Kaw xin 70 (lahonhebꞌ iskanhwinaj) tzꞌayik yiqꞌ bꞌiskꞌulal ebꞌnaj Egipto tuꞌ yinh yaꞌ. 4 Haxa yet lahwi yekꞌto hunteqꞌan tzꞌayik tuꞌ xin, yalni yaꞌ José tet ebꞌnaj chimunla yinta naj rey yul palacio hakaꞌ tiꞌ:

—Ta kaw yeli kꞌul inkꞌulan teyinh cheyabꞌe, halwe tet naj faraón, 5 tato taqꞌwebꞌilkano wuhan sata Komam Dios yet maxhto chikam inmamtuꞌan tato chinmujan isnimanil yaꞌ yul huneꞌ chꞌen nhachꞌen watxꞌebꞌil yu yaꞌ bꞌey Canaán. Yuxin halwe nino tet naj rey tuꞌ tato chintohan inmujuꞌ inmaman bꞌey tuꞌ, lahwi tuꞌ kat inmeltzohan, xhi yaꞌ José tuꞌ.

6 Yet yabꞌen naj rey huneꞌ tuꞌ yalni naj tet yaꞌ José:

—Kꞌultikꞌa, asmuj hamam tuꞌ hakaꞌ yu yalnikano yaꞌ tawet, xhi naj rey.

7 Lahwi tuꞌ xin isto yaꞌ José ismujno ismam, istopaxo xin ebꞌnaj chimunla yinta naj rey yul palacio, yebꞌ sunil ebꞌnaj ay ismunil yinta naj rey yul txꞌotxꞌ Egipto tuꞌ. 8 Istopaxo yixal yaꞌ José yebꞌ yuninal, yebꞌ ebꞌnaj yuxhta yaꞌ, yebꞌ sunil mak ay yul yatut yaꞌ Jacob tuꞌ. Haxanhe nixhte unin yebꞌ isnoqꞌ ebꞌnaj kankano bꞌey txꞌotxꞌ Gosén. 9 Kaw xin hantanhe anma to yibꞌanh carruaje, yebꞌ yibꞌanh noꞌ cheh mujwal yinta yaꞌ José tuꞌ. Hak tuꞌ xin kaw hantanhe anma to mujwal yinh yaꞌ Jacob. 10 Haxa yet yapni ebꞌnaj bꞌey txꞌotxꞌ Atad, txꞌotxꞌ ayikꞌto isqꞌaxebꞌikꞌto haꞌ niman Jordán, yekꞌtzen yaꞌ José yebꞌ sunil anma tzujan yintaj tuꞌ huneꞌ yet bꞌiskꞌulal yinh iskamikal ismam. Kaw xin hujebꞌ tzꞌayik ekꞌtzelax huneꞌ tuꞌ.

11 Hayet yilni anma ay bꞌey Canaán huneꞌ tuꞌ, yalni anma: «Haꞌ hunteqꞌan ebꞌnaj Egipto tiꞌ kaw niman yelapno ye huneꞌ iskamom ebꞌnaj tiꞌ,» xhi anma. Yuxin Abel-mizraim yako anma isbꞌiho huneꞌ txꞌotxꞌ ayko yinh yetkꞌulal bꞌay chiꞌahilo tzꞌayik, yinh haꞌ niman Jordán.

12 Ebꞌnaj iskꞌahol yaꞌ Jacob tuꞌ, kaw isyije ebꞌnaj yinh tzet yalkano yaꞌ yinh iskamikal tuꞌ. 13 Yito ebꞌnaj isnimanil ismam bꞌey Canaán, ismujni ebꞌnaj yaꞌ yul huneꞌ chꞌen nhachꞌen ayayo sat txꞌotxꞌ Macpela loqꞌbꞌilkano yu yaꞌ Abraham tet naj Efrón, naj hitita, yunhe haꞌ tuꞌ chimujlax yuninal yaꞌ. Huneꞌ txꞌo txꞌotxꞌ yebꞌ chꞌen nhachꞌen tuꞌ ayikꞌto yintakꞌto txꞌotxꞌ Mamre. 14 Lahwi ismujnikano yaꞌ José ismam tuꞌ ismeltzo yaꞌ bꞌey Egipto hunelxa, yebꞌ ebꞌnaj yuxhtaj, yebꞌ sunil anma to mujwal tuꞌ.

15 Haxa yet xakamto yaꞌ Jacob, yalni ebꞌnaj yuxhta yaꞌ José tet hunun hakaꞌ tiꞌ:

—Wal tinanh kaw chiꞌok ishowal yaꞌ José jinh, chiꞌok yaꞌ konhyetaꞌ yu sunil istxꞌojal kowatxꞌe yinh yaꞌ, xhi ebꞌnaj tet hunun.

16 Lahwi tuꞌ ischejni ebꞌnaj hal-laxo tet yaꞌ José hakaꞌ tiꞌ: «Yet yalanhto maxhto chikam komam, yalnikano yaꞌ 17 ta chijalanh tawet yinh hunteqꞌan tzotiꞌ hakaꞌ tiꞌ: “Kaw chinqꞌanan tawet, aqꞌ nimankꞌulal yinh sunil istxꞌojal iswatxꞌe ebꞌnaj hawuxhta tawinh, yuto kaw mach xahano kaxhyil ebꞌnaj,” xhikano Komam. Yuxin chikoqꞌananh tawet: “aqꞌ nimankꞌulal jinhanh, hanhonh ischejabꞌ Komam Dios honhtiꞌanh, isDiosal komam,” xhi ebꞌnaj hawuxhtaj,» xhi ebꞌnaj chejabꞌ tet yaꞌ José.

Hayet yabꞌen yaꞌ José huneꞌ tuꞌ ok yaꞌ oqꞌoj. 18 Lahwi tuꞌ xin yapni ebꞌnaj yuxhta yaꞌ José tuꞌ sata, yay nohno ebꞌnaj, yaykano xulno ebꞌnaj sat txꞌotxꞌ, yalni ebꞌnaj hakaꞌ tiꞌ:

—Wal tinanh chonhokkanojanh hachejabꞌoj, ayonhanh lah, xhi ebꞌnaj.

19 Istaqꞌwi yaꞌ José tet ebꞌnaj:

—Matzet chal hekꞌul, mach chu waniko hinbꞌahan selelo Komam Dios. 20 Hex tiꞌ kaw hewatxꞌe istxꞌojal winhan, yajaꞌ Komam Dios meltzoniko istxꞌojal tuꞌ yinh iskꞌulal, yunhe inkolwahan yinh anma, haꞌ ton hunteqꞌan iskꞌulal lanhan jilni tiꞌ. 21 Wal xin mach chexxiwi, chiwaqꞌan tzet cheloh yebꞌ tzet chisloh heyuninal, xhi yaꞌ José tet ebꞌnaj. Kaw xin tzalakanh iskꞌul ebꞌnaj yuto kaw kꞌul yu yaqꞌni yaꞌ José ispaj istzotiꞌ ebꞌnaj.

22 Wal yaꞌ José, haꞌtikꞌa bꞌey Egipto tuꞌ ehayo yaꞌ yebꞌ xin sunil ebꞌnaj yuxhtaj, kaw xin 110 habꞌil ekꞌyaꞌ. 23 Yiltoko yaꞌ yinh yuninal iskꞌahol naj Efraín, yebꞌ ebꞌnaj iskꞌahol yuninal naj Maquir, iskꞌahol naj Manasés. 24 Ay hunel tiꞌ xin yal yaꞌ José tet ebꞌnaj yuxhta hakaꞌ tiꞌ:

—Wal hanintiꞌan lanhanxa yapni istzꞌayikal bꞌay chinkaman, yajaꞌ xin Komam Dios chikolwa teyinh, kat kexyinito Komam bꞌey huneꞌ txꞌo txꞌotxꞌ yalte tet jichmam Abraham, yebꞌ tet komam icham Isaac yebꞌ tet komam Jacob, xhi yaꞌ. 25 Yalnipaxo yaꞌ tet ebꞌnaj yuxhtaj, ebꞌnaj iskꞌahol yaꞌ Israel, tato chistaqꞌwe ebꞌnaj huneꞌ chejbꞌanile tiꞌ yinh, yalni yaꞌ hakaꞌ tiꞌ:

—Yinh kaw yeli chiwalkanojan teyet tato chikolwa Komam Dios teyinh chexyinilo sat huneꞌ txꞌo txꞌotxꞌ tiꞌ. Hayet chij isbꞌa huneꞌ tuꞌ kat heyinito isbꞌajil innimanilan teyintaj, xhi yaꞌ José.

26 Wal yaꞌ José tuꞌ, kaw 110 habꞌil yaꞌ yet iskam yaꞌ bꞌey Egipto. Yet kamomxa yaꞌ xin yanhtelax isnimanil yaꞌ yunhe machi etaxtoj, lahwi tuꞌ yalaxayto isnimanil yaꞌ yul kaxha.