3 —Mamin, chinqꞌanan teyet kananhwekanoj. Maxhtonhe chextohi. 4 Chiwitijan hanikꞌo ha haꞌ, kat hetxꞌahni heyoj, kat hexew hunepo yalanh yenhel huneꞌ te teꞌ tiꞌ. 5 Yaqꞌ isbꞌa chexekꞌ bꞌay ay intiꞌan, chintohan wiqꞌaꞌtijan hanikꞌo tzet cheloh, haxinwal chꞌok heyip, kat heto yinh hebꞌel, xhi yaꞌ. Istaqꞌwi ebꞌnaj:

—Kꞌultikꞌa, xhi ebꞌnaj.

6 Yokto yaꞌ yul yatut, yalni yaꞌ tet yixal:

—Ihti 20 (hunkꞌal) kilo ixim harina yinh anhe, ixim kaw kꞌul, kat hawatxꞌen hayebꞌo ixim pan, xhi yaꞌ. 7 Lahwi tuꞌ isto yaꞌ yinh anhe bꞌay ay iswakax, issaynilo yaꞌ huneꞌ noꞌ wakax kꞌul, kaw yechel tzeh, yebꞌ xin kaw bꞌaqꞌich. Yaqꞌni yaꞌ noꞌ tet huneꞌ naj ischejabꞌ, ispotxꞌni naj noꞌ yinh anhe, iswatxꞌelax itah. 8 Lahwi iswatxꞌi xin, yiniti yaꞌ itah tuꞌ tet ebꞌnaj, yinipaxti yaꞌ noꞌ queso yebꞌ noꞌ lech. Yok ebꞌnaj waꞌoj. Kaw xin ayko yaꞌ Abraham tuꞌ iskꞌatanh ebꞌnaj yet chiwaꞌ ebꞌnaj yalanh yenhel te teꞌ tuꞌ.

9 Lahwi iswaꞌ ebꞌnaj xin, isqꞌambꞌen ebꞌnaj tet yaꞌ:

—¿Bꞌaytuꞌwal ay yaꞌ Sara hawixal? xhi ebꞌnaj. Istaqꞌwi yaꞌ:

—Ayikto yaꞌ yul qꞌap qꞌap watxꞌebꞌilkanh watutotiꞌan, xhi yaꞌ. 10 Yalni xin huneꞌ naj tet yaꞌ:

—Yet hunabꞌ chinhulan kaxhwilaꞌan hunelxa, haꞌ yinh huneꞌ tiempohal tuꞌ chipitzkꞌa huneꞌ nichꞌan yunin yaꞌ Sara hawixal, xhi naj. Wal ixnam Sara tuꞌ xin, ayko ixnam yul ispultahil yatut yinta yaꞌ Abraham, yabꞌen yinh tzet lanhan yal-lax tet yaꞌ.

11 Wal yaꞌ Abraham tuꞌ kaw ichamxa yaꞌ, hakpax tuꞌ ixnam Sara kaw ixnamxa, yebꞌ xin xaꞌekꞌto istiempohal yuninwi ixnam. 12 Yuxinto tzebꞌikanh ixnam yet yabꞌen huneꞌ tuꞌ, istxumni ixnam hakaꞌ tiꞌ: «¿Tzetto chu wochenan huneꞌ tiꞌ? Hanintiꞌan kaw ixnam inxahan yebꞌpaxo xin kaw ichamxa wichamilan,» xhi ixnam ischukil. 13 Yalni Komam tet yaꞌ Abraham:

—¿Tzet yinh xin chitzebꞌi hawixal tuꞌ? ¿Tzet yinh xin mach chayto yaꞌ yul yanma tato chito yu ispitzkꞌati hunu yunin yaꞌ walka ixnamxa yaꞌ? 14 ¿Tom ay hunu tzet ye tuꞌ tiꞌ yaꞌta inwatxꞌenan? Yet hunabꞌ chinhulan kexwilaꞌan hunelxa, haꞌ yinh huneꞌ tiempohal tuꞌ xin, chipitzkꞌa huneꞌ nichꞌan yunin yaꞌ Sara hawixal, xhi Komam.

15 Yet yabꞌen ixnam Sara huneꞌ tuꞌ, kaw xiwkanh ixnam, yaniko ixnam leqꞌtiꞌal, yalni ixnam:

—Machi mantzebꞌihan, xhi ixnam. Yalnipaxo Komam:

—Wal xin makaxhtzebꞌi, xhi Komam.

16 Lahwi tuꞌ xin, yah linhno ebꞌnaj oxwanh apni iskꞌatanh yaꞌ Abraham tuꞌ. Isto ebꞌnaj yul isbꞌelal konhobꞌ Sodoma. Wal yaꞌ Abraham, to yaꞌ yaqꞌaꞌkano ebꞌnaj yu istaqꞌlikano yaꞌ tet ebꞌnaj. 17 Yok Komam istxumno hakaꞌ tiꞌ: «Yilal walnihan tet yaꞌ Abraham yinh tzet chinwatxꞌehan. 18 Yuto yaꞌ Abraham tiꞌ chiꞌok yaꞌ mamehal yinh huneꞌ niman konhobꞌ kaw aykano yip, yu yaꞌ yuxin chischah sunil ej konhobꞌ ay yul sat yibꞌanhqꞌinal tiꞌ inkꞌulalan. 19 Hanan saynhelo yaꞌ yunhe yalni yaꞌ tet ej yuninal yebꞌ tet sunil anma chipohcha yinh yuninal yaꞌ tato yilal isyijen ebꞌnaj inkuybꞌanilan, yebꞌ iswatxꞌen ebꞌnaj sunil iskꞌulal yebꞌ sunil istoholal, hak tuꞌ xin chu waqꞌnihan tzet haltebꞌil tet ebꞌnaj wuhan,» xhi Komam. 20 Yalni Komam tet yaꞌ:

—Xawabꞌehan yal-laxi tato sunil anma ay bꞌey konhobꞌ Sodoma yebꞌ bꞌey konhobꞌ Gomorra kaw txꞌojkano isbꞌeybꞌal, yebꞌ kaw ekꞌnaxakano ismul. 21 Tinanh xin chintohan bꞌey tuꞌ kat wilnihan tato kaw yeli ekꞌnaxa ismul anma tuꞌ hakaꞌ yal-laxi, xhi Komam tet yaꞌ.

22 Wal kawanh ebꞌnaj xin, bꞌeh isto ebꞌnaj bꞌey konhobꞌ Sodoma, wal yaꞌ Abraham tuꞌ kankano yaꞌ sata Komam. 23 Ishitziko yaꞌ iskawilal Komam, isqꞌambꞌen yaꞌ:

—Mamin, ¿tom chatanhtzelo anma machi ismul yinta anma mulum? 24 Tato ay hunu 50 (lahonh yoxkꞌal) anma machi ismul yul huneꞌ konhobꞌ tuꞌ, ¿tom xin mach chawaqꞌ nimankꞌulal yinh yu 50 (lahonh yoxkꞌal) anma machi ismul tuꞌ? xhi yaꞌ. 25 Yalnipaxo yaꞌ:

—Mach chu hatanhtzenilo anma mach ismul yinta anma mulum, yuto mach lahano anma mulum yebꞌ anma mach mulumoj. Wal xin machojabꞌ chawatxꞌe hakaꞌ tuꞌ. Hach tiꞌ Mamin, yahaw hach yinh sunil yul sat yibꞌanhqꞌinal tiꞌ, ¿Tom xin mach chawatxꞌeꞌ istoholal? xhi yaꞌ.

26 Istaqꞌwi Komam tet yaꞌ Abraham tuꞌ:

—Tato chiꞌilcha 50 (lahonh yoxkꞌal) anma kꞌul isbꞌeybꞌal wuhan yul konhobꞌ Sodoma tuꞌ, yu 50 (lahonh yoxkꞌal) anma tuꞌ chiwaqꞌ nimankꞌulalan yinh sunil anma ay yul huneꞌ konhobꞌ tuꞌ, xhi Komam. 27 Yalnipaxo yaꞌ Abraham:

—Mamin, aqꞌ nimankꞌulal yu chiwalan huneꞌ tiꞌ tawet, yuto hach tiꞌ kaw Dios hach, wal hinan xin anma hinan. 28 Mamin, yajaꞌ tato howanhxanhe machi tzꞌajna ebꞌnaj 50 (lahonh yoxkꞌal) mach ismul tuꞌ, ¿tom yunhe huneꞌ tuꞌ yuxin chatanhtzelo anma ay yul huneꞌ konhobꞌ tuꞌ? xhi yaꞌ. Istaqꞌwikanh Komam:

—Tato chiꞌilcha 45 (howebꞌ yoxkꞌal) anma kꞌul isbꞌeybꞌal wuhan, mach chintanhtzelojan huneꞌ konhobꞌ tuꞌ, xhi Komam. 29 Yalnipaxo yaꞌ Abraham:

—¿Taka 40 (kawinajnhe) xin? xhi yaꞌ. Istaqꞌwi Komam:

—Yunhe 40 (kawinaj) anma tuꞌ, mach chintanhtzelojan huneꞌ konhobꞌ tuꞌ, xhipaxo Komam. 30 Wal yaꞌ Abraham, kaw okpaxo yaꞌ isqꞌanaꞌ tet Komam hakaꞌ tiꞌ:

—Mamin, chinqꞌanan tawet mach chitit hahowal winhan, yuto huneꞌnhetikꞌa haꞌ tzet chinqꞌanan tawet. Taka 30 (lahonhebꞌ iskawinaj) anma xin, ¿tzet chawute? xhi yaꞌ. Yalni Komam:

—Yunhe 30 (lahonhebꞌ iskawinaj) anma tuꞌ chiwaqꞌ nimankꞌulalan yinh sunil anma ay yul huneꞌ konhobꞌ tuꞌ, xhi Komam. 31 Yokpaxo yaꞌ isqꞌanno tet Komam:

—Hach Wahawil kaw chinpalkꞌonan, chiwalnihan huneꞌ tiꞌ tawet. Yajaꞌ tato 20 (hunkꞌalnhe) mak kꞌul isbꞌeybꞌal, ¿tzettaxka chawute? xhi yaꞌ. Yalnipaxo Komam hakaꞌ tiꞌ:

—Yu 20 (hunkꞌal) anma tuꞌ, mach chintanhtzelojan sunil anma ay yul konhobꞌ tuꞌ, xhi Komam. 32 Yalnipaxo yaꞌ:

—Mamin, kaw chinqꞌanan tawet, mach chitit hahowal winhan, kaw haxanhe hunel tiꞌ chinqꞌambꞌehan tawet. ¿Tzet chawute Mamin tato 10 (lahonhwanhnhe) anma kꞌul isbꞌeybꞌal chiꞌilcha hawu? xhi yaꞌ. Yalnipaxo Komam:

—Chiwaqꞌpaxo nimankꞌulalan yinh huneꞌ konhobꞌ tuꞌ tato 10 (lahonhwanhnhepaxoj), xhi Komam.

33 Yet lahwi istzotel Komam tet yaꞌ isto Komam. Wal yaꞌ Abraham tuꞌ xin paxkanto yaꞌ, yapni yaꞌ yul yatut watxꞌebꞌilayo yinh qꞌap qꞌap.