GÉNESIS
Isbꞌabꞌel hum tzꞌibꞌnhebꞌil yu yaꞌ Moisés
1. KUYBꞌANILE YINH YET YICHEBꞌANIL
(1:1–11:32)
Yet iswatxꞌenkano Komam Dios sunil tzet ay yul sat yibꞌanhqꞌinal tiꞌ
1
Yet yichebꞌanil, iswatxꞌe Komam Dios satkanh yebꞌ txꞌo txꞌotxꞌ. 2 Wal txꞌo txꞌotxꞌ tiꞌ, maxhto ayoko txꞌotxꞌ yinh istxolal, yebꞌ xin machi hunu tzet ye tuꞌ ayayo sat txꞌotxꞌ. Hanhkꞌanhe ha haꞌ ayayo sat txꞌotxꞌ, kaw xin nimejalkano yich haꞌ, yebꞌ xin qꞌejholonhe sunil sat yibꞌanhqꞌinal tiꞌ, chiꞌekꞌpaxo Yespíritu Komam Dios yibꞌanh ha haꞌ.3 Tzujan tuꞌ xin, yalni Komama hakaꞌ tiꞌ: «Ayojabꞌ issajilqꞌinal,» xhi Komam. Yinhnhena tuꞌ issajbꞌiloj. 4 Hayet yilni Komam tato kaw kꞌul sajilqꞌinal tuꞌ, ispohnilo Komam sajilqꞌinal yinh qꞌejholoj. 5 Haxa sajilqꞌinal tuꞌ xin, tzꞌayik yako Komam isbꞌihoj, walpaxo qꞌejholo tuꞌ xin aqꞌbꞌal yako Komam isbꞌihoj. Yekꞌto aqꞌbꞌal yebꞌ sakꞌayal, hak tuꞌ yu istzꞌajna bꞌabꞌel tzꞌayik.b
6 Tzujan tuꞌ, yalni Komam Dios hakaꞌ tiꞌ: «Ayojabꞌ hunu tzet chiꞌok xolbꞌal ha haꞌ, kat ispohni isbꞌa haꞌ,» xhi Komam, kaw xin hak tuꞌ elikoj. 7 Iswatxꞌe Komam huneꞌ pohni xolbꞌal ha haꞌ tuꞌ, yikta ha haꞌ kankano yibꞌanh, yiktapaxo haꞌ kankano yalanh. 8 Haꞌ huneꞌ pohni xolbꞌal ha haꞌ tuꞌ, satkanh yako Komam isbꞌihoj. Yekꞌto aqꞌbꞌal yebꞌ sakꞌayal, hak tuꞌ yu istzꞌajna iskabꞌ tzꞌayik.
9 Tzujan tuꞌ xin, yalnipaxo Komam: «Wal ha haꞌ ayayo sat txꞌo txꞌotxꞌ tiꞌ, hunojabꞌiko haꞌ, wal xin ay bꞌay tajin,» xhi Komam. Kaw hakaꞌ yu yalni Komam, hak tuꞌ elikoj. 10 Haꞌ bꞌay el ha haꞌ tuꞌ xin, txꞌotxꞌ yako Komam isbꞌihoj. Walpaxo ha haꞌ ishunbꞌakano isbꞌa tuꞌ xin, mar yako Komam isbꞌiho haꞌ. Yilni Komam tato kaw kꞌul hunteqꞌan iswatxꞌe tuꞌ.
11 Tzujan tuꞌ xin yalni Komam: «Wal tinanh chꞌibꞌojabꞌ sunil ej teꞌ yax telaj sat txꞌo txꞌotxꞌ tiꞌ; teꞌ telaj chiyaqꞌ yinhatil, yebꞌ ej te teꞌ chiyaqꞌ sat; yul sat tuꞌ xin ayikto yinhatil, hakaꞌtikꞌa tzet majanil teꞌ,» xhi Komam. Kaw xin hakaꞌ yute yalni Komam, hak tuꞌ elikoj. 12 Hak tuꞌ yu ischꞌibꞌkanh sunil ej te teꞌ; teꞌ telaj chaqꞌ yinhatil, yebꞌpaxo sunil te teꞌ chisatni hakaꞌtikꞌa tzet teꞌal teꞌ. Yilnipaxo Komam tato kaw kꞌul hunteqꞌan tzet iswatxꞌe. 13 Yekꞌto aqꞌbꞌal yebꞌ sakꞌayal, hak tuꞌ yu istzꞌajna yox tzꞌayik.
14-15 Tzujan tuꞌ xin, yalnipaxo Komam hakaꞌ tiꞌ: «Ayojabꞌ tzet chitzejla satkanh yunhe ismujli yinh txꞌo txꞌotxꞌ kat xin ispohni xolbꞌal tzꞌayikal yebꞌ aqꞌbꞌalil, kat isyeni bꞌaqꞌinh waresma yebꞌ nhabꞌil, yebꞌpaxo xin yu isbꞌislax tzꞌayik yebꞌ habꞌil,» xhi Komam. Kaw xin hakaꞌtikꞌa yu yalni Komam, hak tuꞌ elikoj. 16 Hak tuꞌ yu iswatxꞌen Komam kabꞌebꞌ tzet chimujli. Huneꞌ nimajal, haꞌ ton tzꞌayik yu ismujli yet tzꞌayikal, yebꞌ huneꞌxa nichꞌan, haꞌ ton ixahaw yu ismujli yet aqꞌbꞌalil. Iswatxꞌenpaxo Komam sunil ej txꞌumel. 17-18 Yanikaniko Komam hunteqꞌan chitzejla tuꞌ yul satkanh yu ismujli yinh txꞌo txꞌotxꞌ yet tzꞌayikal yebꞌ yet aqꞌbꞌalil, yebꞌpaxo xin yu ispohni issajilqꞌinal yinh qꞌejholoj. Yilni Komam tato kaw kꞌul tzet iswatxꞌe tuꞌ.c 19 Yekꞌto aqꞌbꞌal yebꞌ sakꞌayal, istzꞌajna iskanh tzꞌayik.
20 Tzujan tuꞌ xin yalni Komam Dios: «Wal tinanh pitzkꞌahojabꞌ no noqꞌ xol haꞌ mar, yebꞌ ej noꞌ chꞌik chꞌekꞌ purla yul sat yibꞌanhqꞌinal tiꞌ,» xhi Komam. 21 Hak tuꞌ yu iswatxꞌen Komam sunil ej noꞌ nime noqꞌ chꞌekꞌ xol haꞌ mar, sunil ismajanil noꞌ noqꞌ. Iswatxꞌenpaxo Komam sunil ej noꞌ chꞌik yinh ismajanil. Yilni Komam tato kaw kꞌul sunil tzet iswatxꞌe tuꞌ. 22 Yanikanayo Komam iskꞌulal yibꞌanh ej noꞌ, yalni Komam hakaꞌ tiꞌ: «Kaw pohchahojabꞌ sunil ej no noqꞌ ay xol haꞌ mar, nohojabꞌilo xol haꞌ yu noꞌ. Pohchahojabꞌpaxkanh sunil ej noꞌ chꞌik yul sat yibꞌanhqꞌinal tiꞌ,» xhi Komam. 23 Yekꞌto aqꞌbꞌal yebꞌ sakꞌayal, hak tuꞌ yu istzꞌajna ishoꞌ tzꞌayik.
24-25 Tzujan tuꞌ xin, yalnipaxo Komam: «Wal tinanh pitzkꞌahojabꞌ sunil ej no noqꞌ sat txꞌo txꞌotxꞌ tiꞌ hakaꞌ noꞌ chipohchalax yulaj nha, yebꞌ xin ej noꞌ xoltelajil noqꞌ, yebꞌpaxo ej noꞌ chishatxikꞌo isbꞌa sat txꞌotxꞌ,» xhi Komam. Kaw xin hakaꞌ yu yalni Komam, hak tuꞌ elikoj. Yilni Komam tato kaw kꞌul hunteqꞌan tzet iswatxꞌe tuꞌ.
26 Tzujan tuꞌ xin, yalni Komam hakaꞌ tiꞌ: «Wal tinanh kowatxꞌe naj winaj; lahanojabꞌ chꞌeliko naj hakaꞌ hanhonh tiꞌ. Ayojabꞌ yip naj yibꞌanh sunil ej no noqꞌ ay xol haꞌ mar, yebꞌ yibꞌanh ej noꞌ chꞌik, yebꞌ yibꞌanh ej no noqꞌ chipohchalax yulaj nha, yebꞌ noꞌ xoltelajil noqꞌ, yebꞌ xin yibꞌanh noꞌ chishatxikꞌo isbꞌa sat txꞌotxꞌ,» xhi Komam.
27 Iswatxꞌen Komam Dios naj winaj yecheloj.
Hayet iswatxꞌen Komam naj bꞌabꞌel winaj tuꞌ,
iswatxꞌenpaxo Komam ix ix.
28 Yanikanayo Komam iskꞌulal yibꞌanh naj yebꞌ ix hakaꞌ tiꞌ: «Ayojabꞌ heyuninal, pohchahojabꞌi masanta chinohilo sunil yul sat yibꞌanhqꞌinal tiꞌ, kat heyok yahawo yinh sunil sat yibꞌanhqꞌinal. Chiwaqꞌnipaxojan heyip yibꞌanh ej no noqꞌ ay xol haꞌ mar yebꞌ ej noꞌ chꞌik, yebꞌpaxo yibꞌanh ej no noqꞌ chishatxikꞌo isbꞌa,» xhi Komam.
29 Tzujan tuꞌ xin, yalnipaxo Komam tet naj yebꞌ tet ix hakaꞌ tiꞌ: «Chiwakanojan ej te teꞌ chaqꞌ yinhatil ay sat txꞌo txꞌotxꞌ tiꞌ teyet, yebꞌ xin ej teꞌ lobꞌehal. Sunil hunteqꞌan teꞌ tiꞌ chiwakanojan helobꞌ.
30 »Walpaxo tet sunil ej noꞌ xoltelajil noqꞌ xin, yebꞌ tet ej noꞌ chꞌik, yebꞌ tet ej noꞌ chishatxikꞌo iskꞌul, chiwakanojan teꞌ telaj islobꞌeho noꞌ,» xhi Komam.