2
Hak tuꞌ yu islahwikano iswatxꞌen Komam Dios satkanh yebꞌ txꞌo txꞌotxꞌ yebꞌ xin sunil tzet ay yul satkanh tuꞌ, yebꞌpaxo sunil tzet ay yul sat yibꞌanhqꞌinal tiꞌ. 2 Haxa yinh ishuj tzꞌayik, matxa munla Komam, yuto xew Komam yinh sunil tzet iswatxꞌe.a 3 Tzujan tuꞌ xin, istxayenkano Komam ishuj tzꞌayik.b Yalnikano Komam tato kaw aykano yelapno yehi, yuto yinh huneꞌ tzꞌayik tuꞌ xew Komam yinh sunil tzet iswatxꞌe. 4 Hakton tiꞌ ye istzotiꞌal yet iswatxꞌenkano Komam Dios satkanh yebꞌ sunil tzet ay sat txꞌo txꞌotxꞌ tiꞌ.Naj bꞌabꞌel winaj yul peyabꞌ Edén
Yet iswatxꞌen Komam Dios Jahawilc satkanh yebꞌ txꞌo txꞌotxꞌ, 5 maxhto ej te teꞌ yebꞌ teꞌ telaj, yuto maxhto haꞌ nhabꞌ chati Komam Dios sat yibꞌanhqꞌinal tiꞌ, yebꞌ xin maxhto hunu mak chimunla sat txꞌotxꞌ. 6 Wal xin, haꞌ xobꞌ ha haꞌ chꞌah sat txꞌotxꞌ, haꞌ chꞌaqꞌni chakꞌanbꞌo sunil. 7 Yet iswatxꞌen Komam Dios naj bꞌabꞌel winaj, yinh txꞌo txꞌotxꞌ iswatxꞌe Komam naj. Lahwi tuꞌ xin, isxuniko Komam jaqꞌeqꞌ yinh istxam naj. Hak tuꞌ yu yaqꞌni Komam isqꞌinal naj, yokkano naj anmahil.
8 Tzujan tuꞌ xin, iswatxꞌen Komam Dios huneꞌ peyabꞌ bꞌey huneꞌ txꞌotxꞌ chiyij Edén, ayko yinh yetkꞌulal bꞌay chꞌahilo tzꞌayik. Yul huneꞌ peyabꞌ tuꞌ xin, ehayo naj bꞌabꞌel winaj tuꞌ. 9 Yaqꞌnipaxo chꞌibꞌo Komam sunil ej te teꞌ chisatni, saqꞌal jilni yebꞌ xin kaw kꞌul islolaxi. Yiktabꞌal huneꞌ peyabꞌ tuꞌ xin, yaqꞌ chꞌibꞌo Komam huneꞌ teꞌ lobꞌehal chꞌaqꞌni qꞌinale yebꞌpaxo xin huneꞌ teꞌ lobꞌehal chꞌaqꞌni johtanhelo bꞌaytet kꞌul yebꞌ bꞌaytet txꞌoj.
10 Yul peyabꞌ Edén tuꞌ ay isnuqꞌ huneꞌ ha haꞌ chꞌahiloj, ha haꞌ xin chihayen hunteqꞌan tzꞌunubꞌ ay yul peyabꞌ tuꞌ. Huneꞌ haꞌ tuꞌ, kanhebꞌ bꞌay chipujnakanokanh haꞌ. 11 Haꞌ bꞌabꞌel, Pisón isbꞌi haꞌ. Haꞌ ton haꞌ chꞌekꞌ hoyno huneꞌ txꞌotxꞌ chiyij Havila bꞌay kaw ay chꞌen oro. 12 Wal chꞌen oro ay sat huneꞌ txꞌotxꞌ tuꞌ, haꞌ ton chꞌen kaw kꞌul. Aypaxo xin hunteqꞌan te teꞌ ay isqꞌolal, bedelio isbꞌi, aypaxo hunteqꞌan chꞌen chꞌen kaw aykano istohol, ónice isbꞌi. 13 Walpaxo haꞌ iskabꞌ, Gihón isbꞌi haꞌ. Ha haꞌ tiꞌ, chꞌekꞌ haꞌ ishoyoꞌ huneꞌ txꞌotxꞌ chiyij Cus. 14 Walpaxo haꞌ isyox xin, Tigris isbꞌi haꞌ. Wal haꞌ tiꞌ chꞌekꞌ haꞌ yetkꞌulal bꞌay chꞌahilo tzꞌayik yinh txꞌotxꞌ Asiria. Wal haꞌ iskanh xin, Éufrates isbꞌi haꞌ.
15 Yanikto Komam Dios Jahawil naj bꞌabꞌel winaj yul peyabꞌ Edén tuꞌ yunhe ismunlahi, yebꞌ yu istanhen naj huneꞌ peyabꞌ tuꞌ. 16 Yalnikano Komam Dios tet naj hakaꞌ tiꞌ: «Chu haloni sat sunil ej te teꞌ ay yul huneꞌ peyabꞌ tiꞌ, 17 yaj wal teꞌ chꞌaqꞌni ohtanhelaxo bꞌaytet kꞌul yebꞌ bꞌaytet txꞌoj, mach chu haloni sat teꞌ, yuto ta chaloh teꞌ, chaxhkami,» xhi Komam tet naj.
18 Lahwi tuꞌ xin yalni Komam Dios hakaꞌ tiꞌ: «Kaw mach kꞌulo ye naj winaj tiꞌ ischukil. Wal tinanh chinwatxꞌehan hunu yetbꞌi naj chikolwa yinh,» xhi Komam.
19-20 Wal sunil ej no noqꞌ yebꞌ ej noꞌ chꞌik, yinh txꞌo txꞌotxꞌ iswatxꞌe Komam Dios noꞌ. Lahwi tuꞌ yinito Komam sunil ej noꞌ tet naj Adán, yunhe yaniko naj isbꞌi ej noꞌ sunil, noꞌ chipohchalax yulaj nha, yebꞌ ej noꞌ chꞌik, yebꞌpaxo noꞌ xoltelajil noqꞌ, haꞌ hunteqꞌan bꞌihe tuꞌ xin, okkano isbꞌiho ej noꞌ. Wal xin maxhtikꞌa hunu no noqꞌ tuꞌ yu yok yetbꞌiho naj yebꞌ xin iskolwa yinh naj. 21 Yaniko Komam huneꞌ niman wayanh yinh naj. Hayet lanhan isway naj xin, yinilti Komam Dios huneꞌ isbꞌajil ismotx naj. Tzujan tuꞌ xin, ishunbꞌanpaxkanayo Komam isnimanil naj bꞌay yilti huneꞌ ismotx naj. 22 Yinh huneꞌ isbꞌajil ismotx naj, iswatxꞌe Komam huneꞌ ix ix. Lahwi tuꞌ yinito Komam ix tet naj. 23 Hayet yilni naj ix, yalni naj hakaꞌ tiꞌ:
«¡Wal huneꞌ ix ix tiꞌ, kaw inchibꞌehalan yebꞌ inbꞌajilan ye ix!
Yuxinto ix chiꞌokkano isbꞌihoj,
yuto winhan elna ix yu Komam Dios,» xhi naj.
24 Yuxin chákano naj winaj ismam yebꞌ ismiꞌ, kat ishunbꞌan isbꞌa naj yebꞌ yixal, hak tuꞌ xin hunxanhe anmahil chꞌelkanikoj.
25 Wal naj bꞌabꞌel winaj yebꞌ yixal tuꞌ, tꞌilan iskawanhil. Machi xin yohtajo naj txꞌixwilal yebꞌ ix.