2. ISTZOTIꞌAL EBꞌYAꞌ ICHMAME YINH EBꞌYAꞌ ISRAELa
(12:1–50:26)
Awtelaxilo yaꞌ Abram yu Komam Dios
12
Yet hunel, yal Komam Dios tet yaꞌ Abram hakaꞌ tiꞌ: «Abram, akano hatxꞌotxꞌ tiꞌ yebꞌ hawikꞌal yebꞌ yatut hamam, kat hato bꞌey huneꞌ txꞌotxꞌ chinyehan tawet. 2 Yinh anma chipoho yinh hawuninal chinwatxꞌehan huneꞌ niman konhobꞌ, kat xin wanayojan iskꞌulal tawibꞌanh yebꞌpaxo xin kaw chaxhbꞌinahoj. Kaw txꞌiꞌal anma chichahni iskꞌulal hawu. 3 Chiwayojan iskꞌulal yibꞌanh mak kꞌul istzotel tawinh. Haꞌ mak txꞌoj istzotel tawinh xin, chiwayojan isyaꞌtajil yibꞌanh. Sunil ej konhobꞌ ay yul sat yibꞌanhqꞌinal tiꞌ chischah inkꞌulalan hawu,» xhi Komam.4 Wal yaꞌ Abram isyije yaꞌ hakaꞌ tzet yal Komam Dios, topaxo yaꞌ Lot yintaj. Kaw xin 75 (holahonhebꞌ iskanhwinaj) habꞌil yaꞌ Abram yet yelto yaꞌ sat txꞌotxꞌ Harán. 5 Yaꞌ Abram tuꞌ yito yaꞌ yixal Sarai, yebꞌpaxo yaꞌ Lot, yaꞌ iskꞌahol yuxhtaj. Yinipaxto yaꞌ sunil tzet aya yebꞌ sunil ebꞌnaj iskꞌamteꞌ, ebꞌnaj yiqꞌ bꞌey Harán. Yet yel yaꞌ Abram bꞌey txꞌotxꞌ Harán, apnikano yaꞌ yul ismajul txꞌotxꞌ Canaán. 6 Lahwi tuꞌ isqꞌaxponikꞌto yaꞌ sat txꞌotxꞌ Canaán, yapni yaꞌ bꞌey konhobꞌ Siquem bꞌay ay huneꞌ teꞌ hih sat txꞌotxꞌ More. Sat huneꞌ txꞌo txꞌotxꞌ tuꞌ, ayayo ebꞌnaj cananeo. 7 Haꞌ bꞌey tuꞌ xin, isye isbꞌa Komam Dios tet yaꞌ Abram, yalni Komam tet yaꞌ: «Haꞌ huneꞌ txꞌo txꞌotxꞌ bꞌay ay hach tiꞌ, chiwaqꞌan tet hawuninal yebꞌ tet yuninal hawuninal,» xhi Komam.
Haꞌ bꞌey tuꞌ islatzꞌbꞌakanh yaꞌ chꞌen chꞌen, yaqꞌni yaꞌ isxahanbꞌal tet Komam Dios, yuto haꞌ tuꞌ tzotel Komam tet yaꞌ. 8 Lahwi tuꞌ xin, isto yaꞌ bꞌey huneꞌ txꞌotxꞌ chewal txꞌotxꞌ ayko satakꞌto konhobꞌ Bet-el yinh yetkꞌulal bꞌay chiꞌahilo tzꞌayik. Haꞌ bꞌey tuꞌ xin ehayo yaꞌ, iswatxꞌenkanh yaꞌ qꞌap mantiado yatutoj. Wal konhobꞌ Bet-el tuꞌb yintakꞌti yaꞌ kankanoj, haxa konhobꞌ Hai satato yaꞌ ayikꞌtoj. Bꞌey tuꞌ xin islatzꞌbꞌakanh yaꞌ chꞌen chꞌen, yaqꞌni yaꞌ isxahanbꞌal tet Komam Dios, istxahli yaꞌ tet Komam. 9 Lahwi tuꞌ xin yel yaꞌ bꞌey tuꞌ, nixhtejal xin yapnikano yaꞌ bꞌey txꞌotxꞌ Neguev.c
Yet isto yaꞌ Abram bꞌey txꞌotxꞌ Egipto
10 Yinh huneꞌ tiempohal tuꞌ xin, hul huneꞌ niman wahil sat txꞌo txꞌotxꞌ bꞌay ay yaꞌ Abram. Kaw xin matxatikꞌa nichꞌano tzet chilolaxi, yuxin to yaꞌ bꞌey txꞌotxꞌ Egipto. 11-12 Haxa yet lanhanxa yapni yaꞌ bꞌey txꞌotxꞌ Egipto, yalni yaꞌ tet yixal: «Sarai, hach tiꞌ kaw kꞌulchꞌan kaxhjilni, yuxin hayet chaxhyilno ebꞌnaj Egipto, chalaꞌ ebꞌnaj hakaꞌ tiꞌ: “Huneꞌ ix tiꞌ yixal huneꞌ naj tiꞌ ye ix,” xhim ebꞌnaj. Hak tuꞌ xin chu kinispotxꞌnojan ebꞌnaj, kat kaxhyinokanto ebꞌnaj. 13 Wal tinanh xin, yunhe kꞌul chinyilan ebꞌnaj yebꞌ xin mach chinispotxꞌan ebꞌnaj, chawalaꞌ tato wanabꞌan hawehi,» xhi yaꞌ tet yixal tuꞌ.
14 Hayet yapni yaꞌ Abram bꞌey Egipto, yilni ebꞌnaj ah Egipto tuꞌ tato kaw kꞌulchꞌan jilni yaꞌ Sarai. 15 Yil-laxpaxo yaꞌ yu ebꞌnaj chimunla yinta naj rey, isto ebꞌnaj yalno tet naj rey tato kaw kꞌulchꞌan jilni yaꞌ Sarai. Lahwi tuꞌ xin, yilaxto yaꞌ yul ispalacio naj rey tuꞌ.
16 Wal yaꞌ Abram xin, kaw kꞌul il-lax yaꞌ yu naj rey tuꞌ yu yaꞌ Sarai. Issahni naj rey tuꞌ noꞌ meꞌ, noꞌ wakax, noꞌ burro yebꞌ noꞌ camello tet yaꞌ. Issahnipaxo naj hunteqꞌan ebꞌnaj yebꞌ hunteqꞌan ebꞌix ix chiꞌok ischejabꞌo yaꞌ Abram tuꞌ.
17 Wal Komam Dios xin, yati Komam huneꞌ niman isyaꞌtajil yibꞌanh naj rey tuꞌ yebꞌ yibꞌanh mak ay yul yatut naj yuto yilo naj yixal yaꞌ Abram, yaꞌ Sarai. 18 Yu huneꞌ isyaꞌtajil ay yibꞌanh naj rey tuꞌ, yuxin yawte naj yaꞌ Abram, yalni naj tet yaꞌ hakaꞌ tiꞌ: «¿Tzet yinh yuxin maxawako leqꞌtiꞌal wetan? ¿Tzet yinh yuxin machi maxawal wetan tato hawixal ye ix? 19 Wal xin, maxawal wetan tato hawanabꞌ ix, yuxin mawochehan wiqꞌaꞌan ix. Wal tinanh xin, ay hawixal lah. Ito ix, kat hapaxtoj,» xhi naj tet yaꞌ Abram. 20 Lahwi tuꞌ xin ischejni naj rey tuꞌ ebꞌnaj chimunla yul ispalacio yu iskolwa ebꞌnaj yinh yaꞌ Abram yunhe yel yaꞌ sat txꞌotxꞌ Egipto tuꞌ yebꞌ yaꞌ Sarai, yebꞌ sunil tzet ay yaꞌ.