JOSUÉ
Hum tzꞌibꞌnhebꞌilkano yu yaꞌ Josué
1. CHIꞌOKKANO TXꞌOTXꞌ CANAÁN YU EBꞌNAJ ISRAEL
(1:1–12:24)
Iswatxꞌe isbꞌa ebꞌnaj Israel yinh tzet chiyu isqꞌoji ebꞌnaj yinh anma ay bꞌey Canaán
1
Hayet lahwi iskamto yaꞌ Moisés, ischejabꞌ Komam Dios, istzotel Komam tet yaꞌ Josué, iskꞌahol yaꞌ Nun; yaꞌ Josué tuꞌ ischejabꞌ yaꞌ Moisés yehi. Yalni Komam tet yaꞌ Josué hakaꞌ tiꞌ: 2 «Wal tinanh xakam yaꞌ Moisés inchejabꞌan, yuxin hach tiꞌ chawijbꞌato konhobꞌ Israel yinh isbꞌel, chaxhqꞌaxponikꞌto yibꞌanh haꞌ Jordán yebꞌi, kat heyapni sat txꞌo txꞌotxꞌ chiwaqꞌan teyet hex Israel hex tiꞌ.a 3 Hakaꞌtikꞌa yu walnihan tet yaꞌ Moisés; sunil txꞌo txꞌotxꞌ bꞌay chilakexekꞌi, bꞌay cheyayo heyoj, haninan chiwaqꞌkanojan txꞌotxꞌ teyet. 4 Sunil txꞌotxꞌ ay bꞌey txꞌotxꞌ desierto, yebꞌ txꞌotxꞌ Líbano masanta chiꞌapni yinh haꞌ niman Éufrates chiwaqꞌan teyet; chiwaqꞌnipaxojan sunil istxꞌotxꞌ ebꞌnaj hitita teyet masanta chiꞌapni yinh haꞌ Niman Marb yetkꞌulal bꞌay chito tzꞌayik. 5 Yulbꞌal tiempo ay hakawil yul sat yibꞌanhqꞌinal tiꞌ, machi hunu mak chiqꞌoji tawinh; ayinnhetikꞌakojan hawetbꞌihoj hakaꞌ yu wokan yetbꞌiho yaꞌ Moisés; machi bꞌaqꞌinh chaxhinbꞌejkanojan, mach chachkan hachukil yinh hunelnhe. 6 Ako hawip, mach chachxiwi, yuto hach chapohkanh txꞌotxꞌ yinh ebꞌnaj Israel, txꞌotxꞌ haltebꞌil tet heyichmam ta chiwaqꞌan teyet. 7 Hanhe tiꞌ chinqꞌanan tawet ta chawako yip hawanma, mach chaxhxiwi, chayije sunil chejbꞌanile halbꞌilkano tawet yu yaꞌ Moisés, yaꞌ inchejabꞌan. Mach chahekꞌilo habꞌa yinh; mach chaxhto yinh hawatxꞌqꞌabꞌ, mach chaxhto yinh hamekqꞌabꞌ yinh sunil tzet chiyala, hak tuꞌ xin kꞌul chacheliko yinh sunil tzet chawatxꞌe. 8 Machojabꞌ chabꞌej hawawten Istzotiꞌ Komam Dios ayko yinh hum; tzꞌayikal yebꞌ aqꞌbꞌalil chiꞌekꞌ hanabꞌal yinh yu hayijeni, haxinwal kꞌul chiꞌeliko sunil tzet chawatxꞌe. 9 Abꞌe tzet chiwalan, hanin haDiosal intiꞌan. Chiwalan tawet; ako yip hawanma, helan chawute habꞌa, mach chaxhxiwi, mach chikabꞌkon hakꞌul yuto haninan haDiosal yebꞌ haWahawil, chinokan hawetbꞌihoj bꞌajxanhetuꞌwal chachtohi,» xhi Komam.Iswatxꞌe isbꞌa yaꞌ Josué isto yinh howal
10 Lahwi tuꞌ, istzotel yaꞌ Josué tet ebꞌnaj yahawil xol anma Israel, yalni yaꞌ: 11 «Asiꞌwe xolaj campamento kat heyalni tet konhobꞌ tato chiswatxꞌe tzet chislo chiyitoj, yuto yet oxebꞌ tzꞌayik chonhqꞌaxponikꞌto yibꞌanh haꞌ Jordán tiꞌ, kat kotoh bꞌey txꞌo txꞌotxꞌ chaqꞌ Komam Jahawil, koDiosal jet, kexchi,» xhi yaꞌ Josué.
12 Istzotelpaxo yaꞌ Josué tet ebꞌnaj Israel, ebꞌnaj titna yinh yaꞌ Rubén, yebꞌ tet ebꞌnaj Israel titna yinh yaꞌ Gad, yebꞌ tet yikta majan ebꞌnaj Israel titna yinh yaꞌ Manasés, yalni yaꞌ Josué hakaꞌ tiꞌ:
13 —Chenatij tzet halbꞌilkano yu yaꞌ Moisés, ischejabꞌ Komam Dios teyet, yet yalni ta haꞌ Komam Jahawil, koDiosal, aqꞌnikano txꞌo txꞌotxꞌ tiꞌ teyet yu hexew sat txꞌotxꞌ.c 14 Kanojabꞌkano heyixal, heyuninal yebꞌ henoqꞌ sat txꞌo txꞌotxꞌ yaqꞌkano yaꞌ Moisés teyet tiꞌ, txꞌotxꞌ ayikꞌti isqꞌaxebꞌikꞌti haꞌ Jordán tiꞌ; yajaꞌ wal hex kaw helan hex heto yinh howal, iqꞌwe hemunlabꞌal yet howal, kat hebꞌabꞌi sata hunteqꞌanxa jet konhobꞌ yu hekolwa yinh. 15 Hato xin yet chiyaqꞌnikano Komam bꞌay chixew ebꞌnaj hakaꞌ yu Komam teyinh, masanto yet chaqꞌnikano Komam istxꞌotxꞌ ebꞌnaj, katto hepaxti sat hetxꞌotxꞌ ay isqꞌaxebꞌikꞌti haꞌ Jordán tiꞌ, txꞌotxꞌ ayko yetkꞌulal bꞌay chiꞌahilo tzꞌayik, yu heyokkano yahawo txꞌotxꞌ, txꞌotxꞌ yaqꞌkano yaꞌ Moisés ischejabꞌ Komam Dios teyet, xhi yaꞌ tet ebꞌnaj.
16 Istaqꞌwi ebꞌnaj tet yaꞌ Josué:
—Kꞌultikꞌa, chikowatxꞌehanh tzet chawal tiꞌ, kat kotohanh bꞌay chonhhachejto tiꞌanh. 17 Chixin koyijehanh tzet chawal jetanh hakaꞌ yu koyijenanh tzet yal yaꞌ Moisés. Haꞌ xin huneꞌ tzet chijochehanh ta chiꞌok Komam Dios koDiosal hawetbꞌihoj hakaꞌ yu yok Komam yetbꞌiho yaꞌ Moisés. 18 Makxanhetikꞌa mach chisyije tzet chawala, maka chismanhkꞌo tzet chawal tiꞌ, yilal yaqꞌlax kamoj. Hach kachannhe ako yip hawanma, mach chaxhxiwi, xhi ebꞌnaj.