—Hach Abraham, xhi Komam. Istaqꞌwi yaꞌ:

—Mamin, ayinan lah, xhi yaꞌ.

2 Yalni Komam xin:

—Wal tinanh, ito hunpilan hakꞌahol kaw xahan ay hawu, bꞌey txꞌotxꞌ Moriah. Hayet chaxhapni bꞌey tuꞌ xin, kat hawaqꞌni naj Isaac hakꞌahol tuꞌ yinh xahanbꞌalil wetan yinh iswiꞌ huneꞌ witz chinyehan tawet, xhi Komam tet yaꞌ.

3 Haxa yinh hunxa tzꞌayik kaw sahabꞌ sakꞌayalil xin, yanahto yaꞌ Abraham isxhila isburro, istzokꞌni yaꞌ teꞌ siꞌ chiꞌok yinh isxahanbꞌal tuꞌ. Lahwi tuꞌ, isto yaꞌ yebꞌ iskꞌahol bꞌey huneꞌ txꞌotxꞌ bꞌay yal Komam, yinipaxto yaꞌ kawanh ischejabꞌ yintaj. 4 Haxa yinh yox tzꞌayik xin, yilnito yaꞌ huneꞌ txꞌo txꞌotxꞌ tuꞌ yinh kaw nahat. 5 Yalni yaꞌ tet ebꞌnaj ischejabꞌ hakaꞌ tiꞌ:

—Kananhwekano bꞌey tiꞌ yebꞌ noꞌ burro, wal hinan yebꞌ inkꞌaholtiꞌan, chonhtohanh kosatato tiꞌ. Haꞌ bꞌey tiꞌ xin, chijaqꞌanh koxahanbꞌalanh tet Komam Dios, tzujan tuꞌ kat komeltzohanh, xhi yaꞌ.

6 Lahwi tuꞌ, yanahto yaꞌ Abraham teꞌ siꞌ chiꞌok yinh xahanbꞌal yibꞌanh iswixikꞌ naj Isaac, yinito yaꞌ chꞌen cuchillo yebꞌ qꞌa qꞌaꞌ, isto yaꞌ yebꞌ iskꞌahol tuꞌ. 7 Hanikꞌixto chito yaꞌ tuꞌ, isqꞌambꞌen naj Isaac:

—Mam, xhi naj.

—¿Tzet tuꞌ kꞌahol? xhi yaꞌ.

—Iqꞌbꞌil teꞌ siꞌ ju lah, yebꞌ qꞌa qꞌaꞌ, ¿bꞌaytuꞌwal xin ay noꞌ meꞌ chiꞌok yinh xahanbꞌalil tuꞌ? xhi naj.

8 Yalni yaꞌ tet iskꞌahol:

—Kꞌahol, yohta Komam Dios bꞌaytuꞌwal chitij hunu noꞌ meꞌ chiꞌok yinh xahanbꞌalil tuꞌ, xhi yaꞌ. Islahniko yaꞌ yebꞌ iskꞌahol tuꞌ isto yinh isbꞌel. 9 Lahwi tuꞌ xin, yapni yaꞌ bꞌay yal Komam Dios. Yok yaꞌ islatzꞌbꞌanokanh chꞌen chꞌen bꞌay chaqꞌ isxahanbꞌal, yanahto yaꞌ teꞌ siꞌ yibꞌanh chꞌen. Lahwi tuꞌ iskꞌalnayo yaꞌ iskꞌahol, yanahto yaꞌ naj Isaac yibꞌanh teꞌ siꞌ tuꞌ yinh xahanbꞌalil. 10 Yajaꞌ hayet yinikanh yaꞌ chꞌen cuchillo yinh iskꞌahol tuꞌ, 11 istzotelayti yángel Komam Dios tet yaꞌ yul satkanh, yalni hak tiꞌ:

—Abraham, Abraham, xhi naj.

—¿Tzet tuꞌ Mamin? xhi yaꞌ.

12 Yalni yángel Komam tuꞌ:

—Mach chapotxꞌ hakꞌahol tiꞌ, yuto mawilan tato kaw yijem hach tet Komam Dios. Machi xin maxamanhkꞌo hawaqꞌni hakꞌahol tiꞌ yinh xahanbꞌalil tet Komam, xhi yángel Komam.

13 Lanhantotikꞌa xin, istꞌanhxito yaꞌ Abraham yintaj, yilni yaꞌ huneꞌ noꞌ meꞌ xol teꞌ txꞌix, kawxinakano yukꞌaꞌ noꞌ xol teꞌ. Isto yaꞌ yinoti noꞌ, yaqꞌni yaꞌ noꞌ yinh xahanbꞌalil selelo iskꞌahol tuꞌ. 14 Yu huneꞌ tuꞌ, yuxin yakaniko yaꞌ isbꞌi huneꞌ witz bꞌay yaqꞌ isxahanbꞌal tuꞌ hakaꞌ tiꞌ: «Haꞌ Komam Dios chiꞌaqꞌni tzet chiꞌokniko ju,» xhi yaꞌ. Yuxin chito hal-lax yinh huneꞌ witz tuꞌ hakaꞌ tiꞌ: «Bꞌey witz Komam chiꞌaqꞌni tzet chiꞌokniko ju.»

15 Istzotelpaxayti yángel Komam Dios yul satkanh tet yaꞌ Abraham, 16 yalni hakaꞌ tiꞌ:

—Hanin kaw Dios chihalni hakaꞌ tiꞌ: “Yu maxayije tzet mawalan, machi xin maxamanhkꞌo hawaqꞌni hunpilan hakꞌahol yinh xahanbꞌalil wetan, 17 yuxin yinh kaw yeli, chiwayojan inkꞌulalan tawibꞌanh. Kaw hantanhe anma chipohchahokanto yinh hawuninal, hakaꞌ isbꞌisil ej txꞌumel ay satkanh, yebꞌ hakaꞌ isbꞌisil arena ay istiꞌla haꞌ mar, kat isqꞌoji ebꞌnaj yinh ebꞌnaj ayko ishowal yinh. 18 Yu maxayije yinh tzet mawalan, yuxin sunil anma ay yul sat yibꞌanhqꞌinal tiꞌ chichahno iskꞌulchꞌanil inkꞌulan, hakaꞌ wanayojan inkꞌulalan yibꞌanh hawuninal,” xhi Komam, xhi yángel Komam tuꞌ.

19 Lahwi tuꞌ ismeltzo yaꞌ Abraham bꞌay kankano ebꞌnaj ischejabꞌ, ispaxto yaꞌ yebꞌ ebꞌnaj bꞌey Beerseba, yehayo yaꞌ bꞌey Beerseba tuꞌ.^a

20 Haxa yet yekꞌto tiempo xin, yabꞌenilo yaꞌ Abraham tato txꞌiꞌalxa yuninal naj Nacor yebꞌ ix Milca. Naj Nacor tuꞌ yuxhta yaꞌ ye naj. 21 Naj bꞌabꞌel iskꞌahol naj Nacor tuꞌ, haꞌ ton naj Uz. Tzujanxa xin ispitzkꞌa naj Buz, haxa yet yekꞌto tiempo xin ispitzkꞌapaxo naj Kemuel, naj ismam naj Aram. 22 Tzujan tuꞌ xin ispitzkꞌapaxo hunteqꞌanxa iskꞌahol naj Nacor tuꞌ, haꞌ ton ebꞌnaj tiꞌ: naj Quesed, naj Hazo, naj Pildas, naj Jidlaf yebꞌ naj Betuel. 23 Naj Betuel tuꞌ, haꞌ naj ismam ix Rebeca. Haꞌ ton xin ebꞌnaj waxajwanh tiꞌ yuninal naj Nacor yebꞌ yixal Milca, naj Nacor xin, yuxhta yaꞌ Abraham ye naj.

24 Naj Nacor tuꞌ, aypaxo yuninal naj yebꞌ ix Reúma, haꞌ ton ebꞌnaj tiꞌ: naj Teba, naj Gaham, naj Tahas yebꞌpaxo naj Maaca.