Istxꞌojal anma yul sat Komam Dios
6
1-2 Yet yichiko ispohcha anma yul sat yibꞌanhqꞌinal tiꞌ, kaw txꞌiꞌal ej yuninal anma tuꞌ pitzkꞌahi. Yet yilni ebꞌnaj yuninal Komam Dios tato kaw kꞌulchꞌan jilni ebꞌix iskutzꞌin ebꞌnaj winaj tuꞌ, issaynilo ebꞌnaj yixal xol ebꞌix, yiqꞌni ebꞌnaj ebꞌix.3 Yu huneꞌ tuꞌ yuxin yal Komam Dios hakaꞌ tiꞌ: «Wal tinanh matxa nimano tiempo chiꞌekꞌ anma yul sat yibꞌanhqꞌinal tiꞌ, yuto anmanhe. Wal xin 120 habꞌilnhe chꞌekꞌi,» xhi Komam.
4 Yet yiqꞌni ebꞌnaj yuninal Komam Diosa ebꞌix iskutzꞌin ebꞌnaj tuꞌ, ispitzkꞌa yuninal ebꞌnaj yebꞌ ebꞌix. Haꞌ yuninal ebꞌnaj tuꞌ xin, kaw nimejkano istel yebꞌpaxo xin kaw aykano yip ebꞌnaj. Kaw xin aykano yelapno ebꞌnaj yul sat anma yet payat tuꞌ.
5 Yilni Komam Dios tato kaw txꞌojkano isbꞌeybꞌal sunil anma ay yul sat yibꞌanhqꞌinal tiꞌ, hanhkꞌanhetikꞌa istxꞌojal ayko yinh isnabꞌal iswatxꞌeni, 6 kaw takkanh iskꞌul Komam yilni huneꞌ tuꞌ, 7 yuxin yal Komam hakaꞌ tiꞌ: «Majaltam mach inwatxꞌehan hunteqꞌan anma tiꞌ. Wal tinanh, chiwilojan sunil anma sat txꞌo txꞌotxꞌ, yebꞌpaxo sunil ej no noqꞌ chipohchalax yulaj nha, yebꞌ ej noꞌ xoltelajil noqꞌ, yebꞌ ej noꞌ chishatxikꞌo isbꞌa, yebꞌpaxo ej noꞌ chꞌik. Wal xin majaltam mach inwatxꞌehan,» xhi Komam.
8 Yaj wal yinh yaꞌ Noé, kaw chitzala iskꞌul Komam.
Yet iswatxꞌen yaꞌ Noé huneꞌ teꞌ niman barco
9 Hak tiꞌ ye istzotebꞌanil yaꞌ Noé.
Yaꞌ Noé tuꞌ, kaw kꞌulkano isbꞌeybꞌal yaꞌ, yebꞌ kaw toholkano yanma yaꞌ xol sunil anma yinh huneꞌ tiempohal tuꞌ. Iswatxꞌe yaꞌ tzet yoche iskꞌul Komam Dios. 10 Yaꞌ Noé tuꞌ, oxwanh iskꞌahol yaꞌ, hak tiꞌ isbꞌi ebꞌnaj hakaꞌ tiꞌ: naj Sem, naj Cam yebꞌ naj Jafet. 11 Wal anma yul sat yibꞌanhqꞌinal tiꞌ kaw matzwalil isbꞌeybꞌal yul sat Komam Dios. 12 Kaw haxanhetikꞌa istxꞌojal chiswatxꞌe. Yet yilni Komam tato kaw xapalkꞌon ismul anma, 13 yalni Komam tet yaꞌ Noé: «Xaꞌel yinh inkꞌulan intanhtzenilojan anma ay yul sat yibꞌanhqꞌinal, yuto yu ismachiswalilal anma yuxin kaw ay istxꞌojal. Tinanh xin chiwaqꞌ kꞌayolojan sunil anma yebꞌ sunil tzet ay yul sat yibꞌanhqꞌinal. 14 Wal xin, watxꞌe hunu teꞌ barco, ha teꞌ gofer chawako isteꞌalo teꞌ. Txꞌiꞌal xin chawute yul teꞌ, kat hawaniko qꞌol yinta teꞌ yebꞌ yul teꞌ bꞌay chilaischah isbꞌa hunun yaqꞌinteꞌal teꞌ, haxinwal mach chiꞌokto ha haꞌ yul teꞌ. 15 Huneꞌ teꞌ barco tuꞌ, hak tiꞌ chawute ismalil teꞌ hakaꞌ tilah: 135 metro chawuteko istel teꞌ, wal istxikin teꞌ xin 22 (kabꞌ iskawinaj) metro yok yiktaj metro chawute, yebꞌpaxo xin 13 (oxlahonhebꞌ) metro yok yiktaj metro chawutekanh istel teꞌ. 16 Oxebꞌ piso chawute teꞌ, kat xin hawatxꞌen hunu isventanahil teꞌ yinh iswiꞌ, yikta metro chawute istel huneꞌ ventanah tuꞌ. Lahwi tuꞌ kat hawaniko huneꞌ ispultahil teꞌ yinh iskꞌul. 17 Chiwatijan huneꞌ niman yaxnhabꞌ, kat isnohilo sunil yul sat yibꞌanhqꞌinal tiꞌ yu haꞌ, hak tuꞌ chu istanhkanilo sunil tzet itzitz sat txꞌo txꞌotxꞌ. Sunil tzet ay yul sat yibꞌanhqꞌinal tiꞌ chikamkaniloj. 18 Wal tawet xin chiwaqꞌan huneꞌ intratohan, yuxin chaxhokto yul teꞌ barco, yebꞌ hawixal, yebꞌ ebꞌnaj hakꞌahol, yebꞌ ebꞌix yixal ebꞌnaj hakꞌahol tuꞌ. 19-20 Chawipaxikto ej no noqꞌ yul teꞌ; hunu noꞌ winaj yebꞌ hunu noꞌ ix yinh hunun ismajanil no noqꞌ ay yul sat yibꞌanhqꞌinal tiꞌ, haxinwal chikolcha noꞌ tawintaj. Chawikto ej noꞌ chꞌik, yebꞌ ej noꞌ xoltelajil noqꞌ, yebꞌ ej noꞌ chipohchalax yulaj nha, yebꞌpaxo ej noꞌ yibꞌanh iskꞌul chiꞌekꞌ hatxoni. Sunil hunteqꞌan noꞌ tiꞌ chawikto tawintaj, haxinwal machi kam sunil ej no noqꞌ. 21 Wal xin, kutxbꞌako sunil tzet chaloh yebꞌ tzet chisloh ej no noqꞌ tuꞌ kat hawanikto yul teꞌ barco tuꞌ, haxinwal ay tzet chaloh yebꞌ noꞌ,» xhi Komam tet yaꞌ.
22 Wal yaꞌ Noé tuꞌ xin, isyije yaꞌ hakaꞌtikꞌa yu yalni Komam Dios.