—Mahul inmaman yebꞌ ebꞌnaj wuxhtajan, ay ebꞌnaj bꞌey txꞌotxꞌ Gosén. Ispeto ebꞌnaj bꞌey Canaán, iqꞌbꞌil xin ismeꞌ ebꞌnaj yebꞌ iswakax ebꞌnaj yu yebꞌ sunil tzet ay ebꞌnaj, xhi yaꞌ. 2 Yet isto yaꞌ José tzotelo tet naj rey, yito yaꞌ howanh yuxhta yunhe yohtanhelax ebꞌnaj yu naj. 3 Isqꞌambꞌen naj tet ebꞌnaj hakaꞌ tiꞌ:

—¿Tzet hemunil hex tiꞌ? xhi naj. Istaqꞌwi ebꞌnaj:

—Mam rey, hanhonhtiꞌanh tanhem meꞌ honhanh, hakaꞌtikꞌa ebꞌnaj jichmamanh. 4 Makonhhulanh bꞌey tiꞌ yu jehayojanh sat hetxꞌotxꞌ, yuto kaw ay wahil bꞌey txꞌotxꞌ Canaán. Machipaxo xin telaj chislo komeꞌanh yuxin kaw chikoqꞌananh tawet, ¿estam chaje chonhkananh yul ismajul txꞌotxꞌ Gosén? xhi ebꞌnaj tet naj.

5 Yalni naj rey tet yaꞌ José hakaꞌ tiꞌ:

—¡Mahul hamam yebꞌ ebꞌnaj hawuxhta takꞌatanh, chal tuꞌ! 6 Wal tinanh ehojabꞌ ebꞌnaj bꞌay chal iskꞌul sat txꞌotxꞌ Egipto tiꞌ. Ehojabꞌ ebꞌnaj bꞌey txꞌotxꞌ Gosén yuto haꞌ txꞌotxꞌ kaw kꞌul yul ismajul txꞌotxꞌ Egipto tiꞌ. Tato ay ebꞌnaj kaw helan istanhen noꞌ wakax, ako ebꞌnaj yahawilo istanheno inwakaxan, xhi naj rey tet yaꞌ José.

7 Yaꞌ José tuꞌ yipaxto yaꞌ ismam sata naj rey yunhe yohtanhen naj icham. Hayet istioxhli yaꞌ Jacob tet naj rey, isqꞌanni naj rey iskꞌulal Komam Dios yibꞌanh yaꞌ. 8 Lahwi tuꞌ isqꞌambꞌen naj rey tet yaꞌ:

—¿Hantaxa hahabꞌilal? xhi naj rey. 9 Istaqꞌwi yaꞌ tet naj:

—130 inhabꞌilalan, yajaꞌ yulbꞌal hunteqꞌan habꞌil tuꞌ mach huneꞌnheho bꞌay kinehan. Kaw xin yinh isyaꞌtajil ekꞌto hunteqꞌan habꞌil tuꞌ wibꞌanhan. Hanikꞌixto xin intiempohalan yuto maxhto chintzꞌajnahan hakaꞌ ishabꞌilal ebꞌyaꞌ wichmaman, xhi yaꞌ.

10 Isqꞌannikano yaꞌ Jacob iskꞌulal Komam Dios yibꞌanh naj rey, lahwi tuꞌ yelti yaꞌ yinh sat naj. 11 Yaqꞌni yaꞌ José^a istxꞌotxꞌ ismam yebꞌ yuxhtaj, txꞌotxꞌ kaw kꞌul yul ismajul Egipto tuꞌ hakaꞌtikꞌa yu yalni naj rey. Hak tuꞌ xin yu yehayo ismam yaꞌ José yebꞌ ebꞌnaj yuxhta yaꞌ yul ismajul txꞌotxꞌ Ramasés.^b 12 Yaqꞌnipaxo yaꞌ José tzet chislo ismam tuꞌ yebꞌ ebꞌnaj yuxhta yebꞌ sunil yuninal ebꞌnaj, hanta chiꞌokniko yu hunun ebꞌnaj.

13 Wal huneꞌ niman wahil tuꞌ kaw islahikoj, matxa hunu bꞌay ay ixim trigo, etzaxanhe xin chikam anma yu wahil yul ismajul txꞌotxꞌ Egipto, yebꞌ yul ismajul txꞌotxꞌ Canaán. 14 Wal yaꞌ José xin iskutxbꞌako yaꞌ sunil chꞌen melyu yaqꞌ ebꞌnaj Egipto yebꞌ ebꞌnaj ah Canaán istoholo ixim trigo, iskꞌubꞌanto yaꞌ chꞌen yul ispalacio naj rey. 15 Haxa yet islahwi ismelyu ebꞌnaj Egipto tuꞌ yebꞌ ebꞌnaj ah Canaán, isto ebꞌnaj Egipto tuꞌ yalno tet yaꞌ José hakaꞌ tiꞌ:

—¡Aqꞌ tzet chikolohanh! Mach kꞌuloj tato chonhhachah kamojanh yu huneꞌ wahil tiꞌ yu matxa komelyuhanh, xhi ebꞌnaj.

16 Istaqꞌwi yaꞌ José tet ebꞌnaj:

—Tato matxa hemelyu, iweti henoqꞌ, kat waqꞌnihan hetrigo selelo noꞌ, xhi yaꞌ.

17 Lahwi tuꞌ yinito ebꞌnaj Egipto ischeh, ismeꞌ, iswakax yebꞌ ej isburro tet yaꞌ José yunhe yaqꞌni yaꞌ istrigo ebꞌnaj yinh noꞌ. Hak tuꞌ yute ebꞌnaj yulbꞌal huneꞌ habꞌil. 18 Haxa yinh hunxa habꞌil yapnipaxo ebꞌnaj iskꞌatanh yaꞌ José, yalni ebꞌnaj:

—Mamin, matxa komelyuhanh, matxapaxo konoqꞌanh yuto hawetxa noꞌ, txonhbꞌilxato noꞌ tawet juhanh. Matxa tzet tzꞌaj jaqꞌaꞌanh tawet, kachanxanhe kotxꞌotxꞌanh, yebꞌ jokanh hachejabꞌoj. 19 Wal xin loqꞌikꞌo kotxꞌotxꞌanh kat konhhaloqꞌnipaxikꞌojanh. Lahwi tuꞌ kat jokkanojanh ischejabꞌo naj rey, kat hawaqꞌni kotrigohanh chikowahanh, yebꞌ xin jinhatanh chikotzꞌunanh sat txꞌotxꞌ. Haꞌ sat tzꞌunubꞌ tuꞌ xin yet naj yehi, haxinwal mach tonheho chiꞌekꞌ tiempo yibꞌanh txꞌotxꞌ. Kolwahanh jinhanh haxinwal mach chonhkamanh, yebꞌ xin mach chikan txꞌo txꞌotxꞌ yinh mach chimunlahi, xhi ebꞌnaj tet yaꞌ José.

20 Hak tuꞌ xin yu isloqꞌnikꞌo yaꞌ José sunil txꞌo txꞌotxꞌ tet ebꞌnaj Egipto. Yokkano txꞌotxꞌ yu naj rey, yuto istxonhto ebꞌnaj Egipto tuꞌ sunil istxꞌotxꞌ yu huneꞌ wahil tuꞌ. 21 Yokkano sunil ebꞌnaj Egipto tuꞌ ischejabꞌo naj rey. 22 Haxanhe xin istxꞌotxꞌ ebꞌnaj sacerdote mach isloqꞌ yaꞌ José tuꞌ yuto haꞌ naj rey chiꞌaqꞌni istrigo ebꞌnaj. Haꞌ ixim xin chiswah ebꞌnaj, yuxin mach istxonhto ebꞌnaj istxꞌotxꞌ.

23 Lahwi tuꞌ yalni yaꞌ José tet ebꞌnaj Egipto hakaꞌ tiꞌ:

—Wal tinanh yetxa naj rey heyehi yebꞌ hetxꞌotxꞌ, yuto loqꞌbꞌil hexxa wuhan. Ay hehinhat lah, txihwe ixim. 24 Yajaꞌ xin chekomonnhe ixim, howebꞌ majan chiꞌayikoj. Huneꞌ majan yet naj rey yok kanhebꞌ majan heyet, haxinwal ay hehinhat, yebꞌ xin tzet cheloh yebꞌ ej heyuninal yebꞌ mak ay tekꞌatanh, xhi yaꞌ José.

25 Istaqꞌwi ebꞌnaj hakaꞌ tiꞌ:

—Mamin, hach tiꞌ kaw kꞌulkano hakꞌul jinhanh yuto chakol janmahanh yinh huneꞌ wahil tiꞌ. ¡Kꞌultikꞌa! chonhokkanojanh ischejabꞌo naj rey, xhi ebꞌnaj.

26 Yokkano huneꞌ ley yu yaꞌ José tato sunil sat tzꞌunubꞌ howebꞌ majan chiꞌayikoj, huneꞌ yet naj rey yok kanhebꞌ yet ebꞌnaj. Huneꞌ ley tuꞌ yexnheto yeko xol ebꞌnaj Egipto tinanh. Wal ebꞌnaj sacerdote xin mach chaqꞌ ebꞌnaj ismajul naj rey yuto haꞌ istxꞌotxꞌ ebꞌnaj tuꞌ, mach ok txꞌotxꞌ yu naj rey.

27 Wal ebꞌnaj israelita tuꞌ kankano ebꞌnaj sat txꞌotxꞌ Egipto, yaqꞌlax istxꞌotxꞌ ebꞌnaj yul ismajul txꞌotxꞌ Gosén. Kaw xin pohchakanokanh ebꞌnaj. 28 Wal yaꞌ Jacob^c kaw 17 (hujlanhebꞌto) habꞌil ekꞌyaꞌ bꞌey Egipto tuꞌ, yuxin 147 ishabꞌilal yaꞌ yinh sunil.

29 Haxa yet toxa chikam yaꞌ xin, ischejni yaꞌ awtelaxo yaꞌ José, yalni yaꞌ tet yaꞌ:

—Tato kaw yeli kꞌul hakꞌul winhan akto haqꞌabꞌ yalanh inbꞌulan^d kat hataqꞌwenkanoj yinh sat Komam Dios tato chayije yinh huneꞌ tzet chiwalkanotiꞌan. ¡Kaw chinqꞌankanojan tawet, mach chinhamujan bꞌey txꞌotxꞌ Egipto tiꞌ! 30 Hayet chinkaman, chawito innimanilan kat kinhamujnihan bꞌay mujan inmaman yebꞌ inmam ichaman, xhi yaꞌ. Istaqꞌwi yaꞌ José:

—Kꞌultikꞌa mam, xhi yaꞌ. 31 Yalnipaxo yaꞌ Jacob:

—¿Kaw yelmi chawala chataqꞌwekano tzet chiwaltiꞌan? xhi yaꞌ. Istaqꞌwi yaꞌ:

—Hoꞌ, hak tuꞌ chiwutehan mam, xhi yaꞌ José. Lahwi tuꞌ yay xulno yaꞌ Israel iswiꞌta istxꞌat istxahli yaꞌ tet Komam Dios.