Yaqꞌ Komam Dios istrato tet yaꞌ Noé
9
Yanikanayo Komam Dios iskꞌulal yibꞌanh yaꞌ Noé yebꞌ yibꞌanh ebꞌnaj iskꞌahol yaꞌ, yalni Komam hakaꞌ tiꞌ: «Kaw nimanojabꞌ heyuninal, pohchahojabꞌpaxkanto anma yinh heyuninal tuꞌ, kat xin isnohilo yul sat yibꞌanhqꞌinal tiꞌ yu anma. 2 Wal sunil ej no noqꞌ ay yul sat yibꞌanhqꞌinal tiꞌ, chixiw noꞌ teyet. Chiwaqꞌpaxojan heyip yibꞌanh ej noꞌ chꞌik chꞌekꞌ satkanh yebꞌ yibꞌanh ej no noqꞌ ay sat txꞌotxꞌ tiꞌ, yebꞌ xin yibꞌanh ej no noqꞌ ay xol haꞌ mar. 3 Chu hekꞌuxni ischibꞌehal sunil ej no noqꞌ cheyoche, yebꞌ xin chu heloni sunil ej teꞌ itah yebꞌ ej sat teꞌ lobꞌehal. Sunil hunteqꞌan tiꞌ chiwakanojan teyet. 4 Yaj xin, mach chu hekꞌuxni ischibꞌehal ej no noqꞌ aytoko ischikꞌil xol ischibꞌehal, hakaꞌ noꞌ chishojtxꞌanhnhe isbꞌa, yuto yinh ischikꞌil noꞌ ayko iskawil. 5 Wal xin, tato ay hunu no noqꞌ chipotxꞌni hunu maka, haninan chiwilan tzet chiꞌeliko noꞌ, yebꞌ xin ta ay hunu mak chipotxꞌnikamo hunu yet anmahil, haninan chiwilan tzet chꞌelikoj.6 Tato ay hunu mak chipotxꞌni hunu yet anmahil,
nanxa mak chipotxꞌnipaxo kamoj, yuto naj winaj watxꞌebꞌil naj wuhan wechelojan.
7 Wal hex tiꞌ xin, kaw ayojabꞌ heyuninal yebꞌ xin pohchahojabꞌ heyuninal tuꞌ.
Nohojabꞌilo yul sat yibꞌanhqꞌinal tiꞌ
yu anma chipoh yinh heyuninal,» xhi Komam.
8 Yalnipaxo Komam Dios tet yaꞌ Noé yebꞌ tet ebꞌnaj iskꞌahol yaꞌ hakaꞌ tiꞌ: 9 «Wal tinanh chiwaqꞌkanojan huneꞌ intratotiꞌan teyet, yebꞌ tet ej anma chipoho yinh heyuninal, 10 yebꞌpaxo tet ej no noqꞌ elti teyintaj yul teꞌ barco; ej noꞌ chꞌik, ej noꞌ chipohchalax yulaj nha, yebꞌ ej noꞌ xoltelajil noqꞌ, yebꞌpaxo tet ej noꞌ chipoh yul sat yibꞌanhqꞌinal tiꞌ. 11 Huneꞌ trato chiwaqꞌan teyet tiꞌ, mach chinhelan, yuxin matxa bꞌaqꞌinh chintanhtzelojan anma yebꞌ ej no noqꞌ yu haꞌ nhabꞌ. Matxa chiwatijan hunuxa niman yaxnhabꞌ chitanhtzenilo sunil tzet ay sat yibꞌanhqꞌinal tiꞌ,» xhi Komam.
12 Yalnipaxo Komam: «Haꞌ xin huneꞌ yechel trato chiwaqꞌan teyet yebꞌ tet ej no noqꞌ yinh sunilbꞌal ej tiempo, 13 haꞌ ton noꞌ chꞌer wakanhan satkanh. Haꞌ noꞌ xin, chiꞌokkano yechelo yinh huneꞌ trato chiwaqꞌan teyet tiꞌ. 14 Yet chiwanitijan moyan satkanh, kat yil-lax noꞌ chꞌer xol moyan tuꞌ, 15 hak tuꞌ xin chu innanitijan tato ay huneꞌ trato waqꞌan teyet yebꞌ tet ej no noqꞌ, tato matxa chiwatijan hunu yaxnhabꞌ chitanhtzenilo tzet ay sat yibꞌanhqꞌinal tiꞌ. 16 Yet chiꞌah noꞌ chꞌer xol moyan, chiwilan noꞌ, kat innanotijan huneꞌ trato waqꞌkanojan tet sunil anma yinh sunilbꞌal ej tiempo, yebꞌ tet ej no noqꞌ ay yul sat yibꞌanhqꞌinal tiꞌ,» xhi Komam.
17 Yalnipaxo Komam: «Haꞌ ton huneꞌ tiꞌ chiwakanojan yechelo huneꞌ trato waqꞌkanojan tet anma yebꞌ tet sunil ej no noqꞌ,» xhi Komam Dios tet yaꞌ Noé.
Yaꞌ Noé yebꞌ ebꞌnaj iskꞌahol
18 Ebꞌnaj iskꞌahol yaꞌ Noé elti yul teꞌ barco, haꞌ ton naj Sem, naj Cam yebꞌ naj Jafet. Naj Cam, haꞌ naj ismam naj Canaán. 19 Yinh ebꞌnaj oxwanh iskꞌahol yaꞌ Noé tuꞌ xin pohchakanti sunil anma ay sat txꞌo txꞌotxꞌ tiꞌ.
20 Wal yaꞌ Noé ichiko ismunla sat txꞌo txꞌotxꞌ, istzꞌun yaꞌ teꞌ uva. 21 Yet hunel xin, yukꞌ yaꞌ yal teꞌ uva, yukꞌikanh yaꞌ, istzilnilo yaꞌ xil isqꞌap yinh. Iskankano kupno yaꞌ yiktabꞌal qꞌap mantiado watxꞌebꞌilayo yatutoj. 22 Wal naj Cam, ismam naj Canaán, hayet yilni naj ta tꞌilan ismam tuꞌ, yelti naj yalno tet yuxhtaj. 23 Hayet yabꞌen naj Sem yebꞌ naj Jafet, yinito ebꞌnaj huneꞌ sábana yibꞌanh iswixikꞌ, isto ebꞌnaj islitxꞌbꞌanoyo yibꞌanh ismam tuꞌ. Yajaꞌ yunhe mach chil ebꞌnaj tato tꞌilan yaꞌ, yuxin yet isto ebꞌnaj yanoyo qꞌap, yinta ebꞌnaj bꞌelwitoj yebꞌ xin nan bꞌay tꞌanhanto ebꞌnaj yunhe mach chiyil ebꞌnaj tato tꞌilan ismam.
24 Hayet iswatxꞌilo iskꞌul yaꞌ Noé, yabꞌenilo yaꞌ tato il-lax yaꞌ yu iskꞌahol, naj islahobꞌal unin. 25 Yalni yaꞌ hakaꞌ tiꞌ:
«Chintzꞌaktinhekanojan naj Canaán,
chꞌokokano naj ischejabꞌo kawanh yuxhtaj,» xhi yaꞌ.
26 Yalnipaxo yaꞌ:
«Walpaxo naj Sem, haꞌojabꞌ Komam Dios, inDiosalan,
chꞌanayo iskꞌulal yibꞌanh naj,
kat yokkano naj Canaán ischejabꞌo naj.
27 Walpaxo naj Jafet, kaw pohchahojabꞌ yuninal naj yebꞌ kaw ayojabꞌ tzet ay naj,
kat yehayo naj sat istxꞌotxꞌ naj Sem, kat yokpaxo naj Canaán ischejabꞌo naj,» xhi yaꞌ.