Ispoh isbꞌa yaꞌ Abram yebꞌ yaꞌ Lot
13
Yet yel yaꞌ Abram sat txꞌotxꞌ Egipto yebꞌ yixal yebꞌ sunil tzet aya, meltzopaxo yaꞌ sat txꞌotxꞌ Neguev, tzujanpaxo yaꞌ Lot yinta yaꞌ, yaꞌ iskꞌahol yuxhta yaꞌ. 2 Yaꞌ Abram kaw qꞌalomkano yaꞌ yuto kaw ay isnoqꞌ yaꞌ yebꞌpaxo chꞌen oro yebꞌ chꞌen plata. 3 Lahwi tuꞌ yel yaꞌ sat txꞌotxꞌ Neguev, nixhtejal xin yapni yaꞌ bꞌey konhobꞌ Bet-el. Tzujan tuꞌ xin istopaxo yaꞌ sat txꞌotxꞌ bꞌay ekꞌlena yet yalanhtokanoj. Huneꞌ txꞌotxꞌ tuꞌ ayayo txꞌotxꞌ yiktabꞌal konhobꞌ Bet-el yebꞌ konhobꞌ Hai, 4 bꞌay islatzꞌbꞌakanh yaꞌ chꞌen chꞌen yet yaqꞌni yaꞌ isxahanbꞌal tet Komam Dios. Haꞌ bꞌey tuꞌ xin txahli yaꞌ tet Komam.5 Hakpax tuꞌ yaꞌ Lot, kaw qꞌalompaxo yaꞌ hakaꞌ yaꞌ Abram. Yaꞌ Lot tuꞌ, kaw txꞌiꞌal ismeꞌ yaꞌ yebꞌ iswakax yaꞌ, yebꞌ xin kaw ay ischejabꞌ yaꞌ tzujan yintaj. 6 Wal yaꞌ Abram yebꞌ yaꞌ Lot, kaw matxa chu yehayo iskawanhil sat huneꞌ txꞌo txꞌotxꞌ tuꞌ, yuto matxa chabꞌe bꞌay chilow isnoqꞌ, yuto kaw nimanxa noꞌ. 7 Yu huneꞌ tuꞌ yuxin yaqꞌlekanh howal ebꞌnaj chitanhen isnoqꞌ ebꞌyaꞌ. Aypaxayo ebꞌnaj cananeo yebꞌ ebꞌnaj ferezeo sat huneꞌ txꞌo txꞌotxꞌ tuꞌ. 8 Haxa yet hunel xin, yal yaꞌ Abram tet yaꞌ Lot hakaꞌ tiꞌ: «Hanhonh tiꞌ kaw juxhta kobꞌa, yuxin mach kꞌuloj tato ay howal koxol, yebꞌpaxo xol ebꞌnaj chitanhen konoqꞌ. 9 Wal tinanh, kaw kꞌul tato chikopoh kobꞌa. Ilkꞌanabꞌto sunil txꞌo txꞌotxꞌ tuꞌ lah, sikꞌle bꞌaytuꞌwal chawoche chaxhkani. Wal xin tato hawahkantoj waykantojan, taka hawaykantoj, wahkantojan,» xhi yaꞌ Abram tet yaꞌ Lot.
10 Yilnito yaꞌ Lot huneꞌ niman akꞌal istiꞌ haꞌ niman Jordán, kaw xin ay ha haꞌ sat txꞌotxꞌ, masanta xin chiꞌapni txꞌotxꞌ yinh yetkꞌulal nichꞌan konhobꞌ chiyij Zoar. Huneꞌ txꞌotxꞌ yilto yaꞌ Lot tuꞌ, kaw lahan txꞌotxꞌ hakaꞌ huneꞌ peyabꞌ pebꞌil yu Komam Dios, yebꞌpaxo xin kaw lahan sat txꞌotxꞌ yebꞌ txꞌotxꞌ Egipto. Hak tuꞌ jilni sat txꞌotxꞌ yet yalanhto maxhto chisnhusto Komam Dios konhobꞌ Sodoma yebꞌ konhobꞌ Gomorra. 11 Hak tuꞌ yu issikꞌlen yaꞌ Lot sunil txꞌotxꞌ akꞌal ayayo istiꞌla haꞌ niman Jordán, txꞌotxꞌ tuꞌ ayayo txꞌotxꞌ yinh yetkꞌulal bꞌay chiꞌahilo tzꞌayik. Lahwi tuꞌ xin isto yaꞌ Lot sat huneꞌ txꞌotxꞌ tuꞌ, hak tuꞌ xin yu ispohni isbꞌa yaꞌ yebꞌ yaꞌ Abram. 12 Wal yaꞌ Abram xin kankano yaꞌ sat txꞌotxꞌ Canaán, haxa yaꞌ Lot ehayo sat akꞌal istiꞌ haꞌ Jordán, bꞌay ayayo hunteqꞌan konhobꞌ iskawilal konhobꞌ Sodoma. 13 Wal anma ay yul hunteqꞌan konhobꞌ tuꞌ, kaw hanhkꞌanhetikꞌa istxꞌojal chiswatxꞌe, kaw mulumkano yul sat Komam Dios.
14 Haxa yet xaꞌispoh isbꞌa yaꞌ Lot yebꞌ yaꞌ Abram, yalni Komam Dios tet yaꞌ Abraham hakaꞌ tiꞌ: «Ilkꞌanabꞌto sunil txꞌotxꞌ yehato yinh norte yebꞌ txꞌotxꞌ yehayto yinh sur, yebꞌ txꞌotxꞌ yetkꞌulal bꞌay chꞌahilo tzꞌayik, yebꞌpaxo txꞌotxꞌ yetkꞌulal bꞌay chito tzꞌayik. 15 Sunil txꞌotxꞌ tiꞌ chiwaqꞌan yinh hunelnhe tawet yebꞌ tet anma chipoh yinh hawuninal. 16 Kaw niman anma chipohchakanilto tawinh hakaꞌ isbꞌisil pojoj. Tato ay hunu mak chu isbꞌisni pojoj, chu isbꞌislax anma chipohilto tawinh chal tuꞌ. 17 Wal tinanh xin ahanhwanoj, as bꞌeytze istelbꞌal txꞌotxꞌ yebꞌ issatbꞌal txꞌotxꞌ, yuto haꞌ txꞌotxꞌ chiwaqꞌan tawet,» xhi Komam.
18 Lahwi tuꞌ xin yinikanh yaꞌ Abram qꞌap mantiado watxꞌebꞌilayo yatutoj, isto yaꞌ bꞌey huneꞌ hilaj, sat txꞌotxꞌ Mamre, iskawilal konhobꞌ Hebrón. Hayet yapni yaꞌ bꞌey tuꞌ islatzꞌbꞌankanh yaꞌ chꞌen chꞌen, yaqꞌni yaꞌ isxahanbꞌal tet Komam Dios.