3 Hak tuꞌ xin yu isto 10 (lahonhwanh) yuxhta yaꞌ José tuꞌ bꞌey Egipto loqꞌo trigo. 4 Wal naj Benjamín, naj yuxhta yaꞌ José, mach ischato yaꞌ Jacob tuꞌ naj, yuto chahlotaxka ay tzet yinh naj yul bꞌeh.

5 Wal ebꞌnaj iskꞌahol yaꞌ Jacob, chiyijpaxo Israel, to ebꞌnaj yinta hunteqꞌanxa ebꞌnaj to loqꞌo trigo bꞌey Egipto, yuto sunil sat txꞌotxꞌ Canaán aypaxo wahil. 6 Wal yaꞌ José, haꞌ yaꞌ ayko gobernadoral yinh txꞌotxꞌ Egipto, yebꞌ xin haꞌ yaꞌ chitxonhni ixim trigo tet anma ay yulajla konhobꞌ chiꞌapni loqꞌo trigo bꞌey Egipto tuꞌ. Hayet yapni ebꞌnaj yuxhta tuꞌ sata yaꞌ José, yay kꞌonho ebꞌnaj, yay xulno ebꞌnaj sat txꞌotxꞌ. 7 Wal yaꞌ José tuꞌ pet istxumnalo yaꞌ ebꞌnaj yuxhta tuꞌ yet yilni yaꞌ ebꞌnaj, yajaꞌ xin mach chisyelo yaꞌ. Kaw xin how yute yaꞌ isqꞌambꞌen tet ebꞌnaj hakaꞌ tiꞌ:

—¿Bꞌaytuꞌwal hepeto? xhi yaꞌ. Istaqꞌwi ebꞌnaj:

—Kopetohanh bꞌey txꞌotxꞌ Canaán. Makonhhulanh loqꞌo trigo, xhi ebꞌnaj.

8 Waxanhka kaw pet istxumilo yaꞌ José tuꞌ tato yuxhta yaꞌ ye ebꞌnaj, wal ebꞌnaj xin mach istxumilo ebꞌnaj tato yuxhta ebꞌnaj ye yaꞌ. 9 Hak tuꞌ yu isnahniti yaꞌ José huneꞌ iswayik yinh ebꞌnaj yuxhta tuꞌ. Yalnipaxo yaꞌ tet ebꞌnaj hunelxa:

—Wal hex hex tiꞌ mach kꞌulo nabꞌil heyu, tonhe chexhul heyilaꞌ tzet ye kokonhobꞌ tiꞌanh, xhi yaꞌ. 10 Istaqꞌwi ebꞌnaj hakaꞌ tiꞌ:

—Machoj mamin, hanhonhtiꞌanh loqꞌo trigonhe makonhhulanh. 11 Huneꞌnhe komamanh kosunilanh. Hanhonhtiꞌanh munlawom winaj honhanh, machi hunelo tiꞌ chonhchejlaxanh jilnihanh tzet ye ej konhobꞌ, xhi ebꞌnaj.

12 Yalni yaꞌ José:

—Mach yelo huneꞌ cheyal tiꞌ. Wal xin tonhe chexhul heyilaꞌ tato ay yip kokonhobꞌ tiꞌanh, xhi yaꞌ.

13 Istaqꞌwi ebꞌnaj tet yaꞌ:

—Hanhonhtiꞌanh 12 (kabꞌlanhwanh) honhanh, huneꞌnhe xin komamanh, haꞌ bꞌey txꞌotxꞌ Canaán ayonhanh. Wal naj islahobꞌal unin makankano naj iskꞌatanh komam tuꞌanh. Wal hunxa naj xin matxa ayokꞌo naj kokꞌatanhanh, xhi ebꞌnaj.

14 Yalnipaxo yaꞌ José:

—Wal xin kaw yel hakaꞌ walnitiꞌan, hex tiꞌ chejbꞌil hex tiꞌ heyilaꞌ yinh tzet ye kokonhobꞌ tiꞌanh. 15 Wal xin chexwakojan yinh ilwebꞌal, chalaꞌ isbꞌa tzet chiꞌeliko huneꞌ tiꞌ. Haꞌ naj rey chiꞌok testigohal yinh. Hak tuꞌ xin mach chexinchatojan pax tato mach chihul naj islahobꞌal unin tuꞌ bꞌey tiꞌ. 16 Wal xin asiꞌwe hunujex heyiqꞌati heyuxhta tuꞌ kat hekankano hesunil yul preso. Chiwilan tato kaw yel cheyala. Yajaꞌ ta mach chul naj heyuxhta tuꞌ, chalilo chal tuꞌ tato chejbꞌil hex tiꞌ heyilaꞌ tzet ye kokonhobꞌ tiꞌanh. Hunteqꞌan tiꞌ chiwalan teyet yinh isbꞌi naj rey, xhi yaꞌ. 17 Wal yaꞌ José tuꞌ yakto yaꞌ ebꞌnaj sunil yul preso yinh oxebꞌ tzꞌayik.

18 Yet istzꞌajna isyox tzꞌayik xin, yalni yaꞌ tet ebꞌnaj hakaꞌ tiꞌ:

—Hanintiꞌan chinxiwan tet Komam Dios. Tato cheyije yinh huneꞌ tiꞌ chiꞌaqꞌlax nimankꞌulal teyinh. 19 Tato kaw yeli mach txꞌojo nabꞌil heyu, kanojabꞌkano hunu heyuxhta yul preso tiꞌ kat hepaxtoj, kat heyinito hetrigo chiswah hemam, heyixal yebꞌ heyuninal. 20 Lahwi tuꞌ kat heyiniti naj islahobꞌal unin tuꞌ, kat wilnihan tato kaw yel cheyala. Ta mach xin chexkam hesunil, xhi yaꞌ. Istaqꞌwi ebꞌnaj xin:

—Kꞌultikꞌa, xhi ebꞌnaj. 21 Yalni ebꞌnaj tet hunun hakaꞌ tiꞌ:

—Yinh kaw yeli kaw machiswalil jute kobꞌa yinh naj juxhtaj, kaw mach tzꞌay kokꞌul yinh naj yet yay sat naj jet yet kaw bꞌiskꞌulal ye naj. Haꞌ huneꞌ tuꞌ xin lanhan kotohlan tinanh, xhi ebꞌnaj.

22 Yalni huneꞌ yuxhta ebꞌnaj chiyij Rubén hakaꞌ tiꞌ:

—Kaw walan teyet tato mach cheyute hunu istxꞌojal yinh naj, yajaꞌ maxhtikꞌa heyabꞌeto tzet walan. Yuxin tinanh lanhan kotohlan iskamikal juxhta tuꞌ, xhi naj. 23 Wal ebꞌnaj tuꞌ xin mach yohtajo ebꞌnaj tato chiyabꞌe yaꞌ José yinh tzet chal ebꞌnaj yuto hayet istzotel yaꞌ yebꞌ ebꞌnaj nan najil ok halno tet yaꞌ José tuꞌ yinh tzet yal ebꞌnaj tet yaꞌ. 24 Yaꞌ José tuꞌ ishekꞌilo isbꞌa yaꞌ yinh ebꞌnaj, yok yaꞌ oqꞌoj. Lahwi tuꞌ istopaxo yaꞌ tzotelo tet ebꞌnaj. Ischejni yaꞌ kꞌalbꞌalaxo naj Simeón yinh sat ebꞌnaj yuxhta tuꞌ.

25 Lahwi tuꞌ xin ischejni yaꞌ nohtzelaxo issaco ebꞌnaj yu ixim trigo yebꞌ xin tato chiꞌalaxayto ismelyu ebꞌnaj istiꞌ hunun issaco yebꞌ tato chiꞌalaxayto tzet chislo ebꞌnaj yinh isbꞌel. Hakaꞌ yu yalni yaꞌ José tuꞌ, hak tuꞌ utelaxi. 26 Yanikanh ebꞌnaj yijatz isburro isto ebꞌnaj xin.

27 Haxa yet isxew ebꞌnaj yinh aqꞌbꞌalil isholni huneꞌ naj issaco yu yaqꞌni naj islobꞌe isburro. Yilni naj tato aqꞌlax meltzoho istohol ixim trigo isloqꞌ tuꞌ, ayayto chꞌen istiꞌ txꞌanh saco. 28 Yet yilni naj chꞌen melyu tuꞌ, yalni naj tet ebꞌnaj yuxhta hakaꞌ tiꞌ:

—¡Ilwekꞌanabꞌi, maꞌaqꞌlax meltzo inmelyuhan lah! ¡Ayayto chꞌen istiꞌ insacohan! xhi naj. Yet yilni ebꞌnaj huneꞌ tuꞌ kaw xiwkanh ebꞌnaj sunil, toxanhe chibꞌayla yah ebꞌnaj, chalni ebꞌnaj tet hunun:

—¿Tzet ye tuꞌ huneꞌ chonhyute Komam Dios tiꞌ? xhi ebꞌnaj.

29 Yet yapni ebꞌnaj bꞌey Canaán xin, yok ebꞌnaj yalno tet yaꞌ Jacob, ismam ebꞌnaj, yinh tzet utelax ebꞌnaj. Yalni ebꞌnaj hakaꞌ tiꞌ:

30 —Naj ayko yahawo txꞌotxꞌ konhobꞌ tuꞌ kaw how yu istzotel naj jetanh, yalni naj tato hanhonhtiꞌanh tonhe konhbꞌeyanh jilaꞌanh tzet ye konhobꞌ tuꞌ. 31 Yajaꞌ jalanh tet naj tato hanhonhtiꞌanh munlawom winaj honhanh yebꞌ tato machi hunelo chonhekꞌanh jilaꞌanh tzet ye konhobꞌ. 32 Jalnipaxojanh tato 12 (kabꞌlahonhwanh) honhanh, yebꞌ ta huneꞌnhe komamanh. Jalnipaxojanh tato matxa ayokꞌo huneꞌxa juxhtajanh kokꞌatanhanh. Wal naj islahobꞌal xin kankano naj iskꞌatanh komamanh bꞌey Canaán, konhchihanh tet naj. 33 Yalni naj jetanh hakaꞌ tiꞌ: “Tato kaw yel cheyala awekano hunu heyuxhta inkꞌatanhan kat heto heyaqꞌno ixim trigo chiswah hemam, heyixal yebꞌ heyuninal, 34 kat heyiniti naj heyuxhta tuꞌ. Hak tuꞌ xin chu wohtanhenilojan tato munlawom winaj hex, mach tonheho chexhul heyilaꞌ tzet ye kokonhobꞌ tiꞌanh chal tuꞌ. Lahwi tuꞌ kat inbꞌejtzonan hunxa naj heyuxhta tiꞌ, hak tuꞌ xin chu heyekꞌ yul kokonhobꞌ tiꞌanh, machi xin mak chexkachni,” xhi naj jetanh, xhi ebꞌnaj tet ismam tuꞌ.

35 Hayet isholni ebꞌnaj issaco tuꞌ xin, yilni ebꞌnaj tato ayayto ismelyu hunun ebꞌnaj istiꞌ issaco. Yet yilni ebꞌnaj huneꞌ tuꞌ kaw xiwkanh ebꞌnaj yebꞌ yaꞌ mame tuꞌ. 36 Yalni yaꞌ Jacob tet ebꞌnaj:

—Lanhan inkankanojan manh kꞌaholehal. Matxa naj José aykꞌoj, yebꞌpaxo naj Simeón. Tinanh xin cheyipaxilo naj Benjamín wetan heyalni. Haꞌ mak chiꞌabꞌen isyaꞌil huneꞌ bꞌiskꞌulal tiꞌ, hanintonan, xhi yaꞌ.

37 Yalni naj Rubén tet ismam hakaꞌ tiꞌ:

—Mam, matzet chal hakꞌul yinh naj Benjamín tiꞌ, chinyaꞌilnhehan naj, chiwaqꞌaꞌ meltzohojan naj tawet. Ta matxa chihul naj wuhan xin chu hawaqꞌnikamo kawanh inkꞌaholan, xhi naj tet ismam.

38 Istaqꞌwi yaꞌ Jacob, yalni yaꞌ:

—Machoj, mach cheyito inkꞌaholan teyintaj. Haxanhe naj aykꞌo inkꞌatanhan, wal yuxhta naj xakam naj. Taka ay tzet chukanh naj yul bꞌeh, ¿tzettaxka cheyute hebꞌa? Inkamxamilojan yu bꞌiskꞌulal heyu, xhi yaꞌ mame tuꞌ.