Leqꞌtiꞌal yako ebꞌnaj Gabaonita tet ebꞌnaj Israel
9
Yabꞌelaxilo isqꞌumal tzet iswatxꞌe yaꞌ Josué yu ebꞌnaj isreyal ebꞌnaj heteo, ebꞌnaj amorreo, ebꞌnaj cananeo, ebꞌnaj ferezeo, ebꞌnaj heveo yebꞌ ebꞌnaj jebuseo. Ebꞌnaj ayayo satakꞌto istiꞌ haꞌ Jordán, bꞌey chewal txꞌotxꞌ, yebꞌ satla akꞌal, yebꞌ istiꞌla haꞌ mar Mediterráneo masanta chiꞌapni bꞌey txꞌotxꞌ Líbano, yabꞌelo ebꞌnaj tuꞌ tzet iswatxꞌe yaꞌ Josué. 2 Islahtiꞌnhen isbꞌa ebꞌnaj isreyal hunteqꞌan konhobꞌ tuꞌ, iskutxbꞌaniko isbꞌa ebꞌnaj yu yaniko howal yinh yaꞌ Josué yebꞌ yinh ebꞌnaj Israel. 3 Yajaꞌ wal anma heveo ay bꞌey Gabaón, hayet yabꞌenilo isqꞌumal tzet utelax konhobꞌ Jericó yebꞌ konhobꞌ Hai yu yaꞌ Josué, 4 istxumni ebꞌnaj yinh tzet chu yaniko ebꞌnaj leqꞌtiꞌal tet yaꞌ Josué. Yiti ebꞌnaj hunteqꞌan saco kaw xilxa yebꞌ bꞌujtaxanhe, yebꞌ noꞌ tzꞌum kaw xilxa, yebꞌ holkixhtaxanhe bꞌay chiꞌayto vino, yanahto ebꞌnaj sunil hunteqꞌan tuꞌ yibꞌanh isburro, isto ebꞌnaj yilno yaꞌ Josué. 5 Yanipaxiko ebꞌnaj xilqꞌape kaw xilxa yebꞌ kaw bꞌujbꞌiltaxanhe, yanipaxiko ebꞌnaj noꞌ xanhabꞌ kaw xilxa yinh yoj. Haꞌ xin ixim pan kaw kaw yebꞌ ayxa xil, haꞌ yito ebꞌnaj yinh isbꞌel tuꞌ. 6 Hayet yapni ebꞌnaj bꞌey iscampamento ebꞌnaj Israel bꞌey Gilgal, yalni ebꞌnaj tet yaꞌ Josué yebꞌ tet ebꞌnaj Israel hakaꞌ tiꞌ:—Hanhonhtiꞌanh, kaw nahat kopetohanh, makonhhulanh, yuto chijochehanh chikowatxꞌehanh hunu kotratohanh yebꞌ hex, xhi ebꞌnaj.
7 Istaqꞌwi ebꞌnaj Israel tet ebꞌnaj heveo tuꞌ:
—Kꞌuxantaxka kokawilal tiꞌanh ay hex, ¿tzet chu kowatxꞌen kotratohanh yebꞌ hex? xhi ebꞌnaj.
8 Yajaꞌ xin yal ebꞌnaj tet yaꞌ Josué:
—Hanhonhtiꞌanh, hinanonhanh jokanh hachejabꞌoj, xhi ebꞌnaj.
Istaqꞌwi yaꞌ Josué tet ebꞌnaj:
—¿Mak hex anmahil? ¿Bꞌaytuꞌwal hepeto? xhi yaꞌ.
9 Istaqꞌwi ebꞌnaj tet yaꞌ Josué:
—Hanhonhtiꞌanh, kaw nahat kopetohanh, xajabꞌehanh tato kaw aykano ismay Komam heYahawil, heDiosal, jabꞌenpaxojanh tzet iswatxꞌe Komam bꞌey Egipto; 10 yebꞌ tzet yute Komam ebꞌnaj kawanh rey, isreyal anma amorreo ay isqꞌaxebꞌikꞌto haꞌ Jordán, haꞌ ton naj Sehón, rey ay bꞌey Hesbón, yebꞌ naj rey Og, ay bꞌey Basán, ayko yul ismajul txꞌotxꞌ Astarot. 11 Yu huneꞌ tuꞌ, yuxin yal ebꞌnaj jahawilanh yebꞌ jet konhobꞌanh jetanh hakaꞌ tiꞌ: “Iqꞌwe tzet cheloh yebꞌ tzet chiꞌokniko heyu yinh hebꞌel, kat heto heyilno ebꞌnaj Israel bꞌay ay ebꞌnaj, kat heyalni tet ebꞌnaj tato chonhok ischejabꞌo ebꞌnaj kat kowatxꞌenkano kotrato yebꞌ ebꞌnaj,” xhi ebꞌnaj jetanh. 12 Hayet jelanh bꞌay ayonhanh yu kotitanh kexjilnojanh, haꞌ tzet chikolohanh jitijanh yinh kobꞌel tiꞌanh, kaw kajto jinitijanh, yajaꞌ wal tinanh kaw kawxa, yebꞌ ayxa xil ixim. 13 Hakpax tuꞌ noꞌ tzꞌum tiꞌ, kaw akꞌto noꞌ yet konotzenanh noꞌ yu vino, yajaꞌ wal tinanh xin, holanxa noꞌ. Hakpax tuꞌ xil koqꞌapanh yebꞌ koxanhabꞌanh, kaw akꞌto yet jelanh, wal tinanh kaw xilxa, yuto kaw nahat kopetohanh, xhi ebꞌnaj.
14 Yabꞌlen ebꞌnaj Israel tzet chislo ebꞌnaj tuꞌ, yajaꞌ mach isqꞌambꞌe ebꞌnaj tet Komam Dios yinh tzet chiyute isbꞌa ebꞌnaj yebꞌ ebꞌnaj. 15 Lahwi tuꞌ, istꞌinhbꞌankano yaꞌ Josué istzotiꞌ yinh aqꞌankꞌulal yebꞌ ebꞌnaj, yalni yaꞌ Josué tato chiꞌaqꞌlax nimankꞌulal yinh ebꞌnaj, hak tuꞌ xin mach chitanhtzelaxilo ebꞌnaj. Haktikꞌapax tuꞌ yute yalni ebꞌnaj yahawil yinh ebꞌnaj Israel, yaqꞌni bꞌinaho ebꞌnaj isbꞌi Komam yinh.
16 Haxa yinhxa oxebꞌ tzꞌayik istꞌinhbꞌankano ebꞌnaj istrato xin yabꞌenilo ebꞌnaj Israel tato haꞌ iskawilal ebꞌnaj ayayo ebꞌnaj gabaonita tuꞌ, ebꞌnaj bꞌay yaqꞌ istrato bꞌay istꞌinhbꞌa ebꞌnaj istzotiꞌ yebꞌ ebꞌnaj. 17 Lahwi tuꞌ, isto ebꞌnaj Israel issayno bꞌay ay ebꞌnaj gabaonita, haxa yinh yox tzꞌayik, yapni ebꞌnaj bꞌay ay iskonhobꞌ ebꞌnaj, haꞌ ton konhobꞌ Gabaón, konhobꞌ Cafira, konhobꞌ Beerot, yebꞌ konhobꞌ Quiriat-jearim. 18 Yajaꞌ xin, mach potxꞌlaxkamo anma ay yul hunteqꞌan konhobꞌ tuꞌ yu ebꞌnaj Israel, yuto ebꞌnaj yahawil ebꞌnaj Israel tuꞌ yaqꞌ bꞌinaho ebꞌnaj isbꞌi Komam Dios yet yalni ebꞌnaj ta chiꞌaqꞌlax nimankꞌulal yinh ebꞌnaj gabaonita tuꞌ.
Yuxin ok anma Israel bꞌuchwal yinh ebꞌnaj yahawil konhobꞌ. 19 Yuxin yal ebꞌnaj yahawil konhobꞌ tuꞌ hakaꞌ tiꞌ:
—Hanhonhtiꞌanh, jaqꞌ bꞌinahojanh isbꞌi Komam Jahawil, koDiosal, jalnihanh tato mach chikopotxꞌkamo ebꞌnaj, yuxin matzet chijute ebꞌnaj. 20 Mach chikotanhtzelo ebꞌnaj, yuto ta chikomanhkꞌo yinh tzet taqꞌwebꞌil ju, yet jaqꞌni bꞌinaho isbꞌi Komam Dios, chitit ishowal Komam jinh, xhi ebꞌnaj.
21 Yalnipaxo ebꞌnaj yahawil ebꞌnaj Israel tuꞌ tato mach chipotxꞌlaxkamo ebꞌnaj gabaonita tuꞌ, yajaꞌ xin alaxkaniko ebꞌnaj ijo siꞌ, yebꞌ ijo haꞌ xol ebꞌnaj Israel; hak tuꞌ yu isyijen ebꞌnaj yahawil yinh tzet yala.
22 Wal yaꞌ Josué, yawte yaꞌ ebꞌnaj gabaonita tuꞌ, yalni yaꞌ tet ebꞌnaj:
—¿Tzet yinh yuxin heyako leqꞌtiꞌal jetanh, heyalni tato kaw nahat hepeto, taꞌan kokawilalanh ayexayo bꞌani? 23 Yu huneꞌ tuꞌ, yuxin chiꞌay tzꞌaktiꞌ teyibꞌanh, chejabꞌ cheyukaniko yinh sunibꞌal ej tiempo, hex xin chexokkano tzokꞌo siꞌ yebꞌ ijo haꞌ chiꞌokniko yul Yatut Komam Dios, koDiosalanh, xhi yaꞌ Josué.
24 Istaqꞌwi ebꞌnaj tet yaꞌ Josué:
—Ay tzet yinh hak tuꞌ jutehanh, yuto konhxiwanh tato chonhhepotxꞌ kamojanh, yuto jabꞌelojanh tato Komam Dios, heDiosal halnikano tet yaꞌ Moisés ischejabꞌ, tato chiyaqꞌkano Komam hunteqꞌan txꞌo txꞌotxꞌ tiꞌ teyet, kat hetanhtzenkanilo sunil anma ayayo sat txꞌotxꞌ. 25 Yuxin tinanh ayonhxakojanh yul haqꞌabꞌ, haꞌ bꞌaytet istoholal chawabꞌe, watxꞌe jinhanh, xhi ebꞌnaj.
26 Hak tuꞌ xin yute yaꞌ Josué, matxa isje yaꞌ ta chipotxꞌlaxkamo ebꞌnaj gabaonita yu ebꞌnaj Israel. 27 Yajaꞌ yakaniko yaꞌ Josué ebꞌnaj gabaonita ijo siꞌ, yebꞌ ijo haꞌ xol ebꞌnaj Israel, yebꞌ ha haꞌ yebꞌ teꞌ siꞌ chiꞌokniko yinh ismexhahil yet xahanbꞌal tet Komam Dios, Jahawil, bꞌay chissayilo Komam bꞌay chiꞌah isTabernáculo. Haꞌ to xin ismunil ebꞌnaj gabaonita tuꞌ.