2 Lahwi tuꞌ yok yaꞌ oqꞌo yinh kaw ip. Sunil xin anma ay bꞌey Egipto abꞌenilo huneꞌ tuꞌ, yapnipaxo isqꞌumal tet naj rey yul palacio. 3 Yalni yaꞌ José tet ebꞌnaj yuxhta tuꞌ hakaꞌ tiꞌ:

—Hanintiꞌan José hinan. ¿Kaw yelmi cheyala itzitzto komam tuꞌ? xhi yaꞌ.

Wal ebꞌnaj yuxhta yaꞌ tuꞌ, sukbꞌilo iskꞌul ebꞌnaj, yuxin matxa yu istaqꞌwi ebꞌnaj tet yaꞌ. 4 Yalnipaxo yaꞌ José tet ebꞌnaj:

—Hitzanhweko inkꞌatanhan, xhi yaꞌ.

Yet ishitziko ebꞌnaj iskꞌatanh yaꞌ yok yaꞌ yalno hakaꞌ tiꞌ:

—Hanintiꞌan José hinan, naj heyuxhtaj, quinhetxonhtojan tet ebꞌnaj ah Egipto tiꞌ. 5 Yajaꞌ chiwalan teyet mach cheyako bꞌiskꞌulal yinh hekꞌul yebꞌ mach chitit hehowal teyinh yu kinhetxonhtojan. Wal xin haꞌ Komam Dios kinaqꞌni bꞌabꞌotijan tesataj yu inkolnihan anma. 6 Tinanh kabꞌxa habꞌil yichiko huneꞌ wahil sat txꞌo txꞌotxꞌ tiꞌ. Kaw xin howebꞌto habꞌil bꞌay mach chaqꞌ sat tzꞌunubꞌ, walka chitzꞌunlaxi. 7 Haꞌ Komam Dios kinchejnitijan bꞌey tiꞌ yunhe mach chitanhilo heyikꞌal sat txꞌo txꞌotxꞌ tiꞌ, yuxin chexiskol Komam yu ishelanil. 8 Yuxin haꞌ Komam Dios kinanitijan bꞌey tiꞌ, maxhtaj hex. Haꞌ Komam kinanikojan munil yinta yaꞌ rey, yebꞌ yahawilo yinh yatut yaꞌ, yebꞌpaxo gobernadoral yinh sunil txꞌotxꞌ Egipto tiꞌ. 9 Wal xin asiꞌwe iskꞌatanh komam tuꞌ, kat heyalni tet yaꞌ: “Hak tiꞌ yalni hakꞌahol José tawet hakaꞌ tiꞌ: Haꞌ Komam Dios kinanikojan yahawo txꞌotxꞌ Egipto. Hulanh yinh anhe kinhawilaꞌan. 10 Chaxhehoyo sat txꞌotxꞌ Gosén yebꞌ ej hakꞌahol yebꞌ ej yuninal hakꞌahol tuꞌ, yebꞌ sunil ej hanoqꞌ yebꞌ sunil tzet ay hach. Hak tuꞌ xin kawil chawukaniko winhan. 11 Chiwaqꞌan sunil tzet chaloh yebꞌ tzet chislo ej hawuninal yebꞌ sunil mak tzujan tawintaj, haxinwal mach cheyeta hekꞌul, yuto kaw howebꞌto habꞌil chaqꞌaꞌ huneꞌ wahil tiꞌ,” xhi yaꞌ, kexchi tet komam tuꞌ. 12 Testigo naj Benjamín tiꞌ yebꞌ hex yinh huneꞌ tzet mawaltiꞌan. 13 Halwe tet komam tuꞌ yinh sunil wipan yibꞌanh txꞌotxꞌ Egipto tiꞌ yebꞌ yinh sunil tzet maxeyil bꞌey tiꞌ. ¡Wal xin as iweti komam tuꞌ bꞌey tiꞌ! xhi yaꞌ José tet ebꞌnaj.

14 Lahwi yalni yaꞌ hunteqꞌan tuꞌ xin, yok laqꞌno yaꞌ yinh naj Benjamín, naj kaw yuxhta yaꞌ, yok yaꞌ oqꞌoj. Hakpax tuꞌ naj Benjamín ok laqꞌno naj yinh yaꞌ José tuꞌ, yoqꞌpaxo naj. 15 Hayet istzꞌohnipaxo yaꞌ José isqꞌotx sunil ebꞌnaj yuxhta tuꞌ chꞌoqꞌpaxo yaꞌ, yokpaxo laqꞌno yaꞌ yinh ebꞌnaj. Wal ebꞌnaj yuxhta yaꞌ José tuꞌ matxa chixiw ebꞌnaj istzotel tet yaꞌ.

16 Yapni isqꞌumal tet naj rey yul ispalacio tato apni ebꞌnaj yuxhta yaꞌ José iskꞌatanh, kaw xin tzalakanh naj yebꞌ ebꞌnaj chimunla yintaj. 17 Lahwi tuꞌ yalni naj rey tet yaꞌ José hakaꞌ tiꞌ:

—Hal tet ebꞌnaj hawuxhta tuꞌ yaqꞌabꞌkanh ebꞌnaj yijatz ischeh kat isto ebꞌnaj bꞌey Canaán tuꞌ, 18 kat yiniti ebꞌnaj yixal yebꞌ yuninal yebꞌ hamam. Wal xin chiwaqꞌan iskꞌulal txꞌotxꞌ Egipto tiꞌ tet ebꞌnaj, kat waqꞌnipaxojan iskꞌulal tzet chiwatxꞌi sat txꞌotxꞌ Egipto tiꞌ islobꞌ ebꞌnaj. 19 Hal tet ebꞌnaj yiqꞌabꞌto ebꞌnaj hayebꞌo teꞌ carruaje ay bꞌey Egipto tiꞌ bꞌay chitit yixal ebꞌnaj yebꞌ ej yuninal yebꞌpaxo bꞌay chitit hamam tuꞌ. Wal xin tijabꞌ ebꞌnaj bꞌey tiꞌ. 20 Machojabꞌ xin tzet chal iskꞌul ebꞌnaj yinh tzet ay bꞌey Canaán tuꞌ, yuto haꞌ iskꞌulal txꞌotxꞌ Egipto tiꞌ chiwaqꞌan tet ebꞌnaj, xhi naj rey tuꞌ.

21 Wal ebꞌnaj iskꞌahol yaꞌ Jacob isyije ebꞌnaj huneꞌ tuꞌ. Yaqꞌni yaꞌ José teꞌ carruaje tet ebꞌnaj hakaꞌtikꞌa yu yalni naj rey. Yaqꞌni yaꞌ tzet chislo ebꞌnaj yinh isbꞌel. 22 Yaqꞌnipaxo yaꞌ hunun xil isqꞌap ebꞌnaj kaw akꞌto. Wal tet naj Benjamín yaqꞌ yaꞌ 300 melyu plata, yaqꞌnipaxo yaꞌ howebꞌ majan xil isqꞌap naj. 23 Walpaxo tet icham mame xin yato yaꞌ hunteqꞌan iskꞌulal chiwatxꞌi bꞌey Egipto tuꞌ, 10 (lahonhkꞌonh) noꞌ burro ijnito hunteqꞌan sabꞌehal tuꞌ. Yijnipaxto 10 (lahonhkꞌonhxa) noꞌ miꞌe burro ixim trigo yebꞌ tzet chilolaxi, haꞌ xin chislo icham yebꞌ yuninal yinh isbꞌel. 24 Hayet istaqꞌlikano yaꞌ José tuꞌ tet ebꞌnaj xin, yalni yaꞌ tet ebꞌnaj:

—Tajka cheyaqꞌle howal yulaj bꞌeh, xhi yaꞌ.

25 Lahwi tuꞌ yel ebꞌnaj sat txꞌotxꞌ Egipto, yapni ebꞌnaj bꞌey txꞌotxꞌ Canaán bꞌay ay yaꞌ Jacob, ismam ebꞌnaj. 26 Yalni xin ebꞌnaj tet ismam tuꞌ tato mach kamnajo yaꞌ José, yebꞌ tato haꞌ yaꞌ ayko gobernadoral yinh sunil txꞌotxꞌ Egipto; yet yabꞌen yaꞌ huneꞌ tuꞌ, matxa chitxumcha yu yaꞌ tzet wal yalni tet ebꞌnaj. Kaw xin mach yayto yaꞌ yul yanma yinh huneꞌ tuꞌ. 27 Yajaꞌ yet yok ebꞌnaj yalno tet yaꞌ yinh sunil tzet yalti yaꞌ José tet yaꞌ, yebꞌ yet yilni yaꞌ ej teꞌ carruaje yato yaꞌ José bꞌay chitit yaꞌ, hak tuꞌ xin yu yanayto yaꞌ yul yanma, istzalakanh yaꞌ. 28 Lahwi tuꞌ yalni yaꞌ Jacob:

—Kaw chitzala wanmahan wabꞌenan tato itzitzto yaꞌ José. Wal tinanh xin chintohan wilaꞌan yaꞌ yalanhto maxhto chinkaman, xhi yaꞌ.