4 Haxa yinh iswaxajebꞌ tzꞌayik xin, yaqꞌni circuncidar yaꞌ nichꞌan iskꞌahol tuꞌ, yuto hak tuꞌ yu yalnikano Komam tet yaꞌ. 5 Yaꞌ Abraham tuꞌ kaw 100 (hokꞌal) habꞌil yaꞌ yet ispitzkꞌa nichꞌan iskꞌahol tuꞌ. 6 Yalni yaꞌ Sara hakaꞌ tiꞌ: «Haꞌ Komam Dios maꞌaqꞌni tzalaho wanmahan tinanh, kat istzalahopaxo iskꞌul sunil mak chiꞌabꞌenoj tato ayxa nichꞌan wuninan. 7 ¿Makkꞌanabꞌ ohtanheni tato ay hunu nichꞌan wuninan yebꞌ yaꞌ Abraham? Wal xin walka kaw ichamxa yaꞌ, yajaꞌ ay nichꞌan juninalanh yebꞌ yaꞌ,» xhi yaꞌ Sara tuꞌ.

8 Wal naj nichꞌan Isaac kaw saqꞌal ischꞌibꞌ naj, yet hunel xin yekꞌtze yaꞌ Abraham huneꞌ niman qꞌinh, yuto ilaxilo naj nichꞌan Isaac tuꞌ yinh yim.

9 Wal yaꞌ Sara tuꞌ, yil yaꞌ tato naj Ismael iskꞌahol yaꞌ Abraham yebꞌ ix Agar ah Egipto chibꞌuchwa naj yinh naj nichꞌan Isaac. 10 Isto yaꞌ yalno tet yaꞌ Abraham hakaꞌ tiꞌ: «Wal tinanh tzumbꞌeto huneꞌ ix chejabꞌ tiꞌ yebꞌ yunin, yuto naj yunin ix tiꞌ mach chiyok naj yinh ismajul wunin Isaactiꞌan,» xhi yaꞌ Sara tet yaꞌ Abraham. 11 Yet yabꞌen yaꞌ huneꞌ tuꞌ, kaw yaꞌ yuko yinh yanma yaꞌ yuto iskꞌaholpaxo yaꞌ ye naj Ismael. 12 Yajaꞌ xin yal Komam Dios tet yaꞌ hakaꞌ tiꞌ: «Mach chawako yinh hakꞌul yinh naj nichꞌan Ismael, yebꞌ yinh ix hachejabꞌ tuꞌ. Wal xin yije tzet chal yaꞌ Sara tiꞌ yuto yinh yaꞌ Isaac chipohcha hawuninal, hakaꞌ haltebꞌil wuhan. 13 Walpaxo naj yunin ix chejabꞌ tuꞌ chipohchapaxo huneꞌ niman konhobꞌal anma yinh yuninal naj wuhan yuto hakꞌahol ye naj,» xhi Komam tet yaꞌ Abraham.

14 Haxa yinh hunxa tzꞌayik xin, kaw sahabꞌ ah yaꞌ Abraham tuꞌ, yaqꞌni yaꞌ hanikꞌ tzet chilolaxi, yebꞌ huneꞌ noꞌ tzꞌum bꞌay ayayto ha haꞌ tet ix Agar, yanikanh yaꞌ yinh yichinh ix. Tzujan tuꞌ xin, yaniko yaꞌ naj Ismael tuꞌ tet ix, istaqꞌlikano yaꞌ tet ix. Lahwi tuꞌ, isto ix yebꞌ naj nichꞌan Ismael, isbꞌelwikꞌo ix sat txꞌotxꞌ desierto chiyij Beerseba, machi xin chitxumcha yu ix bꞌay kaw istokoj. 15 Hayet islahwi ha haꞌ ayayto yul noꞌ tzꞌum iqꞌbꞌil yu ix tuꞌ, isbꞌey ix yanokano naj nichꞌan Ismael yalanh yenhel huneꞌ teꞌ nichꞌan teꞌ, 16 ishitzilo ix iskꞌatanh naj yunhe mach chiyil ix iskamayo naj. Hayet yay tzꞌonhno ix, yichiko naj nichꞌan tuꞌ yoqꞌi. 17 Wal Komam Dios xin kaw yabꞌe Komam yoqꞌ naj nichꞌan tuꞌ, yuxin tzotelayti huneꞌ yángel Komam tet ix Agar yul satkanh, yalni naj: «Agar, ¿tzet habꞌiskꞌulal? ¡Mach chaxhxiwi! Kaw mayabꞌe Komam Dios yoqꞌ naj nichꞌan tiꞌ. 18 Tinanh xin asiꞌ iskꞌatanh naj kat haxekni naj, machi xin chabꞌejtzo naj. Wal xin yinh ej yuninal naj chiswatxꞌe Komam Dios huneꞌ niman konhobꞌ,» xhi naj ángel.

19 Lahwi tuꞌ isyelaxto ix yinh huneꞌ kꞌuh yu Komam, isto ix yinh anhe isnohtzeno noꞌ tzꞌum, yaqꞌni ix haꞌ yukꞌuꞌ yunin tuꞌ.

20-21 Wal naj nichꞌan Ismael tuꞌ, kaw ilbꞌil naj yu Komam Dios, yebꞌpaxo xin kaw tzꞌehbꞌikanokanh naj, yehayo naj bꞌey huneꞌ txꞌotxꞌ desierto chiyij isbꞌi Parán. Kaw xin helan naj isqꞌojwa yu teꞌ litꞌ. Tzujan tuꞌ xin yaqꞌlax mohyo naj yebꞌ huneꞌ ix ix ah Egipto yu ismiꞌ.

22 Yinhtikꞌa huneꞌ tiempo tuꞌ, to naj rey Abimelec tzotelo tet yaꞌ Abraham, tzujan xin naj Ficol yinta naj, naj ayko yahawilo yinh ebꞌnaj issoldado naj. Hayet yapni naj, yalni naj tet yaꞌ Abraham:

—Kaw chijilanh tato Komam Dios chikolwa tawinh yinh sunil tzet chawatxꞌe. 23 Wal tinanh halkano wetan yinh sat Komam Dios yinh kaw isyelal bꞌay lanhan kotzotel tiꞌ tato machi hunu istxꞌojal chawatxꞌe winhan yebꞌ yinh wuninalan, yebꞌ yinh yuninal wuninal tuꞌan, yebꞌpaxo yinh sunil anma ay sat huneꞌ txꞌo txꞌotxꞌ bꞌay ayach tiꞌ. Kaw halkano wetan tato kꞌul chawute hakꞌul winhan hakaꞌ iskꞌulchꞌanil inkꞌulan tawinh, xhi naj Abimelec tet yaꞌ Abraham.

24 Istaqꞌwi yaꞌ Abraham hakaꞌ tiꞌ:

—Kꞌultikꞌa, matzet chal hakꞌul, xhi yaꞌ.

25 Yalni yaꞌ yinh huneꞌ kꞌuh yilo ebꞌnaj ischejabꞌ naj Abimelec tuꞌ tet yaꞌ. 26 Istaqꞌwi naj Abimelec tuꞌ:

—Maxhto wohtajojan huneꞌ chawal tiꞌ, yuto maxhto tzet chawal wetan. Mach wohtajojan mak ebꞌnajil tziknilo huneꞌ kꞌuh tuꞌ tawet, xhi naj tet yaꞌ. 27 Lahwi tuꞌ xin yiniti yaꞌ Abraham haykꞌonh noꞌ meꞌ yebꞌ noꞌ wakax, yaqꞌni yaꞌ noꞌ tet naj Abimelec. Hak tuꞌ xin yu iswatxꞌenkanayo yaꞌ huneꞌ istrato tuꞌ yebꞌ naj. 28 Tzujan tuꞌ xin ispohnipaxilo yaꞌ hujkꞌonh noꞌ qꞌopo meꞌ xol ismeꞌ. 29 Hayet yilni naj Abimelec huneꞌ tuꞌ isqꞌambꞌen naj:

—¿Tzet yinh xin maxapohilo hujkꞌonh noꞌ meꞌ tiꞌ? xhi naj.

30 Istaqꞌwi yaꞌ Abraham:

—Noꞌ hujkꞌonh meꞌ tiꞌ, chiwaqꞌan noꞌ tawet, haꞌ noꞌ xin chiꞌok yecheloj tato haninan watxꞌenhe huneꞌ kꞌuh tuꞌ, xhi yaꞌ.

31 Yuxinto Beerseba okkano isbꞌiho huneꞌ txꞌotxꞌ tuꞌ yuto haꞌ bꞌey tuꞌ iswatxꞌe yaꞌ Abraham yebꞌ naj Abimelec huneꞌ istrato.

32 Hayet lahwi iswatxꞌenkano ebꞌnaj huneꞌ istrato bꞌey Beerseba tuꞌ^a ismeltzo naj Abimelec yebꞌ naj Ficol yul ismajul txꞌotxꞌ Filistea. 33 Lahwi tuꞌ xin istzꞌunni yaꞌ Abraham huneꞌ te teꞌ chiyij tamarisco bꞌey Beerseba tuꞌ. Haꞌ bꞌey tuꞌ xin txahli yaꞌ tet Komam Dios, Komam itzitznhetikꞌa. 34 Yaꞌ Abraham tuꞌ, kaw txꞌiꞌalto tzꞌayik ehayo yaꞌ sat istxꞌotxꞌ ebꞌnaj filisteo tuꞌ.