6 Haxa yet yekꞌto tiempo xin, iskamto yaꞌ José yebꞌ sunil yuxhtaj, yebꞌ yuninal apni bꞌey Egipto tuꞌ yinta ebꞌyaꞌ. 7 Haxa anma titna yinh ebꞌnaj Israel tuꞌ kaw chꞌibꞌkanokanh isbꞌisil, yiqꞌnikanokanh yip ebꞌnaj, hak tuꞌ yu isnohilo sunil sat txꞌotxꞌ Egipto yu ebꞌnaj.^b

8 Yinh huneꞌ tiempo tuꞌ xin, ok huneꞌxa naj isreyalo txꞌotxꞌ Egipto tuꞌ, yajaꞌ xin matxa ohtabꞌilo yaꞌ José yu naj, yuxin ok naj yalaꞌ tet yet konhobꞌ tuꞌ hakaꞌ tiꞌ: 9 «Wal tinanh, xam heyila tato kaw ekꞌnaxakano isbꞌisil anma Israel tiꞌ jibꞌanh, yebꞌ kaw ekꞌbꞌalxa yip ebꞌnaj kosataj; 10 wal tinanh xin, yilal kotxumni tzet wal juten huneꞌ tiꞌ, yunhe matxa chichꞌibꞌkanh isbꞌisil ebꞌnaj, yuto kꞌuxantaxka ay mak chiꞌaniko howal jinh kat yanito isbꞌa ebꞌnaj yintaj ebꞌnaj, kat yaniko ebꞌnaj howal jinh, kat yelkanh ebꞌnaj sat txꞌotxꞌ Egipto tiꞌ,» xhi naj rey tuꞌ.

11 Yuxin alaxiko yilomal ebꞌnaj Israel yu ebꞌnaj Egipto tuꞌ, yet chimunla ebꞌnaj. Yaqꞌlax munil kaw yaꞌta tet ebꞌnaj, yalaxiko ebꞌnaj iswatxꞌeno kabꞌebꞌ nimeta konhobꞌ, haꞌ ton konhobꞌ Pitón yebꞌ konhobꞌ Ramasés; haꞌ bꞌey hunteqꞌan konhobꞌ tuꞌ xin, iskꞌubꞌa naj Faraón ixim trigo. 12 Yajaꞌ hayet chꞌaqꞌlax ekꞌoyaꞌ ebꞌnaj tuꞌ, kaw ip ispohchakanh isbꞌisil ebꞌnaj, yuxin xiwkanh ebꞌnaj Egipto tet ebꞌnaj Israel tuꞌ.

13 Yalaxkaniko ebꞌnaj Israel ischejabꞌo ebꞌnaj Egipto, yaqꞌlax munil kaw yaꞌta tet ebꞌnaj. 14 Yaqꞌlax ekꞌoyaꞌ ebꞌnaj yinh munil kaw yaꞌtaj, yalaxiko ebꞌnaj somo tzꞌotzꞌew, chiswatxꞌen ebꞌnaj txꞌotxꞌ ladrillo, yalaxpaxiko ebꞌnaj tzꞌunu trigo, yebꞌ yinh hunteqꞌanxa munil. Kaw xin how ebꞌnaj Egipto tuꞌ yinh ebꞌnaj Israel yet chischejni ebꞌnaj, ebꞌnaj. 15 Istzotelpaxo naj faraón tet ebꞌix chiꞌilni ebꞌix Israel tuꞌ yet chiwatxꞌi iskꞌul ebꞌix, haꞌ ton xin ix Sifra yebꞌ ix Fúa, yalni naj tet ebꞌix hakaꞌ tiꞌ:

16 —Hayet cheyilni ebꞌix Israel yet chiwatxꞌi iskꞌul ebꞌix, cheyila tzet uninal, tato winaj nixhte yunin ebꞌix chipitzkꞌahi, maqꞌbꞌil hepitzꞌni kamoj, taka ix nixhte yunin ebꞌix chipitzkꞌa xin matzet cheyute, hehojabꞌi, xhi naj tet ebꞌix.

17 Yajaꞌ wal ebꞌix iyawom tuꞌ xin, chixiw ebꞌix tet Komam Dios, yuxin mach isyije ebꞌix yinh tzet yal naj rey tuꞌ, mach ispitzꞌkamo ebꞌix nixhte winaj unin chipitzkꞌahi. 18 Hayet yabꞌen naj rey huneꞌ tuꞌ, yawten naj ebꞌix, yalni naj tet ebꞌix hakaꞌ tiꞌ:

—¿Tzet yinh xin chechah itzitzbꞌo nixhte winaj unin, mach xin chepitzꞌkamoj? xhi naj. 19 Istaqꞌwi ebꞌix:

—Yuto ebꞌix hebrea, mach lahano ebꞌix yebꞌ ebꞌix Egipto, ebꞌix hebrea tiꞌ, kaw ay yip ebꞌix, yuto hayet chonhtohanh jilaꞌanh ebꞌix xawatxꞌina iskꞌul ebꞌix yet chonhapnihanh, xhi ebꞌix.

20 Kaw yayo Komam Dios iskꞌulal yibꞌanh ebꞌix iyawom tuꞌ, yuxin chꞌibꞌkanokanh isbꞌisil anma Israel, yiqꞌnikanokanh yip. 21 Yayo Komam Dios isyaxil yibꞌanh ebꞌix iyawom, isnohpaxokanh yuninal ebꞌix.

22 Wal naj rey faraón, ischej naj hal-laxo tet yet konhobꞌ hakaꞌ tiꞌ: «Wal tinanh sunil nixhte winaj unin chipitzkꞌa xol ebꞌnaj Israel, maqꞌbꞌil isqꞌojlaxto xol ha haꞌ, wal nixhte ix chipitzkꞌa xin, matzet cheyute, chꞌibꞌojabꞌi,» xhi naj rey tuꞌ.