—Mamin, chinqꞌanan teyet, tonhwe bꞌey watutan, haꞌ tuꞌ xin chexkankano huneꞌ aqꞌbꞌal tiꞌ kat hetxꞌahno heyoj. Lahwi tuꞌ kat heto yinh hebꞌel sahabꞌ hekal, xhi yaꞌ Lot tuꞌ tet ebꞌnaj. Istaqꞌwi ebꞌnaj ángel tuꞌ:

—Yuchꞌandios tawet yajaꞌ machoj, wal xin chonhkanojanh txonhbꞌal, xhi ebꞌnaj. 3 Wal yaꞌ Lot tuꞌ xin, kaw yahwiko yaꞌ yinh ebꞌnaj kawanh tuꞌ, hak tuꞌ yu isto ebꞌnaj yinta yaꞌ yatut. Yet yapni yaꞌ Lot yebꞌ ebꞌnaj bꞌey yatut tuꞌ xin, yok yaꞌ iswatxꞌeno itah kaw kꞌul chislo ebꞌnaj, iswatxꞌenpaxo yaꞌ ixim pan machi yanhal chiꞌoki. Lahwi tuꞌ xin iswaꞌ ebꞌnaj.

4 Yet maxhto chiwaykanh ebꞌnaj tuꞌ xin, yapni bꞌulna ebꞌnaj ay yul konhobꞌ tuꞌ, ishoynayo ebꞌnaj yatut yaꞌ Lot. Kaw sunil ebꞌnaj apni, apni ebꞌnaj tzehtaj yebꞌ xin ebꞌnaj ichamtaj. 5 Yalni ebꞌnaj tet yaꞌ Lot yinh ip hakaꞌ tiꞌ:

—¿Bꞌaytuꞌwal ay ebꞌnaj mahul takꞌatanh yet huneꞌ aqꞌbꞌal tiꞌ? ¡Ilti ebꞌnaj! Chijochehanh chonhwayanh yebꞌ ebꞌnaj, xhi ebꞌnaj tet yaꞌ Lot.

6 Wal yaꞌ Lot tuꞌ xin elti yaꞌ tzotelo tet ebꞌnaj. Ispebꞌankanikto yaꞌ ispultahil yatut tuꞌ, 7 yalni yaꞌ tet ebꞌnaj:

—Hex wet konhobꞌ, chinqꞌanan teyet, mach cheyute huneꞌ istxꞌojal tiꞌ. 8 Wal xin ay kawanh inkutzꞌinan maxhto yichamil, chiwiltijan ebꞌix teyet, kat heyilni tzet cheyute ebꞌix. Wal ebꞌnaj mahul kinilnotiꞌan, chinqꞌanan teyet matzet cheyute ebꞌnaj, xhi yaꞌ Lot tuꞌ. 9 Istaqꞌwi ebꞌnaj tuꞌ hakaꞌ tiꞌ:

—¡Hach tiꞌ, elanh yinh kosatanh! Mach chu konhhakachnihanh, yuto nan konhobꞌal hach. Wal tinanh xin ekꞌbꞌalto chaxhjetaꞌanh sataj ebꞌnaj tuꞌ, xhi ebꞌnaj tet yaꞌ.

Yichiko ebꞌnaj isbꞌahni yaꞌ Lot. Ishitziko ebꞌnaj sat pulta tuꞌ yu ispohnito ebꞌnaj teꞌ yalni. 10 Wal ebꞌnaj ángel tuꞌ xin isnhikꞌikto ebꞌnaj yaꞌ Lot yul nha yinh anhe. Ispebꞌankꞌanilti ebꞌnaj teꞌ pulta tuꞌ. 11 Yanikaniko ebꞌnaj ángel tuꞌ sunil ebꞌnaj tzꞌopsatil. Sunil ebꞌnaj apni bꞌey tuꞌ matxatikꞌa yu yilni, ichiti yinh ebꞌnaj tzeh masanta yinh ebꞌnaj ichamtaj. Issikikanilo sunil ebꞌnaj issayni ispultahil teꞌ nha tuꞌ, yajaꞌ xin maxhtikꞌa ilcha ispultahil teꞌ yu ebꞌnaj. 12 Yalni ebꞌnaj ángel tuꞌ tet yaꞌ Lot:

—¿Aytom xin hawikꞌal bꞌey tiꞌ? Tinanh tato ay hakꞌahol, hakutzꞌin, yebꞌ ebꞌnaj chiꞌiqꞌni hakutzꞌin tuꞌ, yebꞌ hunuxa maka, ito sunil tawintaj kat hato nahat yebꞌi. 13 Wal xin chikotanhtzelojanh huneꞌ konhobꞌ tiꞌ yuto kaw txꞌiꞌalxakano istxꞌojal chabꞌe Komam Dios yinh, yuxin makonhischejtijanh Komam kotanhtzelojanh, xhi ebꞌnaj ángel tuꞌ tet yaꞌ Lot.

14 Wal yaꞌ Lot tuꞌ xin, to yaꞌ yalaꞌ tet ebꞌnaj toxa chimohyi yebꞌ ebꞌix iskutzꞌin, yalni yaꞌ tet ebꞌnaj hakaꞌ tiꞌ:

—Ahanhwewanoj, elanhwe yul huneꞌ konhobꞌ tiꞌ yuto chistanhtzelo Komam Dios, xhi yaꞌ tet ebꞌnaj.

Yajaꞌ xin kaw mach yako ebꞌnaj yinh iskꞌul yinh tzet yal yaꞌ Lot, tonhe tzebꞌi ebꞌnaj. 15 Yajaꞌ yu kaw lanhanxa issajbꞌiloj, yuxin yal ebꞌnaj ángel tet yaꞌ Lot:

—Ahanhwano yinh anhe kat hawinito hawixal yebꞌ kawanh hakutzꞌin tato mach chawoche chaxhkami yet chijanotijanh isyaꞌtajil yibꞌanh huneꞌ konhobꞌ tiꞌ, xhi ebꞌnaj.

16 Yajaꞌ yu kaw mach islahiko yaꞌ Lot yel yul konhobꞌ tuꞌ, yuxin ok tzabꞌno ebꞌnaj ángel yinh isqꞌabꞌ yaꞌ, yinilti ebꞌnaj yaꞌ. Yinipaxilti ebꞌnaj yixal yaꞌ yebꞌ ebꞌix iskutzꞌin yaꞌ yunhe iskolcha yaꞌ yebꞌ ebꞌix, yuto chitzꞌay iskꞌul Komam Dios yinh yaꞌ yebꞌ ebꞌix. 17 Haxa yet xaꞌelti yaꞌ yebꞌ ebꞌix yul konhobꞌ tuꞌ, yalni huneꞌ naj ángel:

—Asiꞌwe yinh anhe, kolwe hebꞌa, machi xin chextꞌanhxiti teyintaj yebꞌpaxo xin mach chexok linhno yul huneꞌ akꞌal tiꞌ. Asiꞌwe yinhla iswiꞌ witz tuꞌ lah ta cheyoche chexkolchahi, xhi naj ángel tuꞌ.

18-19 Istaqꞌwi yaꞌ Lot:

—Mamin, hex tiꞌ kaw kꞌul hekꞌul, kaw nimanxa chexkolwa jinhanh, yuto makonhhekolanh. Yajaꞌ wal xin kaw chikoqꞌananh teyet, mach chonhtohanh yinhla iswiꞌ witz tuꞌ yuto kꞌuxantaxka kotzujchahanh yu huneꞌ isyaꞌtajil tuꞌ kat kokamanh. 20 Wal xin kokawilal tiꞌanh ay huneꞌ nichꞌan konhobꞌ bꞌay chu kotohanh kokolno kobꞌahanh, yuxin chikoqꞌananh teyet chawehonhtojanh bꞌey tuꞌ, haxinwal mach chonhkamanh. Huneꞌ konhobꞌ chijal tuꞌanh kaw nichꞌanchꞌan, xhi yaꞌ. 21 Istaqꞌwi huneꞌ naj ángel tet yaꞌ Lot tuꞌ:

—Kꞌultikꞌa, chinyijehan hakaꞌ chaqꞌan tiꞌ, mach chintanhtzelojan huneꞌ nichꞌan konhobꞌ tuꞌ. 22 Yajaꞌ xin asiꞌwe yinh anhe, kat hekankano bꞌey tuꞌ, yuto mach chu wanitijan huneꞌ isyaꞌtajil tiꞌ tato maxhto chexapni bꞌey tuꞌ, xhi naj ángel tet yaꞌ Lot. Yinhtikꞌa huneꞌ tiempohal tuꞌ, Zoar^b yijkano isbꞌi huneꞌ nichꞌan konhobꞌ tuꞌ. 23 Haxa yet issajbꞌilo xin yapni yaꞌ Lot yul konhobꞌ Zoar. 24 Lahwi tuꞌ yaniti Komam Dios yul satkanh qꞌa qꞌaꞌ yebꞌ azufre yibꞌanh konhobꞌ Sodoma yebꞌ konhobꞌ Gomorra, 25 istzꞌakantoj. Kaw xin tzꞌapaxkanto hunteqꞌan konhobꞌ ayko yinhla ishoyani, yebꞌ sunil anma ay yul hunteqꞌan konhobꞌ tuꞌ, istzꞌapaxto sunil tzet chichꞌibꞌkanh sat huneꞌ akꞌal tuꞌ. 26 Wal yixal yaꞌ Lot, tzujan ix yinta yaꞌ, yajaꞌ xin tꞌanhxito ix yintaj, yinhnhena tuꞌ xin, iskankano linhno ix bꞌey tuꞌ, yokkano ix atzꞌamil.

27 Haxa yet kaw sahabꞌ yinh hunxa tzꞌayik xin, isto yaꞌ Abraham bꞌay tzotel yaꞌ yebꞌ Komam Dios. 28 Ishakxito yaꞌ yinh konhobꞌ Sodoma yebꞌ konhobꞌ Gomorra, yebꞌ yinh huneꞌ niman akꞌal bꞌay ayayo hunteqꞌanxa konhobꞌ. Yilni yaꞌ tato sunil sat huneꞌ akꞌal tuꞌ kaw toxanhe chiꞌah topton nhubꞌ hakaꞌ isnhubꞌal hunu horno.

29 Hak tuꞌ yu istanhtzenkanilo Komam Dios hunteqꞌan konhobꞌ ayayo sat huneꞌ akꞌal bꞌay ehayo yaꞌ Lot. Yajaꞌ xin yabꞌeto Komam tzet isqꞌan yaꞌ Abraham yinh hunteqꞌan konhobꞌ tuꞌ, yuxin iskol Komam yaꞌ Lot xol huneꞌ isyaꞌtajil yati tuꞌ.

30 Tzujanxa xin yel yaꞌ Lot yebꞌ ebꞌix iskutzꞌin yul konhobꞌ Zoar yuto xiw yaꞌ iskankano yul nichꞌan konhobꞌ tuꞌ, isto yaꞌ yinh iswiꞌ hunteqꞌan witz. Haꞌ bꞌey tuꞌ xin ehayo yaꞌ yebꞌ kawanh iskutzꞌin yul huneꞌ chꞌen nhachꞌen. 31 Yet hunel xin yal ix bꞌabꞌel ix tet ix iskabꞌ hakaꞌ tiꞌ:

—Wal komam, kaw ichamxa yaꞌ, yebꞌpaxo xin bꞌay ayonh tiꞌ machi hunu mak wal jiqꞌni hakaꞌtikꞌa jekanoj. 32 Wal tinanh xin jukꞌtzekanh komam tiꞌ, kat koway yebꞌ yaꞌ, hak tuꞌ xin mach chitanhilo yikꞌal komam, xhi ix tet isnoh.

33 Yinhtikꞌa huneꞌ aqꞌbꞌal tuꞌ, yukꞌtzekanh ebꞌix ismam, isway ix bꞌabꞌel kutzꞌine yebꞌ ismam tuꞌ. Wal yaꞌ mame tuꞌ xin maxhtikꞌa nano yu yaꞌ yet isway yaꞌ yebꞌ iskutzꞌin tuꞌ. 34 Haxa yet hunxa tzꞌayik xin yalni ix bꞌabꞌel ix tet ix isnoh hakaꞌ tiꞌ:

—Yet may aqꞌbꞌal makinwayan yebꞌ komam, wal yinh huneꞌ aqꞌbꞌal tiꞌ xin chijukꞌtzepaxokanh yaꞌ kat hawayopaxo yebꞌ yaꞌ, haxinwal kokawanhil ay juninal yebꞌ yaꞌ, xhi ix. 35 Yinhtikꞌa huneꞌ aqꞌbꞌal tuꞌ xin yukꞌtzepaxokanh ebꞌix ismam, iswaypaxo ix iskabꞌ kutzꞌine yebꞌ ismam tuꞌ, yajaꞌ xin maxhtikꞌa nanopaxo yu yaꞌ yet isway yaꞌ yebꞌ iskutzꞌin tuꞌ. 36 Hak tuꞌ xin yu ispitzkꞌati yunin ebꞌix iskawanhil yuto way ebꞌix yebꞌ ismam. 37 Haxa yet yapni istzꞌayikal iswatxꞌi iskꞌul ix bꞌabꞌel kutzꞌine tuꞌ, pitzkꞌa huneꞌ nichꞌan yunin ix, Moab yako ix isbꞌihoj. Naj Moab tuꞌ, haꞌ naj mame yinh ebꞌnaj moabita tinanh. 38 Hakpax tuꞌ ix iskabꞌ, pitzkꞌapaxo huneꞌ nichꞌan yunin ix, Ben-ammi yako ix isbꞌihoj. Haꞌ naj Ben-ammi tuꞌ haꞌ naj mame yinh ebꞌnaj amonita tinanh.^c