2 Ebꞌnaj iskꞌahol naj Jafet, haꞌ ton ebꞌnaj tiꞌ: naj Gomer, naj Magog, naj Madai, naj Javán, naj Tubal, naj Mesec yebꞌ naj Tiras. 3 Wal ebꞌnaj iskꞌahol naj Gomer xin, haꞌ ton ebꞌnaj tiꞌ: naj Askenaz, naj Rifat yebꞌ naj Togarma. 4 Wal iskꞌahol naj Javán, haꞌ ton naj Elisa, naj Tarsis, naj Quitim yebꞌ naj Dodanim. 5 Haꞌ ebꞌnaj tiꞌ xin, titna yinh ej yuninal naj Jafet. Haꞌ xin ebꞌnaj pohchakanto istiꞌla haꞌ mar, hakaꞌtikꞌa yabꞌxubꞌal ebꞌnaj yebꞌ yikꞌal ebꞌnaj yinh hunun iskonhobꞌ.

6 Ebꞌnaj iskꞌahol naj Cam, haꞌ ton ebꞌnaj tiꞌ: naj Cus, naj Mizraim, naj Fut yebꞌ naj Canaán. 7 Walpaxo ebꞌnaj iskꞌahol naj Cus xin, haꞌ ton ebꞌnaj tiꞌ: naj Seba, naj Havila, naj Sabta, naj Raama, yebꞌ naj Sabteca. Walpaxo ebꞌnaj iskꞌahol naj Raama xin, haꞌ ton naj Seba yebꞌ naj Dedán. 8 Naj Cus, haꞌ naj ismam naj Nimrod. Naj Nimrod tuꞌ, haꞌ naj bꞌabꞌel winaj kaw aykano yip sat txꞌo txꞌotxꞌ tiꞌ yet payat tuꞌ. 9 Naj Nimrod tuꞌ, kaw helan naj uste noqꞌ, yuto hak tuꞌ yoche Komam Dios. Yu huneꞌ tuꞌ yuxin chihal-lax hakaꞌ tiꞌ: «Lahanojabꞌ chꞌeliko naj tiꞌ hakaꞌ naj Nimrod, naj ustem noqꞌ kaw helan yul sat Komam Dios,» xhi. 10 Ay hunteqꞌan konhobꞌ kaw aykano yelapno ye iswatxꞌe naj, yahaw yuko naj yinh, haꞌ ton konhobꞌ Babel, konhobꞌ Erec, konhobꞌ Acad yebꞌpaxo konhobꞌ Calne. Hunteqꞌan konhobꞌ tiꞌ ayayo yul ismajul txꞌotxꞌ Sinar. 11 Lahwi tuꞌ xin, yel naj yul ismajul txꞌotxꞌ Sinar, isto naj bꞌey yul ismajul txꞌotxꞌ Asiria. Haꞌ bꞌey tuꞌ iswatxꞌe naj huneꞌ konhobꞌ Nínive, yebꞌ xin konhobꞌ Rehobot, yebꞌ konhobꞌ Kala. 12 Iswatxꞌenpaxo naj hunxa konhobꞌ Resén kaw nimajalkanoj. Huneꞌ konhobꞌ tiꞌ ayayo xolbꞌal konhobꞌ Nínive yebꞌ konhobꞌ Kala.

13 Yinh naj Mizraim titna ebꞌnaj ludeo, ebꞌnaj anameo, ebꞌnaj lehabita, ebꞌnaj naftuhíta,^a 14 yebꞌ ebꞌnaj patruseo, ebꞌnaj casluhíta, yinh ebꞌnaj tuꞌ xin titna ebꞌnaj filisteo yebꞌ ebꞌnaj caftorita.

15 Wal naj Canaán xin, haꞌ naj ismam naj Sidón yebꞌ naj Het. Naj Sidón, haꞌ naj bꞌabꞌel kꞌahole. 16 Yinh naj Canaán titna ebꞌnaj jebuseo, yebꞌ ebꞌnaj amorreo, ebꞌnaj gergeseo, 17 yebꞌ ebꞌnaj heveo, ebꞌnaj araceo, ebꞌnaj sineo, 18 yebꞌ ebꞌnaj arvadeo, ebꞌnaj zemareo, yebꞌpaxo ebꞌnaj chiyij hamateo. Sunil ebꞌnaj tiꞌ titna yinh naj Canaán, nixhtejalnhe yu ispujnakanh ebꞌnaj. 19 Wal istxꞌotxꞌ ebꞌnaj cananeo tuꞌ, chiꞌichiti txꞌotxꞌ yinh txꞌotxꞌ Sidón yinh yetkꞌulal txꞌotxꞌ Gerar masanta chꞌapni txꞌotxꞌ yinh konhobꞌ Gaza, yebꞌ yinh yetkꞌulal konhobꞌ Sodoma, yebꞌ konhobꞌ Gomorra, konhobꞌ Adma yebꞌ konhobꞌ Zeboim, masanta yinh konhobꞌ Lasa. 20 Haꞌ ebꞌnaj tuꞌ titna yinh ej yuninal naj Cam, ehayo ebꞌnaj sat istxꞌotxꞌ, hatatikꞌa yabꞌxubꞌal ebꞌnaj yebꞌ xin yikꞌal ebꞌnaj.

21 Wal naj Sem,^b haꞌ naj bꞌabꞌel uxhtaje sata naj Jafet, aypaxo iskꞌahol naj. Haꞌ naj xin ichmame yinh yuninal naj Heber. 22 Haꞌ xin ebꞌnaj iskꞌahol naj Sem, haꞌ ton ebꞌnaj tiꞌ: naj Elam, naj Asur, naj Arfaxad, naj Lud yebꞌ naj Aram. 23 Wal ebꞌnaj iskꞌahol naj Aram, haꞌ ton ebꞌnaj tiꞌ: naj Uz, naj Hul, naj Geter, yebꞌ naj Mas. 24 Wal naj Arfaxad xin, haꞌ naj ismam naj Sala, haxa naj Sala iskꞌahol naj ye naj Heber. 25 Wal naj Heber xin, pitzkꞌa kawanh iskꞌahol naj, huneꞌ naj yij Peleg yuto yinh huneꞌ tiempohal tuꞌ pohlaxto txꞌo txꞌotxꞌ yinh anma. Haxa hunxa yuxhta naj xin, haꞌ ton naj Joctán. 26 Wal naj Joctán, haꞌ ebꞌnaj tiꞌ iskꞌahol naj: naj Almodad, naj Selef, naj Hazar-mavet, naj Jera, 27 naj Adoram, naj Uzal, naj Dicla, 28 naj Obal, naj Abimael, naj Seba, 29 naj Ofir yebꞌ naj Havila, yebꞌpaxo xin naj Jobab. Sunil ebꞌnaj tuꞌ, iskꞌahol naj Joctán. 30 Haꞌ xin txꞌo txꞌotxꞌ bꞌay ehayo ebꞌnaj, haꞌ ton txꞌotxꞌ chiꞌichiti yinh txꞌotxꞌ Mesa masanta chiꞌapni txꞌotxꞌ yinh txꞌotxꞌ Sefar. Haꞌ txꞌotxꞌ tuꞌ xin, kaw witzla txꞌotxꞌ. Ayko txꞌotxꞌ yinh yetkꞌulal bꞌay chꞌahilo tzꞌayik. 31 Haꞌ sunil ebꞌnaj tuꞌ, titna yinh yuninal ej naj Sem. Ehayo ebꞌnaj sat istxꞌotxꞌ, hatatikꞌa yabꞌxubꞌal ebꞌnaj yebꞌ xin yikꞌal ebꞌnaj.

32 Haꞌ ton sunil ebꞌnaj tuꞌ titna yinh ebꞌnaj iskꞌahol yaꞌ Noé, hatatikꞌa yikꞌal ebꞌnaj yebꞌ istxꞌotxꞌ ebꞌnaj. Ispujnakanto ebꞌnaj yul sat yibꞌanhqꞌinal tiꞌ, iswatxꞌenpaxo ebꞌnaj iskonhobꞌ yet lahwi yaqꞌnikanilo haꞌ niman yaxnhabꞌ.