Bꞌey yaꞌ Abram kolwal yinh yaꞌ Lot
14
Yinh huneꞌ tiempohal tuꞌ yet ayko naj Amrafel, isreyal txꞌotxꞌ Sinar, naj Arioc ayko isreyal txꞌotxꞌ Elasar, naj Quedorlaomer ayko isreyalo txꞌotxꞌ Elam, yebꞌpaxo naj Tidal ayko isreyal txꞌotxꞌ Goim. 2 Kanhwanh ebꞌnaj rey tuꞌ yako ebꞌnaj howal yinh ebꞌnaj howanh rey tiꞌ; naj Bera isreyal konhobꞌ Sodoma, yebꞌ yinh naj Birsa isreyal konhobꞌ Gomorra yebꞌ yinh naj Sinab isreyal konhobꞌ Adma, yebꞌ yinh naj Semeber isreyal konhobꞌ Zeboim, yebꞌpaxo yinh naj isreyal konhobꞌ Bela chiyijpaxo Zoar. 3-4 Wal ebꞌnaj howanh rey tiꞌ kaw 12 (kabꞌlahonhebꞌxa) habꞌil yokto ebꞌnaj yalanh yip naj rey Quedorlaomer. Haxa yinh 13 (yoxlahonhebꞌ) habꞌil xin yok yinh isnabꞌal ebꞌnaj yaniko howal yinh naj rey Quedorlaomer yebꞌ ebꞌnaj yetbꞌi. Yuxin iskutxbꞌako ebꞌnaj rey tiꞌ issoldado bꞌey huneꞌ akꞌal chiyij Sidim, istiꞌ haꞌ mar chihal-lax Kꞌachiꞌal.a5 Haxa yinh 14 (iskanhlanhebꞌ) habꞌil, isto naj rey Quedorlaomer yebꞌ oxwanhxa ebꞌnaj rey ayko yintaj naj yinh howal. Yapni ebꞌnaj yul ismajul txꞌotxꞌ Astarot Karnaim. Haꞌ bꞌey tuꞌ xin qꞌoji ebꞌnaj yinh ebꞌnaj refaíta, isqꞌojipaxo ebꞌnaj yinh ebꞌnaj zuzita, ebꞌnaj ay yul konhobꞌ Ham. Yebꞌpaxo xin qꞌoji ebꞌnaj yinh ebꞌnaj emita bꞌey txꞌotxꞌ Save-quiriataim. 6 Isqꞌojipaxo ebꞌnaj yinh ebꞌnaj horeo bꞌey hunteqꞌan witz bꞌey txꞌotxꞌ Seir. Yok tzujno ebꞌnaj yinta ebꞌnaj horeo tuꞌ masanta bꞌey akꞌal Parán iskawilal txꞌotxꞌ desierto. 7 Hayet ismeltzo naj Quedorlaomer yebꞌ ebꞌnaj tzujan yintaj tuꞌ, yapni ebꞌnaj bꞌey txꞌotxꞌ En-mispat, chihal-laxpaxo Cades. Kaw xin ok ebꞌnaj istanhtzelo sunil tzet ilcha yu ebꞌnaj yul ismajul ebꞌnaj amalecita. Hakpax tuꞌ xin yute ebꞌnaj yinh ebꞌnaj amorreo, ebꞌnaj ayayo yul ismajul txꞌotxꞌ Hazezon-tamar.
8-9 Walpaxo ebꞌnaj isreyal txꞌotxꞌ Sodoma yebꞌ Gomorra yebꞌ konhobꞌ Adma yebꞌ konhobꞌ Zeboim yebꞌpaxo konhobꞌ Bela, chiyijpaxo Zoar, to ebꞌnaj bꞌey akꞌal Sidim tuꞌ yebꞌ issoldado yaqꞌaꞌko howal yinh naj rey Quedorlaomer, yebꞌ yinh naj rey Tidal, yinh naj rey Amrafel yebꞌ yinh naj rey Arioc. Ebꞌnaj kanhwanh tiꞌ haꞌ ebꞌnaj isreyal txꞌotxꞌ Elam, txꞌotxꞌ Goim, txꞌotxꞌ Sinar yebꞌ txꞌotxꞌ Elasar.
10 Sat huneꞌ txꞌotxꞌ akꞌal chiyij Sidim tuꞌ kaw ay hunteqꞌan kꞌuh bꞌay ay qꞌol, hunteqꞌan chiꞌokniko yinh qꞌolbꞌe.b Yuxin hayet yelkanh naj isreyal txꞌotxꞌ Sodoma yebꞌ naj isreyal txꞌotxꞌ Gomorra yalni, istokano ebꞌnaj yul hunteqꞌan kꞌuh tuꞌ. Walpaxo hunteqꞌanxa ebꞌnaj rey yetbꞌi ebꞌnaj xin, elkanh ebꞌnaj, isto ebꞌnaj iswiꞌla witz. 11 Haꞌ xin naj rey Quedorlaomer yebꞌ xin oxwanh ebꞌnaj rey yetbꞌi, qꞌoji ebꞌnaj yinh huneꞌ howal tuꞌ, yinito ebꞌnaj isqꞌalomal ebꞌnaj Sodoma yebꞌ ebꞌnaj Gomorra, yebꞌ sunil tzet chislo ebꞌnaj, lahwi tuꞌ isto ebꞌnaj. 12 Yinipaxto ebꞌnaj yaꞌ Lot, yaꞌ iskꞌahol yuxhta yaꞌ Abram, yebꞌ sunil tzet ay yaꞌ, yuto yul konhobꞌ Sodoma tuꞌ ay yaꞌ.
13 Ay xin huneꞌ naj elkanh yet yuni huneꞌ howal tuꞌ, isto naj yalno tet yaꞌ Abram, yaꞌ hebreo ay bꞌey txꞌotxꞌ hilaj, sat istxꞌotxꞌ naj Mamre, naj amorreo. Naj Mamre tuꞌ yuxhta isbꞌa naj yebꞌ naj Escol yebꞌ naj Aner. Haꞌ ebꞌnaj tuꞌ xin yetbꞌi isbꞌa ebꞌnaj yebꞌ yaꞌ Abram yinh howal.
14 Hayet yabꞌen yaꞌ Abram tato ilaxto yaꞌ Lot, iskꞌahol yuxhta yaꞌ, iskutxbꞌanayo yaꞌ ebꞌnaj ischejabꞌ pitzkꞌana yul yatut, yunhe isto ebꞌnaj yinta yaꞌ. Kaw xin 318 ebꞌnaj yinh sunil. Lahwi tuꞌ, isto yaꞌ Abram yebꞌ ebꞌnaj istzujnoyo ebꞌnaj rey tuꞌ masanta yul konhobꞌ Dan. 15 Haxa yinh aqꞌbꞌalil xin, tona nahul ye ebꞌnaj rey tuꞌ, yapni lemna yaꞌ Abram yebꞌ ebꞌnaj yetbꞌi tuꞌ yinh ebꞌnaj. Yet yilni ebꞌnaj rey huneꞌ tuꞌ yelkanh ebꞌnaj. Wal yaꞌ Abram yebꞌ ebꞌnaj tzujan yintaj, ok tzujno ebꞌnaj yinta ebꞌnaj rey tuꞌ masanta bꞌey txꞌotxꞌ Hoba. Txꞌotxꞌ Hoba tuꞌ, yehato txꞌotxꞌ yibꞌanh konhobꞌ Damasco. 16 Yinilo yaꞌ Abram sunil tzet yilo ebꞌnaj rey tuꞌ tet ebꞌnaj ah Sodoma, iskolnilo yaꞌ Lot yebꞌ sunil tzet aya. Iskolnipaxilo yaꞌ sunil ebꞌnaj winaj yebꞌ ebꞌix ix yiti ebꞌnaj rey tuꞌ.
Yet isqꞌanni yaꞌ Melquisedec iskꞌulal Komam Dios yibꞌanh yaꞌ Abram
17 Hayet ismeltzo yaꞌ Abram yet isqꞌoji yaꞌ yinh naj rey Quedorlaomer yebꞌ yinh ebꞌnaj rey tzujan yintaj tuꞌ, istit naj isreyal Sodoma ischahno yaꞌ sat huneꞌ akꞌal chiyij Save, chihal-laxpaxo, Yakꞌal naj rey. 18 Hakpax tuꞌ yaꞌ Melquisedec,c yaꞌ isreyal konhobꞌ Salem, yaꞌ issacerdote Komam Dios, Komam kaw aykano yip. Hul yaꞌ ischabꞌ yaꞌ Abram, iqꞌbꞌil xin ixim pan yebꞌ vino yu yaꞌ. 19 Isqꞌanni yaꞌ Melquisedec tuꞌ iskꞌulal Komam Dios yibꞌanh yaꞌ Abram, yalni yaꞌ hakaꞌ tiꞌ:
«Yaqꞌabꞌayo Komam Dios iskꞌulal tawibꞌanh,
Komam kaw aykano yip, Komam watxꞌenhe satkanh yebꞌ txꞌo txꞌotxꞌ.
20 Kaw nimanojabꞌ yelapno isbꞌi Komam Dios,
Komam kaw aykano yip, yuto haꞌ Komam makolwa tawinh
haqꞌoji yinh ebꞌnaj ayko ishowal tawinh,» xhi yaꞌ.
Lahwi tuꞌ xin yaqꞌni yaꞌ Abram isdiezmo tet yaꞌ Melquisedec yinh sunil tzet bꞌey iskololo yul isqꞌabꞌ ebꞌnaj rey tuꞌ. 21 Walpaxo naj isreyal txꞌotxꞌ Sodoma, yal naj tet yaꞌ hakaꞌ tiꞌ:
—Aqꞌpaxo anma wetan kat iskankano sunil tzet ye tuꞌ tiꞌ tawet, xhi naj.
22 Istaqꞌwi yaꞌ:
—Xawalan tet Komam Dios, Komam kaw aykano yip, Komam watxꞌenhe satkanh yebꞌ txꞌo txꞌotxꞌ, 23 tato machi hunu tzet ye tuꞌ hawet yehi chiwitojan. Wal xin nitam hunu nichꞌano txꞌal maka nichꞌan istxꞌanhal xanhabꞌ chiwitojan, haxinwal machi bꞌaqꞌinh chawala tato hawu yuxin qꞌalom hinan. 24 Wal xin machi hunu tzet chiwitojan, kachannhe tzet chislo ebꞌnaj inchejabꞌtiꞌan, walpaxo ebꞌnaj tzujan wintatiꞌan xin, naj Aner, naj Escol, yebꞌ naj Mamre, chu yinito ebꞌnaj yet, xhi yaꞌ Abram tuꞌ.