Yinh tzet yu yaqꞌlax aykꞌayo konhobꞌ Jericó
6
Wal ispultahil konhobꞌ Jericó, kaw kꞌul yekaniko istel, yu chixiw anma tuꞌ tet ebꞌnaj Israel, machi xin hunu mak chu yoktoj, machi hunu mak chu yelpaxti yul konhobꞌ tuꞌ.2 Yalni Komam Dios tet yaꞌ Josué: «Hanintiꞌan chiwakojan konhobꞌ Jericó yul haqꞌabꞌ yebꞌ isreyal anma tuꞌ yebꞌ ebꞌnaj soldado ay bꞌey tuꞌ. 3 Haxa hex soldado Israel hex tiꞌ yulbꞌal wajebꞌ tzꞌayik chexekꞌ yinh sunil ishoyanil konhobꞌ tuꞌ, hunta el chexekꞌ hehoyoꞌ yinh hunun tzꞌayik. 4 Kat isbꞌabꞌi hujwanh ebꞌnaj sacerdote sat Kaxha yet isTrato Komam, kat yiqꞌni ebꞌnaj hunun yukꞌaꞌ noꞌ winaj meꞌ yu yoqꞌtzen ebꞌnaj. Haxa yinh ishuj tzꞌayik xin, hujel el chexekꞌ hehoyoꞌ konhobꞌ tuꞌ, wal ebꞌnaj sacerdote chiꞌok ebꞌnaj yoqꞌtzeꞌ yukꞌaꞌ noꞌ meꞌ tuꞌ.a 5 Haxa yet cheyabꞌeni ta nanxa chu yoqꞌtzen ebꞌnaj yukꞌaꞌ noꞌ meꞌ tuꞌ, kat yichiko yel heyaw yinh kaw ip, kat yay wuyna iskꞌubꞌal konhobꞌ hoyaniko yinh tuꞌ, kat heyokto yul konhobꞌ hunun hex chexto yinh yetkꞌulal bꞌay ay hex,» xhi Komam.
6 Lahwi tuꞌ, yawten yaꞌ Josué ebꞌnaj sacerdote, yalni yaꞌ: «Iweto Kaxha yet isTrato Komam, hujwanh hex xin chexbꞌabꞌi sata Kaxha tiꞌ, kat heyiqꞌni yukꞌaꞌ noꞌ winaj meꞌ yu heyoqꞌtzeni,» xhi yaꞌ. 7 Yalnipaxo yaꞌ tet konhobꞌ Israel: «Asiꞌwej kat hehoyni konhobꞌ tuꞌ, haxa xin ebꞌnaj soldado chibꞌabꞌi ebꞌnaj sata isKaxha isTrato Komam Jahawil,» xhi yaꞌ.
8 Isyijen ebꞌnaj sunil tzet yal yaꞌ Josué tuꞌ. Isbꞌabꞌi hujwanh ebꞌnaj sacerdote sata isKaxha Komam Jahawil, yoqꞌtzen ebꞌnaj noꞌ yukꞌaꞌ meꞌ tuꞌ, tzujan xin isKaxha isTrato Komam Jahawil yinta ebꞌnaj. 9 Wal ebꞌnaj soldado yet howal, bꞌabꞌi ebꞌnaj sata ebꞌnaj sacerdote tuꞌ, ay xin huneꞌxa majan ebꞌnaj ok tzujno yinta isKaxha Komam, wal ebꞌnaj sacerdote xin matxa islinhbꞌa ebꞌnaj yoqꞌtzen noꞌ yukꞌaꞌ meꞌ tuꞌ. 10 Yalni yaꞌ Josué tet ebꞌnaj soldado tato machi hunu ebꞌnaj chiꞌel yaw nitam istzoteli masanto yet chiyalni yaꞌ Josué tuꞌ ta chiꞌel yaw ebꞌnaj yinh kaw ip.
11 Ischejni yaꞌ Josué tato chishoyikꞌo isKaxhahil istrato Komam Jahawil konhobꞌ Jericó. Lahwi tuꞌ ismeltzo yaꞌ Josué yebꞌ ebꞌnaj yul campamento, haꞌ tuꞌ xin ekꞌto huneꞌ aqꞌbꞌal yibꞌanh ebꞌnaj. 12 Haxa yinh hunxa tzꞌayik yinh kaw sahabꞌ ah yaꞌ Josué, yinito ebꞌnaj sacerdote isKaxhahil istrato Komam Jahawil. 13 Haxa xin ebꞌnaj hujwanh sacerdote iqꞌnhe noꞌ yukꞌaꞌ meꞌ, bꞌabꞌi ebꞌnaj sata Kaxha tuꞌ, isbꞌelwi ebꞌnaj, chiyoqꞌtzen ebꞌnaj yukꞌaꞌ noꞌ meꞌ tuꞌ. Wal ebꞌnaj soldado yet howal, bꞌabꞌi ebꞌnaj sata ebꞌnaj sacerdote tuꞌ, nan xin ebꞌnaj soldado kankano tzujno yinta isKaxhahil istrato Komam; machi xin isbꞌej ebꞌnaj sacerdote yoqꞌtzen yukꞌaꞌ noꞌ meꞌ tuꞌ. 14 Haꞌ yinh iskabꞌ tzꞌayik ekꞌpaxo ebꞌnaj ishoyoꞌ konhobꞌ lahan hakaꞌ yu ebꞌnaj yinh bꞌabꞌel tzꞌayik; lahwi tuꞌ ismeltzo ebꞌnaj yul campamento hunelxa, hak tuꞌ yute ebꞌnaj yulbꞌal wajebꞌ tzꞌayik.
15 Haxa yinh ishuj tzꞌayik, kaw sahabꞌ ahwano ebꞌnaj, isto ebꞌnaj ishoyoꞌ konhobꞌ Jericó hunelxa, hujel xin ekꞌ ebꞌnaj ishoyoꞌ konhobꞌ yinh huneꞌ tzꞌayik tuꞌ. 16 Haxa yet ishujel tuꞌ, yet yoqꞌtzen ebꞌnaj sacerdote yukꞌaꞌ noꞌ meꞌ, yalni yaꞌ Josué tet anma: «¡Elojabꞌ heyaw yinh kaw ip! Haꞌ Komam Dios maꞌaniko huneꞌ konhobꞌ tuꞌ yul koqꞌabꞌ. 17 Haꞌ sunil konhobꞌ tuꞌ yebꞌ sunil anma ay yul konhobꞌ wiyom istanhtzelaxkaniloj, yuto hak tuꞌ yalni Komam, hanhe ix Rahab, ix txꞌoj ye iswiꞌ, mach chitanhtzelaxiloj yebꞌ sunil mak ayikꞌo iskꞌatanh yul yatut, yuto yebꞌalo ix ebꞌnaj jet Israelal hul ilno konhobꞌ Jericó yet yalanhtokanoj. 18 Wal hex xin machi hunu tzet ye tuꞌ ay yul konhobꞌ tiꞌ cheyitoj yu yok heyu; maka hetzabꞌni, yuto halbꞌilxa yu Komam tato wiyom istanhtzelaxiloj; yuto ta mach cheyije, cheyiti tzꞌaktiꞌ yibꞌanh campamento tiꞌ, kat xin yel kotxꞌixobꞌal heyu. 19 Yajaꞌ wal chꞌen oro yebꞌ chꞌen plata yebꞌ sunil tzet watxꞌebꞌil yinh chꞌen bronce maka chꞌen hierro, chiꞌilaxti tet Komam kat yalaxiko yul iskꞌuwanbꞌal Komam,» xhi yaꞌ Josué.
20 Lahwi tuꞌ, yoqꞌtzen ebꞌnaj sacerdote yukꞌaꞌ noꞌ meꞌ, hayet yabꞌen anma Israel huneꞌ tuꞌ yichiko anma yel yaw yinh kaw ip, yay wuyna iskꞌubꞌal konhobꞌ tuꞌ, yaykꞌaykano yul isqꞌabꞌ ebꞌnaj Israel, yokto ebꞌnaj yul konhobꞌ yinh anhe yinh yetkꞌulal bꞌay ay hunun ebꞌnaj. 21 Ispotxꞌnikamo ebꞌnaj yu yespada sunil ebꞌnaj winaj yebꞌ ebꞌix ix yebꞌ ebꞌnaj tzehtaj yebꞌ ebꞌix qꞌopo yebꞌ ebꞌnaj ichamta winaj ay yul konhobꞌ tuꞌ, ispotxꞌnipaxokamo ebꞌnaj noꞌ wakax, noꞌ meꞌ yebꞌ noꞌ burro, istanhtzenilo ebꞌnaj sunil tzet ay yul konhobꞌ.
22 Yalni yaꞌ Josué tuꞌ tet ebꞌnaj kawanh bꞌeykꞌo ilno konhobꞌ Jericó hakaꞌ tiꞌ: «Asiꞌwe bꞌey yatut ix Rahab, ix txꞌoj ye iswiꞌ, kat heyinilti ix yebꞌ sunil mak ay yul yatut ix, hakaꞌtikꞌa yu hetaqꞌwen tet ix,» xhi yaꞌ Josué. 23 Isto ebꞌnaj yatut ix, yinilti ebꞌnaj ix Rahab tuꞌ yebꞌ ismam, yebꞌ ismiꞌ ix, yebꞌ ej isnoh ix, yebꞌ sunil mak ayto yuh isbꞌa ix yebꞌi. Yinito ebꞌnaj ix yebꞌ sunil mak tuꞌ yintalto campamento. 24 Isnhusnito ebꞌnaj Israel konhobꞌ tuꞌ yebꞌ sunil tzet ay bꞌey tuꞌ. Hanhe xin chꞌen oro yebꞌ chꞌen plata yebꞌ tzetaj watxꞌebꞌilayo yinh chꞌen bronce yebꞌ chꞌen hierro; sunil chꞌen tuꞌ yilti ebꞌnaj, yaniko ebꞌnaj chꞌen yul iskꞌuwanbꞌal Komam. 25 Wal yaꞌ Josué iskolilo yaꞌ ix Rahab yebꞌ ismam ix, yebꞌ ismiꞌ ix, yebꞌ isnoh ix, yebꞌ makta ayto yu isbꞌa ix yebꞌi, yuto yebꞌalo ix ebꞌnaj Israel ischej yaꞌ Josué bꞌeykꞌo ilno konhobꞌ Jericó. Hataxtikꞌa tuꞌ xin iskankano ix Rahab yebꞌ sunil mak ay yu ix xol anma Israel masanto tinanh.b
26 Lahwi tuꞌ, yalni yaꞌ Josué hunteqꞌan tzotiꞌ tiꞌ sata Komam Jahawil: «Haꞌ mak chiꞌok watxꞌenokanh konhobꞌ Jericó tiꞌ, chitzꞌaktiꞌnhelax yu Komam Dios, chikam isbꞌabꞌel kꞌahol yet chiswatxꞌenkanh xeꞌ konhobꞌ tiꞌ; chikampaxo iskꞌahol islahobꞌal unin yet chiꞌok ispultahil konhobꞌ,» xhi yaꞌ Josué.
27 Kaw kolwa Komam Dios yinh yaꞌ Josué, ispujnakanh isqꞌumal yaꞌ sunil sat txꞌotxꞌ tuꞌ.