—Hanintiꞌan Dios hinan, kaw aykano wipan. Wal xin kꞌulojabꞌnhetikꞌa chawute habꞌeybꞌal yul insatan. 2 Chiwaqꞌan huneꞌ intratohan tawet; kaw xin niman anma chipohchakanilto yinh hawuninal, xhi Komam.

3 Wal yaꞌ Abram tuꞌ ay jahno yaꞌ, yay xulno yaꞌ sat txꞌotxꞌ. Yalnipaxo Komam tet yaꞌ:

4 —Haꞌ huneꞌ trato tiꞌ chiwaqꞌan tawet, chaxhok ichmamehal yinh txꞌiꞌal ej konhobꞌ. 5 Tinanh xin matxa Abram habꞌi, wal xin Abraham^a chawijkanoj yuto chaxhwakojan ichmamehal yinh txꞌiꞌal ej konhobꞌ. 6 Haꞌ anma chitit tawinh, kaw chipohchakanh, yebꞌ xin tawinh chiꞌelo ebꞌnaj rey yebꞌ nimeta konhobꞌ. 7 Wal huneꞌ trato chiwaqꞌan tawet yebꞌ tet anma chipohchakanilto tawinh tuꞌ, haꞌ ton huneꞌ tiꞌ: Haninnhehan haDiosal, yebꞌ haninnhehan isDiosal anma chipohcha tawinh. 8 Tawet xin yebꞌ tet anma chipoho tawinh chiwaqꞌkanojan txꞌotxꞌ Canaán bꞌay ayachayo tiꞌ. Haꞌ txꞌotxꞌ chiwakanojan teyet yinh kaw hunelnhe, haninnhehan xin heDiosal, xhi Komam.

9 Yalnipaxo Komam tet yaꞌ Abraham:

—Yaj wal hach tiꞌ xin, yije huneꞌ trato chiwaqꞌan tawet tiꞌ, kat isyijenpaxo anma chipoh yinh hawuninal. 10 Haꞌ ton huneꞌ trato tiꞌ chiwaqꞌan teyet yebꞌ tet anma chipohchakanilto yinh ej hawuninal tato yilal yaqꞌlax circuncidar^b ebꞌnaj winaj. 11 Haꞌ huneꞌ circuncisión tuꞌ, haꞌ ton huneꞌ yechel chiꞌok yinh henimanil, haꞌ xin chiꞌok yechelo huneꞌ trato koxolbꞌal. 12 Wal tinanh xin sunil nixhte winaj unin chipitzkꞌa texol, yilal hawaqꞌni circuncidar yinh iswaxajebꞌ tzꞌayik, kat hawaqꞌni circuncidar ebꞌnaj chejabꞌ chipitzkꞌa yul hawatut yebꞌ ebꞌnaj loqꞌbꞌil hawu bꞌey nan konhobꞌal. 13 Wal xin kaw mach chꞌekꞌto yet yaqꞌlax circuncidar ebꞌnaj tuꞌ, hak tuꞌ xin chu yokkano huneꞌ yechel intratohan teyinh yinh sunilbꞌal tiempo. 14 Haꞌ mak mach chiꞌok circuncisión yinh isnimanil, kaw yilal yel texol yuto mach chisyije huneꞌ trato chiwaqꞌan teyet, xhi Komam.

15 Yalnipaxo Komam tet yaꞌ:

—Wal yaꞌ hawixal xin, matxa Sarai isbꞌi yaꞌ, wal xin Sara^c chiyijkano isbꞌi yaꞌ. 16 Chiwayojan inkꞌulalan yibꞌanh yaꞌ, kat xin waqꞌnihan huneꞌ hawuninal yebꞌ yaꞌ. Yinh kaw yeli chiwayojan inkꞌulalan yibꞌanh yaꞌ. Wal xin miꞌe chuko yaꞌ yinh txꞌiꞌal ej konhobꞌ, haxa ej yuninal yaꞌ xin, chiꞌok yahawo txꞌiꞌal ej konhobꞌ, xhi Komam.

17 Wal yaꞌ Abraham, ay jahno yaꞌ, yay xulno yaꞌ sat txꞌotxꞌ, yajaꞌ tzebꞌikanh yaꞌ istxumni yaꞌ hakaꞌ tiꞌ: «¿Tokꞌanabꞌ ay hunu naj icham winaj 100 (hokꞌal) habꞌilxa ayto hunu yuninal? Hakpax tuꞌ wixalan yaꞌ Sara, ¿tom xin chito pitzkꞌati hunu yunin yaꞌ yinh 90 (lahonhebꞌ ishokꞌal) habꞌil?» xhi yaꞌ ischukil. 18 Yalni yaꞌ tet Komam:

—Mamin, yibꞌanhojabꞌ naj Ismael, chiꞌay huneꞌ hakꞌulal tiꞌ, xhi yaꞌ Abraham.

19 Yalni Komam tet yaꞌ:

—Wal xin, haꞌ huneꞌ mawalan tawet, to kaw yinhtikꞌa hawixal Sara chipitzkꞌa huneꞌ hakꞌahol, Isaac chawako isbꞌihoj. Yinh naj hakꞌahol tuꞌ chiyij isbꞌa huneꞌ intratotiꞌan. Haꞌ xin huneꞌ trato tiꞌ machi bꞌaqꞌinhal chitanhi, kat waqꞌnipaxojan huneꞌ trato tiꞌ tet yuninal naj. 20 Wal yinh naj Ismael kaw mawabꞌehan tzet chawoche. Kaw chiwayojan inkꞌulalan yibꞌanh naj, kaw xin niman yuninal naj. Haꞌ yinh yuninal naj tuꞌ, kaw niman anma chipohchahi. Naj Ismael tuꞌ chiꞌok naj mamehal yinh 12 (kabꞌlanhwanh) ebꞌnaj yahaw kaw aykano yelapnoj. Chinwatxꞌeꞌan huneꞌ niman konhobꞌ yinh ej yuninal naj. 21 Wal huneꞌ intratohan xin, haꞌ tet naj Isaac chiwaqꞌan, naj chipitzkꞌa yet hunabꞌ yinh yaꞌ Sara hakaꞌ yinh huneꞌ tiempohal tiꞌ, xhi Komam tet yaꞌ.

22 Hayet lahwi istzotel Komam tet yaꞌ Abraham tuꞌ, isto Komam. 23 Yinhtikꞌa huneꞌ tzꞌayik tuꞌ xin yaqꞌ circuncidar isbꞌa yaꞌ Abraham yebꞌ naj nichꞌan Ismael, yaqꞌnipaxo circuncidar yaꞌ sunil ebꞌnaj ischejabꞌ, ebꞌnaj pitzkꞌana iskꞌatanh yaꞌ yebꞌ sunil ebꞌnaj loqꞌbꞌil yu yaꞌ. Yebꞌpaxo sunil ebꞌnaj winaj chimunla yul yatut yaꞌ. Aqꞌlax circuncidar ebꞌnaj hakaꞌtikꞌa yu yalni Komam Dios. 24-25 Wal yaꞌ Abraham, kaw 99 (bꞌalonhlahonhebꞌ ishokꞌal) habꞌil yaꞌ yet yok huneꞌ yechel circuncisión tuꞌ yinh isnimanil yaꞌ. Naj Ismael xin, 13 (oxlanhebꞌ) habꞌil naj. 26 Hak tuꞌ yu yokkano huneꞌ yechel yinh isnimanil yaꞌ yebꞌ iskꞌahol, huneꞌ chiyij circuncisión, 27 yebꞌ yinh sunil ebꞌnaj ay yul yatut yaꞌ, ebꞌnaj chejabꞌ pitzkꞌana yul yatut yaꞌ, yebꞌ ebꞌnaj chejabꞌ loqꞌbꞌil yu yaꞌ bꞌey nan konhobꞌal.