Alaxiko circuncisión yinh ebꞌnaj Israel bꞌey txꞌotxꞌ Gilgal
5
Sunil ebꞌnaj isreyal anma amorreo ay isqꞌaxebꞌikꞌti haꞌ Jordán, ay yinh yetkꞌulal bꞌay chito tzꞌayik, yebꞌ ebꞌnaj isreyal anma cananeo ayayo iskawilal istiꞌ haꞌ Mar Mediterráneo yabꞌelo ebꞌnaj isqꞌumal tato ispoh Komam haꞌ Jordán, istajayto haꞌ bꞌay ekꞌto anma Israel. Hayet yabꞌenilo ebꞌnaj huneꞌ tuꞌ, isxiwkanokanh ebꞌnaj, machi xin hunu ebꞌnaj islinhbꞌa isbꞌa yaniko howal yinh ebꞌnaj Israel.a2 Yinh hunteqꞌan tzꞌayik tuꞌ, tzotel Komam Jahawil tet yaꞌ Josué, yalni Komam hakaꞌ tiꞌ: «Watxꞌe hayebꞌo chꞌen chꞌen chililon chawuteti yeh hakaꞌ chꞌen cuchillo, kat hawaqꞌni circuncidar ebꞌnaj Israel,» xhi Komam.
3 Iswatxꞌen yaꞌ Josué chꞌen chꞌen hakaꞌ cuchillo, yaqꞌni circuncidar yaꞌ ebꞌnaj Israel bꞌey istzalanil Aralot. 4 Yaqꞌni circuncidar yaꞌ Josué sunil ebꞌnaj Israel tuꞌ, yuto ebꞌnaj el bꞌey Egipto, ebꞌnaj kꞌulxa isto yinh howal kamilo ebꞌnaj sat txꞌotxꞌ desierto yinh bꞌel. 5 Yuto sunil ebꞌnaj el bꞌey Egipto tuꞌ, ayxako circuncisión yinh ebꞌnaj. Wal sunil ebꞌnaj pitzkꞌa bꞌey txꞌotxꞌ desierto yet ayko ebꞌnaj yinh isbꞌel, maxhto ayoko circuncisión yinh ebꞌnaj. 6 Ebꞌnaj Israel tuꞌ yulbꞌal 40 (kawinaj) habꞌil ekꞌ ebꞌnaj sat txꞌotxꞌ desierto, yuxin ebꞌnaj ayko yinh ishabꞌilal isto yinh howal el bꞌey Egipto kam ebꞌnaj bꞌey txꞌotxꞌ desierto, yuto mach yijemo yute isbꞌa ebꞌnaj tet Komam Jahawil. Yuxin yalkano Komam tet ebꞌnaj tato mach chil ebꞌnaj txꞌo txꞌotxꞌ yaltekano Komam tet ebꞌyaꞌ jichmam ta chiyaqꞌ jet, haꞌ ton huneꞌ txꞌo txꞌotxꞌ kaw kꞌul yebꞌ kaw yax sat.b 7 Yuxin yaqꞌ circuncidar yaꞌ Josué iskꞌahol ebꞌnaj kamto tuꞌ, yaniko Komam iskꞌahol ebꞌnaj tuꞌ isseleloj. Ebꞌnaj kꞌahole tuꞌ, maxhto ayoko yechel circuncisión yinh ebꞌnaj yuto ayko ebꞌnaj yinh isbꞌel.c 8 Yet lahwi yaqꞌlaxkano circuncidar ebꞌnaj winaj Israel tuꞌ, iskankano ebꞌnaj xewo yul campamento masanto kawxilo ebꞌnaj. 9 Lahwi tuꞌ yalni Komam tet yaꞌ Josué: «Hayet maꞌokkano yechel circuncisión teyinh tiꞌ, haꞌ chaliloj ta chinmajchekanojan istiꞌ ebꞌnaj Egipto isbꞌuchwa teyinh,» xhi Komam. Yuxin Gilgald yijkano isbꞌi huneꞌ txꞌotxꞌ tuꞌ; yexnheto xin isbꞌina tinanh.
10 Ebꞌnaj Israel tuꞌ, ehayo ebꞌnaj yul iscampamento bꞌey txꞌotxꞌ Gilgal, haxa yinh qꞌejbꞌiyal yinh 14 (iskanhlahonhebꞌ) tzꞌayik yinh ixahaw tuꞌ, yekꞌtzen ebꞌnaj qꞌinh pascua bꞌey akꞌal satakꞌti konhobꞌ Jericó. 11 Yinhtikꞌa huneꞌ tzꞌayik tuꞌ, haxa sat tzꞌunubꞌ chiꞌel sat txꞌo txꞌotxꞌ tuꞌ isloh ebꞌnaj, iswahni ebꞌnaj ixim pan machi yanhal aykoj, iskꞌuxnipaxo ebꞌnaj iswiꞌ ixim akꞌ trigo qꞌantzebꞌil. 12 Haxa yinh huneꞌxa sahabꞌ sakꞌayal xin, matxa ay maná, yuto haxa sat tzꞌunubꞌ chiꞌel sat txꞌo txꞌotxꞌ bꞌey Canaán tuꞌ haxa isloh anma Israel huneꞌ habꞌil tuꞌ.
Yil yaꞌ Josué yinh naj ijbꞌalom yinh yejercito Komam
13 Yet hunel yet ayko yaꞌ Josué iskawilal konhobꞌ Jericó, hayet istꞌanhxito yaꞌ, yilni yaꞌ huneꞌ naj hakaꞌ soldado, ayko huneꞌ chꞌen espada ahnati yul yatut yul isqꞌabꞌ, ishitziko yaꞌ Josué iskꞌatanh naj, isqꞌambꞌen yaꞌ Josué tuꞌ:
—¿Mak hach anmahil, jetbꞌimihanh hawehi mato yetbꞌi ebꞌnaj ayko ishowal jinhanh? xhi yaꞌ Josué.
14 Istaqꞌwi naj:
—Machoj, hanintiꞌan Ijbꞌalom yinh yejercito Komam Jahawil, xhi naj. Hayet yabꞌen yaꞌ Josué hakaꞌ tuꞌ, yay jahno yaꞌ, yay xulno yaꞌ sat txꞌotxꞌ, yinayo isbꞌa yaꞌ tet. Isqꞌambꞌen yaꞌ Josué tet naj:
—¿Mamin, tzet chawoche chawal wetan hanin hachejabꞌ intiꞌan? xhi yaꞌ.
15 Istaqꞌwi naj Ijbꞌalom yinh yejercito Komam Jahawil:
—Ilo haxanhabꞌ yinh hawoj, yuto bꞌay linhan hach tiꞌ, kaw txahul, yet Komam yehi, xhi naj.
Isyijen yaꞌ Josué tzet yal naj tuꞌ.