Lahwi tuꞌ isto ebꞌnaj, yapni ebꞌnaj, isqꞌanni ebꞌnaj bꞌay chiway bꞌey yatut huneꞌ ix ix txꞌoj ye iswiꞌ, chiyij Rahab.^b 2 Yajaꞌ xin ay mak bꞌey halno tet naj isreyal konhobꞌ Jericó tuꞌ hakaꞌ tiꞌ:

—Mamin, haꞌ yinh huneꞌ aqꞌbꞌal tiꞌ, ay ebꞌnaj Israel mahul ilno kotxꞌotxꞌ, xhi ebꞌnaj.

3 Ischejnito naj isreyal konhobꞌ Jericó tuꞌ yalno tet ix Rahab hakaꞌ tiꞌ:

—Chejilti ebꞌnaj Israel mahul isqꞌanaꞌ bꞌay chiway bꞌey hawatut tiꞌ, kat hawaniko ebꞌnaj yul inqꞌabꞌan, yuto tonhe chihul ebꞌnaj yilaꞌ kotxꞌotxꞌ tiꞌ, xhi ebꞌnaj chejabꞌ.

4 Yajaꞌ xin ebꞌabꞌilxato ebꞌnaj kawanh yu ix; yalnito ix tet ischejabꞌ naj rey hakaꞌ tiꞌ:

—Yeli ay ebꞌnaj mahul isqꞌanaꞌ bꞌay chiwayi, yajaꞌ mach wohtajojan bꞌay ay ebꞌnaj. 5 Yajaꞌ yet maqꞌejbꞌayoj yet lanhanxa ispebꞌalax ispultahil konhobꞌ tiꞌ, mato ebꞌnaj, yajaꞌ xin mach wohtajojan tzet bꞌehal maschato ebꞌnaj; asiꞌwe yinh anhe hetzujuyo ebꞌnaj tinanh, chito tzujchayo ebꞌnaj heyu, xhi ix.

6 Yajaꞌ xin yihto ix ebꞌnaj yibꞌanh yakꞌalil yatut, yebꞌanto ix ebꞌnaj xol txꞌiꞌal topan teꞌ lino ayahto tajo bꞌey tuꞌ.

7 Hak tuꞌ yu isto ebꞌnaj issoldado naj rey saywal yinh ebꞌnaj yulaj bꞌeh chito bꞌey haꞌ Jordán, masanta istiꞌ haꞌ, bꞌay kawil yehati yich haꞌ. Hayet yelto ebꞌnaj soldado istzujnoyo ebꞌnaj tuꞌ, ispebꞌalaxkano ispultahil konhobꞌ Jericó. 8 Hayet maxhto chiwaykanh ebꞌnaj kawanh Israel tuꞌ, yahto ix Rahab yibꞌanh yakꞌalil yatut bꞌay ayahto ebꞌnaj, yalni ix tet ebꞌnaj:

9 —Kaw wohtajan ta xayaqꞌ Komam heYahawil txꞌo txꞌotxꞌ tiꞌ teyet, yuxin hul huneꞌ xiwkilal jibꞌanhanh yu Komam. Kaw sunil anma ay yul huneꞌ konhobꞌ tiꞌ, lanhan ispax yip yu xiwkilal teyet. 10 Xajabꞌehanh isqꞌumal tato yet heyel yul konhobꞌ Egipto ispohni Komam heYahawil haꞌ Kajinh Mar yu heyekꞌto yiktabꞌal haꞌ yul bꞌeh tajin. Jabꞌenpaxojanh tato hetanhtzelo kawanh ebꞌnaj isreyal anma amorreo; anma ay isqꞌaxebꞌikꞌto haꞌ Jordán, haꞌ ton naj Sehón yebꞌ naj Og. 11 Hayet jabꞌenanh isqꞌumal tuꞌ, kaw konhxiwkanokanhanh, yuxin machi hunu mak tiꞌ chiqꞌoji yaniko howal teyinh, yuto heYahawil hex tiꞌ, haꞌ ton Komam Dios isDiosal satkanh yebꞌ isDiosal sat txꞌo txꞌotxꞌ tiꞌ. 12 Yuxin chinqꞌanan teyet tato cheyaqꞌ bꞌinaho isbꞌi Komam heYahawil, cheyalni tato chexkolwa winhan yebꞌ mak ay yu inmaman yul watuttiꞌan, hakaꞌ mayu inkolwahan teyinh. Aqꞌwe hunu yechel wetan chiyeniloj ta kaw yel cheyala, 13 ta chekolkanilo inmaman yebꞌ inmiꞌan yebꞌ sunil ebꞌnaj innohan yebꞌpaxo ebꞌix innohan, yebꞌ sunil yuninal. ¡Mach chonhhetanhtzelojanh! xhi ix.

14 Istaqꞌwi ebꞌnaj tet ix:

—Chijaqꞌ kobꞌahanh tawinh, tanhe machi bꞌay chawalikꞌo huneꞌ tiꞌ. Hayet chaqꞌni Komam Jahawil txꞌo txꞌotxꞌ tiꞌ jetanh, kꞌul chijute kobꞌahanh tawinh, chachkokolilojanh, xhi ebꞌnaj tet ix.

15 Ix Rahab tuꞌ, ayko yatut ix yinh iskꞌubꞌal konhobꞌ, yuxin yul wentanah yalti ix ebꞌnaj yinh huneꞌ lasu. 16 Hayet maxhto chiꞌayti ebꞌnaj, yalni ix tet ebꞌnaj:

—As ebꞌawe hebꞌa iswiꞌ witz, haxinwal mach chexilcha yu ebꞌnaj to kexsaynoj, wal xin cheyebꞌa hebꞌa oxebꞌ tzꞌayik bꞌey tuꞌ masanto yet chimeltzo ebꞌnaj elto kexissaynoj. Lahwi tuꞌ kat heto yinh hebꞌel bꞌay ay hex, xhi ix tet ebꞌnaj.

17 Istaqꞌwi ebꞌnaj tet ix:

—Hanhonhtiꞌanh chikoyijehanh tzet makotaqꞌwe jubꞌanh tawinh. 18 Yuxin yet chonhhulanh janokojanh howal yinh konhobꞌ tiꞌ, chalokbꞌayto hunu lasu kaj tiꞌ yul wentanah bꞌay chonhayto tꞌunhno tiꞌanh; kat hakutxbꞌan habꞌa yebꞌ hamam, hamiꞌ, yebꞌ sunil hanoh, yebꞌ sunil mak ayto hawu habꞌa yebꞌ bꞌey hawatut tiꞌ. 19 Tato ay hunu mak chiꞌelto yul nha tiꞌ yet ayko howal kat iskam juhanh, yinh hakaꞌ tuꞌ machi ok iskamikal tuꞌ komulojanh, yuto haꞌ chisayni kamikal yinh; yajaꞌ ta ayikti yul nha tiꞌ, kat iskam juhanh, yinh hakaꞌ tuꞌ chiꞌok huneꞌ tuꞌ komulojanh. 20 Yajaꞌ ta chawalilo huneꞌ tiꞌ, wal tuꞌ matxa yilalo chikoyijehanh tzet chijaltekanojanh tawet tiꞌ, xhi ebꞌnaj.

21 Istaqꞌwi ix:

—Kꞌultikꞌa hakaꞌ heyalni tiꞌ, xhi ix.

Istaqꞌlikano ebꞌnaj tet ix, isto ebꞌnaj. Lahwi tuꞌ isximnikaniko ix huneꞌ txꞌanh lasu kaj jilni yinh isventanahil yatut.

22 Isto ebꞌnaj kawanh Israel tuꞌ yebꞌano isbꞌa iswiꞌ witz, yehayo ebꞌnaj oxebꞌ tzꞌayik bꞌey tuꞌ, masanto yet ismeltzo ebꞌnaj soldado bꞌey saywal yinh ebꞌnaj. Kaw xin sunil bꞌay ekꞌ ebꞌnaj soldado tuꞌ saywal yinh ebꞌnaj, yajaꞌ machi ilcha ebꞌnaj yu ebꞌnaj. 23 Lahwi tuꞌ, yayti ebꞌnaj kawanh Israel tuꞌ iswiꞌ witz, isqꞌaxponikꞌto ebꞌnaj yibꞌanh haꞌ Jordán, yapni ebꞌnaj bꞌay ay yaꞌ Josué, iskꞌahol yaꞌ Nun. Yichiko ebꞌnaj yalni sunil tzet bꞌey ebꞌnaj yilaꞌ bꞌey tuꞌ. 24 Yalni ebꞌnaj tet yaꞌ hakaꞌ tiꞌ: «Xayako Komam Dios Jahawil txꞌo txꞌotxꞌ tuꞌ yul koqꞌabꞌ, yuto sunil anma ay yul konhobꞌ, lanhan ispax yip yu xiwkilal jet,» xhi ebꞌnaj.