—Nohtze issaco ebꞌnaj yu ixim trigo, yiqꞌabꞌto ebꞌnaj hantatikꞌa chiqꞌoji ebꞌnaj yinitoj, yebꞌ xin ayto ismelyu hunun ebꞌnaj istiꞌ issaco. 2 Apaxayto incopahan, chꞌen nabꞌa plata, istiꞌ issaco naj islahobꞌal unin yuxhta ebꞌnaj, yebꞌ ismelyu naj mayaqꞌ yinh ixim trigo tiꞌ, xhi yaꞌ José. Wal naj ayko yinh yahawilo tuꞌ, isyije naj sunil tzet yal yaꞌ José. 3 Haxa yet issajbꞌilo xin yalni yaꞌ José tato chipaxto ebꞌnaj yebꞌ ej ischeh tuꞌ. 4 Lahwi tuꞌ isto ebꞌnaj, yajaꞌ kawilixto chito ebꞌnaj yet yalni yaꞌ José tet naj ayko yahawo istanhen yatut tuꞌ hakaꞌ tiꞌ:

—As tzujayo hunteqꞌan ebꞌnaj tuꞌ kat hawalni tet ebꞌnaj: “¿Tzet yinh xin haꞌ istxꞌojal cheyaqꞌ selelo iskꞌulal? ¿Tzet yinh xin maxeyelqꞌati chꞌen copa nabꞌa plata, 5 chꞌen chiꞌokniko yu yaꞌ wahawan bꞌay chukꞌ yaꞌ vino yebꞌ chiꞌokniko yu yaꞌ yet chistxumni yaꞌ qꞌambꞌebꞌal? ¡Kaw txꞌoj huneꞌ maxeyute tiꞌ!” kachi tet ebꞌnaj, xhi yaꞌ José tuꞌ.

6 Yet istzujcha ebꞌnaj yu naj, yalni naj tet ebꞌnaj hakaꞌtikꞌa yu yalni yaꞌ José. 7 Hayet yabꞌen ebꞌnaj yalni naj hakaꞌ tuꞌ, istaqꞌwi ebꞌnaj:

—¿Tzet yinh xin hak tuꞌ hawalni jetanh? Maxhto hunelo chonhelqꞌawihanh hakaꞌ hawalni tiꞌ. 8 Haꞌ chꞌen melyu ilcha istiꞌ kosakohanh yet hunel, masan konhtitanh bꞌey Canaán julanh jaqꞌnojanh chꞌen tawet. Hajxam jelqꞌantijanh hunu tzet ye tuꞌ plata maka oro yul yatut yaꞌ hawahawil tuꞌ. 9 Wal xin, ¡kamojabꞌ huneꞌ mak bꞌay chiꞌilcha chꞌen copa tuꞌ, kat jokkanojanh hachejabꞌoj! xhi ebꞌnaj.

10 Istaqꞌwi naj tet ebꞌnaj:

—Yubꞌojabꞌ hakaꞌ heyalni tiꞌ, yajaꞌ hanhe naj bꞌay chiꞌilcha chꞌen copa tuꞌ, hanhe naj chiꞌok inchejabꞌojan. Wal hex xin matzet tzꞌaj hetohlaꞌ, xhi naj.

11 Kaw yinh anhe yiyo ebꞌnaj yijatz ischeh tuꞌ, yanayo ebꞌnaj yijatz sat txꞌotxꞌ, yok ebꞌnaj isholno istiꞌ issaco. 12 Yok naj yahawil yinh yatut yaꞌ José tuꞌ issayno yul issaco hunun ebꞌnaj. Ichiko naj issayni yul issaco naj bꞌabꞌel winaj masanta apni yinh issaco naj islahobꞌal. Kꞌuxan xin yul issaco naj Benjamín, naj islahobꞌal yuxhta ebꞌnaj tuꞌ, ilcha chꞌen. 13 Kaw xin yaꞌ yuko huneꞌ tuꞌ yinh yanma ebꞌnaj, istzilnilo ebꞌnaj xil isqꞌap yu bꞌiskꞌulal. Lahwi tuꞌ yanipaxokanh ebꞌnaj yijatz ischeh, ismeltzopaxo ebꞌnaj yul konhobꞌ tuꞌ. 14 Wal yaꞌ José aytokꞌo yaꞌ yatut yet yapni naj Judá yebꞌ ebꞌnaj yuxhtaj, yay jahno ebꞌnaj sata yaꞌ José tuꞌ, yay xulno ebꞌnaj sat txꞌotxꞌ. 15 Yok yaꞌ José yalno tet ebꞌnaj hakaꞌ tiꞌ:

—¿Tzet yinh xin hak tuꞌ maxeyute? ¿Tom mach heyohtajoj tato hunu naj winaj hakaꞌ intiꞌan chisje istxumnilo hunu tzet ye tuꞌ? xhi yaꞌ.

16 Istaqꞌwi naj Judá tet yaꞌ:

—¿Tzet tzꞌaj jalaꞌanh tawet tinanh? ¿Tzikꞌanabꞌ hunu tzet chijalanh yunhe hawohtanheniloj tato machi nino komulanh? Wal tinanh lanhan yanayo Komam Dios isyaꞌtajil jibꞌanhanh. Ayonhanh lah, okojonhanh hachejabꞌoj yebꞌ naj bꞌay maꞌilcha chꞌen copa tuꞌ, xhi naj.

17 Istaqꞌwi yaꞌ José hakaꞌ tiꞌ:

—¡Machoj! Wal xin hanhe naj bꞌay maꞌilcha chꞌen copa tuꞌ, hanhe naj chiꞌok inchejabꞌojan. Wal hex tiꞌ xin paxanhweto yinh aqꞌankꞌulal bꞌey yatut hemam. Machi mak chexkachni, xhi yaꞌ José.

18 Ishitziko naj Judá iskꞌatanh yaꞌ José, yalni naj:

—Mamin, kaw chinqꞌanan tawet, abꞌe nino tzet chiwalan yinh ewantajil tawet. Machojabꞌ xin chitit hahowal winhan. Hach tiꞌ lahan hawip yebꞌ naj rey. 19 Hach haqꞌambꞌe jetanh tato aytokꞌo komamanh yebꞌ ta ay hunuxa juxhtajanh. 20 Yuxin jalanh tawet tato aytokꞌo yaꞌ komam tuꞌanh yebꞌ ta ay hunxa juxhtajanh tzehto, pitzkꞌana yet kaw ichamxa komamanh. Jalnipaxojanh tawet tato naj tzeh tuꞌ, huneꞌnhe ismiꞌ naj yebꞌ huneꞌxa naj kamnaj. Haxanhe xin naj islahobꞌal unin tuꞌ aykꞌo iskꞌatanh yaꞌ komam tuꞌanh, yuxin kaw xahan ay naj yu yaꞌ. 21 Yajaꞌ hawal jetanh tato chijitijanh naj hawilaꞌ. 22 Jalnihanh tawet tato mach chu isbꞌejnikano naj komam tuꞌanh, yuto ta chisbꞌejkano naj yaꞌ, chimkam yaꞌ yu bꞌiskꞌulal. 23 Hawalnipaxo jetanh tato mach chijitijanh naj, matxa chonhhachahanh.

24 »Yet komeltzohanh iskꞌatanh komam tuꞌanh jalnihanh tet yaꞌ yinh sunil tzet hawal jetanh. 25 Yalnipaxo yaꞌ jetanh hunelxa hakaꞌ tiꞌ: “As loqꞌwe hanikꞌoxa kotrigo,” xhi yaꞌ. 26 Kotaqꞌwihanh tet yaꞌ: “Mach chonhtohanh tato mach chachato naj juxhta tiꞌanh jintajanh, yuto mach chu japnihanh sata yaꞌ tuꞌ tato mach tzujano naj jintajanh,” konhchihanh tet yaꞌ. 27 Yalni yaꞌ jetanh hakaꞌ tiꞌ: “Hex tiꞌ kaw heyohtaj tato kawanhchꞌan inkꞌaholan yu wixalan. 28 Haꞌ huneꞌ naj tokano naj yinh hunelnhe. Matxa wilan sat naj, aymi hunu no noqꞌ kaw how kꞌuxnito naj. 29 Yuxin tato chiꞌel hunxa naj tiꞌ inkꞌatanhan, kꞌuxan xin ay tzet yinh naj, hex xin ay hemul tato chinkaman yu bꞌiskꞌulal yinh naj,” xhi yaꞌ jetanh.

30 »Yaꞌ komam tuꞌanh kaw aykaniko yanma yaꞌ yinh naj tzeh tiꞌ, yuxin tato mach tzujano naj jintajanh yet chonhapnihanh, 31 chimkam yaꞌ yet chilni yaꞌ ta mach tzujano naj jintajanh. Yuxin jibꞌanhanh chitokanoj tato chikam komam tuꞌanh yu bꞌiskꞌulal. 32 Walan tet inmamtuꞌan tato chinyaꞌilnhehan naj, walnipaxojan tet yaꞌ hakaꞌ tiꞌ: “Tato mach chimeltzo naj wuhan, wibꞌanhan chitokano huneꞌ tuꞌ yinh sunilbꞌal tiempo,” kinchihan tet yaꞌ. 33 Yuxin kaw chinqꞌanan tawet, kanojinkanojan hachejabꞌo selelo naj nichꞌan tzeh tiꞌ. Chato naj yinta ebꞌnaj wuxhtatiꞌan. 34 Wal xin mach chu inmeltzohan iskꞌatanh inmamtuꞌan tato mach tzujano naj wintajan. Mach chiwochehan inwatxꞌehan hunu istxꞌojal chiꞌaniko bꞌiskꞌulal yinh inmamtuꞌan, xhi naj Judá tuꞌ tet yaꞌ José.