Naj Caín yebꞌ naj Abel
4
Lahwi tuꞌ ishunbꞌan isbꞌa naj Adán yebꞌ ix Eva, ispitzkꞌati nichꞌan yunin ix. Haxa yet yapni istzꞌayikal xin, iswatxꞌi iskꞌul ix. Haꞌ nichꞌan tzꞌul tuꞌ, Caín yijkano isbꞌi. Yalni ix Eva hakaꞌ tiꞌ: «Ayxa nichꞌan wuninan winaj haꞌ Komam Dios maꞌaqꞌni wetan,» xhi ix. 2 Lahwi yekꞌto tzꞌayik xin, ispitzkꞌa hunxa nichꞌan istzꞌul ix, yuxhta naj Caín, Abel yij isbꞌi. Wal naj Abel tuꞌ, pohcha meꞌ ok naj, walpaxo naj Caín, munil sat txꞌo txꞌotxꞌ ok naj.3 Hayet yekꞌto tiempo xin, yaqꞌni naj Caín isyebꞌalqꞌabꞌ tet Komam Dios. Haꞌ isyebꞌalqꞌabꞌ naj tuꞌ, haꞌ sat istzꞌunubꞌ naj. 4 Hakpax tuꞌ xin naj Abel, yaqꞌ naj isyebꞌalqꞌabꞌ tet Komam Dios. Issikꞌlelo naj xol noꞌ bꞌabꞌel yunin ej ismeꞌ, noꞌ kaw bꞌaqꞌich, yaqꞌni naj noꞌ tet Komam. Wal Komam xin, kaw tzala Komam yinh naj Abel yebꞌ yinh isyebꞌalqꞌabꞌ naj.a 5 Walpaxo yinh naj Caín yebꞌ yinh isyebꞌalqꞌabꞌ naj, machi tzala iskꞌul Komam. Yuxin kaw chíwakanh iskꞌul naj yinh huneꞌ tuꞌ, ishowbꞌilo sat naj. 6 Yalni Komam Dios tet naj:
—¿Tzet yinh yuxin chꞌok hahowal yinh hakꞌul, yebꞌ kaw how chawute hasat? 7 Ta iskꞌulal chawatxꞌe, chimtzala hasat, yaj yu mach chawatxꞌe iskꞌulal etza chaxhaykꞌay yinh istxꞌojal. Yaj xin, chu haqꞌoji yinh istxꞌojal tuꞌ, xhi Komam tet naj.
8 Yet hunel xin, yal naj Caín tet yuxhtaj: «Tonh nino sat cheqꞌanh,» xhi naj. Haxa yet ay ebꞌnaj bꞌey tuꞌ, yok lemna naj Caín yinh naj Abel, ispotxꞌni naj naj. 9 Tzujan tuꞌ xin, isqꞌambꞌen Komam Dios tet naj Caín:
—¿Bꞌaytuꞌwal ay naj Abel, hawuxhtaj? xhi Komam. Istaqꞌwi naj:
—Mach wohtajojan, mach ayinikojan intanhenojan naj, xhi naj tet Komam.
10 Yalnipaxo Komam tet naj:
—¿Tzet yinh yuxin maxawute huneꞌ tuꞌ? Haꞌ ischikꞌil hawuxhta mamalto sat txꞌotxꞌ hawu, kaw ayko yahwi wetan yu wilnihan tzet chꞌeliko huneꞌ istxꞌojal maxawatxꞌe tuꞌ. 11 Yu huneꞌ maxawatxꞌe, yuxin chaxhintzꞌaktiꞌnhekanojan, yebꞌ xin chaxhintzumbꞌelojan sat txꞌo txꞌotxꞌ bꞌay mamalto ischikꞌil hawuxhta maxapotxꞌ tuꞌ. 12 Walka chaxhmunlahi matxa chiꞌapni iswatxꞌi sat hatzꞌunubꞌ sat txꞌo txꞌotxꞌ. Chaxhekꞌkano kolo sat txꞌo txꞌotxꞌ tiꞌ, machi xin bꞌay kachankan apno haxewi, xhi Komam.
13 Istaqꞌwikanh naj Caín tet Komam Dios hakaꞌ tiꞌ:
—Kaw mach chitecha wuhan huneꞌ isyaꞌtajil chawayo wibꞌanhtiꞌan. 14 Chinhatzumbꞌelojan sat txꞌo txꞌotxꞌ tiꞌ, kat welkanojan yinh hasat, kat wekꞌkano kolohan yul sat yibꞌanhqꞌinal tiꞌ, machi xin bꞌay kachankan apno inxewan, hawalni. Makxanhetikꞌa chinilnihan chinispotxꞌkamojan, xhi naj.
15 Istaqꞌwi Komam tet naj:
—Ta ay mak chaxhpotxꞌni, hujel ekꞌbꞌalto chiꞌay isyaꞌtajil yibꞌanh wuhan, xhi Komam.
Wal xin yako Komam huneꞌ yechel naj Caín yunhe machi mak chipotxꞌnikamo naj.
16 Lahwi tuꞌ xin, yel naj Caín sat txꞌo txꞌotxꞌ bꞌay tzotel yebꞌ Komam Dios. Isto naj sat huneꞌ txꞌo txꞌotxꞌ chiyij Nod, txꞌotxꞌ ayko yintalto txꞌotxꞌ Edén bꞌay chꞌahilo tzꞌayik.
Yet ispohchakanto yuninal naj Caín
17 Wal naj Caín, ishunbꞌa isbꞌa naj yebꞌ yixal, ispitzkꞌa huneꞌ nichꞌan yuninal naj yebꞌ ix. Haꞌ nichꞌan unin tuꞌ xin, Enoc yijkano isbꞌi. Iswatxꞌen naj Caín huneꞌ konhobꞌ, yaniko naj isbꞌi iskꞌahol yinh huneꞌ konhobꞌ tuꞌ, yuxin Enoc yijkano isbꞌi. 18 Naj Enoc, ay huneꞌ iskꞌahol naj yij Irad. Naj Irad tuꞌ, ay huneꞌ iskꞌahol naj yij Mehujael. Naj Mehujael tuꞌ xin, ay huneꞌ iskꞌahol naj yij Metusael, haxa naj Metusael tuꞌ xin, ay huneꞌ iskꞌahol naj yij Lamec. 19 Naj Lamec tuꞌ xin, kawanh yixal naj, huneꞌ ix chiyij Ada, hunxa ix xin chiyij Zila. 20 Ix Ada tuꞌ, pitzkꞌa nichꞌan yunin ix yij Jabal. Yinh naj Jabal tuꞌ xin titna ebꞌnaj ekꞌlena yul hunteqꞌan nha watxꞌebꞌilayo yinh qꞌap qꞌap. Ebꞌnaj tiꞌ pohchahom wakax ebꞌnaj. 21 Ay xin huneꞌ yuxhta naj Jabal tuꞌ yij Jubal. Yinh naj, titna sunil ebꞌnaj chꞌaniko teꞌ arpa yebꞌ teꞌ suꞌ. 22 Wal ix Zila xin pitzkꞌa huneꞌ yunin ix yij Tubal-caín. Haꞌ naj tiꞌ, chakꞌom chꞌen naj. Chiswatxꞌe naj tzettaj ye tuꞌ yinh chꞌen bronce yebꞌ yinh chꞌen hierro. Naj Tubal-caín tuꞌ xin, ay huneꞌ yanabꞌ naj yij Naama.
23 Yet hunel xin, yal naj Lamec tet ebꞌix kawanh yixal tuꞌ:
«Hach tiꞌ Ada, yebꞌ hach tiꞌ Zila, abꞌewe tzet chiwalan:
Ay huneꞌ naj inpotxꞌan yuto kinlahwihan yu naj.
Inpotxꞌan naj yu kinismaqꞌan naj.
24 Tato hujel el chiꞌay isyaꞌtajil yibꞌanh mak chipotxꞌni naj Caín,
wal hinpaxojan xin ta ay mak chinpotxꞌnihan,
kaw hujelto el 70 (lahonhebꞌ iskanhwinaj) chꞌay isyaꞌtajil yibꞌanh,» xhi naj.
Naj Set, iskꞌahol naj Adán, isselel naj Abel
25 Wal naj Adán xin, pitzkꞌa huneꞌxa yuninal naj yebꞌ ix Eva, Set alaxiko isbꞌihoj. Yalni ix hakaꞌ tiꞌ: «Mayaqꞌ Komam Dios hunxa nichꞌan wuninan selelo naj Abel, naj kam yu naj Caín,» xhi ix.
26 Wal naj Set tuꞌ xin, ay huneꞌ iskꞌahol naj yij Enós. Haꞌ yinh ishabꞌilal naj Enós tuꞌ ichiko anma yaqꞌni bꞌinaho Komam Dios.