Yet ismanhkꞌon naj Adán yebꞌ ix Eva yinh tzet yal Komam Dios
3
Wal xol sunil ej noꞌ xoltelajil noqꞌ iswatxꞌe Komam Dios Jahawil, noꞌ labꞌa, haꞌ noꞌ kaw kanhyehi. Yet hunel xin, tzotelkanh noꞌ tet ix Eva, isqꞌambꞌen noꞌ tet ix:—¿Kaw yelmi xayal Komam Dios teyet ta mach chu heloni sunil teꞌ lobꞌehal ay yul huneꞌ peyabꞌ tiꞌ? xhi noꞌ tet ix.
2 Istaqꞌwi ix hakaꞌ tiꞌ:
—Halbꞌil jetanh yu Komam Dios ta chu kolonihanh sat sunil te teꞌ ay yul peyabꞌ tiꞌ. 3 Yaj xin, huneꞌ teꞌ ayayo yul yiktabꞌal peyabꞌ tiꞌ, mach chu kotzabꞌnihanh teꞌ, nitam kolonipaxojanh teꞌ, yuto ta chikolohanh teꞌ chonhkamanh, xhi ix.
4 Yalni noꞌ tet ix hakaꞌ tiꞌ:
—Mach yelo huneꞌ tuꞌ, wal xin mach chexkami. 5 Yal Komam Dios huneꞌ tuꞌ yuto kaw yohta Komam tato yet cheloni teꞌ, kaw lahan chꞌeliko henabꞌal yebꞌ isnabꞌal Komam, kat xin heyohtanhenilo bꞌaytet kꞌul yebꞌ bꞌaytet txꞌoj, xhi noꞌ tet ix.
6 Yilni ix tato kaw saqꞌal jilni teꞌ lobꞌehal tuꞌ, yebꞌ xin kaw kꞌul islolax teꞌ. Yekꞌ yinh isnabꞌal ix ta hayet chisloni ix teꞌ, kaw lahanxam chꞌeliko isnabꞌal ix yebꞌ Komam Dios. Hak tuꞌ xin yu yinilo ix teꞌ lobꞌehal, islohni ix teꞌ. Tzujan tuꞌ xin, yaqꞌnipaxo ix teꞌ tet naj, islohnipaxo naj teꞌ. 7 Yet islohni ix teꞌ lobꞌehal tuꞌ yebꞌ naj, isnachalo yu, yilnitij tato tꞌilan iskawanhil. Yinilo naj xaj teꞌ higuera yebꞌ ix, istzꞌisnayo naj teꞌ yebꞌ ix xilo isqꞌap.
8 Haxa yinh qꞌejbꞌiyal, yet chꞌekꞌ jaqꞌeqꞌ, yabꞌen naj yebꞌ ix tato lanhan yekꞌ Komam Dios yul peyabꞌ tuꞌ. Isto naj yinh anhe yebꞌanoto isbꞌa yebꞌ ix xolaj teꞌ qꞌebꞌtaj. 9 Yahwi Komam yinh naj, yalni Komam:
—Adán, ¿bꞌaytuꞌwal ay hach? xhi Komam.
10 Istaqꞌwi naj tet Komam:
—Mamin, hayet mawabꞌenan tato lanhan hawekꞌ yul peyabꞌ tiꞌ, manxiwkanhan, yuxin mawebꞌa hinbꞌahan yuto tꞌilan hinan, xhi naj.
11 Yalni Komam Dios tet naj:
—¿Mak xin mahalni tawet tato tꞌilan hach? ¿Tom xin maxalo sat teꞌ lobꞌehal halbꞌil tawet wuhan tato mach chaloh? xhi Komam tet naj.
12 Istaqꞌwi naj tet Komam:
—Mamin, haꞌ ix hawaqꞌ wetbꞌihojan, haꞌ ix maꞌaqꞌni teꞌ wetan, manlonihan teꞌ, xhi naj.
13 Yalni Komam tet ix hakaꞌ tiꞌ:
—¿Tzet yinh yuxin maxawute huneꞌ tuꞌ? xhi Komam. Istaqꞌwi ix tet Komam:
—Haꞌ noꞌ labꞌa makinaqꞌni subꞌchahojan, yuxin manlohan teꞌ, xhi ix tet Komam.
14 Lahwi tuꞌ xin, yalni Komam Dios tet noꞌ labꞌa hakaꞌ tiꞌ:
—Yu huneꞌ maxawute tiꞌ, chaxhintzꞌaktiꞌnhekanojan xol sunil ej no noqꞌ.
Wal tinanh haxa hakꞌul chahatxikꞌo sat txꞌotxꞌ, yebꞌ xin pojoj chaloh.
15 Chiwakojan howal texol yebꞌ ix ix tiꞌ,
yebꞌpaxo xin xol ej hawuninal yebꞌ ej yuninal ix. Chiꞌapni istzꞌayikal bꞌay chikechꞌmoto hawiꞌ yu yuninal ix,a
wal hachpaxo xin chaxhchiwaho yinh isyutz yoj yuninal ix, xhi Komam.
16 Yalnipaxo Komam tet ix ix hakaꞌ tiꞌ:
—Kaw yaꞌta chawaqꞌle yet ayxa tzet hawehi, yebꞌpaxo xin kaw chawabꞌe isyaꞌtajil yet chipitzkꞌa hawunin.
Yaj kaw chawoche hawichamil, kat hawokkanto yalanh ischejbꞌanil naj,b xhi Komam.
17 Yalnipaxo Komam tet naj winaj:
—Wal tinanh, yu maxayije tzet mayal ix tiꞌ,
maxaloni teꞌ lobꞌehal walan tato mach chu haloni, yu huneꞌ tuꞌ yuxin chintzꞌaktinhekanojan txꞌo txꞌotxꞌ tiꞌ.
Kaw xin yaꞌta chawaqꞌle hamunlahi, katto hawiqꞌni tzet chaloh yulbꞌal sunilbꞌal tiempo ayachikꞌo yul sat yibꞌanhqꞌinal tiꞌ.
18 Wal sat txꞌotxꞌ tiꞌ, chichꞌibꞌkanh ej teꞌ txꞌix,
yebꞌ ej teꞌ komon telaj, kat haloni ej teꞌ itah chichꞌibꞌ xolaj telaj.
19 Kaw chaxhmunlahi, chito el haꞌ yinh hapalanh
katto hawiqꞌni tzet chaloh masanto yet chaxhkami.
Chaxhmeltzopaxiko txꞌotxꞌal hunelxa,
yuto yinh txꞌo txꞌotxꞌ watxꞌebꞌil hach wuhan, xhi Komam.
20 Wal naj Adán tuꞌ xin, Eva yako naj isbꞌiho ix yetbꞌi tuꞌ. Eva chaliloj qꞌinale, yuto haꞌ ix, miꞌe yinh sunil anma ay yul sat yibꞌanhqꞌinal tiꞌ. 21 Iswatxꞌenayo Komam Dios xil isqꞌap naj yebꞌ ix yinh istzꞌumal no noqꞌ.
22 Lahwi tuꞌ xin, yalni Komam Dios hakaꞌ tiꞌ: «Wal tinanh, kaw lahanxa naj winaj hakaꞌ hanhonh, yuto yohtaxa naj bꞌaytet kꞌul yebꞌ bꞌaytet txꞌoj. Wal tinanh xin, yilal yelto naj yul peyabꞌ tiꞌ tajka chislopaxo naj teꞌ lobꞌehal chꞌaqꞌni qꞌinale. Yuto ta chislo naj teꞌ, chiqꞌkano naj isqꞌinal yinh hunelnhe,» xhi Komam.
23 Lahwi tuꞌ, istzumbꞌenilti Komam naj yebꞌ ix yul peyabꞌ Edén yu yokkano naj munil sat txꞌo txꞌotxꞌ. Wal xin yinh txꞌo txꞌotxꞌ watxꞌelax naj yu Komam Dios. 24 Lahwi yelkanti naj yebꞌ ix yul peyabꞌ tuꞌ, yaniko Komam Dios hunteqꞌan ebꞌnaj ángel chiyij querubín yinh yetkꞌulal bꞌay chꞌahilo tzꞌayik yunhe istanhen ebꞌnaj huneꞌ peyabꞌ tuꞌ. Yanipaxiko Komam huneꞌ chꞌen espada ayko qꞌaꞌ yinh, chꞌekꞌ hoyon yinh bꞌeh chiꞌapni yinh teꞌ lobꞌehal chꞌaqꞌni qꞌinale tuꞌ, yunhe machi hunu mak chu yapni iskꞌatanh teꞌ.c