—Abram, mach chaxhxiwi, yuto haninan chaxhintanhehan. Kaw niman iskꞌulal chiwayojan tawibꞌanh, xhi Komam tet yaꞌ.

2-3 Istaqꞌwi yaꞌ:

—Mamin, hach inDiosalan, ¿tzet chꞌok iskꞌulal chawaqꞌ wetan? Hawohtaj tato maxhtikꞌa hunu wuninalan. Wal xin haꞌ tet naj Eliezer, naj ah Damasco inchejabꞌan, haꞌ tet naj chikankano tzet ay hinan, xhi yaꞌ.

4 Yalni Komam tet yaꞌ:

—Maxhtaj tet naj tuꞌ chikankano tzet ayach. Wal xin haꞌ tet kaw hakꞌahol chikankano tzet ayach, xhi Komam.

5 Yilaxilto yaꞌ Abram istinha yu Komam, tzujan tuꞌ xin yalni Komam:

—Tꞌanhxanhkanh satkanh kat hawilni tato chaxhqꞌoji habꞌisni sunil ej txꞌumel. Hakaꞌ isbꞌisil txꞌumel tuꞌ, hak tuꞌ isbꞌisil anma chipoh yinh hawuninal, xhi Komam tet yaꞌ.

6 Wal yaꞌ Abram kaw yayto yaꞌ yul yanma yinh tzet yal Komam, yuxin ok yaꞌ kꞌulal yul sat Komam Dios. 7 Yalnipaxo Komam tet yaꞌ:

—Hanintiꞌan Dios hinan, kaxhwilojan yul konhobꞌ Ur xol ebꞌnaj caldeo, yu waqꞌnikanojan huneꞌ txꞌotxꞌ tiꞌ tawet, xhi Komam.

8 Istaqꞌwi yaꞌ Abram:

—Mamin, hach inDiosalan ¿tzet chu wohtanhenilojan tato chawaqꞌkano txꞌotxꞌ wetan? xhi yaꞌ.

9 Yalni Komam tet yaꞌ hakaꞌ tiꞌ:

—As iti hunu noꞌ ix wakax kaw bꞌaqꞌich ayko yinh oxebꞌ habꞌil, yebꞌ hunu noꞌ ix chiw oxebꞌ habꞌil, yebꞌ hunu noꞌ meꞌ winaj, oxebꞌpaxo habꞌil. Kat hawinipaxti hunu noꞌ palamuch yebꞌ hunu yunin noꞌ kuwis, xhi Komam.

10 Yiniti yaꞌ Abram no noqꞌ yal Komam tuꞌ. Ispotxꞌni yaꞌ noꞌ, lahwi tuꞌ isqꞌaxponayo yaꞌ yiktabꞌal hunun noꞌ. Ispohni yaꞌ xolbꞌal noꞌ qꞌaxqꞌep tuꞌ, wal noꞌ palamuch yebꞌ noꞌ kuwis mach ispohayo yaꞌ noꞌ. 11 Kaw xin chulayti noꞌ usmij yibꞌanh ischibꞌehal no noqꞌ tuꞌ, yajaꞌ xin chistzumbꞌeto yaꞌ noꞌ. 12 Haxa yet kaw lanhanxa isqꞌejbꞌayo xin yok huneꞌ niman wayanh yinh yaꞌ Abram tuꞌ. Yok hoyno huneꞌ qꞌejholo yinh yaꞌ, isxiwkanh yaꞌ. 13 Yet lanhan isway yaꞌ, yalni Komam tet yaꞌ hakaꞌ tiꞌ:

—Kaw yilal hawohtanhenkaniloj tato anma chipoh yinh hawuninal chiꞌehayo yul huneꞌ nan konhobꞌal, kat xin yok ebꞌnaj ischejabꞌo anma ay yul huneꞌ konhobꞌ tuꞌ. Kaw xin kanhebꞌ ciento habꞌil chiꞌetalax ebꞌnaj yu anma tuꞌ. 14 Wal intiꞌan xin chiwatijan isyaꞌtajil yibꞌanh hunteqꞌan anma bꞌay chꞌok ebꞌnaj chejabꞌo tuꞌ. Tzujan tuꞌ xin kat winilojan ebꞌnaj yalanh yip huneꞌ konhobꞌ tuꞌ, kat yok ebꞌnaj yahawo qꞌalomal. 15 Wal hach tiꞌ xin kaw ichamil chaxhkami. Kaw xin chaxhkam yinh aqꞌankꞌulal kat hamuji iskꞌatanh hamam icham. 16 Lahwi yekꞌto kanhebꞌ generación, kat ismeltzo ebꞌnaj chipoh yinh hawuninal tuꞌ sat huneꞌ txꞌotxꞌ tiꞌ, yuto tinanh maxhto chiꞌapni ispalkꞌon ismachiswalilal ebꞌnaj amorreo tiꞌ yul insatan, xhi Komam.

17 Haxa yet kaw aqꞌbꞌalxa xin, yet kaw qꞌejxaholo, isyeni isbꞌa huneꞌ horno, toxanhe topton yelti nhubꞌ yul, yebꞌ xin huneꞌ antorcha ayko qꞌaꞌ yinh, chilaxin ekꞌ xolbꞌal no noqꞌ qꞌaxqꞌep yehayo tuꞌ. 18 Yinhtikꞌa huneꞌ tzꞌayik tuꞌ xin, yaqꞌ Komam istrato tet yaꞌ Abram, yalni Komam hakaꞌ tiꞌ:

—Haꞌ huneꞌ txꞌo txꞌotxꞌ tiꞌ chiwaqꞌan tet ebꞌnaj chipohcha yinh hawuninal. Chiꞌichiti txꞌotxꞌ yinh haꞌ chiꞌekꞌ bꞌey Egipto, masanta xin chiꞌapni txꞌotxꞌ yinh haꞌ niman Éufrates. 19 Haꞌ ton txꞌotxꞌ bꞌay ayayo ebꞌnaj ceneo, ebꞌnaj cenezeo, ebꞌnaj cadmoneo, 20 ebꞌnaj hitita, ebꞌnaj ferezeo, ebꞌnaj refaíta, 21 yebꞌ xin txꞌotxꞌ bꞌay ayayo ebꞌnaj amorreo, ebꞌnaj cananeo, ebꞌnaj gergeseo, yebꞌ xin ebꞌnaj jebuseo, haꞌ txꞌotxꞌ chiwaqꞌan tet ebꞌnaj chipohcha yinh hawuninal, xhi Komam tet yaꞌ Abram.