Yet isto yaꞌ Jacob yebꞌ ej yuninal bꞌey txꞌotxꞌ Egipto
46
Lahwi tuꞌ yok bꞌel yu yaꞌ Jacob, yaꞌ chihal-laxpaxo Israel, yinito yaꞌ sunil tzet aya. Hayet yapni yaꞌ bꞌey Beerseba, yaqꞌni yaꞌ isxahanbꞌal tet isDiosal ismam, haꞌ ton yaꞌ Isaac. 2 Haxa yinh aqꞌbꞌalil xin istzotel Komam Dios tet yaꞌ yinh iswayik hakaꞌ tiꞌ:—Jacob, xhi Komam. Istaqꞌwi yaꞌ:
—Hanintiꞌan Dios hinan, isDiosal hamam. Wal xin mach chaxhxiw hato bꞌey Egipto, yuto haꞌ bꞌey tuꞌ chinwatxꞌehan huneꞌ niman konhobꞌ yinh ej hawuninal chipohi. 4 Haninan chinokan hawetbꞌiho bꞌey Egipto. Haxa yet chiꞌapni istiempohal kat winilojan ej hawuninal sat txꞌotxꞌ Egipto tuꞌ, kat ismeltzopaxo ebꞌnaj bꞌey Canaán. Haxa yet chaxhkam xin ayxakꞌo yaꞌ José hakawilal, xhi Komam tet yaꞌ.
5 Lahwi tuꞌ xin yanahto ebꞌnaj ismam, yebꞌ ej iskꞌahol yebꞌ ebꞌix yixal yul teꞌ carruaje yato naj rey. Yel yaꞌ Jacob yebꞌ ebꞌnaj iskꞌahol bꞌey Beerseba tuꞌ. 6 Hayet yel yaꞌ Jacob bꞌey Canaán, yet isto yaꞌ bꞌey Egipto, yito yaꞌ sunil iswakax yebꞌ ej ismeꞌ, yebꞌ sunil tzet aya. 7 Yinipaxto yaꞌ sunil ebꞌnaj iskꞌahol, yebꞌ ebꞌix iskutzꞌin, yebꞌpaxo ej iskꞌahol ebꞌnaj kꞌahole tuꞌ, yebꞌ ebꞌix iskutzꞌin ebꞌnaj.
8 Hak tiꞌ isbꞌi ebꞌnaj israelita apni bꞌey Egipto, ebꞌnaj titna yinh yaꞌ Jacob: Yaꞌ Rubén, haꞌ yaꞌ bꞌabꞌel kꞌahole. 9 Haxa ebꞌnaj iskꞌahol yaꞌ Rubén, haꞌ ton ebꞌnaj tiꞌ: Naj Hanoc, naj Falú, naj Hezrón yebꞌ naj Carmi.
10 Haxa ebꞌnaj iskꞌahol yaꞌ Simeón xin, haꞌ ton ebꞌnaj tiꞌ: Naj Jemuel, naj Jamín, naj Ohad, naj Jaquín, naj Zohar, yebꞌ naj Saúl. Naj Saúl tuꞌ xin yunin huneꞌ ix ah Canaán ye naj. 11 Ebꞌnaj iskꞌahol yaꞌ Leví xin, haꞌ ton ebꞌnaj tiꞌ: Naj Gersón, naj Coat yebꞌ naj Merari. 12 Haxa ebꞌnaj iskꞌahol yaꞌ Judá xin, haꞌ ton ebꞌnaj tiꞌ: Naj Er, naj Onán, naj Sela, naj Fares yebꞌ naj Zara; yajaꞌ wal naj Er yebꞌ naj Onán kam ebꞌnaj bꞌey txꞌotxꞌ Canaán. Haxa ebꞌnaj iskꞌahol naj Fares, haꞌ ton naj Hezrón yebꞌ naj Hamul. 13 Ebꞌnaj iskꞌahol yaꞌ Isacar xin, haꞌ ton ebꞌnaj tiꞌ: Naj Tola, naj Fúa, naj Job yebꞌ naj Simrón. 14 Wal ebꞌnaj iskꞌahol yaꞌ Zabulón xin, haꞌ ton ebꞌnaj tiꞌ: Naj Sered, yaꞌ Elón yebꞌ naj Jahleel. 15 Haꞌ sunil ebꞌnaj tuꞌ titna yinh ebꞌnaj yunin ix Lea yebꞌ yaꞌ Jacob yet ay yaꞌ bꞌey Padan-aram. Ay xin huneꞌ yunin ix Lea ix chiyij Dina. Haꞌ isbꞌisil sunil yunin ix Lea yebꞌ ej yuninal ebꞌnaj yunin ix tuꞌ 33 (oxlahonhebꞌ iskawinaj) isbꞌisil yinh sunil.
16 Wal ebꞌnaj iskꞌahol yaꞌ Gad, haꞌ ton ebꞌnaj tiꞌ: Naj Zifión, naj Hagui, naj Ezbón, naj Suni, naj Eri, naj Arodi yebꞌ naj Areli. 17 Haxa ebꞌnaj iskꞌahol yaꞌ Aser, haꞌ ebꞌnaj tiꞌ: Naj Imna, naj Isúa, naj Isúi yebꞌ naj Bería, ay xin huneꞌ yanabꞌ ebꞌnaj chiyij Sera. Haxa ebꞌnaj iskꞌahol naj Bería, haꞌ ton naj Heber yebꞌ naj Malquiel. 18 Haꞌ ton ebꞌnaj tuꞌ titna yinh yunin ix Zilpa yebꞌ yaꞌ Jacob. Ix Zilpa tuꞌ, haꞌ ix yato icham Labán ischejabꞌo iskutzꞌin, haꞌ ton ix Lea. Kaw xin 16 (wajlahonhwanh) isbꞌisil ebꞌnaj titna yinh ix Zilpa tuꞌ.
19 Haxa ebꞌnaj yunin ix Raquel, ix yixal yaꞌ Jacob, haꞌ ton yaꞌ José yebꞌ yaꞌ Benjamín. 20 Walpaxo ebꞌnaj iskꞌahol yaꞌ José pitzkꞌa bꞌey Egipto yebꞌ yixal, haꞌ ton naj Manasés yebꞌ naj Efraín. Haꞌ xin yixal yaꞌ José tuꞌ, haꞌ ton ix Asenat, iskutzꞌin naj Potifera, naj ayko sacerdotehal bꞌey konhobꞌ On. 21 Haxa ebꞌnaj iskꞌahol yaꞌ Benjamín xin haꞌ ton ebꞌnaj tiꞌ: Naj Bela, naj Bequer, naj Asbel, naj Gera, naj Naamán, naj Ehi, naj Ros, naj Mupim, naj Hupim yebꞌ naj Ard. 22 Haꞌ ton ebꞌnaj tuꞌ titna yinh yunin ix Raquel yebꞌ yaꞌ Jacob, 14 (kanhlanhwanh) ebꞌnaj yinh sunil.
23 Yaꞌ Dan xin ay huneꞌ iskꞌahol yaꞌ chiyij Husim.
24 Wal ebꞌnaj iskꞌahol yaꞌ Neftalí, haꞌ ton ebꞌnaj tiꞌ: naj Jahzeel, naj Guni, naj Jezer yebꞌ naj Silem. 25 Haꞌ ebꞌnaj tuꞌ yunin ix Bilha yebꞌ yaꞌ Jacob. Ix Bilha tuꞌ ischejabꞌ ix Raquel ye ix, sabꞌil ix yu icham Labán tet iskutzꞌin tuꞌ. Haꞌ ton ebꞌnaj tuꞌ titna yinh yunin ix Bilha, hujwanh ebꞌnaj yinh sunil.
26 Kaw xin 66 (wajebꞌ iskanhwinaj) isbꞌisil ebꞌnaj iskꞌahol yaꞌ Jacob apni bꞌey Egipto. Yinh huneꞌ isbꞌisil tiꞌ hanhe ebꞌnaj iskꞌahol yaꞌ yebꞌ ej iskꞌahol ebꞌnaj kꞌahole tuꞌ, mach xin ayoko ebꞌix yixal ebꞌnaj tuꞌ istzꞌajoj. 27 Nanyepaxo kawanh iskꞌahol yaꞌ José pitzkꞌa bꞌey Egipto, yuxin kaw 70 (lahonhebꞌ iskanhwinaj) isbꞌisil yuninal yaꞌ Jacob yinh sunil, yet ayxa yaꞌ bꞌey Egipto.
28 Yet aytoko yaꞌ Jacob yinh isbꞌel, yanito yaꞌ yaꞌ Judá yalaꞌ tet yaꞌ José tato chihul yaꞌ chawal yinh ismam bꞌey Gosén. Yet xaꞌapni yaꞌ bꞌey Gosén tuꞌ xin, 29 ischejni yaꞌ José yilaxoti iscarruaje yu isto yaꞌ ischahno ismam. Hayet yapni yaꞌ iskꞌatanh ismam tuꞌ yok laqꞌno yaꞌ yinh yaꞌ, yokkano yaꞌ oqꞌo yibꞌanh iswixikꞌ yaꞌ, kaw xin hunep oqꞌ yaꞌ. 30 Yalni yaꞌ Jacob tet yaꞌ José hakaꞌ tiꞌ:
—Wal tinanh xayu inkaman yuto hankawinan mawilikojan tawinh, yebꞌpaxo wohtaxahan tato itzitz hachto, xhi yaꞌ.
31 Yalni yaꞌ José tet ebꞌnaj yuxhtaj yebꞌ tet sunil mak tzujan yinta yaꞌ Jacob tuꞌ hakaꞌ tiꞌ:
—Wal tinanh chintohan wilaꞌan naj rey, kat walnihan tet naj hakaꞌ tiꞌ: “Mamin, mahul ebꞌnaj wuxhtajan yebꞌ sunil mak ay yul yatut inmaman ay bꞌey Canaán, yu iskankano ebꞌnaj inkꞌatanhan. 32 Iqꞌbꞌil xin ismeꞌ ebꞌnaj yebꞌ iswakax ebꞌnaj yu, yebꞌ sunil tzet ay ebꞌnaj. Wal xin tanhem meꞌ ebꞌnaj yebꞌ pohcham wakax ebꞌnaj,” kinchinhetikꞌahan tet naj. 33 Yuxin hayet chexyawteno naj rey tuꞌ, kat isqꞌambꞌeno naj teyet yinh tzet hemunil, 34 cheyalaꞌ tet naj tato hex tiꞌ pohcham meꞌ hex hakaꞌtikꞌa heyichmam. Hak tuꞌ xin chu hekankano sat txꞌotxꞌ Gosén tiꞌ, yuto haꞌ anma ay bꞌey Egipto tiꞌ kachbꞌil yok xol ebꞌnaj tanhem meꞌ, xhi yaꞌ José tet ebꞌnaj.