Yet lahwi yaqꞌnikanilo haꞌ niman yaxnhabꞌ
8
Wal xin kaw isnahti Komam Dios yaꞌ Noé yebꞌ sunil ej no noqꞌ ayikto yinta yaꞌ yul teꞌ barco tuꞌ. Yaniti Komam huneꞌ jaqꞌeqꞌ yul sat yibꞌanhqꞌinal tiꞌ, yichiko ispaxayo haꞌ. 2 Islinhi yahilo haꞌ linhmohati sat txꞌotxꞌ tiꞌ, islinhipaxo yayilo ha haꞌ linhmohayti satkanh. Hak tuꞌ xin yu istuki yaqꞌni huneꞌ yaxnhabꞌ tuꞌ. 3 Wal ha haꞌ nohkanokanh sat txꞌo txꞌotxꞌ tiꞌ, kaw nixhtejalnhe ispaxayo haꞌ. Haxa yet yapni yinh 150 tzꞌayik istanhkanayo haꞌ sat txꞌo txꞌotxꞌ tiꞌ. 4 Wal teꞌ niman barco tuꞌ xin, aykano bꞌatxno teꞌ yibꞌanh iswiꞌ huneꞌ witz xol hunteqꞌan witz chiyij Ararat, yinh 17 (ishujlahonhebꞌ) tzꞌayik yet ishuj ixahaw yinh huneꞌ habꞌilal tuꞌ. 5 Haxa yinh 10 (islahonhebꞌ) ixahaw yinh bꞌabꞌel tzꞌayik xin yixtanhwi iswiꞌ hunteqꞌan witz kaw nahat yekanokanh, yuto kaw hunun tzꞌayik yay sutsun haꞌ sat txꞌotxꞌ tiꞌ.6 Hayet lahwi istzꞌajna 40 (kawinaj) tzꞌayik xin, ishajni yaꞌ Noé isventanahil teꞌ barco watxꞌebꞌil yu tuꞌ, 7 yanilti yaꞌ huneꞌ noꞌ hoh. Wal noꞌ hoh tuꞌ xin, tonhe purpun yekꞌ noꞌ yechman ispaxayo haꞌ. 8 Lahwi tuꞌ, yanipaxilti yaꞌ Noé huneꞌ noꞌ kuwis yunhe isto noꞌ yilnoj tato xapaxayo ha haꞌ yul sat yibꞌanhqꞌinal tiꞌ. 9 Wal noꞌ kuwis tuꞌ, machi bꞌay yu isxew noꞌ, yuto kaw nohnatoyo ha haꞌ sat txꞌotxꞌ tiꞌ, yuxin meltzo noꞌ hunelxa bꞌay ay teꞌ barco. Hayet yilni yaꞌ Noé yapni noꞌ, yinikto yaꞌ noꞌ yul teꞌ barco tuꞌ hunelxa.
10 Yaꞌ Noé tuꞌ xin yechma yaꞌ hujebꞌxa tzꞌayik yanilti yaꞌ noꞌ kuwis tuꞌ hunelxa. 11 Haxa yet lanhanxa isqꞌejbꞌayo xin ismeltzopaxti noꞌ, iqꞌbꞌil huneꞌ isqꞌabꞌ teꞌ olivo yul sup istiꞌ noꞌ. Hak tuꞌ yu istxumni yaꞌ Noé tato lanhan ispaxayo ha haꞌ sat txꞌotxꞌ tiꞌ. 12 Yechmanpaxo yaꞌ hujebꞌxa tzꞌayik yanipaxilti yaꞌ noꞌ kuwis yinh yoxel, yajaꞌ xin matxa meltzo noꞌ iskꞌatanh yaꞌ.
13 Haxa yet 601 habꞌilxa yaꞌ Noé, yinh isbꞌabꞌel tzꞌayik, yinh isbꞌabꞌel ixahaw istanhayo ha haꞌ sat txꞌo txꞌotxꞌ. Yinilo yaꞌ hanikꞌ iswiꞌ teꞌ barco tuꞌ, yilni yaꞌ tato tajinxa sat txꞌo txꞌotxꞌ tiꞌ. 14 Haxa yinh tzꞌayik 27 (hujebꞌ iskawinaj) yinh iskabꞌ ixahaw xin, kaw tajinxa yul sat yibꞌanhqꞌinal tiꞌ. 15 Lahwi tuꞌ, yalni Komam Dios tet yaꞌ Noé hakaꞌ tiꞌ: 16 «Noé, wal tinanh elanhti yul teꞌ barco, yebꞌ hawixal, yebꞌ ebꞌnaj hakꞌahol yebꞌpaxo ebꞌix yixal ebꞌnaj hakꞌahol. 17 Ipaxilti sunil ismajil ej no noqꞌ ayikto yul teꞌ barco tiꞌ; ej noꞌ chꞌik, yebꞌ ej noꞌ xoltelajil noqꞌ yebꞌ ej noꞌ chipohchalax yulaj nha, yebꞌpaxo noꞌ chishatxikꞌo iskꞌul. Wal xin pujnajabꞌto noꞌ sat txꞌo txꞌotxꞌ tiꞌ, kat ispohchapaxkanto noꞌ yul sat yibꞌanhqꞌinal tiꞌ hunelxa,» xhi Komam.
18 Lahwi tuꞌ xin, yelti yaꞌ Noé yul teꞌ barco yebꞌ yixal yebꞌ ebꞌnaj iskꞌahol yebꞌ ebꞌix yixal ebꞌnaj kꞌahole tuꞌ. 19 Yelpaxti sunil ej no noqꞌ, noꞌ chipohchalax yulaj nha, yebꞌ noꞌ xoltelajil noqꞌ, yebꞌ ej noꞌ chishatxikꞌo iskꞌul, yebꞌpaxo xin ej noꞌ chꞌik. 20 Lahwi yelti yaꞌ Noé, islatzꞌbꞌankanh yaꞌ chꞌen chꞌen bꞌay chaqꞌ isxahanbꞌal tet Komam Dios. Ispotxꞌni yaꞌ ej no noqꞌ kꞌul yok yinh xahanbꞌalil, yebꞌ noꞌ chꞌik kꞌul yok yinh xahanbꞌalil, yalten yaꞌ noꞌ tet Komam Dios. Hak tuꞌ yu yaqꞌni yaꞌ yuchꞌandios tet Komam. 21 Wal huneꞌ xahanbꞌal yaqꞌ yaꞌ tet Komam Dios tuꞌ, kaw apni xuqꞌal sam sata Komam. Istzala iskꞌul Komam, yalni Komam hakaꞌ tiꞌ: «Wal tinanh, matxa bꞌaqꞌinhal chintzꞌaktinhehan txꞌo txꞌotxꞌ yu ismul anma. Wal xin, hanhetikꞌa istxꞌojal ayko yinh isnabꞌal iswatxꞌeni yichtaxtikꞌa ischꞌibꞌkanh, yajaꞌ matxa bꞌaqꞌinhal chintanhtzelojan anma yebꞌ ej no noqꞌ ay yul sat yibꞌanhqꞌinal tiꞌ.
22 Yuxin hayet aytokꞌo huneꞌ yul sat yibꞌanhqꞌinal tiꞌ,
chichꞌibꞌo ej tzꞌunubꞌ kat yaqꞌni issat. Aypaxo xin chew yebꞌ qꞌaꞌ,
aypaxo xin nhabꞌil yebꞌ waresma,
yebꞌ xin tzꞌayikal yebꞌ aqꞌbꞌalil,» xhi Komam Dios.