AY HAYEBꞌ TZOTIꞌ YIBꞌANHILO BIBLIA
Huneꞌ tiꞌ, haꞌ ton Biblia, chitzotel yinh iskꞌulchꞌanil iskꞌul Komam Dios. Kabꞌebꞌ xin Testamento ayko yinh. Huneꞌ bꞌabꞌel, haꞌ ton Payat Testamento, chitzotel yinh yet yichiko yul sat yibꞌanhqꞌinal tiꞌ, yebꞌ yet iswatxꞌen Komam Dios naj bꞌabꞌel winaj yebꞌ ix bꞌabꞌel ix, haꞌ ton naj Adán yebꞌ ix Eva; yebꞌ chitzotel yinh tzet yu ispohchakanto anma yul yibꞌanhqꞌinal. Chitzotelpaxo yinh konhobꞌ Israel, konhobꞌ issikꞌilo Komam Dios.
Huneꞌ iskabꞌ, haꞌ ton Akꞌ Testamento, chitzotel yinh kꞌul-la tzotiꞌ yet kolbꞌanile yinh Komam Jesucristo. Yinh bꞌabꞌelal, ay kanhebꞌ hum chihal-lax Evangelio: ha ton San Mateo, San Marcos, San Lucas, San Juan. Aypaxo xin Hechos, chitzotel yinh tzettaj iswatxꞌe ebꞌyaꞌ ischejabꞌ Komam Jesús, yebꞌ yet yichiko yaniko isbꞌa anma yul isqꞌabꞌ Komam, ischꞌibꞌkanokanh isbꞌisil yuninal Komam Dios. Aypaxo hunteqꞌan carta tzꞌibꞌnhebꞌilkano yu howanh ebꞌyaꞌ ischejabꞌ Komam Dios, yajaꞌ hanhe yaꞌ Pablo ekꞌbꞌal carta istzꞌibꞌnhekanoj. Haxa yinh islahobꞌal xin ayko Apocalipsis; huneꞌ tiꞌ chitzotel yinh tzettaj isye Komam Jesucristo tet yaꞌ Juan, haꞌ ton tzet chiyu yinh islahobꞌal tzꞌayik, yebꞌ yinh yet chiꞌok Komam Jesucristo Yahawiloj.
Sunil tzet tzꞌibꞌnhebꞌilkano yul Biblia tiꞌ, tzꞌibꞌnhebꞌilkano yu iskolwal Komam Espíritu Santo, yebꞌ yu yip Komam.
Huneꞌ Biblia tiꞌ, ayxako yinh abꞌxubꞌal Concepcíon Huista, ay yul ismajul Chinabꞌul; aqꞌbꞌil traducir yinh txꞌiꞌal versiones autorizado yu Sociedades Biblicas Unidas. Aypaxo xin hunteqꞌanxa hum kolwahi yet yaqꞌlax traducir, hakaꞌ comentario, diccionario yebꞌ referencia.
Chijochehanh ta huneꞌ Biblia tiꞌ, kaw chikolwa teyinh heyohtanhenilo Istzotiꞌ Komam Dios, yuto Istzotiꞌ Komam chaqꞌ kolbꞌanile, yebꞌ chonhyijbꞌa yinh tzet chu cobꞌeybꞌalnhen tzet choche Komam Dios.
Chal yul Akꞌ Testamento yinh Apocalipsis 1:3
“Saqꞌal yet anma chiꞌilni yebꞌ mak chiꞌabꞌen hunteqꞌan tzet halbꞌilkano yu Komam yul Hum tiꞌ, kat isyijen hunteqꞌan tzet tzꞌibꞌnhebꞌilkano tiꞌ, yuto toxa chiyij isbꞌa, xhihayoj.”