Pohchakanh yuninal naj Set, iskꞌahol naj Adán
5
Haꞌ tiꞌ istxolal yuninal yuninal naj Adán. Naj Adán tuꞌ iswatxꞌe Komam Dios naj yecheloj. 2 Hayet iswatxꞌen Komam naj winaj tuꞌ xin, iswatxꞌenpaxo Komam ix ix. Yanikanayo Komam Dios iskꞌulal yibꞌanh naj yebꞌ ix. Yalnikano Komam tato anma chiyijkano naj yebꞌ ix.3 Kaw 130 habꞌil naj Adán yet ispitzkꞌa iskꞌahol naj chiyij Set. Naj Set tuꞌ kaw lahan naj hakaꞌ ismam. 4 Yet lahwi ispitzkꞌa naj Set tuꞌ xin, 800 habꞌilto ekꞌ naj Adán. Yulbꞌal hunteqꞌan habꞌil tuꞌ xin, kaw txꞌiꞌalto iskꞌahol naj yebꞌ iskutzꞌin naj pitzkꞌahi. 5 Haꞌ xin ishabꞌilal naj yinh sunil kaw 930 habꞌil. Lahwi tuꞌ, iskam naj.
6 Wal naj Set, ayko naj yinh 105 habꞌil yet ispitzkꞌa nichꞌan iskꞌahol naj yij Enós. 7 Yet lahwi ispitzkꞌakano naj Enós tuꞌ xin, kaw 807 habꞌilto ekꞌ naj Set tuꞌ. Yulbꞌal hunteqꞌan habꞌil tuꞌ xin, kaw txꞌiꞌalto iskꞌahol naj yebꞌ iskutzꞌin naj pitzkꞌahi. 8 Haꞌ xin ishabꞌilal naj Set yinh sunil kaw 912 habꞌil. Lahwi tuꞌ iskam naj.
9 Wal naj Enós, kaw 90 (lahonhebꞌ ishokꞌal) habꞌil naj yet ispitzkꞌa nichꞌan iskꞌahol naj yij Cainán. 10 Kaw xin 815 habꞌilto ekꞌ yaꞌ Enós tuꞌ. Yulbꞌal hunteqꞌan habꞌil tuꞌ xin, kaw txꞌiꞌalto ej iskꞌahol naj yebꞌ ej iskutzꞌin naj pitzkꞌahi. 11 Wal ishabꞌilal naj Enós tuꞌ yinh sunil, kaw 905. Lahwi tuꞌ, iskam naj.
12 Haxa naj Cainán xin, kaw 70 (lahonhebꞌ iskanhwinaj) habꞌil naj yet ispitzkꞌa nichꞌan iskꞌahol, yij Mahalaleel. 13 Kaw xin 840 habꞌilto ekꞌ naj Cainán. Yulbꞌal hunteqꞌan habꞌil tuꞌ xin, txꞌiꞌalto iskꞌahol yebꞌ iskutzꞌin naj pitzkꞌahi. 14 Wal ishabꞌilal naj Cainán yinh sunil, kaw 910 habꞌil. Lahwi tuꞌ, iskam naj.
15 Haxa naj Mahalaleel xin, kaw 65 habꞌil naj yet ispitzkꞌa nichꞌan iskꞌahol naj, yij Jared. 16 Kaw xin 830 habꞌilto ekꞌ naj Mahalaleel. Yulbꞌal hunteqꞌan habꞌil tuꞌ xin, kaw txꞌiꞌalto iskꞌahol naj yebꞌ iskutzꞌin naj pitzkꞌahi. 17 Wal ishabꞌilal naj Mahalaleel yinh sunil, kaw 895. Lahwi tuꞌ xin, iskam naj.
18 Wal naj Jared, 162 habꞌil naj yet ispitzkꞌa nichꞌan iskꞌahol naj yij Enoc. 19 Kaw xin 800 habꞌilto ekꞌ naj. Yulbꞌal hunteqꞌan habꞌil tuꞌ xin, kaw txꞌiꞌalto iskꞌahol naj yebꞌ iskutzꞌin naj pitzkꞌahi. 20 Wal ishabꞌilal naj Jared tuꞌ yinh sunil, kaw 962 habꞌil. Lahwi tuꞌ xin iskam naj.
21 Wal yaꞌ Enoc, kaw 65 (howebꞌ iskanhwinaj) habꞌil yaꞌ yet ispitzkꞌa nichꞌan iskꞌahol yaꞌ yij Matusalén. 22 Yaꞌ Enoc tuꞌ, kaw yijem yute isbꞌa yaꞌ yinh tzet yal Komam Dios. Kaw xin 300 habꞌilto ekꞌ yaꞌ yet ispitzkꞌa naj Matusalén. Yulbꞌal hunteqꞌan habꞌil tuꞌ, kaw txꞌiꞌalto iskꞌahol yaꞌ yebꞌ iskutzꞌin yaꞌ Enoc tuꞌ pitzkꞌahi. 23 Wal yaꞌ Enoc kaw 365 ishabꞌilal yinh sunil. 24 Yaꞌ Enoc tuꞌ, yu kaw yijem yaꞌ yinh tzet yal Komam Dios yuxin apni huneꞌ tzꞌayik bꞌay matxa il-lax yinh yaꞌ, yuto ilaxto yaꞌ satkanh yu Komam Dios.
25 Wal naj Matusalén, kaw 187 habꞌil naj yet ispitzkꞌa nichꞌan iskꞌahol naj yij Lamec. 26 Kaw xin, 782 habꞌilto ekꞌ naj yet ispitzkꞌakano naj Lamec. Yulbꞌal hunteqꞌan habꞌil tuꞌ, kaw txꞌiꞌalto iskꞌahol naj yebꞌ iskutzꞌin naj pitzkꞌahi. 27 Yuxin kaw 969 ishabꞌilal naj Matusalén tuꞌ yinh sunil. Tzujan tuꞌ xin, iskam naj.
28 Wal naj Lamec, kaw 182 habꞌil naj yet ispitzkꞌa nichꞌan iskꞌahol naj. 29 Haꞌ nichꞌan unin pitzkꞌa tuꞌ xin, Noé yijkano isbꞌi, yuto yal naj mame hakaꞌ tiꞌ: «Komam Dios tzꞌaktiꞌnhenkano txꞌo txꞌotxꞌ, yuxin kaw yaꞌtaj chijaqꞌle katto ischꞌibꞌ kotzꞌunubꞌ, yaj wal xin haꞌ nichꞌan unin tiꞌ chonhaqꞌno xewoj,» xhi naj. 30 Naj Lamec tuꞌ, kaw 595 habꞌilto ekꞌ naj. Yulbꞌal hunteqꞌan habꞌil tuꞌ xin, kaw tzetkꞌato iskꞌahol naj yebꞌ iskutzꞌin naj pitzkꞌahi. 31 Yuxin naj Lamec kaw 777 ishabꞌilal naj yinh sunil. Lahwi tuꞌ, iskam naj.
32 Yet ayko yaꞌ Noé yinh 500 habꞌil ispitzkꞌa ebꞌnaj iskꞌahol yaꞌ, chiyij isbꞌi hakaꞌ tiꞌ: naj Sem, naj Cam yebꞌ naj Jafet.