxa yet hunxa tzꞌayik, yaniko Komam konhobꞌ Laquis yul isqꞌabꞌ ebꞌnaj Israel, ispotxꞌnikamo ebꞌnaj sunil anma ay yul konhobꞌ tuꞌ yu chꞌen espada. Istanhtzenkanilo ebꞌnaj sunil tzet ay bꞌey tuꞌ hakaꞌtikꞌa yute ebꞌnaj konhobꞌ Libna. 33 Wal naj Horam, isreyal konhobꞌ Gezer, ahto naj yebꞌ issoldado kolwal yinh konhobꞌ Laquis, yajaꞌ xin tanhtzelaxpaxilo naj yebꞌ sunil iskonhobꞌ yu yaꞌ Josué.
34 Lahwi tuꞌ, yel yaꞌ Josué yebꞌ Israel bꞌey konhobꞌ Laquis, isto yaꞌ bꞌey konhobꞌ Eglón, iswatxꞌenkanh ebꞌnaj iscampamento iskawilal konhobꞌ Eglón tuꞌ, yaniko ebꞌnaj howal yinh konhobꞌ tuꞌ. 35 Yinhtikꞌa huneꞌ tzꞌayik tuꞌ, aykꞌay konhobꞌ yul isqꞌabꞌ ebꞌnaj; ispotxꞌnikamo ebꞌnaj sunil anma ay bꞌey tuꞌ yu chꞌen espada, istanhtzenkanilo ebꞌnaj sunil tzet ay bꞌey tuꞌ, hakaꞌtikꞌa yute ebꞌnaj bꞌey konhobꞌ Laquis.
36 Lahwi tuꞌ yel yaꞌ Josué yebꞌ issoldado bꞌey Eglón, yahto ebꞌnaj bꞌey konhobꞌ Hebrón, yaniko ebꞌnaj howal yinh konhobꞌ tuꞌ. 37 Yaykꞌay konhobꞌ tuꞌ yul isqꞌabꞌ ebꞌnaj, istanhtzenilo ebꞌnaj sunil tzetaj ay bꞌey tuꞌ, ispotxꞌnikamo ebꞌnaj naj rey yebꞌ sunil anma ay bꞌey tuꞌ yu chꞌen espada. Istanhtzenpaxilo ebꞌnaj konhobꞌ ayko yinh ishoyanil konhobꞌ tuꞌ, hakaꞌtikꞌa yute ebꞌnaj konhobꞌ Eglón.
38 Lahwi tuꞌ, yel yaꞌ Josué yebꞌ issoldado bꞌey Eglón, isto ebꞌnaj bꞌey konhobꞌ Debir, yaniko ebꞌnaj howal yinh konhobꞌ tuꞌ. 39 Yaykꞌay konhobꞌ tuꞌ yul isqꞌabꞌ ebꞌnaj. Ispotxꞌnikamo ebꞌnaj naj rey yebꞌ sunil anma ay yul konhobꞌ tuꞌ, istanhtzenpaxilo ebꞌnaj ej konhobꞌ ayayo yinhla ishoyanil. Matxa xin hunu mak kankano yul konhobꞌ tuꞌ, sunil mak tanhkaniloj. Hakaꞌtikꞌa utelax konhobꞌ Hebrón yebꞌ konhobꞌ Laquis yebꞌ isreyal, haktikꞌapax tuꞌ yu konhobꞌ Debir.
40 Hak tuꞌ yu yaqꞌni aykꞌayo yaꞌ Josué sunil konhobꞌ ayko yul ismajul txꞌotxꞌ tuꞌ. Yaqꞌ aykꞌayo yaꞌ ebꞌnaj rey ay yul ismajul txꞌotxꞌ Neguev, bꞌey chewal txꞌotxꞌ, yebꞌ satla akꞌal, yinhla witz, ispotxꞌnikamo ebꞌnaj Israel sunil anma ay yul hunteqꞌan konhobꞌ tuꞌ, istanhtzenkanilo ebꞌnaj sunil tzetaj ay bꞌey tuꞌ. Matxa hunu tzet kankanoj, hakaꞌtikꞌa yu yalnikano Komam Jahawil tet ebꞌnaj, Komam isDiosal ebꞌnaj Israel tuꞌ. 41 Yaqꞌ aykꞌayo yaꞌ Josué ebꞌnaj rey tuꞌ yinh hunelnhe, yinikanikꞌo ebꞌnaj Israel istxꞌotxꞌ ebꞌnaj; ichiti bꞌey Cades-barnea masanta bꞌey Gaza, yebꞌ sunil ismajul Gosén, masanta bꞌey konhobꞌ Gabaón. 42 Sunil ebꞌnaj rey tanhilo yu yaꞌ Josué, ismajnayo yaꞌ istxꞌotxꞌ ebꞌnaj yuto haꞌ Komam Dios Jahawil, isDiosal ebꞌnaj Israel, kolwa yinh ebꞌnaj yaniko howal. 43 Lahwi tuꞌ, ismeltzo yaꞌ Josué yebꞌ sunil ebꞌnaj Israel bꞌey campamento bꞌey Gilgal.