3 »Ta wakax noꞌ cheyiti nhuslaxo xahanbꞌalil tet Komam, yilal tzehla wakax noꞌ cheyitij yebꞌ xin machi nino istzakaꞌil noꞌ. Haꞌ xin sata istiꞌ ispultahil Yatut Komam watxꞌebꞌil yinh qꞌap qꞌap bꞌay chiskutxbꞌa isbꞌa anma iskꞌatanh Komam, haꞌ bꞌey tuꞌ cheyiti noꞌ xahanbꞌal tet Komam, yunhe ischahni Komam huneꞌ xahanbꞌal tuꞌ.^a 4 Haꞌ naj chiꞌiniti noꞌ xin, chiyayo isqꞌabꞌ naj yibꞌanh iswiꞌ noꞌ, hak tuꞌ xin chu ischahni Komam huneꞌ xahanbꞌal tuꞌ, kat yaqꞌni nimankꞌulal Komam yinh ismul naj. 5 Kat ispotxꞌni naj noꞌ wakax tuꞌ sata Komam Dios; haxa ebꞌnaj sacerdote, iskꞌahol yaꞌ Aarón chihalten ischikꞌil noꞌ tet Komam, lahwi tuꞌ kat istxihnayo ebꞌnaj ischikꞌil noꞌ yibꞌanh, yebꞌ yinhla iskꞌul ismexhahil xahanbꞌal tet Komam tuꞌ, ayayo sata istiꞌ ispultahil Yatut Komam watxꞌebꞌil yinh qꞌap qꞌap, bꞌay chiskutxbꞌa isbꞌa anma iskꞌatanh Komam. 6 Lahwi tuꞌ, kat yinilo naj istzꞌumal noꞌ, kat istzokꞌnayo naj ischibꞌehal noꞌ. 7 Haxa ebꞌnaj sacerdote, iskꞌahol yaꞌ Aarón chiꞌaniko qꞌa qꞌaꞌ yibꞌanh ismexhahil bꞌay chinhuslax xahanbꞌal tet Komam, kat iswatxꞌenahto ebꞌnaj teꞌ siꞌ yibꞌanh qꞌaꞌ. 8 Lahwi tuꞌ xin kat yanahto ebꞌnaj sacerdote, iskꞌahol yaꞌ Aarón tuꞌ noꞌ chibꞌe pohbꞌilayo tuꞌ yebꞌ noꞌ iswiꞌ, yebꞌ ismantecahil noꞌ, yebꞌ istxꞌanhkanta istzaꞌ noꞌ, yibꞌanh teꞌ siꞌ xol xaj qꞌaꞌ yibꞌanh ismexhahil yet xahanbꞌal. 9 Naj chiꞌaqꞌni noꞌ yinh xahanbꞌalil tuꞌ, chistxꞌah naj noꞌ istxꞌanhkanta istzaꞌ yebꞌ noꞌ yoj, kat isnhusnito naj sacerdote sunil noꞌ tuꞌ yibꞌanh chꞌen mexha yet xahanbꞌal. Noꞌ chibꞌe chinhuslax yinh xahanbꞌal tuꞌ, kaw xuqꞌ chꞌahapno sam sata Komam Dios, Jahawil.

10 »Ta meꞌ noꞌ maka ta chiw noꞌ cheyaqꞌ yinh xahanbꞌalil tet Komam xin, haꞌ noꞌ winaj cheyitij, hunu noꞌ machi nino istzakaꞌil. 11 Kat xin ispotxꞌni naj noꞌ yetkꞌulal norte sata ismexhahil yet xahanbꞌal sata Komam; haxa ebꞌnaj iskꞌahol yaꞌ Aarón, chitxihnayo ischikꞌil noꞌ yibꞌanh yebꞌ yinhla iskꞌul mexha, bꞌay chinhuslax xahanbꞌal tet Komam. 12 Kat istzokꞌnayo naj ischibꞌehal noꞌ, haxa xin naj sacerdote chiꞌanahto ischibꞌehal noꞌ yebꞌ iswiꞌ noꞌ yebꞌ ismantecahil noꞌ istxꞌanhkanta istzaꞌ noꞌ yibꞌanh teꞌ siꞌ xol qꞌaꞌ ayko yibꞌanh mexha bꞌay chinhuslax xahanbꞌal tet Komam. 13 Naj ay yet noꞌ tuꞌ, chꞌaqꞌlax yinh xahanbꞌal tuꞌ, chistxꞌah naj noꞌ yul iskꞌul yebꞌ noꞌ yoj, kat isnhusni naj sacerdote noꞌ yibꞌanh ismexhahil yet xahanbꞌal. Haꞌ hunteqꞌan xahanbꞌal tiꞌ kaw xuqꞌ chꞌahapno sam sata Komam.

14 »Ta xin chꞌik noꞌ cheyiti nhuslaxo yinh xahanbꞌalil tet Komam Jahawil, yilal heyiniti noꞌ palamuch maka noꞌ kuwis. 15 Haꞌ xin naj sacerdote tuꞌ chihalten noꞌ yibꞌanh mexha yet xahanbꞌal; chiyilo naj iswiꞌ noꞌ, kat isnhusni naj noꞌ xahanbꞌal tet Komam, kat istxihnayo naj ischikꞌil noꞌ yinhla iskꞌul ismexhahil xahanbꞌal tuꞌ. 16 Kat yinilo naj xil noꞌ yebꞌ isponhkoy noꞌ, kat isqꞌojnito naj bꞌay chikutxi tanh yinh iskꞌul mexha yet xahanbꞌal, yinh yetkꞌulal bꞌay chito tzꞌayik. 17 Lahwi tuꞌ, kat yok tzabꞌno naj yinh isxikꞌ noꞌ, kat istzilnayo naj noꞌ, yaj mach wiyom iskabꞌnhenayo naj noꞌ, lahwi tuꞌ, kat isnhusni naj sacerdote tuꞌ noꞌ yibꞌanh teꞌ siꞌ ayko qꞌaꞌ yinh yibꞌanh ismexhahil yet xahanbꞌal. Noꞌ chibꞌe chinhuslax yinh xahanbꞌal tuꞌ, kaw xuqꞌ chꞌahapno sam sata Komam Dios, Jahawil.