NÚMEROS
Iskanh hum tzꞌibꞌnhebꞌil yu yaꞌ Moisés
1. KUYBꞌANILE YET AYKꞌO ANMA ISRAEL BꞌEY TXꞌOTXꞌ SINAÍ
(1:1–10:10)
Isbꞌisil anma Israel bꞌey txꞌotxꞌ Sinaí
1
Hayet bꞌabꞌel tzꞌayik yinh iskabꞌ ixahaw yet kabꞌxa habꞌil yel anma Israel sat txꞌotxꞌ Egipto, istzotel Komam Dios tet yaꞌ Moisés yul Tabernáculo bꞌay chiskutxbꞌa isbꞌa anma Israel yebꞌ Komam Dios. Bꞌey txꞌotxꞌ desierto Sinaí, tzotel Komam tuꞌ tet yaꞌ Moisés hakaꞌ tiꞌ: 2 «Ikanh isbꞌisil sunil ebꞌnaj winaj Israel, kat habꞌisni isbꞌisil hunun nhahil, yebꞌ isbꞌisil hunun majan yikꞌal ebꞌnaj Israel, kat hatzꞌibꞌnhen isbꞌi ebꞌnaj winaj Israel yinh hununtajil. 3 Sunil ebꞌnaj tzꞌajanxa yinh 20 (hunkꞌal) habꞌil yebꞌ ebꞌnaj winaj ekꞌbꞌalxa yinh 20 (hunkꞌal) habꞌil, ebꞌnaj kꞌulxa isto yinh howal, haꞌ ebꞌnaj chawikanh isbꞌisil. Chikolwa yaꞌ Aarón tawinta habꞌisni ebꞌnaj, hakaꞌ chu isbꞌislax ebꞌnaj soldado yet howal. 4 Haꞌ ebꞌnaj iswiꞌehal yinh hunun majan ebꞌnaj Israel chikolwa ebꞌnaj teyinh isbꞌisni. 5 Hak tiꞌ isbꞌi hunun ebꞌnaj iswiꞌehal chikolwa tawintaj:»Haꞌ yinh ebꞌnaj titna yinh yaꞌ Rubén, haꞌ naj Elisur, iskꞌahol naj Sedeur, haꞌ naj tuꞌ chikolwa teyinh.
6 »Haꞌ yinh ebꞌnaj titna yinh yaꞌ Simeón, haꞌ naj Selumiel, iskꞌahol naj Zurisadai, haꞌ naj chikolwahi.
7 »Haꞌ yinh ebꞌnaj titna yinh yaꞌ Judá, haꞌ naj Naasón iskꞌahol naj Aminadab, haꞌ naj chikolwahi.
8 »Haꞌ yinh ebꞌnaj titna yinh yaꞌ Isacar, naj Natanael, iskꞌahol naj Zuar, chikolwahi.
9 »Haꞌ yinh ebꞌnaj titna yinh yaꞌ Zabulón, naj Eliab, iskꞌahol naj Helón, chikolwahi.
10 »Haxa yinh ebꞌnaj titna yinh kawanh iskꞌahol yaꞌ José, ebꞌnaj titna yinh yaꞌ Efraín, naj Elisama, iskꞌahol naj Amiud, chikolwahi. Haxa ebꞌnaj titna yinh yaꞌ Manasés, hunxa iskꞌahol yaꞌ José, naj Gamaliel, iskꞌahol naj Pedasur, haꞌ naj chikolwahi.
11 »Haꞌ yinh ebꞌnaj titna yinh yaꞌ Benjamín, naj Abidán iskꞌahol naj Gedeoni, chikolwahi.
12 »Haꞌ yinh ebꞌnaj titna yinh yaꞌ Dan, naj Ahiezer iskꞌahol naj Amisadai, chikolwahi.
13 »Haꞌ yinh ebꞌnaj titna yinh yaꞌ Aser, naj Pagiel iskꞌahol naj Ocrán, chikolwahi.
14 »Haꞌ yinh ebꞌnaj titna yinh yaꞌ Gad, naj Eliasaf iskꞌahol naj Reuel, chikolwahi.
15 »Haꞌ yinh ebꞌnaj titna yinh yaꞌ Neftalí, naj Ahira iskꞌahol naj Enán, chikolwahi,» xhi Komam tet yaꞌ Moisés.
16 Haꞌ ton hunteqꞌan ebꞌnaj yahawil tiꞌ, sikꞌlaxilo xol hunun majan ebꞌnaj Israel; ok ijbꞌalo yinh munil tiꞌ.
17 Haꞌ yaꞌ Moisés yebꞌ yaꞌ Aarón inito ebꞌnaj winaj awtelax isbꞌi tuꞌ, 18 iskutxbꞌaniko ebꞌyaꞌ sunil anma Israel yinh bꞌabꞌel tzꞌayik yinh iskabꞌ ixahaw, yinh huneꞌ habꞌil tuꞌ. Yilaxkanh isbꞌisil anma Israel, istzꞌunlax isbꞌi yinh istxolal, ebꞌnaj tzꞌajanxa yinh 20 (hunkꞌal) habꞌil yebꞌ ebꞌnaj ekꞌbꞌalxa yinh 20 (hunkꞌal) habꞌil; hatatikꞌa hunun nhahil yinh hunun majan ebꞌnaj. 19 Hakaꞌtikꞌa yu yalni Komam tet yaꞌ Moisés, hak tuꞌ yu yilaxkanh isbꞌisil anma Israel, yet aykꞌoꞌ ebꞌnaj bꞌey txꞌotxꞌ desierto Sinaí.
Haꞌ yinh hunun majan ebꞌnaj Israel, yebꞌ yinh hunun majan yuninal ebꞌnaj ilaxkanh isbꞌisil anma Israel, hak tiꞌ xin eliko isbꞌisil hakaꞌ tiꞌ:
20 Haꞌ yinh ebꞌnaj titna yinh yaꞌ Rubén, yaꞌ bꞌabꞌel iskꞌahol yaꞌ Israel, tzꞌibꞌnhelax isbꞌi, yebꞌ isbꞌisil ebꞌnaj winaj tzꞌajanxa ishabꞌilal yinh 20 (hunkꞌal) habꞌil, yebꞌ ebꞌnaj ekꞌbꞌalxa 20 (hunkꞌal) habꞌil. 21 Haꞌ ebꞌnaj titna yinh yuninal yaꞌ Rubén tuꞌ 46,500 isbꞌisil ebꞌnaj, ebꞌnaj winaj chiyu isto yinh howal.
22-23 Haꞌ ebꞌnaj titna yinh yaꞌ Simeón, 59,300 isbꞌisil ebꞌnaj.
24-25 Haꞌ ebꞌnaj titna yinh yaꞌ Gad, 46,650 isbꞌisil ebꞌnaj.
26-27 Haꞌ ebꞌnaj titna yinh yaꞌ Judá, 74,600 isbꞌisil ebꞌnaj.
28-29 Haꞌ ebꞌnaj titna yinh yaꞌ Isacar, 54,400 isbꞌisil ebꞌnaj.
30-31 Haꞌ ebꞌnaj titna yinh yaꞌ Zabulón, 57,400 isbꞌisil ebꞌnaj.
32-35 Haxa ebꞌnaj yuninal yaꞌ José, 40,500 isbꞌisil ebꞌnaj titna yinh yaꞌ Efraín; yebꞌpaxo 32,200 isbꞌisil ebꞌnaj titna yinh yaꞌ Manasés.
36-37 Haꞌ ebꞌnaj titna yinh yaꞌ Benjamín, 35,400 isbꞌisil ebꞌnaj.
38-39 Haꞌ ebꞌnaj titna yinh yaꞌ Dan, 62,700 isbꞌisil ebꞌnaj.
40-41 Haxa ebꞌnaj pohchakanti yinh yaꞌ Aser, 41,500 isbꞌisil ebꞌnaj.
42-43 Haꞌ ebꞌnaj titna yinh yaꞌ Neftalí, 53,400 isbꞌisil ebꞌnaj.
44 Hak tuꞌ eliko isbꞌisil ebꞌnaj Israel yet yinikanh yaꞌ Moisés isbꞌisil ebꞌnaj yebꞌ yaꞌ Aarón, yebꞌ ebꞌnaj 12 (kabꞌlahonhwanh) iswiꞌehal yinh hunun majan ebꞌnaj Israel. 45 Sunil ebꞌnaj Israel bꞌislax tuꞌ, hatatikꞌa hunun majan ebꞌnaj yebꞌ hunun majan yuninal yuninal ebꞌnaj, tzꞌajanxa ishabꞌilal yinh 20 (hunkꞌal) habꞌil, yebꞌ ebꞌnaj ekꞌbꞌalxa yinh 20 (hunkꞌal) habꞌil tuꞌ, ebꞌnaj chiyu isto yinh howal, 46 yinh sunil ebꞌnaj Israel tuꞌ 603,550 isbꞌisil ebꞌnaj.
Haꞌ ebꞌnaj levita chiꞌok munil bꞌey Tabernáculo
47 Wal hunun majan ebꞌnaj Israel titna yinh yuninal yaꞌ Leví, mach ilaxkanh isbꞌisil ebꞌnaj xol ebꞌnaj Israel, 48 yuto Komam Dios Jahawil halni tet yaꞌ Moisés hakaꞌ tiꞌ: 49 «Hayet chawinikanh isbꞌisil anma Israel tiꞌ, mach chawako anma titna yinh yaꞌ Leví istzꞌajoj. 50 Haꞌ ebꞌnaj levita tuꞌ, haꞌ ebꞌnaj chawako munil yul watutan bꞌay ayikto isKaxhahil inTratohan waqꞌan tet ebꞌnaj Israel, haꞌ ebꞌnaj chiꞌilni sunil tzet chiꞌokniko yul watutan. Haꞌ ebꞌnaj chiꞌijnito isqꞌapil watutan yebꞌ sunil tzet chiꞌokniko yul. Haꞌ yinhla ishoyanil watuttuꞌan chiꞌehayo ebꞌnaj. 51 Hayet chiꞌilaxto watuttuꞌan, haꞌ ebꞌnaj Levita chiꞌuchkꞌanayoj, haꞌ ebꞌnaj xin chiwatxꞌenpaxkanh bꞌay chiꞌapni. Makxanhetikꞌa hunu mak mach levitahoj chihitziko iskꞌatanh watuttuꞌan, maqꞌbꞌil iskami. 52 Wal sunil ebꞌnaj Israel xin, chiꞌok ebꞌnaj yinh istxolal, kat yehayo ebꞌnaj yul iscampamento yalanh isbandera. 53 Wal ebꞌnaj levita xin yinhla ishoyanil Tabernáculo, haꞌ bꞌey tuꞌ chiꞌeh ebꞌnaj yunhe mach chitit inhowalan teyinh, hex Israelex tiꞌ. Haꞌ xin ebꞌnaj levita tuꞌ, chiꞌilni watutan,» xhi Komam.
54 Isyijen ebꞌnaj Israel hakaꞌtikꞌa yu yalnikano Komam tet yaꞌ Moisés.