4 Lahwi tuꞌ, yawtenti yaꞌ Josué ebꞌnaj 12 (kabꞌlahonhwanh) issikꞌlelo tuꞌ, hunun ebꞌnaj yinh hunun majan ebꞌnaj Israel. 5 Yalni yaꞌ tet ebꞌnaj: «Ayanhweto satakꞌti isKaxhahil isTrato Komam Dios Jahawil ayko yiktabꞌal haꞌ Jordán, kat heyahnato hunun chꞌen yibꞌanh hewixikꞌ, hunun chꞌen yinh hunun majan ebꞌnaj Israel, hak tuꞌ xin kabꞌlahonhebꞌ chꞌen yinh sunil. 6 Haꞌ chꞌen tuꞌ chiꞌok yecheloj yu hetxumnilo yinh tzet yu heyekꞌto yul huneꞌ bꞌeh yiktabꞌal haꞌ; yebꞌ yet chisqꞌambꞌen heyuninal teyet yet bꞌaqꞌinh hakaꞌ tiꞌ: “¿Tzet chal yelapno hunteqꞌan chꞌen chꞌen tiꞌ?” ta xhi.^a 7 Kat heyalni tet: “Hayet yekꞌto isKaxhahil isTrato Komam Jahawil xol haꞌ Jordán, ispohni isbꞌa haꞌ sata isKaxha Komam, yuxin haꞌ chꞌen chꞌen bꞌulanayo tiꞌ ayko yechelo yinh tzet iswatxꞌe Komam jinh hanhonh Israelonh tiꞌ,” kexchi,» xhi yaꞌ Josué.

8 Isyijen ebꞌnaj tzet yal yaꞌ Josué tuꞌ, yinahti ebꞌnaj kabꞌlahonhebꞌ chꞌen chꞌen bꞌay ispoh isbꞌa haꞌ Jordán tuꞌ, hunun chꞌen yinh hunun majan ebꞌnaj Israel. Yinito ebꞌnaj chꞌen bꞌey campamento, isbꞌulbꞌankanh ebꞌnaj chꞌen hakaꞌtikꞌa yu yalni Komam Dios tet yaꞌ Josué. 9 Ischejnipaxo yaꞌ Josué bꞌulbꞌalaxokanh 12 (kabꞌlahonhebꞌxa) chꞌen chꞌen yul haꞌ Jordán, bꞌay ok linhno ebꞌnaj sacerdote iqꞌnhe isKaxhahil isTrato Komam. Hunteqꞌan chꞌen chꞌen tuꞌ bꞌulankanokanh chꞌen xol haꞌ Jordán tinanh.

10 Hayet linhaniko ebꞌnaj sacerdote iqꞌnhe teꞌ isKaxha Komam Dios yiktabꞌal haꞌ Jordán, isyijen anma Israel sunil tzet yal Komam tet yaꞌ Josué, yijnipaxkano isbꞌa sunil tzet yalkano yaꞌ Moisés tet yaꞌ Josué tuꞌ. Haꞌ anma Israel, kaw yinh anhe ekꞌto yiktabꞌal haꞌ Jordán. 11 Haxa yet xaꞌekꞌto sunil anma Israel isqꞌaxebꞌikꞌto haꞌ xin, yekꞌpaxto ebꞌnaj sacerdote iqꞌnhe isKaxha Komam. Lahwi tuꞌ, isbꞌabꞌi ebꞌnaj sata sunil anma Israel. 12 Ekꞌpaxto ebꞌnaj soldado Israel titna yinh yaꞌ Rubén yebꞌ yinh yaꞌ Gad, yebꞌ yikta majan ebꞌnaj titna yinh yaꞌ Manasés. Sunil ebꞌnaj soldado tuꞌ, iqꞌbꞌil ischꞌen ebꞌnaj yet howal, bꞌabꞌi xin ebꞌnaj sata sunil anma Israel, hakaꞌtikꞌa yu yalnikano yaꞌ Moisés. 13 Aymi 40 mil isbꞌisil ebꞌnaj soldado yet howal bꞌabꞌi sata isKaxha Komam Jahawil, yapnikano sunil anma Israel tuꞌ sata Komam Jahawil, satakꞌti konhobꞌ Jericó.^b 14 Yinh huneꞌ tzꞌayik tuꞌ, kaw niman yelapno elkaniko yaꞌ Josué yul sat sunil anma Israel yu Komam Dios, wal xin yijem yute isbꞌa anma Israel tet yaꞌ, hakaꞌ isyijemal tet yaꞌ Moisés yulbꞌal hunteqꞌan habꞌil ehikꞌo yaꞌ.

15 Lahwi tuꞌ, istzotel Komam Dios tet yaꞌ Josué, yalni Komam: 16 «Hal tet ebꞌnaj sacerdote iqꞌnhe Kaxha yet isTrato Komam tato chiꞌahti ebꞌnaj xol haꞌ,» xhi Komam.

17 Wal yaꞌ Josué yal yaꞌ tet ebꞌnaj sacerdote hakaꞌ tiꞌ: «Ahanhweti xol haꞌ Jordán,» xhi yaꞌ. 18 Hayet yel ebꞌnaj sacerdote iqꞌnhe isKaxha Komam Jahawil yiktabꞌal haꞌ Jordán, yanayo ebꞌnaj yoj yibꞌanh txꞌo txꞌotxꞌ tajin ayko istiꞌ haꞌ, yichiko haꞌ Jordán tuꞌ isbꞌelwi yul isbꞌeh hunelxa, isnohkanh haꞌ yul isbꞌeh hakaꞌtikꞌa ye yet yalanhtokanoj.

19 Haꞌ yinh 10 (islahonhebꞌ) tzꞌayik yinh bꞌabꞌel ixahaw yekꞌto anma Israel yul haꞌ Jordán, yapni bꞌey Gilgal, satakꞌti Jericó, yinh yetkꞌulal bꞌay chiꞌahilo tzꞌayik. 20 Haꞌ bꞌey tuꞌ xin, islatzꞌbꞌakanh yaꞌ Josué chꞌen kabꞌlahonhebꞌ chꞌen ilaxahti yul haꞌ Jordán. 21 Yalni yaꞌ Josué tet ebꞌnaj Israel: «Yet bꞌaqꞌinhal yet chisqꞌambꞌen heyuninal teyet: “¿Tzet chal yelapno hunteqꞌan chꞌen chꞌen tiꞌ?” ta xhi. 22 Cheyal tet heyuninal yinh tzet chal yelapnoj: “Hanhonh Israelonh tiꞌ konhekꞌto yul huneꞌ bꞌeh tajin yiktabꞌal haꞌ Jordán tiꞌ,” kexchi. 23 Cheyalni tet heyuninal yinh tzet yu ispohni Komam Jahawil koDiosal haꞌ Jordán, jekꞌtojanh kosunil yul huneꞌ bꞌeh tajin, hakaꞌ yu ispohni Komam Jahawil haꞌ Kajinh Mar yet jekꞌto yiktabꞌal haꞌ. 24 Hak tuꞌ chu yohtanhenilo anma ay yul sat yibꞌanhqꞌinal tiꞌ tato kaw aykano yip Komam Dios. Haxa hex tiꞌ xin yilal hexiw tet Komam Jahawil, koDiosal yinh sunilbꞌal tzꞌayik,» xhi yaꞌ Josué.