Yet isqꞌannikano yaꞌ Israel iskꞌulal Komam Dios yibꞌanh naj Efraín yebꞌ naj Manasés
48
Hayebꞌixto tzꞌayik xin yal-lax tet yaꞌ José tato yaꞌay ismam yaꞌ. Isto yaꞌ yilno ismam tuꞌ yinito yaꞌ kawanh iskꞌahol, haꞌ ton naj Manasés yebꞌ naj Efraín. 2 Hayet yal-lax tet yaꞌ Israel tato apni yaꞌ José ilwal yinh yaꞌ, islanhnikanh isbꞌa yaꞌ, istzꞌonhi yaꞌ sat istxꞌat. 3 Yalni yaꞌ tet yaꞌ José:—Komam Dios kaw aykano yip, isye isbꞌa Komam wetan bꞌey konhobꞌ Luz yul ismajul txꞌotxꞌ Canaán, yanikanayo Komam iskꞌulal wibꞌanhan, 4 yalni hakaꞌ tiꞌ: “Jacob, kaw chipohchahokanto hawuninal, kaw xin hantanhe konhobꞌ chiꞌel yinh ej hawuninal tuꞌ. Haꞌ xin tet hawuninal chiwaqꞌan huneꞌ txꞌo txꞌotxꞌ tiꞌ yinh hunelnhe,” xhi Komam wetan. 5 Wal ebꞌnaj hakꞌahol pitzkꞌana yet maxhto chinhulan takꞌatanh bꞌey Egipto tiꞌ, naj Manasés yebꞌ naj Efraín wetan ye ebꞌnaj. Kaw inkꞌaholan ye ebꞌnaj hakaꞌ naj Rubén yebꞌ naj Simeón. 6 Walpaxo ebꞌnaj hakꞌahol chipitzkꞌa tzujaniloxa yinta ebꞌnaj tiꞌ hawetxa ye ebꞌnaj, yajaꞌ yu yuxhta isbꞌa ebꞌnaj yebꞌ naj Manasés yebꞌ naj Efraín yuxin chischahpaxo ebꞌnaj ismajul yinta ebꞌnaj. 7 Hayet ayinikojan yinh inbꞌelan yet welan bꞌey Padan-aram, yet lanhanxa wapnihan bꞌey txꞌotxꞌ Efrata ayko yul ismajul Canaán, iskam hamiꞌ Raquel. Inmujnikanojan yaꞌ istiꞌ bꞌeh chito bꞌey txꞌotxꞌ Efrata, haꞌ ton txꞌotxꞌ Belén tinanh, xhi icham.
8 Hunepixto xin yilni yaꞌ Israel tuꞌ ebꞌnaj iskꞌahol yaꞌ José, isqꞌambꞌen yaꞌ:
—Haꞌ ebꞌnaj tiꞌ inkꞌaholan aqꞌbꞌil yu Komam Dios bꞌey txꞌotxꞌ Egipto tiꞌ, xhi yaꞌ. Yalnipaxo yaꞌ hakaꞌ tiꞌ:
—Hitzti ebꞌnaj inkꞌatanhan, chinqꞌankanojan iskꞌulal Komam Dios yibꞌanh ebꞌnaj, xhi yaꞌ.
10 Wal yaꞌ Israel tuꞌ kaw ichamxa yaꞌ, matxa xin kaw chu yilni yaꞌ. Ishitzniko yaꞌ José ebꞌnaj iskꞌahol tuꞌ iskꞌatanh yaꞌ, islaqꞌnayo yaꞌ ebꞌnaj, istzꞌohnipaxo yaꞌ isqꞌotx ebꞌnaj. 11 Yalni yaꞌ tet yaꞌ José tuꞌ:
—Matxa chiwilan tawinh walnihan, yajaꞌ yu iskꞌulal Komam Dios yuxin chiwilan tawinh yebꞌ nixhte hakꞌahol tiꞌ, xhi yaꞌ.
12 Yinilo yaꞌ José tuꞌ ebꞌnaj yibꞌanh isbꞌul ismam, yay kꞌonhno yaꞌ, yay xulno yaꞌ sat txꞌotxꞌ. 13 Lahwi tuꞌ xin isxekni yaꞌ kawanh iskꞌahol tuꞌ, naj Manasés yinh ismekqꞌabꞌ, haxa naj Efraín xin yinh iswatxꞌqꞌabꞌ, yaniko yaꞌ ebꞌnaj sata ismam tuꞌ. Hak tuꞌ yu yokkano naj Efraín yinh ismekqꞌabꞌ yaꞌ, wal naj Manasés xin yinh iswatxꞌqꞌabꞌ yaꞌ okkano naj. 14 Haxa yet yanayo yaꞌ Israel isqꞌabꞌ yibꞌanh ebꞌnaj xin iskulusnhen isqꞌabꞌ yaꞌ, haꞌ iswatxꞌqꞌabꞌ yaꞌ yayo yibꞌanh naj Efraín, naj iskabꞌ kꞌahole, haxa ismekqꞌabꞌ yaꞌ xin yayo yibꞌanh naj Manasés, naj bꞌabꞌel winaj. 15 Isqꞌannikano yaꞌ iskꞌulal Komam Dios yibꞌanh yaꞌ José hakaꞌ tiꞌ:
«Haꞌojabꞌ Komam Dios, Komam bꞌay isyije inmaman yebꞌ inmam ichaman,
Komam chintanhenan yettaxtikꞌa inpitzkꞌahan,
16 yebꞌ naj ángel, kinkolnihan tet sunil isyaꞌtajil,
haꞌojabꞌ chiꞌanayo iskꞌulal yibꞌanh ebꞌnaj nixhte tiꞌ.
Chixin bꞌinaho inbꞌihan yu ebꞌnaj yebꞌ isbꞌi inmam Isaacan, yebꞌ isbꞌi inmam Abrahaman.
Kaw xin nimanojabꞌ yuninal ebꞌnaj chipohcha yul sat yibꞌanhqꞌinal tiꞌ,» xhi ismam yaꞌ José.
17 Yajaꞌ wal yaꞌ José mach ischah iswiꞌ yaꞌ yet yilni yaꞌ yanayo iswatxꞌqꞌabꞌ ismam yibꞌanh iswiꞌ naj Efraín, naj iskabꞌ kꞌahole, haxa ismekqꞌabꞌ yaꞌ xin yayo yibꞌanh iswiꞌ naj Manasés. 18 Yalni yaꞌ tet ismam hakaꞌ tiꞌ:
—Mach hako tuꞌ mam, wal xin haꞌ naj tiꞌ bꞌabꞌel winaj lah, yibꞌanh naj chawayo hawatxꞌqꞌabꞌ, xhi yaꞌ José.
19 Yajaꞌ mach chisje yaꞌ mame tuꞌ, yalni yaꞌ:
—Wohtajan kꞌahol, wohtajan, naj tiꞌ chiꞌel huneꞌ niman konhobꞌ kaw aykano yelapno yinh naj. Yajaꞌ naj iskabꞌ kꞌahole tiꞌ ekꞌbꞌal yelapno chiꞌeliko naj sata naj bꞌabꞌel, kaw xin tzetkꞌa konhobꞌ chipohchakanokanh yinh yuninal naj, xhi yaꞌ.
20 Yinhtikꞌa huneꞌ tzꞌayik tuꞌ isqꞌankano yaꞌ iskꞌulal Komam Dios yibꞌanh ebꞌnaj kawanh tuꞌ, yalni yaꞌ hakaꞌ tiꞌ:
—Chibꞌinaho hebꞌi yu anma Israel yet chisqꞌanni anma iskꞌulal yibꞌanh yuninal, chalni anma hakaꞌ tiꞌ: “Haꞌojabꞌ Komam Dios chiꞌanayo iskꞌulal tawibꞌanh hakaꞌ yu yanayo Komam iskꞌulal yibꞌanh naj Efraín yebꞌ naj Manasés,” xhinhetikꞌa anma tuꞌ, xhi yaꞌ.
Hak tuꞌ yu yanikanayo yaꞌ Israel ekꞌbꞌal iskꞌulal yibꞌanh naj Efraín sata naj Manasés. 21 Yalnikano yaꞌ tet yaꞌ José hakaꞌ tiꞌ:
—Hanintiꞌan lanhanxa yapni istzꞌayikal bꞌay chinkaman, yajaꞌ Komam Dios chiꞌokkano heyetbꞌihoj. Haꞌ Komam tuꞌ chexaqꞌno meltzo sat istxꞌotxꞌ hemam. 22 Kaw ekꞌbꞌal nimanta hamajul chiwakanojan sata ebꞌnaj hawuxhtaj. Chiwakanojan txꞌotxꞌ Siquem tawet, txꞌotxꞌ wilojan tet ebꞌnaj amorreo, yet inqꞌojihan yinh howal yinh ebꞌnaj, xhi yaꞌ.