Iskamikal yaꞌ Moisés yebꞌ yet ismuji yaꞌ
34
Haꞌ bꞌey akꞌal Moab ay yaꞌ Moisés, yahto yaꞌ bꞌay ay hunteqꞌan witz chiyij Nebo, yahto yaꞌ yinh iswiꞌ witz Pisga ay bꞌey tuꞌ, ayko satakꞌti konhobꞌ Jericó. Haꞌ bꞌey tuꞌ xin isye Komam Dios Jahawil tet yaꞌ Moisés sunil txꞌotxꞌ Galaad, masanta bꞌey txꞌotxꞌ Dan. 2 Isyenipaxo Komam txꞌotxꞌ ismajul yaꞌ Neftalí, yaꞌ Efraín, yebꞌ yaꞌ Manasés, yebꞌ sunil txꞌotxꞌ ismajul yaꞌ Judá masanta chiꞌapni txꞌotxꞌ bꞌey haꞌ mar bꞌay chito tzꞌayik. 3 Isyenipaxo Komam txꞌotxꞌ Neguev, txꞌotxꞌ yakꞌalil istiꞌ haꞌ Jordán, yebꞌ yakꞌalil txꞌotxꞌ Jericó bꞌay kaw ay ej teꞌ palmera masanta bꞌey konhobꞌ Zoar. 4 Yalni Komam tet yaꞌ Moisés hakaꞌ tiꞌ:«Haꞌ txꞌo txꞌotxꞌ tiꞌ waltehan tet heyichmam Abraham, heyichmam Isaac yebꞌ heyichmam Jacob tato chiwaqꞌan tet anma chipohchakanilto yinh yuninal. Chinyekanojan txꞌotxꞌ hawilaꞌ, yaj matxa chaxhapni sat txꞌotxꞌ,» xhi Komam tet yaꞌ.
5 Haꞌ tuꞌ xin kam yaꞌ Moisés, ischejabꞌ Komam Dios Jahawil yul ismajul txꞌotxꞌ Moab, hakaꞌtikꞌa yu yalnikano Komam. 6 Ismujlax yaꞌ Moisés sat yakꞌalil txꞌotxꞌ Moab, satakꞌti txꞌotxꞌ Bet-peor. Haꞌ xin bꞌay mujlaxkano yaꞌ Moisés tuꞌ, machi hunu mak ohtanhe tinanh. 7 120 ishabꞌilal yaꞌ yet iskam yaꞌ, kaw xin kꞌulto yilni yaꞌ yebꞌ kaw ayto yip yaꞌ yet iskam yaꞌ.a
8 Yok anma Israel oqꞌo yinh yaꞌ Moisés bꞌey txꞌotxꞌ Moab, kaw huneꞌ ixahaw oqꞌ anma yinh yaꞌ; yiqꞌni anma bꞌiskꞌulal yinh iskamikal yaꞌ hakaꞌtikꞌa chu ebꞌnaj Israel. 9 Ischahnikano yaꞌ Josué, iskꞌahol yaꞌ Nun, ishelanil yaꞌ Moisés, yuto yalanhto maxhto chikam yaꞌ Moisés tuꞌ, yanikanayo isqꞌabꞌ yaꞌ yibꞌanh iswiꞌ yaꞌ Josué. Isyijen sunil anma Israel tzet chiyal yaꞌ Josué tuꞌ, hakaꞌtikꞌa yu yalnikano Komam tet yaꞌ Moisés.
10 Hataxtikꞌa tuꞌ xin matxa hunu ischejabꞌ Komam xol anma Israel hakaꞌ yaꞌ Moisés, yaꞌ ilniko sat Komam yet chitzotel tet. 11 Machipaxo hunu mak yeni kꞌaybꞌalkꞌule yebꞌ yechel yip Komam hakaꞌ isye yaꞌ Moisés yu Komam bꞌey Egipto yinh naj rey Faraón, yebꞌ yinh sunil ebꞌnaj chimunla yinta naj, yebꞌ yinh sunil anma ah Egipto tuꞌ. 12 Machipaxo hunuxa mak yeni tzetaj kaw ay yelapnoj, yebꞌ tzet ay ismay, yebꞌ tzetaj chonhxiw jilni hakaꞌ isye yaꞌ Moisés xol anma Israel.