Yet somlaxto yabꞌxubꞌal anma
11
Yet kaw payat tiempo, yet lahwi yaqꞌnikanilo haꞌ niman yaxnhabꞌ, huneꞌnhechꞌan yabꞌxubꞌal anma ay sat txꞌo txꞌotxꞌ tiꞌ. 2 El anma sat txꞌotxꞌ ayko yinh yetkꞌulal bꞌay chꞌahilo tzꞌayik, yapnikano anma sat huneꞌ txꞌo txꞌotxꞌ kaw akꞌal chiyij Sinar.a 3 Yet hunel xin yalni anma tet hunun hakaꞌ tiꞌ: «Wal tinanh, kowatxꞌewe txꞌotxꞌ ladrillo, kat konhusni txꞌotxꞌ,» xhi anma. Txꞌotxꞌ ladrillo tuꞌ, haꞌ txꞌotxꞌ yako anma selelo chꞌen chꞌen, walpaxo huneꞌ yako anma selelo mezcla xin, haꞌ ton hunteqꞌan chiꞌokniko yinh qꞌolbꞌe. 4 Tzujan tuꞌ xin, yalnipaxo anma hakaꞌ tiꞌ: «Wal tinanh kowatxꞌewe hunu konhobꞌ bꞌey tiꞌ, yebꞌ hunu nha chiꞌahapno istel satkanh. Hak tuꞌ xin kaw chonhbꞌinahoj, yebꞌ xin machi bꞌaqꞌinhal chonhpujnato sat txꞌo txꞌotxꞌ tiꞌ,» xhi anma. 5 Wal Komam Dios xin, ayilo Komam yilaꞌ huneꞌ konhobꞌ yebꞌ huneꞌ niman nha nahat yekanh istel lanhan iswatxꞌen anma tuꞌ. 6 Yalni Komam: «Haꞌ hunteqꞌan anma tiꞌ kaw huneꞌnhe konhobꞌal yehi, yebꞌ xin kaw huneꞌnhechꞌan yabꞌxubꞌal. Yu huneꞌ tuꞌ, yuxin lanhan iswatxꞌen anma huneꞌ konhobꞌ yebꞌ huneꞌ nha tiꞌ. Machi hunu tzet ye tuꞌ chꞌaqꞌni linhno huneꞌ ismunil anma tiꞌ.b 7 Wal tinanh xin, kosomoto yabꞌxubꞌal anma tiꞌ, haxinwal matxa chitxumcha yu yinh tzet chal-le tet hunun,» xhi Komam.
8 Hak tuꞌ yu isbꞌejnikano anma iswatxꞌen huneꞌ konhobꞌ tuꞌ, ispujnakanto anma yul sat yibꞌanhqꞌinal tiꞌ yu Komam Dios. 9 Haꞌ xin huneꞌ konhobꞌ iswatxꞌe anma tuꞌ, Babel okkano isbꞌihoj yuto haꞌ bꞌey tuꞌ yaqꞌ somchahoto Komam yabꞌxubꞌal anma, ispujnakanto anma yul sat yibꞌanhqꞌinal tiꞌ.
Ebꞌnaj titna yinh yuninal naj Sem
10 Haꞌ ebꞌnaj tiꞌ, titna yinh yuninal naj Sem. Yet kabꞌxa habꞌil yaqꞌni haꞌ niman yaxnhabꞌ, ispitzkꞌa huneꞌ iskꞌahol naj Sem yij Arfaxad, 100 (hokꞌal) habꞌil naj yet ispitzkꞌa iskꞌahol naj tuꞌ. 11 Naj Sem tuꞌ, kaw 500 habꞌilto ekꞌ naj. Yulbꞌal hunteqꞌan habꞌil tuꞌ xin, kaw txꞌiꞌal ejto iskꞌahol naj yebꞌ iskutzꞌin naj pitzkꞌahi.
12 Wal naj Arfaxad, 35 (holanhebꞌ iskawinaj) ishabꞌilal naj, yet ispitzkꞌa iskꞌahol naj chiyij Sala. 13 Kaw xin 403 habꞌil ekꞌ naj Arfaxad. Yulbꞌal hunteqꞌan habꞌil tuꞌ kaw ay ejto iskꞌahol naj yebꞌ iskutzꞌin naj pitzkꞌahi.
14 Haxa naj Sala, 30 (lahonhebꞌ iskawinaj) habꞌil naj yet ispitzkꞌa iskꞌahol naj chiyij Heber. 15 Tzujan tuꞌ xin kaw 403 habꞌilto ekꞌ naj. Yulbꞌal hunteqꞌan habꞌil tuꞌ, kaw txꞌiꞌal ejto iskꞌahol naj yebꞌ iskutzꞌin naj Sala tuꞌ pitzkꞌahi.
16 Wal naj Heber, 34 (kanhlanhebꞌ iskawinaj) ishabꞌilal naj yet ispitzkꞌa iskꞌahol naj chiyij Peleg. 17 Tzujan tuꞌ, kaw 430 habꞌilto ekꞌ naj Heber tuꞌ. Yulbꞌal hunteqꞌan habꞌil tuꞌ xin, kaw ay ejto iskꞌahol naj yebꞌ iskutzꞌin naj pitzkꞌahi.
18 Wal naj Peleg, 30 (lahonhebꞌ iskawinaj) habꞌil naj yet ispitzkꞌa iskꞌahol naj yij Reu. 19 Tzujan tuꞌ xin, kaw 209 habꞌil ekꞌ naj Peleg. Yulbꞌal hunteqꞌan habꞌil tuꞌ xin, ay ejto iskꞌahol naj yebꞌ iskutzꞌin naj pitzkꞌahi.
20 Wal naj Reu, 32 habꞌil naj, yet ispitzkꞌa iskꞌahol naj chiyij Serug. 21 Tzujan tuꞌ xin, kaw 207 habꞌilto ekꞌ naj Reu tuꞌ. Yulbꞌal hunteqꞌan habꞌil tuꞌ xin, ay ejto iskꞌahol naj yebꞌ iskutzꞌin naj pitzkꞌahi. 22 Wal naj Serug, 30 (lahonhebꞌ iskawinaj) habꞌil naj yet ispitzkꞌa iskꞌahol naj yij Nacor. 23 Tzujan tuꞌ xin, kaw 200 habꞌilto ekꞌ naj Serug tuꞌ. Yulbꞌal hunteqꞌan habꞌil tuꞌ xin, kaw ay ejto iskꞌahol naj yebꞌ iskutzꞌin naj pitzkꞌahi.
24 Wal naj Nacor 29 (bꞌalonhebꞌ iskawinaj) habꞌil naj, yet ispitzkꞌa iskꞌahol naj chiyij Taré. 25 Tzujan tuꞌ xin kaw 119 habꞌilto ekꞌ naj Nacor. Yulbꞌal hunteqꞌan habꞌil tuꞌ xin, ay ejto iskꞌahol naj yebꞌ iskutzꞌin naj pitzkꞌahi.
26 Wal yaꞌ Taré, 70 (lahonhebꞌ iskanhwinaj) habꞌil yaꞌ yet ispitzkꞌa ebꞌnaj iskꞌahol yaꞌ tiꞌ, yaꞌ Abram, naj Nacor yebꞌ naj Harán.c
Ebꞌnaj iskꞌahol yaꞌ Taré
27 Haꞌ ebꞌnaj oxwanh tiꞌ iskꞌahol yaꞌ Taré, yaꞌ Abram, naj Nacor yebꞌ naj Harán. Naj Harán, haꞌ naj ismam yaꞌ Lot. 28 Wal naj Harán tuꞌ, kam naj bꞌey konhobꞌ Ur ay yul ismajul txꞌotxꞌ Caldea, bꞌaytikꞌa pitzkꞌa naj. Bꞌabꞌel xin kam naj sata ismam.
29 Yaꞌ Abram, mohyi yaꞌ yebꞌ yaꞌ Sarai. Walpaxo naj Nacor mohyi naj yebꞌ ix Milca. Ix Milca tuꞌ, iskutzꞌin naj Harán ye ix, isnoh isbꞌa ix yebꞌ naj Isca. 30 Yaꞌ Sarai tuꞌ, machi yunin yaꞌ.
31 Wal yaꞌ Taré, el yaꞌ yul konhobꞌ Ur ayko yul ismajul txꞌotxꞌ Caldea, isto yaꞌ bꞌey txꞌotxꞌ Canaán. Yinito yaꞌ yaꞌ Abram yebꞌpaxo yaꞌ Lot iskꞌahol yuxhta yaꞌ Abram, yipaxto yaꞌ yaꞌ Sarai, yixal yaꞌ Abram. Lahwi tuꞌ xin, yapni ebꞌyaꞌ bꞌey konhobꞌ Harán. Haꞌ bꞌey tuꞌ ehayo ebꞌyaꞌ. 32 Yet 205 yaꞌ Taré, iskam yaꞌ bꞌey Harán tuꞌ.