Iskamikal ixnam Sara yebꞌ yet ismujlaxi
23
1-2 Wal ixnam Sara, kam ixnam bꞌey konhobꞌ Quiriat-arba, chihal-laxpaxo Hebrón, ay yul ismajul Canaán. Ixnam Sara tuꞌ kaw 127 habꞌil ekꞌ ixnam. Hayet iskam ixnam tuꞌ xin kaw oqꞌ yaꞌ Abraham, yiqꞌni bꞌiskꞌulal yaꞌ yinh ixnam. 3 Lahwi tuꞌ yel yaꞌ iskꞌatanh ixnam Sara, yet kamomxa ixnam, isto yaꞌ tzotelo tet ebꞌnaj hitita ay bꞌey tuꞌ. Yalni yaꞌ hakaꞌ tiꞌ:4 —Walka nan konhobꞌal hinan texol, yajaꞌ kaw chinqꞌanan teyet, txonhwe nichꞌano hetxꞌotxꞌ wetan, bꞌay chinmujan isnimanil wixalan, xhi yaꞌ.
5 Istaqꞌwi ebꞌnaj hitita tuꞌ tet yaꞌ:
6 —Mamin, abꞌe tzet chijalanh, hach tiꞌ ischejabꞌ Komam Dios haweko koxolanh, yuxin akto isnimanil hawixal tuꞌ yul hunu chꞌen kopantionhanh kaw kꞌul. Wal xin machi hunu mak chimanhkꞌon huneꞌ chaqꞌan tiꞌ, xhi ebꞌnaj.
—Tato kaw yel cheyala cheje chinmujan wixalan texol, kaw chinqꞌanan teyet tzotelanhwe tet naj Efrón iskꞌahol naj Zohar, 9 tato chistxonhilo naj nichꞌano txꞌotxꞌ Macpela wetan, bꞌay ay huneꞌ chꞌen nhachꞌen, istiꞌla istxꞌotxꞌ naj Efrón. Wal xin chintohlahan chꞌen tet naj hakaꞌtikꞌa kaw istohol chꞌen, hak tuꞌ xin chiꞌokkano huneꞌ chꞌen nhachꞌen tuꞌ mujbꞌalil wuhan texol, xhi yaꞌ.
10 Yajaꞌ kꞌuxan ayko naj Efrón xol ebꞌnaj, istaqꞌwikanh naj tet yaꞌ Abraham yinh kaw ip, yunhe yabꞌen yet konhobꞌ naj yebꞌ anma chiꞌekꞌto istiꞌ ispultahil konhobꞌ tuꞌ, yalni naj hakaꞌ tiꞌ:
11 —Mamin, mach chinqꞌanan istohol txꞌotxꞌ, wal xin tonhe chiwaqꞌan txꞌotxꞌ tawet yebꞌ chꞌen nhachꞌen ayayo sat txꞌotxꞌ tuꞌ. Ebꞌnaj wet konhobꞌtiꞌan testigo chukaniko ebꞌnaj yinh huneꞌ tiꞌ, tato tonhe chiwaqꞌan txꞌotxꞌ tawet. Wal xin akto isnimanil hawixal yul chꞌen, xhi naj.
12 Yaypaxo xulno yaꞌ Abraham tuꞌ yinh sat ebꞌnaj hunelxa. 13 Lahwi tuꞌ yalnipaxo yaꞌ tet naj Efrón yinh sat sunil ebꞌnaj hitita tuꞌ:
—Kaw chinqꞌanan tawet abꞌe tzet chiwalan, chákano istohol txꞌotxꞌ wetan katto waniktojan isnimanil wixal tuꞌan yul chꞌen, xhi yaꞌ.
14 Istaqꞌwi naj Efrón tuꞌ tet yaꞌ:
15 —Mamin, huneꞌ txꞌo txꞌotxꞌ tuꞌ kanhebꞌ ciento siclo plata istohol txꞌotxꞌ. Yinh istohol txꞌotxꞌ tuꞌ mach txꞌiꞌalo chonhtzoteli, wal xin as akto isnimanil hawixal yul chꞌen, xhi naj.
16 Hayet yabꞌen yaꞌ Abraham huneꞌ tuꞌ, istohlan yaꞌ txꞌotxꞌ tet naj Efrón, ismalen yaꞌ chꞌen 400 siclo plata tet naj yinh sat ebꞌnaj hitita, hakaꞌ chute ebꞌnaj txonhwom. Yaqꞌ yaꞌ chꞌen melyu yinh kaw tzꞌajan tet naj. 17 Hak tuꞌ xin yu yokkano istxꞌotxꞌ naj Efrón yebꞌ chꞌen nhachꞌen tuꞌ yu yaꞌ Abraham, yebꞌpaxo sunil ej teꞌ qꞌebꞌtaj ayayo sat txꞌotxꞌ Macpela tuꞌ. Txꞌotxꞌ Macpela tuꞌ yintakꞌto txꞌotxꞌ Mamre ayikꞌto txꞌotxꞌ. 18 Yaꞌ Abraham tuꞌ yahaw yukaniko yaꞌ yinh sunil tuꞌ, yinh sat ebꞌnaj hitita yebꞌ yinh sat sunil ebꞌnaj chiꞌekꞌ istiꞌ pulta tuꞌ.
19 Lahwi tuꞌ xin isto yaꞌ Abraham yanokto isnimanil yixal yul chꞌen nhachꞌen ay bꞌey Macpela, txꞌotxꞌ chihal-laxpaxo Hebrón. Txꞌotxꞌ Macpela tuꞌ yintakꞌto txꞌotxꞌ Mamre yul ismajul Canaán ay txꞌotxꞌ.a 20 Hak tuꞌ yu yokkano huneꞌ txꞌotxꞌ tuꞌ yu yaꞌ Abraham yebꞌ chꞌen nhachꞌen ayayo sat txꞌotxꞌ bꞌay okkanto isnimanil yixal yaꞌ. Huneꞌ txꞌotxꞌ tuꞌ tet ebꞌnaj hitita isloqꞌ yaꞌ txꞌotxꞌ.