Yet isqꞌaxponikꞌto ebꞌnaj Israel yibꞌanh haꞌ Jordán
3
Haxa yinh huneꞌxa tzꞌayik, yinh kaw sahabꞌ sakꞌayal yel yaꞌ Josué yebꞌ sunil anma Israel bꞌey txꞌotxꞌ Sitim, yapni ebꞌnaj istiꞌ haꞌ Jordán, yajaꞌ mach qꞌaxponikꞌto ebꞌnaj yibꞌanh haꞌ yinh huneꞌ tzꞌayik tuꞌ, wal xin kantokano ebꞌnaj istiꞌ haꞌ. 2 Haxa yinh yox tzꞌayik yekꞌ ebꞌnaj yahawil konhobꞌ Israel xolaj campamento, 3 yalni ebꞌnaj chejbꞌanile tet anma Israel hakaꞌ tiꞌ: «Hayet cheyilni yekꞌto isKaxhahil istrato Komam Dios iqꞌbꞌil yu ebꞌnaj sacerdote, ebꞌnaj titna yinh yaꞌ Leví, xol haꞌ Jordán, chexel bꞌay ay hex, kat heyok tzujno yintaj. 4 Hak tuꞌ chu heyohtanhenilo bꞌay kaw hetohi, yuto maxhto hunujex xakexekꞌ yul bꞌeh tuꞌ yet yalanhtokanoj. Yajaꞌ mach chexhitziko yinh isKaxhahil isTrato Komam,a wal xin nahat chexkantzujnoj, huneꞌ kilómetro chexkan tzujno yintaj,» xhi ebꞌnaj.5 Yalni yaꞌ Josué tet konhobꞌ Israel: «Wal tinanh sajnhewe hebꞌa, yuto yet hekal cheyil iswatxꞌen Komam Jahawil kꞌaybꞌalkꞌule koxol,» xhi yaꞌ. 6 Yalnipaxo yaꞌ Josué tet ebꞌnaj sacerdote: «Bꞌatxwekanh isKaxhahil isTrato Komam, kat heyekꞌto yebꞌ teꞌ xol haꞌ sata sunil anma tiꞌ,» xhi yaꞌ.
Isbꞌatxnikanh ebꞌnaj teꞌ kaxha tuꞌ, isbꞌabꞌi ebꞌnaj sata sunil anma. 7 Lahwi tuꞌ, istzotel Komam tet yaꞌ Josué, yalni hakaꞌ tiꞌ: «Haꞌ yinh huneꞌ tzꞌayik tiꞌ, chiꞌichiko wanikojan hamay yul sat anma Israel, hak tuꞌ chu yohtanheniloj ta ayinikojan hawetbꞌihoj, hakaꞌ yu wokan yetbꞌiho yaꞌ Moisés. 8 Wal hach xin chachej ebꞌnaj sacerdote ta chisbꞌatxto ebꞌnaj teꞌ isKaxhahil inTratohan, hayet chꞌayto ebꞌnaj istiꞌ haꞌ Jordán tuꞌ xin, kat yok linhno ebꞌnaj xol haꞌ,» xhi Komam.
9 Lahwi tuꞌ, yalni yaꞌ Josué tet konhobꞌ Israel: «Hitzanhwetij, kat heyabꞌen tzet chiyal Komam Jahawil, koDiosal, 10 yu tzet cheyil tinanh, haꞌ chiꞌaqꞌno heyohtanheloj tato ayko Komam Dios itzitz koxol, kat xin yinilo Komam anma cananeo yinh kosat, yebꞌ anma hitita, yebꞌ anma heveo, yebꞌ anma ferezeo, yebꞌ anma gergeseo, yebꞌ anma amorreo, yebꞌ anma jebuseo. 11 Tinanh xin, haꞌ teꞌ Kaxha yet istꞌinhanil istrato Komam Dios, Yahawil yinh txꞌo txꞌotxꞌ, haꞌ chibꞌabꞌayto xol haꞌ Jordán kosataj. 12 Yuxin sayilo 12 (kabꞌlahonhwanh) ebꞌnaj Israel, hunun ebꞌnaj yinh hunun majan yikꞌal yaꞌ Israel. 13 Hayet chiyanayto yoj ebꞌnaj sacerdote, ebꞌnaj iqꞌnhe teꞌ Kaxha yet istrato Komam Jahawil, Yahawil yinh txꞌo txꞌotxꞌ, xol haꞌ Jordán, kat ispohni isbꞌa haꞌ, yuto ha haꞌ chibꞌelwi yayiloj chislinhbꞌa isbꞌa, kat islatzꞌbꞌankanh isbꞌa haꞌ hakaꞌ kꞌubꞌ,» xhi yaꞌ Josué tuꞌ.
14 Lahwi tuꞌ xin yinikanh anma Israel yatut watxꞌebꞌil yinh qꞌap qꞌap yu yekꞌto anma xol haꞌ Jordán, bꞌabꞌel xin ebꞌnaj sacerdote iqꞌnhe teꞌ Kaxha yet isTrato Komam sata anma. 15 Hayet yichiko yokto ebꞌnaj sacerdote xol haꞌ, ischakꞌanbꞌi yoj ebꞌnaj yu ha haꞌ istiꞌ haꞌ tuꞌ; hunteqꞌan tzꞌayik tuꞌ bꞌay chikꞌuplaxkanh ixim trigo, kaw chichꞌibꞌkanh haꞌ Jordán. 16 Haxa ha haꞌ chiꞌayilo yibꞌanh, islinhbꞌa isbꞌa haꞌ, islatzꞌbꞌakanh isbꞌa haꞌ, kaw xin nahat to haꞌ yetkꞌulal konhobꞌ Adán, iskawilal Saretán. Haxapaxo haꞌ ay yalanh xin, tokano haꞌ, masanta apnikano haꞌ xol haꞌ Mar Kamom. Hak tuꞌ xin yu ispohni isbꞌa haꞌ Jordán tuꞌ, yekꞌto anma Israel yiktabꞌal haꞌ yul huneꞌ bꞌeh tajin, satakꞌti konhobꞌ Jericó. 17 Wal ebꞌnaj sacerdote iqꞌnhe isKaxhahil isTrato Komam, ok linhno ebꞌnaj bꞌay tajin yiktabꞌal haꞌ Jordán, hak tuꞌ xin yu yekꞌto sunil anma Israel yiktabꞌal haꞌ bꞌay tajin.