Hak tuꞌ yu yabꞌenilo naj Abimelec isreyal konhobꞌ Gerar tuꞌ, yanito naj yiqꞌomal yaꞌ Sara yu yok yaꞌ yixalo naj yalni. 3 Yinh huneꞌ aqꞌbꞌal xin, tzotel Komam Dios tet naj Abimelec tuꞌ yul iswayik hakaꞌ tiꞌ: «Wal tinanh chaxhkamoj yuto huneꞌ ix ix hachej ilaxoti tiꞌ ay yichamil ix,» xhi Komam.

4 Yajaꞌ xin maxhto chiꞌok yaꞌ yixalo naj, yuxin yal naj tet Komam: «Mamin, ¿tom chawaqꞌ kamo hunu mak maxhto chiwatxꞌen hunu istxꞌojal yul hasat? 5 Wal xin haꞌ kaw yaꞌ Abraham tuꞌ halni wetan tato yanabꞌ yaꞌ ye ix, hakpax tuꞌ ix, yal ix tato isnoh ix ye yaꞌ, yuxin mach kꞌulo wubꞌan chinnanikojan yok ix wixalojan. Wal xin mach istxꞌojal chinwatxꞌehan yul hasat,» xhi naj.

6 Istaqꞌwi Komam tet naj yul iswayik hakaꞌ tiꞌ: «Kaw wohtajan tato mach kꞌulo hawubꞌ chananiko huneꞌ tuꞌ yinh ix, yuxinto mach injehan ta chiꞌok ix hawixaloj, yunhe mach chawako hamul yul insatan. 7 Tinanh xin aqꞌ meltzo yixal yaꞌ, yuto inchejabꞌan ye yaꞌ. Chitxahlo yaꞌ tawinh haxinwal ay hakawil. Taka mach chawaqꞌ meltzo ix tet yichamil tuꞌ xin, chaxhkamo yebꞌ sunil hawikꞌal,» xhi Komam Dios tet naj yul iswayik.

8 Haxa yet hunxa tzꞌayik xin, kaw sahabꞌ ah naj Abimelec tuꞌ. Yawteniko naj sunil ebꞌnaj ischejabꞌ, yalni naj huneꞌ iswayik tuꞌ tet ebꞌnaj. Yet yabꞌen ebꞌnaj iswayik naj tuꞌ kaw xiwkanh ebꞌnaj. 9 Lahwi tuꞌ xin yawten naj Abimelec yaꞌ Abraham, yalni naj tet yaꞌ:

—¿Tzet yinh xin hak tiꞌ chonhhawutehanh? ¿Tom ay istxꞌojal chinwatxꞌehan tawinh yuxin chitit huneꞌ isyaꞌtajil tiꞌ wibꞌanhan hawu yebꞌ yibꞌanh mak ay inkꞌatanhan? Huneꞌ tzet hawatxꞌe mach kꞌuloj, xhi naj. Yalnipaxo naj tet yaꞌ:

10 —¿Tzet yinh xin hak tuꞌ hawute hawalni wetan? xhi naj Abimelec tuꞌ tet yaꞌ Abraham. 11 Istaqꞌwi yaꞌ tet naj rey tuꞌ:

—Ham walnihan tato yul huneꞌ konhobꞌ tiꞌ, machi yelapno Komam Dios yul hesat, yuxin chimkinhepotxꞌan yu wixaltiꞌan walnihan. 12 Yajaꞌ yeli wanabꞌan ix, yuto iskutzꞌin inmaman ye ix, yajaꞌ wal komiꞌanh nanantaj, yuxin kinmohyihan yebꞌ ix isyayil, xhi yaꞌ. Yalnipaxo yaꞌ:

13 —Yet yalni Komam Dios wetan tato chinelan yul yatut inmaman, walnikanojan tet ix tato bꞌajxanhetuꞌwal konhobꞌal chonhekꞌanh yebꞌ ix, chal ix tato isnoh ix wehan, xhi yaꞌ tet naj Abimelec.

14 Lahwi tuꞌ xin yaqꞌni meltzoho naj Abimelec yaꞌ Sara tet yaꞌ Abraham. Issahnipaxo naj hunteqꞌan noꞌ meꞌ yebꞌ noꞌ wakax tet yaꞌ, yebꞌ hunteqꞌan ebꞌnaj yebꞌ ebꞌix ix ok ischejabꞌo yaꞌ Abraham tuꞌ. 15 Yalni naj Abimelec:

—Ilkꞌanabꞌto sunil txꞌotxꞌ tuꞌ lah, sikꞌle bꞌay chawoche chaxhehi, xhi naj. 16 Yalnipaxo naj tet yaꞌ Sara:

—Haꞌ chꞌen mil melyu plata mawaqꞌan tet naj hanoh tiꞌ, haꞌ chiꞌok ispaj selelo tawet, haꞌ chihalnilo tet anma ayko takꞌatanh tato machi nichꞌano hamul. Hak tuꞌ xin machi hunu mak txꞌoj istzotel tawinh, xhi naj Abimelec tuꞌ.

17 Lahwi tuꞌ istxahli yaꞌ Abraham yinh naj Abimelec tet Komam Dios. Yaqꞌni kawxo Komam naj yebꞌ yixal. Yaqꞌnipaxo kawxo Komam ebꞌix ischejabꞌ naj, hak tuꞌ xin yu yuninwi ebꞌix hunelxa. 18 Yuto yet yalanhto, sunil ebꞌix ix ay yul yatut naj Abimelec tuꞌ, matxa uninwi ebꞌix yu huneꞌ isyaꞌtajil yati Komam Dios yibꞌanh ebꞌix, yuto etza yiqꞌkanh naj Abimelec yaꞌ Sara.