2 Hayet ay yaꞌ Josué yebꞌ ebꞌnaj Israel bꞌey Jericó, ischejnito yaꞌ haywanh ebꞌnaj Israel bꞌey konhobꞌ Hai, yunhe isto ebꞌnaj yilno konhobꞌ tuꞌ. Konhobꞌ Hai, ayko satakꞌti Bet-el, iskawilal Bet-avén. Yalni yaꞌ Josué tet ebꞌnaj: «Asiꞌweto bꞌey konhobꞌ Hai, kat heyilni konhobꞌ tuꞌ,» xhi yaꞌ. Isto ebꞌnaj yilno konhobꞌ Hai. 3 Hayet ismeltzo ebꞌnaj xin, yalni ebꞌnaj tet yaꞌ Josué: «Mach yilalo chiꞌahto sunil ebꞌnaj Israel yaqꞌaꞌko howal yinh konhobꞌ Hai, wal xin kabꞌ oxebꞌnhe mil ebꞌnaj chiꞌaniko howal yinh konhobꞌ tuꞌ. Mach chiꞌahto sunil ebꞌnaj yetaꞌ iskꞌul, yuto haywanhnhechꞌan mak chitanhen konhobꞌ tuꞌ,» xhi ebꞌnaj.

4 Hak tuꞌ xin oxebꞌnhe mil ebꞌnaj ahto yaqꞌaꞌko howal yinh konhobꞌ tuꞌ, yajaꞌ xin qꞌoji ebꞌnaj ay yul huneꞌ konhobꞌ tuꞌ yinh ebꞌnaj Israel, istzumbꞌen ebꞌnaj ebꞌnaj. 5 Tzumbꞌelax ebꞌnaj Israel yu ebꞌnaj bꞌey ispultahil konhobꞌ tuꞌ, masanta bꞌey konhobꞌ Sebarim, ismaqꞌnikamo ebꞌnaj 36 (wajlahonhebꞌ iskawinaj) ebꞌnaj soldado Israel yinh istzalanil witz yalanh konhobꞌ tuꞌ. Yuxin kabꞌkonkanh iskꞌul anma Israel, ispax yip, ischewbꞌilo ebꞌnaj hakaꞌ ha haꞌ. 6 Wal yaꞌ Josué istzililo yaꞌ xil isqꞌap, yanahto yaꞌ pojoj xol xil iswiꞌ yu bꞌiskꞌulal. Hak tuꞌ yutepaxo ebꞌnaj ichamta winaj Israel. Yay jahno ebꞌnaj sata isKaxhahil istrato Komam, yay xulno ebꞌnaj sat txꞌotxꞌ, masanto yinh qꞌejbꞌiyal.^a 7 Yalni yaꞌ Josué tet Komam:

—¡Ay Mamin, Jahawilanh! ¿Tzet yinh yuxin konhhawikꞌtijanh isqꞌaxebꞌikꞌti haꞌ Jordán tiꞌ? ¿Tom yu konhhawanikojanh yul isqꞌabꞌ anma amorreo tiꞌ, kat konhistanhtzenilojanh ebꞌnaj? ¡Majaltam konhkantikꞌakanojanh isqꞌaxebꞌikꞌto haꞌ Jordán sataj! 8 ¡Ay Mamin! ¿Tzet chiwute walnihan tinanh? Yuto matzumbꞌelax ebꞌnaj Israel, maꞌelkanh ebꞌnaj tet ebꞌnaj ayko ishowal yinh. 9 Ebꞌnaj cananeo yebꞌ sunil anma ayayo yul ismajul txꞌo txꞌotxꞌ tiꞌ, chiyabꞌelo ebꞌnaj huneꞌ tiꞌ, kat yawten isbꞌa ebꞌnaj jinhanh, kat isbꞌutnikanh ebꞌnaj kobꞌihanh. Ta hak tuꞌ, ¿tzet chu isbꞌina habꞌi? xhi yaꞌ Josué.

10 Istaqꞌwi Komam tet yaꞌ Josué:

—Ikanh habꞌa, ¿tzet yinh xin makaxhay jahnoj, maxawanayo hapalanh xol txꞌotxꞌ? 11 Haꞌ anma Israel tiꞌ mayako ismul, masmanhkꞌon intzotiꞌan waqꞌan tet, yito ebꞌnaj tzet walan ta chitanhtzelaxkaniloj, yelqꞌanti ebꞌnaj yinh ewantajil, yebꞌanto ebꞌnaj hunteqꞌan tuꞌ bꞌay aya. 12 Yuxin haꞌ ebꞌnaj Israel tiꞌ, mach chiqꞌoji ebꞌnaj yinh anma ayko ishowal yinh, wal xin chiꞌelkanh ebꞌnaj tet ebꞌnaj. Yu ismul ebꞌnaj tuꞌ, yuxin yet ay hetanhtzelaxiloj. Tato mach cheyuchkꞌato tzet halbꞌilkano wuhan ta chiꞌuchkꞌalaxtoj, hak tuꞌ xin mach chu wokan heyetbꞌihoj. 13 Wal tinanh xin, ikanh habꞌa, kat hasajnhen konhobꞌ tiꞌ, kat hawalni tet ta chiswatxꞌe isbꞌa, yuto yet hekal chiꞌok insatajan. Hanin heYahawilintiꞌan, yebꞌ heDiosal, chiwalan huneꞌ tiꞌ: “Hex Israel hex tiꞌ, xaheyiti tzet halbꞌil wuhan ta chitanhtzelaxilo yinh hunelnhe. Tato mach cheyilo texol, chextanhiloj, mach chu heqꞌoji yinh ebꞌnaj ayko ishowal teyinh,” xhi Komam. 14 Yet hekal chexok insatajan yinh hunun majan hex Israel hex tiꞌ; haꞌ xin huneꞌ majan ebꞌnaj Israel chinyehan xol tuꞌ, chiꞌok huneꞌ majan ebꞌnaj yuxhtanhe isbꞌa tuꞌ insatajan, haxa xol ebꞌnaj yuxhtanhe isbꞌa tuꞌ, chiꞌok hunun nhahil anma tuꞌ insatajan, haxa yinh hunun nhahil anma tuꞌ, chiꞌok hunun ebꞌnaj winaj insatajan yinh hununtajil. 15 Haꞌ xin mak chiꞌilchahi ta yiti tzet walan ta chitanhtzelaxiloj, haꞌ huneꞌ mak tuꞌ chinhuslaxkantoj yebꞌ yixal, yuninal yebꞌ sunil tzet aya, yuto iswatxꞌe istxꞌojal xol ebꞌnaj Israel, ismanhkꞌon istꞌinhanil chejbꞌanile aqꞌbꞌil wuhan, xhi Komam.

16 Haxa yet hunxa tzꞌayik, yinh sahabꞌ sakꞌayal ah yaꞌ Josué, yalni yaꞌ ta chihitziko konhobꞌ Israel yinh hunun majan, yinhnhena tuꞌ isyeni Komam Dios ebꞌnaj Israel titna yinh yaꞌ Judá. 17 Yalni yaꞌ Josué ta chiꞌok huneꞌ majan ebꞌnaj yuxhtanhe isbꞌa titna yinh yaꞌ Judá tuꞌ sata Komam, isyeni Komam ebꞌnaj titna yinh naj Zera. Haxa xol ebꞌnaj titna yinh naj Zera tuꞌ isyeni Komam naj Zabdi. 18 Haxa yet yok ebꞌnaj iskꞌahol naj Zabdi sata Komam, isyenilo Komam naj Acán, iskꞌahol naj Carmi, ismam icham naj Acán tuꞌ ye naj Zabdi, haꞌ xin ismam naj Zabdi haꞌ naj Zera. Haxa naj Zera tuꞌ xin, titna yinh yaꞌ Judá.

19 Lahwi tuꞌ, yalni yaꞌ Josué tet naj Acán:

—Hach wet konhobꞌ, ayojabꞌ yelapno Komam Dios yul hasat, kat hawaniko ismay Komam, koDiosal hanhonh Israelonh tiꞌ; chawalnilo wetan tzet istxꞌojal maxawatxꞌe, matzet xin chawebꞌa, xhi yaꞌ Josué.

20 Istaqꞌwi naj Acán:

—Yinh kaw yeli, wako inmulan tet Komam Jahawil, koDiosal, haꞌ hunteqꞌan tiꞌ witijan; 21 xol hunteqꞌan tzet ye tuꞌ ay bꞌey Jericó, wilan huneꞌ qꞌap qꞌap kaw kꞌul titna bꞌey Babilonia, yebꞌ 200 siclo chꞌen plata, yebꞌ hunlijan chꞌen oro, 50 (lahonh yoxkꞌal) siclo^b yalil. Wochenikojan hunteqꞌan tuꞌ, winitijan wetojan, mujbꞌil xin wuhan yul qꞌap inmantiadohan, haꞌ kaw yich xin ayayto chꞌen melyu wuhan, xhi naj.

22 Ischejnito yaꞌ Josué haywanh ebꞌnaj yatut naj Acán tuꞌ, isto ebꞌnaj yinh anhe, yilcha hunteqꞌan tuꞌ yu ebꞌnaj, ayayto chꞌen melyu yalanh yu naj. 23 Yinito ebꞌnaj hunteqꞌan tuꞌ tet yaꞌ Josué yebꞌ tet sunil ebꞌnaj Israel, yaniko ebꞌnaj sata Komam Dios. 24 Lahwi tuꞌ, yinito ebꞌnaj naj Acán bꞌey akꞌal Acor, yilaxpaxto chꞌen melyu plata yebꞌ qꞌap qꞌap, yebꞌ hunlijan chꞌen oro tuꞌ; yilaxpaxto ebꞌnaj iskꞌahol naj yebꞌ ebꞌix iskutzꞌin naj, yebꞌ ej iswakax naj, yebꞌ ej isburro naj, yebꞌ ej ismeꞌ naj, yebꞌ qꞌap qꞌap aykanh yatuto naj yebꞌ sunil tzet ay naj.

25 Yalni yaꞌ Josué tet naj Acán:

—¿Tzet yinh yuxin maxawiti huneꞌ isyaꞌtajil tiꞌ jibꞌanh? Wal xin yaqꞌabꞌkanayo Komam isyaꞌtajil tawibꞌanh, xhi yaꞌ Josué.

Hayet yalni yaꞌ hakaꞌ tuꞌ, isqꞌojnikamo sunil ebꞌnaj Israel naj Acán yebꞌ yuninal naj, isnhuslaxkanto naj. 26 Lahwi tuꞌ, istenbꞌankanh ebꞌnaj chꞌen chꞌen yibꞌanh naj Acán; tenantokanh chꞌen tinanh. Yu huneꞌ tuꞌ yuxin Acor ok isbꞌiho huneꞌ txꞌo txꞌotxꞌ tuꞌ; yexnheto xin yal-lax yinh txꞌotxꞌ tuꞌ tinanh. Hak tuꞌ yu istanh ishowal Komam yinh anma Israel.