Ix Agar yebꞌ yunin Ismael
16
Wal yaꞌ Sarai, yixal yaꞌ Abram, machi yunin. Ay xin huneꞌ ischejabꞌ yaꞌ ah Egipto, chiyij Agar, 2 yalni yaꞌ Sarai tet yaꞌ Abram hakaꞌ tiꞌ:—Kaw hawohtaj tato machi hunu wuninan chaqꞌ Komam Dios. Wal tinanh kaw chinqꞌanan tawet, iqꞌ ix inchejabꞌan, ix Agar. Aytaxka hawuninal yebꞌ ix, kat yok wuninojan, xhi yaꞌ Sarai tet yaꞌ.
Wal yaꞌ Abram tuꞌ xin isyije yaꞌ yinh tzet yal yaꞌ Sarai. 3 Lahwi tuꞌ yaqꞌni yaꞌ Sarai ix Agar ischejabꞌ egipcia yixalo yaꞌ Abram. Kaw xin 10 (lahonhebꞌxa) habꞌil yehayo yaꞌ Abram sat txꞌotxꞌ Canaán yet yuni huneꞌ tuꞌ. 4 Yiqꞌni yaꞌ Abram ix Agar, ispitzkꞌati nichꞌan unin yinh ix. Haxa yet ayxa tzet ye ix Agar tuꞌ matxa bꞌin yelapno yaꞌ Sarai yul sat ix. 5 Hayet yilni yaꞌ Sarai huneꞌ tuꞌ, yalni yaꞌ tet yaꞌ Abram:
—¡Hawu yuxin chiꞌel intxꞌixobꞌalan! Hankawinan mawaqꞌan ix Agar tiꞌ hawixaloj. Wal tinanh xin kaw ekꞌbꞌalxa yelapno ye ix wibꞌanhan chabꞌe, yu chipitzkꞌaho nichꞌan yunin ix. Haꞌojabꞌ Komam Dios chiꞌilni mak ay ismul, tato hach makato haninan, xhi yaꞌ.
6 Yalni yaꞌ Abram tet yaꞌ Sarai:
—Kaw hachejabꞌ ye ix, yuxin hach hawohtaj tzet wal hawuten ix, xhi yaꞌ.
Wal yaꞌ Sarai, ichiko yaꞌ yetan ix Agar, hak tuꞌ xin yu yelkanh ix tet yaꞌ Sarai, isto ix. 7 Haxa yet yapni ix Agar bꞌey huneꞌ kꞌuh ayko iskawilal huneꞌ bꞌeh chito bꞌey txꞌotxꞌ Shur, sat txꞌotxꞌ desierto, yapni yángel Komam Dios iskꞌatanh ix. 8 Isqꞌambꞌen ángel Komam tet ix:
—Agar, ischejabꞌ yaꞌ Sarai, ¿bꞌaytuꞌwal hapeto yebꞌ xin bꞌaytuꞌwal chaxhtohi? xhi yángel Komam. Istaqꞌwi ix:
—Lanhan welkanhan tet wahawan, yaꞌ Sarai, yaꞌ bꞌay chinmunlahan, xhi ix.
9 Lahwi tuꞌ xin yalni naj ángel tet ix:
—Wal tinanh meltzanhto iskꞌatanh ix bꞌay chaxhmunla tuꞌ, kaw yijem chawute habꞌa tet ix, xhi naj.
10 Yalnipaxo naj ángel tet ix:
—Kaw niman anma chipohchakanilto yinh ej hawuninal,
machi hunu mak chu isbꞌisni isbꞌisil anma tuꞌ.
11 Wal tinanh ayxa tzet hawehi, haꞌ xin nichꞌan hawunin chipitzkꞌaho tuꞌ,
Ismael chawako isbꞌihoj, yuto mayil Komam Dios habꞌiskꞌulal.
12 Huneꞌ nichꞌan hawunin chipitzkꞌaho tuꞌ,
lahan chiꞌeloko naj hakaꞌ hunu noꞌ nichꞌan cheh kaw how, machi hunu mak chu istzabꞌni.
Chaqꞌ naj howal, kat yaqꞌlaxpaxo howal yinh naj.
Chiꞌehayo naj yinh sat ebꞌnaj yuxhtaj,
walka kaw chichiwa iskꞌul ebꞌnaj yinh naj, xhi naj ángel tet ix.
13 Yajaꞌ yu tzotel ix Agar yebꞌ Komam Dios, yuxin yal ix yinh Komam hakaꞌ tiꞌ: «Kaw mayil Komam winhan,» xhi ix. Yalnipaxo ix hakaꞌ tiꞌ: «Kaw matzotel Komam Dios wetan, yajaꞌ xin itzitz intohan,» xhi ix. 14 Haꞌ xin huneꞌ kꞌuh bꞌay tzotel Komam yebꞌ ix, chihal-lax yinh hakaꞌ tiꞌ: «Iskꞌuh Komam Itzitz yebꞌ Chinilnihan.» Huneꞌ kꞌuh tuꞌ, ayayo xolbꞌal txꞌotxꞌ Cades yebꞌ txꞌotxꞌ Bered.