Qꞌoji ebꞌnaj Israel yinh konhobꞌ Hai
8
Lahwi tuꞌ yalni Komam Dios tet yaꞌ Josué: «Mach chaxhxiwi, mach chikabꞌkon hakꞌul. Ito sunil ebꞌnaj soldado kat hato yebꞌ ebꞌnaj heyanoko howal yinh konhobꞌ Hai, kat wanikojan konhobꞌ tuꞌ yebꞌ isreyal yul heqꞌabꞌ, kat yokkano istxꞌotxꞌ ebꞌnaj tuꞌ heyu. 2 Hakaꞌtikꞌa heyu yinh konhobꞌ Jericó yebꞌ isreyal, haktikꞌapax tuꞌ cheyute yinh konhobꞌ Hai yebꞌ isreyal, yajaꞌ wal tzet ay anma tuꞌ chisje yokkano heyu yebꞌ ej isnoqꞌ anma yet chexqꞌoji yinh konhobꞌ tuꞌ. Cheyebꞌa hebꞌa yintalto konhobꞌ, hayet tona nahul ay ebꞌnaj xin, kat heyaniko howal yinh,» xhi Komam.3 Iswatxꞌen isbꞌa yaꞌ Josué yebꞌ issoldado yu isto yanoko howal yinh konhobꞌ Hai. Issaynilo yaꞌ 30 mil ebꞌnaj soldado kaw helan, kaw ay yip; ischejnito yaꞌ ebꞌnaj yinh aqꞌbꞌalil, 4 yalni yaꞌ Josué chejbꞌanile tet ebꞌnaj hakaꞌ tiꞌ: «Kaw kam cheyabꞌewe xin, haꞌ yintalto konhobꞌ tuꞌ chexehi, kat heyebꞌanto hebꞌa bꞌey tuꞌ, mach xin nahato chexel yinh konhobꞌ, kaw xin helan cheyute hebꞌa heyechman heyaniko howal tuꞌ. 5 Wal hunteqꞌanxa ebꞌnaj soldado Israel xin, chintohan yebꞌ ebꞌnaj, kat kohitzikojanh iskawilal konhobꞌ tuꞌ, haxa yet chiꞌelti ebꞌnaj yaqꞌaꞌko howal jinhanh, kat jelkanhanh tet ebꞌnaj, hakaꞌ heyu yet bꞌabꞌelal. 6 Kat yok tzujno ebꞌnaj jintajanh yet chonhelkanh tuꞌanh. Chisnanipaxo ebꞌnaj: “Ebꞌnaj Israel tiꞌ chiꞌelkanh ebꞌnaj jet hakaꞌ yet bꞌabꞌelal,” xhiho ebꞌnaj. Tonh yinta ebꞌnaj, lanhan koqꞌoji yinh ebꞌnaj. 7 Wal hex tiꞌ xin chexelti bꞌay ebꞌabꞌil hebꞌa, kat heyokto lemna yul konhobꞌ tuꞌ, yuto haꞌ Komam Dios Jahawil, koDiosal chiꞌaniko konhobꞌ tuꞌ yul heqꞌabꞌ. 8 Haxa yet xaꞌaykꞌay konhobꞌ yul heqꞌabꞌ tuꞌ, kat heyaniko qꞌaꞌ yinh. Hakaꞌtikꞌa yu yalnikano Komam Jahawil chejbꞌanile, hak tuꞌ chiwute walnikanojan teyet,» xhi yaꞌ Josué.
9 Yalni yaꞌ Josué ta chito ebꞌnaj; lahwi tuꞌ xin isto ebꞌnaj yebꞌano isbꞌa xolbꞌal Bet-el yebꞌ konhobꞌ Hai, yintalto konhobꞌ, yetkꞌulal bꞌay chiꞌahilo tzꞌayik. Wal yaꞌ Josué tuꞌ xin kantokano yaꞌ huneꞌxa aqꞌbꞌal yul campamento.
10 Haxa yet hunxa tzꞌayik xin, kaw sahabꞌ ah yaꞌ Josué, iskutxbꞌaniko yaꞌ hunteqꞌanxa ebꞌnaj soldado, lahwi tuꞌ isbꞌabꞌi yaꞌ yebꞌ ebꞌnaj ichamta Israel sata ebꞌnaj soldado tuꞌ, isto ebꞌnaj yanoko howal yinh konhobꞌ Hai. 11 Ishitzato ebꞌnaj aqꞌom howal yinh konhobꞌ yinh yetkꞌulal istiꞌ ispultahil, iswatxꞌenkanh ebꞌnaj iscampamento sat akꞌal yinh yetkꞌulal norte yinh konhobꞌ Hai tuꞌ, hak tuꞌ xin yu iskankano akꞌal tuꞌ xolbꞌal ebꞌnaj yebꞌ konhobꞌ. 12 Yaꞌ Josué tuꞌ, ischejto yaꞌ howebꞌ mil ebꞌnaj yebꞌaꞌ isbꞌa xolbꞌal Bet-el yebꞌ konhobꞌ Hai, yinh yetkꞌulal bꞌay chito tzꞌayik. 13 Hak tuꞌ xin kabꞌ majan eliko ebꞌnaj soldado Israel tuꞌ; huneꞌ majan ebꞌnaj ebꞌabꞌil isbꞌa yinta konhobꞌ, yinh yetkꞌulal bꞌay chito tzꞌayik, hunxa majan ebꞌnaj xin ayayo yul campamento yinh yetkꞌulal norte. Haxa yaꞌ Josué xin hitzto yaꞌ yiktabꞌal akꞌal tuꞌ yet aqꞌbꞌalil.
14 Haxa yet yilniti naj isreyal konhobꞌ Hai huneꞌ tuꞌ, kaw sahabꞌ ahwano naj, yah lemna naj yebꞌ sunil issoldado yelto naj yanoko howal yinh ebꞌnaj Israel bꞌey yakꞌalil istiꞌ haꞌ Jordán. Mach xin yohtajo ebꞌnaj tato ay hunteqꞌanxa ebꞌnaj soldado Israel ebꞌabꞌil isbꞌa yintalto konhobꞌ tuꞌ. 15 Yaꞌ Josué yebꞌ issoldado tuꞌ kꞌul yubꞌ ebꞌnaj yaqꞌlen yelkanh ebꞌnaj tet ebꞌnaj ay yul konhobꞌ Hai, isto ebꞌnaj yul bꞌeh chiꞌapni bꞌey txꞌotxꞌ desierto. 16 Hak tuꞌ xin yu yaqꞌlax chejbꞌanile tet ebꞌnaj soldado ay yul konhobꞌ Hai ta chistzumbꞌe ebꞌnaj yaꞌ Josué yebꞌ issoldado, kaw xin nahat el ebꞌnaj yinh iskonhobꞌ tuꞌ. 17 Sunil ebꞌnaj winaj ay yul konhobꞌ Hai yebꞌ konhobꞌ Bet-el, ok tzujno yinta ebꞌnaj Israel tuꞌ, matxa hunu ebꞌnaj kan yul iskonhobꞌ. Yu kaw yako ebꞌnaj yinh iskꞌul isto istzumbꞌeno ebꞌnaj Israel, yuxin ishajbꞌakano ebꞌnaj ispultahil iskonhobꞌ tuꞌ. 18 Lahwi tuꞌ yalni Komam Dios tet yaꞌ Josué: «Yeto halanza iqꞌbꞌil yul haqꞌabꞌ yinh yetkꞌulal konhobꞌ Hai, yuto chiwakojan konhobꞌ tiꞌ yul haqꞌabꞌ,» xhi Komam.
Hak tuꞌ yu isyenito yaꞌ Josué islanza ayko yul isqꞌabꞌ yinh yetkꞌulal konhobꞌ Hai. 19 Yelti ebꞌnaj soldado yinh anhe bꞌay ebꞌabꞌil isbꞌa, yokto ebꞌnaj yul konhobꞌ Hai yinh anhe, yaniko ebꞌnaj howal yinh, isnhusnito ebꞌnaj konhobꞌ tuꞌ.
20 Wal ebꞌnaj ah konhobꞌ Hai, ismeltzo isbꞌa ebꞌnaj, istꞌanhxito yinh iskonhobꞌ, yilni ebꞌnaj tato toxanhe topton yah isnhubꞌal iskonhobꞌ tuꞌ satkanh; matxa xin bꞌay chu iskolni isbꞌa ebꞌnaj. Yuto ebꞌnaj Israel istzumbꞌe ebꞌnaj sat txꞌotxꞌ desierto, meltzoti ebꞌnaj yaqꞌaꞌko howal yinh ebꞌnaj ah Hai. 21 Haxa yet yilnito yaꞌ Josué yebꞌ ebꞌnaj Israel tato xaꞌaykꞌay konhobꞌ tuꞌ yul isqꞌabꞌ ebꞌnaj ebꞌabꞌil isbꞌa, yilni ebꞌnaj yah isnhubꞌal konhobꞌ tuꞌ, ismeltzo ebꞌnaj yanoko howal yinh ebꞌnaj soldado yet konhobꞌ Hai. 22 Haxa ebꞌnaj soldado Israel ayikto yul konhobꞌ tuꞌ, elti ebꞌnaj, istit ebꞌnaj yinh ebꞌnaj soldado Hai, hak tuꞌ yu iskankano ebꞌnaj xol iskabꞌ majan ebꞌnaj Israel tuꞌ. Yaniko ebꞌnaj Israel howal yinh ebꞌnaj, ispotxꞌnikamo ebꞌnaj sunil ebꞌnaj, matxa xin hunu ebꞌnaj kolchaloj. 23 Wal naj isreyal konhobꞌ tuꞌ, mach ispotxꞌ ebꞌnaj naj, wal xin istzabꞌayo ebꞌnaj naj, yinito ebꞌnaj naj yinh itzitzal sata yaꞌ Josué.
24 Lahwi ispotxꞌni ebꞌnaj Israel sunil ebꞌnaj soldado Hai elti tzumbꞌeno sat akꞌal tuꞌ, ismeltzo ebꞌnaj Israel yul konhobꞌ Hai, ispotxꞌni ebꞌnaj makta kantokano yul konhobꞌ tuꞌ. 25 Haꞌ xin isbꞌisil ebꞌnaj winaj yebꞌ ebꞌix ix kam yul konhobꞌ Hai, 12 (kabꞌlahonhebꞌ) mil isbꞌisil yinh sunil. 26 Wal yaꞌ Josué tuꞌ machi yiyo yaꞌ isqꞌabꞌ, huneꞌnhetikꞌa isyenito yaꞌ islanza yetkꞌulal konhobꞌ Hai masanto tanhilo sunil anma ay bꞌey konhobꞌ Hai. 27 Wal isnoqꞌ anma yebꞌ tzetaj ay anma yul konhobꞌ tuꞌ, okkano yu ebꞌnaj Israel, hakaꞌtikꞌa yu yalni Komam Dios tet yaꞌ Josué. 28 Isnhusnikanto yaꞌ Josué konhobꞌ Hai yinh hunelnhe, haxanhe xin yekꞌlenajil konhobꞌ tuꞌ ixtanhto tinanh. 29 Wal naj Isreyal konhobꞌ tuꞌ, istꞌunhbꞌakanh yaꞌ Josué naj yinh isqꞌabꞌ huneꞌ teꞌ qꞌebꞌtaj masanto yinh qꞌejbꞌiyal. Haxa yet isqꞌejbꞌayo tuꞌ, ischejni yaꞌ Josué ilaxoyti isnimanil naj, isto alaxayo naj istiꞌ ispultahil konhobꞌ Hai, istenbꞌankanh ebꞌnaj chꞌen chꞌen yibꞌanh isnimanil naj; tenantokanokanh chꞌen chꞌen tuꞌ tinanh.
Il-lax istzotiꞌal chejbꞌanile bꞌey yich witz Ebal
30 Lahwi tuꞌ iswatxꞌenkanh yaꞌ Josué huneꞌ mexha yet xahanbꞌalil yinh chꞌen chꞌen tet Komam Jahawil, isDiosal ebꞌnaj Israel, haꞌ huneꞌ tuꞌ iswatxꞌe yaꞌ Josué bꞌey witz Ebal. 31 Iswatxꞌenkanh ebꞌnaj chꞌen chꞌen hakaꞌtikꞌa yu yalnikano yaꞌ Moisés, ischejabꞌ Komam Dios tet ebꞌnaj Israel, yebꞌ hakaꞌ yalni hum yet chejbꞌanile bꞌay chal hakaꞌ tiꞌ: «Haꞌ chꞌen chꞌen mach paqꞌbꞌilo iskꞌul, haꞌ chꞌen chꞌok mexhahil yeto xahanbꞌal,» xhihayoj. Lahwi tuꞌ isnhusni ebꞌnaj Israel isxahanbꞌal yibꞌanh ismexhahil yet xahanbꞌal tet Komam, yaqꞌnipaxo ebꞌnaj isxahanbꞌal, yebꞌalqꞌabꞌe yet aqꞌankꞌulal.a 32 Istzꞌibꞌnheniko yaꞌ Josué chejbꞌanile aykano yu yaꞌ Moisés tet ebꞌnaj Israel, yinh chꞌen chꞌen ayko ismexhahil yet xahanbꞌal yinh sat sunil konhobꞌ Israel. 33 Lahwi tuꞌ, sunil ebꞌnaj Israel yebꞌ anma mach Israelo ayko xol ebꞌnaj, yebꞌ ebꞌnaj ichamta winaj Israel yebꞌ ebꞌnaj yahawil soldado, yebꞌ ebꞌnaj juez, ok linhno ebꞌnaj iskawilal ebꞌnaj sacerdote levita, ebꞌnaj iqꞌnhe Kaxha yet istrato Komam Jahawil. Yikta ebꞌnaj tuꞌ ok yich witz Gerizim, haxa yiktaxa ebꞌnaj xin okpaxo yich witz Ebal; isqꞌanni ebꞌnaj sacerdote iskꞌulal Komam Dios yibꞌanh konhobꞌ Israel, hakaꞌtikꞌa yu yalnikano yaꞌ Moisés, ischejabꞌ Komam, yet yalanhtokanoj.
34 Lahwi tuꞌ, yilni yaꞌ Josué hunun chejbꞌanile tzꞌibꞌnhebꞌilkano yul hum yabꞌeꞌ sunil anma; hunteqꞌan iskꞌulal iskꞌul Komam Dios yebꞌ isyaꞌtajil chiyayo Komam yibꞌanh ebꞌnaj machi yijen tzet chal Komam. 35 Machi hunu chejbꞌanile halbꞌilkano yu yaꞌ Moisés, machi yalilo yaꞌ Josué, wal xin tzꞌajan yalilo yaꞌ; kaw xin sunil konhobꞌ Israel abꞌenkanoj; yabꞌe ebꞌnaj winaj, yabꞌe ebꞌix ix, yabꞌe nixhte unin, yebꞌ anma mach Israelo ayko xol ebꞌnaj Israel tuꞌ.