Yet yaniti Komam Dios huneꞌ niman yaxnhabꞌ
7
Lahwi tuꞌ, yalni Komam Dios tet yaꞌ Noé hakaꞌ tiꞌ: «Xol sunil anma ay yul sat yibꞌanhqꞌinal tiꞌ, hachnhechꞌan kaw kꞌul habꞌeybꞌal yul insatan. Wal xin, chaxhokto yul teꞌ barco yebꞌ hawixal yebꞌ ebꞌnaj hakꞌahol yebꞌ ebꞌix hawalibꞌ. 2 Chawipaxikto no noqꞌ kꞌul yok yinh xahanbꞌalil; hujkꞌonho noꞌ winaj, yebꞌ hujkꞌonho noꞌ ix. Wal xol sunil ej noꞌ komon xin, huneꞌnhechꞌan noꞌ icham yebꞌ huneꞌnhechꞌan noꞌ ix chawiktoj. 3 Walpaxo xol sunil ej noꞌ chꞌik, chawikto hujkꞌonho noꞌ winaj yebꞌ hujkꞌonho noꞌ ix yinh hunun majan noꞌ, haxinwal mach chitanhilo yinhatil noꞌ. 4 Wal xin yinh hujebꞌ tzꞌayik tinanh, chiwatijan huneꞌ niman yaxnhabꞌ, kaw xin 40 (kawinaj) tzꞌayik yebꞌ 40 (kawinaj) aqꞌbꞌal chaqꞌ haꞌ nhabꞌ tuꞌ. Chintanhtzekanilojan sunil tzet itzitz ay yul sat yibꞌanhqꞌinal tiꞌ yebꞌ xin sunil tzet watxꞌebꞌil wuhan,» xhi Komam. 5 Wal yaꞌ Noé, kaw isyije yaꞌ yinh sunil tzet yal Komam Dios.6 Yet yaqꞌni haꞌ niman yaxnhabꞌ tuꞌ, kaw 600 ishabꞌilal yaꞌ Noé. 7 Yokto yaꞌ yul teꞌ barco tuꞌ yebꞌ yixal, yebꞌ ebꞌnaj iskꞌahol, yebꞌ yalibꞌ, yunhe iskolcha sunil tet huneꞌ niman yaxnhabꞌ tuꞌ. 8 Yokpaxto xin ej no noqꞌ kꞌul yok yinh xahanbꞌalil yebꞌpaxo noꞌ komon noqꞌ. Yokpaxto xin ej noꞌ chꞌik yebꞌ ej noꞌ chishatxikꞌo iskꞌul. 9 Sunil hunteqꞌan noꞌ tuꞌ okto yinta yaꞌ Noé yul teꞌ barco. Kaw xin katakꞌonh yu yokto noꞌ; huneꞌ noꞌ icham yebꞌ huneꞌ noꞌ ix, hakaꞌtikꞌa yu yalni Komam Dios tet yaꞌ Noé.
10 Yet yapni yinh ishuj tzꞌayik tuꞌ xin, istzabꞌniko yaqꞌni haꞌ yax nhabꞌ, yichiko isnohkanh haꞌ sat txꞌo txꞌotxꞌ tiꞌ. 11 Hayet 600 ishabꞌilal yaꞌ Noé tuꞌ, yinh ishujlahonhebꞌ tzꞌayik yinh iskabꞌ ixahaw islinhmohti ha haꞌ yul txꞌo txꞌotxꞌ, 12 kaw xin yulbꞌal 40 (kawinaj) tzꞌayik yebꞌ yulbꞌal 40 (kawinaj) aqꞌbꞌal yaqꞌ haꞌ nhabꞌ tuꞌ yul sat yibꞌanhqꞌinal tiꞌ. 13 Haꞌ yinh huneꞌ tzꞌayik yet yichiko yaqꞌni haꞌ nhabꞌ tuꞌ okto yaꞌ Noé yul teꞌ barco, yebꞌ yixal yebꞌ ebꞌnaj kꞌahole; naj Sem, naj Cam yebꞌ naj Jafet. Okpaxto ebꞌix alibꞌe. 14 Yokpaxto sunil ej noꞌ xoltelajil noqꞌ, yebꞌ ej noꞌ chipohchalax yulaj nha, yebꞌ ej noꞌ chishatxikꞌo iskꞌul, yebꞌpaxo ej noꞌ chꞌik. 15 Sunil hunteqꞌan noꞌ tiꞌ okto yinta yaꞌ Noé yul teꞌ barco. Kaw xin katakꞌonh yu yokto noꞌ. 16 Yikto yaꞌ huneꞌ noꞌ icham yebꞌ huneꞌ noꞌ ix yinh hunun majan ej no noqꞌ. Kaw isyije yaꞌ hakaꞌtikꞌa yu yalni Komam Dios tet yaꞌ. Lahwi tuꞌ xin ispebꞌankano Komam Dios ispultahil teꞌ niman barco tuꞌ.
17 Wal haꞌ niman yaxnhabꞌ tuꞌ, 40 (kawinaj) tzꞌayik yaqꞌ haꞌ. Yichiko isnohkanh haꞌ sat txꞌo txꞌotxꞌ. Wal teꞌ barco tuꞌ xin, ah teꞌ yibꞌanh haꞌ. 18 Kaw xin hunun tzꞌayik ischꞌibꞌkanh ha haꞌ tuꞌ yibꞌanh txꞌotxꞌ, wal teꞌ barco, sutsun yahpaxo teꞌ yibꞌanh haꞌ. 19 Kaw nahat ahkano haꞌ yul sat yibꞌanhqꞌinal tiꞌ. Sunil ej witz kaw nahat yekanokanh mujikanto yalanh haꞌ. 20 Kaw nohkanokanh haꞌ yul sat yibꞌanhqꞌinal tiꞌ, kaw hujebꞌto metro palkꞌonkanh haꞌ yibꞌanh ej witz kaw nahat yekanh. 21 Hak tuꞌ yu iskamkanilo sunil anma ay yul sat yibꞌanhqꞌinal, iskampaxo sunil ej noꞌ chꞌik yebꞌpaxo sunil ej noꞌ chipohchalax yulaj nha, yebꞌ sunil ej noꞌ xoltelajil noqꞌ. Iskampaxo sunil ej noꞌ chishatxikꞌo iskꞌul. 22 Sunil tzet itzitz yul sat yibꞌanhqꞌinal kaw tanhiloj. 23 Kaw hanhkꞌanhe yaꞌ Noé yebꞌ mak okto yinta yaꞌ yul teꞌ barco tuꞌ kolchahi, yebꞌpaxo sunil ej no noqꞌ okto yinta yaꞌ. Walpaxo sunil anma xin kamiloj. Iskampaxilo sunil ej no noqꞌ, noꞌ chipohchalax yulaj nha, yebꞌ sunil ej noꞌ chꞌik, yebꞌpaxo ej no noqꞌ chishatxikꞌo iskꞌul. 24 Wal ha haꞌ tuꞌ xin, kaw howebꞌ ixahaw ehayo haꞌ yibꞌanh txꞌo txꞌotxꞌ tiꞌ.