—Asiꞌwe hunelxa heloqꞌo hanikꞌoxa kotrigo chikowah, xhi yaꞌ tet ebꞌnaj.

3 Yalni naj Judá hakaꞌ tiꞌ:

—Mam, yajaꞌ huneꞌ naj yahaw tuꞌ kaw yalkano naj jetanh hakaꞌ tiꞌ: “Tato mach cheyiti naj heyuxhta islahobꞌal tuꞌ bꞌey tiꞌ, mach chexhul kinheyilaꞌan,” xhi naj jetanh. 4 Wal xin tato chachato naj jintajanh chonhtohanh loqꞌo trigo tuꞌ. 5 Yajaꞌ tato mach chachato naj xin, mach chonhtohanh, yuto kaw yal naj hakaꞌ tiꞌ: “Tato mach cheyiti naj bꞌey tiꞌ mach chexhul kinheyilaꞌan,” xhi naj jetanh, xhi naj Judá tuꞌ tet ismam.

6 Yalni yaꞌ Israel hakaꞌ tiꞌ:

—¡Kaw tzet hetxꞌojal! ¿Tzet yinh xin heyal tet huneꞌ naj tuꞌ tato ayto hunuxa heyuxhtaj? xhi yaꞌ.

7 Istaqꞌwi ebꞌnaj:

—Jalanh yuto kaw ok naj isqꞌambꞌeꞌ mak anmahil honhanh yebꞌ isqꞌambꞌepaxo naj yinh ej juninalanh hakaꞌ tiꞌ: “¿Aytomikꞌo hemam? ¿Aytom hunxa heyuxhtaj?” xhi naj. ¿Tokꞌanabꞌ xin mach chikopajtzehanh tzet isqꞌambꞌe naj tuꞌ? ¿Tzet johtanhenanh tato chal naj ta chijitojanh juxhta tiꞌanh? xhi ebꞌnaj. 8 Yok naj Judá yalno tet ismam xin:

—Mam, tato mach chawoche chonhkamanh yebꞌ hach yebꞌ juninalanh, chato naj Benjamín tiꞌ wintajan, kat kotohanh hunelxa. 9 Haninan chinyaꞌilnhehan naj. Yajaꞌ tato ay tzet yinh naj, matxa xin chimeltzo naj wuhan, yebꞌ tato mach chiwakojan naj yul haqꞌabꞌ bꞌey tiꞌ, wibꞌanhan chitokano huneꞌ tuꞌ yinh sunilbꞌal tiempo. 10 Wal xin tato mach qꞌahano jechmananh, xam jaqꞌanh kayelo iqꞌo trigo tuꞌ tinanh, xhi naj tet ismam.

11 Yalni yaꞌ mame tuꞌ xin:

—Kaw matzet wal juten kobꞌa, yubꞌojabꞌ hakaꞌ tuꞌ, chal tuꞌ. Wal xin iweto hanikꞌo sabꞌehal tet huneꞌ naj tuꞌ yul hesaco yinh hunteqꞌan kaw kꞌul chiwatxꞌi bꞌey tiꞌ. Iweto hanikꞌo bálsamo, yebꞌ hanikꞌo noꞌ kabꞌ, yebꞌ hanikꞌo anh kaw xuqꞌ sam, yebꞌ mirra, yebꞌ teꞌ nueces yebꞌ teꞌ almendra. 12 Yiktato xin ekꞌbꞌal chꞌen melyu cheyitoj. Wal xin haꞌ kaw tet naj cheyaqꞌ chꞌen yatipaxo naj teyet. ¡Tomi nahul chꞌen yu ebꞌnaj! 13 Wal xin asiꞌwej, iweto heyuxhta tiꞌ, kat heto heyilno huneꞌ naj yahaw tuꞌ hunelxa. 14 Haꞌojabꞌ Komam Dios kaw aykano yip chiꞌayto yul yanma naj, kat istzꞌay iskꞌul naj teyinh, kat isbꞌejtzon naj heyuxhta Simeón tuꞌ, yebꞌ xin kꞌulojabꞌ chu ismeltzo naj Benjamín tiꞌ teyintaj. Wal hinan xin tato chinkanan manh kꞌaholehal, ¡kanojinan tzikꞌanabꞌtikꞌa tzꞌaj wuteꞌ hinbꞌahan! xhi yaꞌ.

15 Lahwi tuꞌ yinito ebꞌnaj hunteqꞌan sabꞌehal tuꞌ, yinipaxto ebꞌnaj naj Benjamín. Wal chꞌen melyu xin kabꞌ majan xayu yinito ebꞌnaj chꞌen, isto ebꞌnaj xin. Yet yapni ebꞌnaj bꞌey Egipto tuꞌ isyeni isbꞌa ebꞌnaj sata yaꞌ José. 16 Hayet yilni yaꞌ José tato tzujan naj Benjamín yinta ebꞌnaj, yalni yaꞌ José tuꞌ tet naj yahawil yinh ismunil bꞌey yatut hakaꞌ tiꞌ:

—Ito hunteqꞌan ebꞌnaj tiꞌ watutan kat hapotxꞌni hunu noꞌ wakax kat hawatxꞌen noꞌ, yuto chiwaꞌo ebꞌnaj tiꞌ inkꞌatanhan yet chumanil, xhi yaꞌ. 17 Wal naj yahawil yinh yatut yaꞌ José tuꞌ isyije naj yinh sunil tzet yal yaꞌ. Yinito naj ebꞌnaj yatut yaꞌ José. 18 Yajaꞌ kaw xiwkanh ebꞌnaj yuto ilaxto ebꞌnaj bꞌey yatut yaꞌ José, yalni ebꞌnaj tet hunun hakaꞌ tiꞌ:

—Kꞌul yubꞌ yaꞌ tiꞌ chonhyanito yaꞌ yatut yumi chꞌen melyu aqꞌlax meltzoho jet yettax hunel. Kaw chonhyaqꞌako yaꞌ munil yebꞌ ej noꞌ kocheh tiꞌ kat jokkano ischejabꞌo yaꞌ, xhi ebꞌnaj tet hunun. 19 Yuxin hayet yapni ebꞌnaj istiꞌ ispultahil teꞌ nha tuꞌ, ishitziko ebꞌnaj iskꞌatanh naj yahawil yatut yaꞌ José tuꞌ, yok ebꞌnaj tzotelo tet naj, 20 yalni ebꞌnaj hakaꞌ tiꞌ:

—¡Ay mamin! Yet hunel, yinh kaw yeli, loqꞌo trigo konhhulikꞌojanh, 21 haxa yet jokanh xewo yet aqꞌbꞌalil yet ayonhikojanh yinh kobꞌel tuꞌanh, koholnihanh istiꞌ kosakohanh, yixtanhwati chꞌen melyu jaqꞌanh istoholo ixim istiꞌ hunun kosakohanh. Chꞌen melyu tuꞌ tzꞌajan chꞌen, majitijanh chꞌen yu jaqꞌnipaxojanh chꞌen tawet. 22 Yajaꞌ tinanh xin majitijanh yaqꞌbꞌilxa komelyuhanh yu koloqꞌnihanh hanikꞌoxa kotrigohanh, wal xin mach johtajojanh mak anayto chꞌen melyu tuꞌ istiꞌ kosakohanh, xhi ebꞌnaj.

23 Istaqꞌwi naj yahawil yinh yatut yaꞌ José tuꞌ:

—Yilaꞌxam chꞌen mach chexxiwi, tzalahanhwej, ham heDiosal yebꞌ isDiosal hemam anayto chꞌen istiꞌ hesaco tuꞌ. Wal xin inchahan chꞌen melyu heyaqꞌ yinh istohol ixim, xhi naj.

Isto naj yinoti naj Simeón, yaniko naj naj xol ebꞌnaj. 24 Lahwi tuꞌ yinikto naj ebꞌnaj yul yatut yaꞌ José, yiniti naj ha haꞌ yunhe istxꞌahni ebꞌnaj yoj, yaqꞌnipaxo naj islobꞌe ischeh ebꞌnaj. 25 Yajaꞌ xin yabꞌe ebꞌnaj tato haꞌ tuꞌ chiwaꞌ ebꞌnaj yinh chumanil, yuxin kaw yechma ebꞌnaj yapni yaꞌ José yu yaqꞌni ebꞌnaj hunteqꞌan sabꞌehal tet yaꞌ.

26 Haxa yet yapni yaꞌ José xin, yaqꞌni ebꞌnaj hunteqꞌan sabꞌehal tuꞌ tet yaꞌ, yay kꞌonhno ebꞌnaj, yaykano xulno ebꞌnaj sat txꞌotxꞌ sata yaꞌ. 27 Isqꞌambꞌen yaꞌ José tuꞌ hanikꞌ ye iskꞌul ebꞌnaj, isqꞌambꞌenpaxo yaꞌ hakaꞌ tiꞌ:

—Haxaka hemam, yaꞌ heyal wetan, ¿hanikꞌ ye yaꞌ? ¿Aytomikꞌo yaꞌ? xhi yaꞌ. 28 Yaypaxo kꞌonhno ebꞌnaj sata yaꞌ José, yalni ebꞌnaj:

—Yaꞌ komam tuꞌanh aytokꞌo yaꞌ yebꞌ xin kꞌul ye yaꞌ, xhi ebꞌnaj.

29 Yekꞌ hakon yaꞌ José tuꞌ, yilni yaꞌ naj Benjamín, naj kaw yuxhta yaꞌ, yuto huneꞌnhe ismiꞌ ebꞌnaj iskawanhil. Isqꞌambꞌen yaꞌ José:

—¿Ham naj tiꞌ islahobꞌal heyuxhtaj, naj heyal wetan? xhi yaꞌ. Lahwi tuꞌ yalni yaꞌ tet naj Benjamín:

—Yaqꞌabꞌayo Komam Dios iskꞌulal tawibꞌanh, xhi yaꞌ.

30 Wal yaꞌ José tuꞌ, kaw tzalakanh yanma yaꞌ yet yilni yuxhta tuꞌ, etza xin oqꞌkanh yaꞌ, yajaꞌ yu mach techa yu yaꞌ yuxin okto yaꞌ yinh anhe oqꞌo yul iscuarto. 31 Hayet lahwi yoqꞌ yaꞌ tuꞌ xin, istxꞌahni yaꞌ sat. Yelpaxti yaꞌ hunelxa, yalni yaꞌ: «Aweyo itah,» xhi yaꞌ.

32 Wal yaꞌ José tuꞌ xin nan alaxayo tzet chislo yaꞌ sat huneꞌ mexha, hakpax tuꞌ ebꞌnaj iskꞌahol yaꞌ Jacob nan alaxpaxayo tzet chislo ebꞌnaj sat hunxa mexha. Haxa yibꞌanh hunxa teꞌ xin alaxayo yitah ebꞌnaj chitikꞌawaꞌ yinta yaꞌ José. Yuto haꞌ ebꞌnaj Egipto tuꞌ txahul yok ebꞌnaj waꞌo iskꞌatanh ebꞌnaj hebreo. 33 Yalni yaꞌ José tuꞌ tato chiꞌay tzꞌonhno ebꞌnaj yinh istxolal hakaꞌtikꞌa ishabꞌilal hunun ebꞌnaj. Kaw xin chikꞌay iskꞌul ebꞌnaj yilni huneꞌ tuꞌ, toxanhe chitꞌanhxiko ebꞌnaj yinh sat hunun. 34 Wal yaꞌ José tuꞌ xin, yaqꞌ yaꞌ yitah ayayo sat ismexha tuꞌ tet ebꞌnaj, wal tet naj Benjamín ekꞌbꞌalto niman itah tuꞌ yaqꞌ yaꞌ satapaxo tet hunteqꞌanxa ebꞌnaj yuxhtaj. Yok ebꞌnaj waꞌoj, yukꞌni ebꞌnaj tzet yukꞌ yibꞌanh yoch, istzala iskꞌul ebꞌnaj.