Islahobꞌal tzotiꞌ yal yaꞌ Jacob
49
Yet hunel xin yawteko yaꞌ Jacob ebꞌnaj iskꞌahol, yalni yaꞌ hakaꞌ tiꞌ:—Hitzanhweko inkꞌatanhan, chiwalkanojan yinh tzet chihul teyibꞌanh hekal kabꞌe:
2 Hitzanhwekoj kat heyabꞌen tzet chiwalan,
hanin Israel intiꞌan hemam, xhi yaꞌ.
3 Yichiko yaꞌ yalni yinh ebꞌnaj iskꞌahol hakaꞌ tiꞌ:
—Hach tiꞌ Rubén, inbꞌabꞌel kꞌaholan, chisyelo isbꞌa wipan tawinh yet kaw tzeh hinan.
Hach tiꞌ kaw ekꞌbꞌal yelapno haweh sata ebꞌnaj hawuxhtaj yebꞌ kaw aykano hawip,
4 yuto lahan hach yebꞌ hunu ha haꞌ kaw ay yip.
Yajaꞌ wal tinanh xin matxa bꞌabꞌelo hach,
yuto hawilo inpixanan yet haway yebꞌ huneꞌ ix wixalan,
ix ischejabꞌ hamiꞌ, xhi yaꞌ.
5 Yalnipaxo yaꞌ Jacob: —Hach tiꞌ Simeón yebꞌ hach tiꞌ Leví kaw heyuxhta hebꞌa.
Wal heyespada yebꞌ helitꞌ hanhkꞌanhe istxꞌojal chilaiswatxꞌe.
6 Yinh tzettaj lahtiꞌ chiꞌok heyu mach chiwako hinbꞌahan xol,
yuto hayet istit hehowal hepotxꞌkamo anma yebꞌpaxo yu heyekꞌnajil hewoqꞌilto yoj noꞌ winaj wakax.
7 Chititkano tzꞌaktiꞌal teyibꞌanh yu ishowal hewiꞌ,
chexinpujbꞌakantojan xol ebꞌnaj Israel, xhi yaꞌ.
8 Yalnipaxo yaꞌ Jacob: —Haxa hach tiꞌ Judá kaw chiꞌalaxiko hawinajil yu ebꞌnaj hawuxhtaj kat xin yay xulno ebꞌnaj tasataj.
Chaxhqꞌoji yinh ebꞌnaj ayko ishowal tawinh,
kat hawok yachno yinh isnuqꞌ ebꞌnaj.
9 Hach tiꞌ kꞌahol Judá, lahan hach hakaꞌ hunu noꞌ tzehla bꞌalam,a
hayet chilahwi iskꞌuxnayto noꞌ hunu no noqꞌ chispotxꞌkamoj,
chiꞌay pajno noꞌ kat yay kotno noꞌ sat txꞌotxꞌ hakaꞌ hunu noꞌ niman bꞌalam. Machi xin hunu mak chu ispitwako yinh noꞌ.
10 Machi hunu mak chu yinilo hawip,
yebꞌ xin machi hunu mak chu yinilo teꞌ vara yet ebꞌnaj rey ayko yul haqꞌabꞌ,
masanto yet chihul naj yahaw teꞌ,b haꞌ tet naj xin chisyije anma.
11 Chaxekbꞌa haburro xol teꞌ uva kat hatxꞌahni xil haqꞌap yu vino yebꞌ yu yal teꞌ uva.
12 Wal isbꞌaqꞌ hasat ekꞌbꞌal kaw qꞌej sata teꞌ vino, haxa haweh xin,
ekꞌbꞌal issajil sata noꞌ lech, xhi yaꞌ.
13 Yalni yaꞌ hunelxa: —Haxa hach tiꞌ Zabulón, chaxheho istiꞌ haꞌ mar bꞌay chiꞌapni ej teꞌ barco.
Wal hatxꞌotxꞌ xin chitaapni txꞌotxꞌ bꞌey Sidón, xhi yaꞌ.
14 Yalnipaxo yaꞌ: —Haxa hach tiꞌ Isacar, lahan hach hakaꞌ, hunu noꞌ burro kaw ijtzom,
chixew yul iswaybꞌal.
15 Hayet chawilni txꞌo txꞌotxꞌ kaw kꞌul yebꞌ ta kaw kꞌul haxew sat txꞌotxꞌ chawaniko habꞌa yalanh ijatz.
Chaxhokkano chejabꞌoj, machi xin tzet chawala.
16 Haxa hach tiꞌ Dan, chaxhok yahawo yinh hakonhobꞌ hakaꞌtikꞌa hunu majan ebꞌnaj Israel.
17 Lahan hach hakaꞌ hunu noꞌ labꞌa ayayo istiꞌla bꞌeh chichiwa yinh yoj noꞌ cheh,
kat yaykꞌayti naj ayahto yibꞌanh noꞌ tuꞌ, xhi yaꞌ.
18 Yalnipaxo yaꞌ: —Mamin, chiwechmahan kinhakolnihan, xhi yaꞌ.
19 Lahwi tuꞌ yalnipaxo yaꞌ: —Haxa hach tiꞌ Gad, chiꞌapni ebꞌnaj aqꞌlen howal tawinh,
yajaꞌ xin chiꞌelkanh ebꞌnaj tawet, kat hawok tzujno yinta ebꞌnaj, xhi yaꞌ.
20 Yalnipaxo yaꞌ: —Haxa hach tiꞌ Aser, kaw ay tzet chaloh,
kat hawaqꞌni itah kaw kꞌul tet ebꞌnaj rey, xhi yaꞌ.
21 Lahwi tuꞌ, yalnipaxo yaꞌ: —Haxa hach tiꞌ Neftalí,
lahan hach hakaꞌ hunu noꞌ sajche mach chixiw yekꞌi yebꞌ kaw kꞌulchꞌankano jilni nixhte yunin, xhi yaꞌ.
22 Yalnipaxo yaꞌ: —Wal hach José hach tiꞌ, lahan hach hakaꞌ hunu teꞌ qꞌebꞌtaj ayayo istiꞌ ha haꞌ.
Kaw niman sat chaqꞌa, kat yelto lehna isqꞌabꞌ yibꞌanh ej peyabꞌ.
23 Ebꞌnaj ay islitꞌ chako ishowal ebꞌnaj tawinh, kat kaxhisqꞌojni ebꞌnaj yu islitꞌ tuꞌ.
Kaw xin aynhetikꞌako ebꞌnaj pitwal tawinh.
24 Yajaꞌ wal hach tiꞌ xin, machi bꞌaqꞌinh chisikilo haqꞌabꞌ,
yebꞌ xin mach chiꞌetaxto halitꞌ yu iskꞌulal Komam Dios,
Komam kaw aykano yip, Komam chintanhenan hanin Israel intiꞌan.
25 Yuchꞌandios tet inDiosalan haꞌ kolwa tawinh yebꞌpaxo yuchꞌandios tet Komam kaw aykano yip.
Chaqꞌ Komam iskꞌulal tawibꞌanh,
haꞌ ton haꞌ nhabꞌ chitit yul satkanh yebꞌ txꞌo txꞌotxꞌ yax sat tawet.
Haꞌ iskꞌulal Komam chiꞌaqꞌni pohchakanh hawuninal,
kat yaqꞌnipaxo pohchaho hanoqꞌ.
26 Kaw ekꞌbꞌal niman iskꞌulal chinqꞌankanojan tawibꞌanh sata iskꞌulal isqꞌankanayo inmaman wibꞌanhan.
Hunteqꞌan iskꞌulal chiwakanayojan tawibꞌanh tiꞌ kaw ay istiempo hakaꞌ witz.
Hach José, hach tiꞌ sikꞌbꞌil hachilo xol ebꞌnaj hawuxhtaj, xhi yaꞌ Jacob.
27 Yalnipaxo yaꞌ: —Haxa hach tiꞌ Benjamín, lahan hach hakaꞌ noꞌ oj kaw how, kaw kꞌuxum noqꞌ.
Yet kaw ayto issajbꞌiloj chiskꞌuxto noꞌ ischibꞌehal no noqꞌ chispotxꞌ tuꞌ.
Haxa yet qꞌejbꞌiyalil xin chitxqꞌato noꞌ, noꞌ chibꞌe matxa chilahwi yu, xhi yaꞌ Jacob.
28 Haꞌ ton ebꞌnaj tiꞌ ebꞌnaj kabꞌlahonhebꞌ majan Israel, yebꞌ xin haꞌ hunteqꞌan tzotiꞌ tuꞌ yalkano yaꞌ Jacob yibꞌanh hunun ebꞌnaj yet isqꞌannikano yaꞌ iskꞌulal Komam Dios yibꞌanh ebꞌnaj.
Iskamikal yaꞌ Jacob yebꞌ yinh yet ismujlax yaꞌ
29 Yet hunel xin yalkano yaꞌ Jacob tet ebꞌnaj iskꞌahol hakaꞌ tiꞌ: «Wal hanintiꞌan kaw toxa chinkaman, chiwalkanojan teyet; chinhemujan yul huneꞌ chꞌen nhachꞌen bꞌay mujan ebꞌyaꞌ inmam ichaman, sat istxꞌotxꞌ naj Efrón, naj hitita. 30 Huneꞌ chꞌen nhachꞌen tuꞌ bꞌey Canaán ay chꞌen yul ismajul txꞌotxꞌ Macpela, satalto txꞌotxꞌ Mamre. Huneꞌ txꞌo txꞌotxꞌ yebꞌ chꞌen nhachꞌen tuꞌ loqꞌbꞌilkano yu inmam ichaman, yaꞌ Abraham tet naj Efrón, yu yokniko chꞌen mujbꞌalil. 31 Yul huneꞌ chꞌen nhachꞌen tuꞌ mujlax yaꞌ Abraham yebꞌ yixal, yaꞌ inmiꞌ ixnaman yaꞌ Sara. Haꞌ tuꞌ xin mujlaxpaxo hemam icham yaꞌ Isaac, yebꞌ hemiꞌ ixnam yaꞌ Rebeca, haꞌ bꞌey tuꞌ xin inmujpaxojan yaꞌ Lea. 32 Huneꞌ txꞌo txꞌotxꞌ yebꞌ chꞌen nhachꞌen tuꞌ loqꞌbꞌilkano tet ebꞌnaj hitita,» xhi yaꞌ.
33 Yet lahwi yalnikano yaꞌ Jacob hunteqꞌan tzotiꞌ tuꞌ tet ebꞌnaj iskꞌahol yay hilno yaꞌ, iskamilo yaꞌ xin.